O Concello de Nigrán rematou esta semana as obras de humanización da rúa do Cean (parroquia de Nigrán) dentro da política de mellorar a seguridade viaria e peonil dos espazos ruráis que vertebran o seu territorio. As obras, cun orzamento de 132.000 € ao cargo do Plan Concellos 2018, inclúen a construción de beiravías accesibles, habilitar aparcamentos en liña (dous deles para persoas con mobilidade reducida), reparar o firme, mellorar a instalación de pluviais, renovar o saneamento ou nova luminaria LED.
Con este obxectivo, elimínanse as canaletas de formigón existentes para ter drenaxe soterrado, o que permite ampliar a estrada e pavimentar (neste sentido cabe destacar o retranqueo dun gran terreo privado cedido ao Concello, por iso é posible executar unha beiravía de 1,8 m. de ancho e unha zona de aparcamento en liña de 2,2 metros). Contémplase tamén a execución dun paso de peóns sobreelevado para a máxima seguridade dos peóns á altura do parque infantil (tamén renovado recentemente cunha pista multideportes).
“Soluciona
un problema de seguridade viaria e accesibilidade nun tramo moi
frecuentado por unir o Cemiterio Municipal, a Biblioteca, o Parque
infantil, a Igrexa de San Fiz e as instalacións do clube Bolos do
Cean. Era algo moi demandado polos veciños”, sinala o alcalde,
Juan González.
O
terreo cedido pechouse cun muro de bloques de formigón de contención
e malla, manténdose os carballos existentes neste espazo. Asimesmo,
fronte ao Cemiterio Municipal e co fin de preservar e por en valor
esta contorna, a pavimentación realizouse en adoquín en granito con
6 alcorques onde se plantaron cipreses. O Cruceiro tamén foi posto
en valor cun axardinamento do pé do mesmo.
“Toda
a obra de construción de beiravías accesibles, humanización e
asfaltado, complétase co empedrado fronte ao Cemiterio Municipal e
coa realización dun xardín con céspede e bordillo de granito ao
rededor do Cruceiro do Cean, fronte á actual Biblioteca Municipal, o
que engade calidade a unha contorna de tanto valor Patrimonial”,
resume o rexedor.
Oito persoas celebran estes días de verán o seu primeiro encontro coa arte da escultura en Goián, unha das parroquias de Tomiño con maior concentración de artistas e sede da Aula Museo Antonio Fernández.
E
é que este verán a devandita aula museo celebra as súas xa
tradicionais actividades estivais, nas que figura un taller de
modelado con Magín Picallo, un dos escultores máis recoñecidos do
panorama artístico galego e español.
A
maioría dos aspirantes son principiantes, aínda que hai algún con
estudos de Belas Artes. Tras unhas pequenas notas teóricas, o mestre
centrouse en explicar os pasos para modelar con barro unha figura;
que na maior parte dos casos, resultou humana e feminina. Preparar a
base, de madera neste caso, e o esqueleto da obra, de ferro, onde
logo colocarase o barro e moldearase a man e con espátula, a figura
escollida. Mentres os aprendices van avanzando, Picallo constrúe as
súas e repasa as dos demais; con catro ou cinco toques maxistrais
soe bastar para sacar do barro líneas nítidas da anatomía humana.
E
aínda que o tempo é moi escaso, as persoas que se inician alcanzan
a descubrir o misterio da creación nas súas propias mans. “Esta é
toda unha experiencia -di o mestre- ver como o barro vai gañando á
xente”.
Entre
as figuras recoñecemos dúas meninas, un anxo, un home andando, unha
muller embarazada, outra sentada mirando o ceo, etc. Todas levan o
selo do autor e tamén o do mestre.
A
aventura rematará cunha visita ao taller do escultor, tamén en
Goián.
Esta
experiencia inscríbese no ciclo “Creando con” organizado pola
Aula-Museo Antonio Fernández. A seguinte actividade realizarase o
vindeiro fin de semana, coa pintora viguesa afincada en Tomiño,
Pilar Alonso, e un curso de iniciación ao debuxo botánico,
descubrindo as plantas e flores da beira do Miño; un traballo de
campo para aprender a debuxar con lapis, acuarela, pastel ou calquera
outra técnica. O segundo día de traballo levarase a cabo no estudo
da artista, no barrio tomiñés de Hospital.
O Concello de Tui contratará nas próximas semanas a catro persoas desempregadas tituladas universitarios e de ciclos superiores de Formación Profesional sen experiencia laboral previa. Será ao abeiro do programa ‘O Teu Primeiro Emprego’ da Deputación de Pontevedra, logo de que a institución provincial aprobase a selección do Concello de Tui coma entidade colaboradora.
Deste xeito o Concello de Tui comprométese co
emprego xuvenil facilitando a 4 mozos ou mozas a posibilidade de
adquirir experiencia profesional acorde ao nivel de estudos cursado
facilitando a súa inserción no mercado laboral.
En concreto o Concello de Tui realizará un
contrato en prácticas durante seis meses prorrogables a catro
persoas co seguinte nivel de estudos.
Ciclo Superior en Guía, información e asistencias turísticas ou Información e Comercialización turísticas
Ciclo Superior en Produción Audiovisual e Espectáculo ou Produción de Audiovisuais, Radio e Espectáculos
Licenciatura ou grao en xornalismo
Enxeñería Técnica Forestal, Grao en Enxeñería Forestal e do Medio Natural, Grao en Enxeñería Forestal ou Enxeñería de Montes
O Concello de Tui será o encargado de realizar a
selección das persoas que resulten beneficiarias destes contratos en
prácticas. A Deputación concede unha subvención de 1000€/mes
para os titulados universitarios e o de 950€/mes para os ciclos
superiores de formación profesional, financiando o concello o resto
do importe do custo laboral e a Seguridade Social de cada traballador
ou traballadora.
A
Deputación de Pontevedra ven de concluír as obras de
acondicionamento da estrada EP-5003 no lugar de A Lomba, no concello
de Arbo. Nestes traballos, a institución provincial abordou a
renovación da pavimentación desta vía así como a dotación de
servicios no devandito lugar.
A obra, que tiña un presuposto de licitación de 233.091,59 euros, fora adxudicada á empresa “Excavaciones y Construcciones Pérez Portela S. L.” por 184.608,54 euros.
Entre outras actuacións, o acondicionamento incluíu a renovación das sendas peonís, así como da rede de abastecemento e a súa dotación nun treito en que non existía, coa execución dun pozo de bombeo.
Tamén se dispuxeron canalizacións para a rede de telecomunicacións e de enerxía eléctrica e a dotación de iluminación con luminarias LED. Por último, abordouse a sinalización horizontal e vertical nesta zona.
O areal Panxón-Praia América acolleu, na mañá de hoxe, unha nova edición do ‘Nigrán Area’ todo un clásico das probas de atletismo á que, o escenario natural converte, sen dúbida, na pista máis fermosa do mundo.
Máis de 600 deportistas, á maior parte deles na categoría absoluta, tomaron a saída para participar nesta proba que organizan de xeito conxunto o Concello de Nigrán e a Sociedade Atlética Val Miñor e que conta coa colaboración da Deputación de Pontevedra e Deporte Galego
Máis de 600 deportistas disputan mañá en Nigrán a popular carreira pola praia ‘Nigrán Area’, a maioría deles na categoría absoluta. Un ano máis, o Concello de Nigrán e a Sociedade Atlética Val Miñor, coa colaboración da Deputación de Pontevedra e Deporte Galego, ofrecen esta carreira de atletismo pola praia que é xa un referente da programación estival e deportiva na comarca.
A
proba dará comezo ás 10:00 horas coa categoría sub-16 seguida de
sub-14, sub-12, sub-10, sub-8, e pitufos, sendo a absoluta (6.000
metros) ás 11:00 horas e a continuación a entrega de premios. Os
circuítos discorrerán entre o Peirao de Panxón e Praia America,
son circuitos chás sobre a area mollada da praia, ca marea baixa.
Os
dorsais e chip, serán entregados polo club organizador hoxe no
Pavillón de Deportes de Panxón en horario de 17:00 a 20:00 horas e
mañá ata 30 min. antes da celebración da carreira.
Haberá
avituallamento ao fin da carreira, servizo de ambulancia dispoñible
durante o evento e servizo de duchas no Pavillón Municipal de
Deportes de Panxón.
Outorgaranse
trofeos aos tres primeiros/as da categoría absoluta, ao primeiro de
cada categoría e medalla conmemorativa a todos os Pitufos. Ademais,
os 500 primeiros inscritos recibirán unha camiseta conmemorativa.
O goberno municipal de Ponteareas constituíu unha comisión de estudo e de traballo sobre o fenómeno do botellón. Dita comisión, presidida polo Alcalde, está formada polas concellerías con competencias na materia, Bo Goberno como área encargada de convivencia cidadá, Mocidade, Igualdade e Educación e Saúde.
Na primeira reunión da comisión, analizouse un informe provisional elaborado pola área de Bo Goberno que dirixe Roberto Mera, no que se analiza o botellón en Ponteareas, as súas dimensións, as problemáticas que xenera e as causas do fenómeno e factores que inciden nel. Tamén se estableceu a metodoloxía de traballo da comisión para obter conclusións e contar cun plan de actuacións no prazo aproximado de dous meses.
Mera, xunto co edil de Mocidade, Miguel Bouzó, e a de Deportes, Nahir Covelo, acompañaron na madrugada do pasado sábado a un grupo de veciños afectados polo botellón e os ruidos nocturnos no entorno da Feira Vella para coñecer in situ a problemática.
O edil de Mocidade, Miguel Bouzó, sinalou que “non se pode criminalizar á mocidade no seu conxunto” e salientou que os comportamentos incívicos son minoritarios entre a mocidade.
“Duns 3.400 habitantes entre 15 e 30 anos que residen en Ponteareas, só varios centos toman parte no botellón, menos dun 10 %, e a maioría dos que participan nel non teñen condutas incívicas. Estamos diante de comportamentos moi minoritarios pero que causan problemas a moita xente”.
Roberto Mera sinalou que “o problema é complexo e para arranxalo teremos que poñer en marcha medidas educativas e de concienciación, dar outras alternativas de ocio e, en determinadas situacións, adoptar medidas punitivas”. O edil explicou que “non hai percepción de risco para a saúde no consumo desmedido de alcohol e hai pais e nais de menores que descoñecen o problema e outros que se desentenden. E respecto ao incivismo existe unha falta de empatía cara a xente que quere descansar e unha sensación de impunidade e ausencia de reproche social, legal e familiar desas condutas”.
Segundo Mera “detrás do incivismo, do consumo esaxerado de alcohol, do vandalismo ou da condución temeraria hai un problema educacional. Non podemos simplemente preocuparnos de que se ensuxen os portais con vómitos, tamén debe preocuparnos que rapaces e rapazas de 16 anos anden vomitando por inxesta de alcohol”.
A comisión porá en marcha de inmediato un calendario de encontros e reunións con profesionais do centro de saúde, dos centros de ensino, da Policía Local, dos servizos sociais e de igualdade do Concello, coa mocidade que participa no botellón así como cos afectados por este. Ademais analizaranse as solucións dadas noutras cidades e concellos a esta problemática e o seu resultado.
Mentres a comisión realiza o seu traballo, adoptaranse algunhas medidas inmediatas e provisionais para atenuar os efectos negativos do botellón en materia de convivencia como a intervención de voluntariado xuvenil dentro do propio botellón para labores de concienciación cívica e o apoio da Policía Local para os casos minoritarios pero graves de incivismo.
O Concello da Guarda estrea estes días a súa nova rúa Concepción Arenal tras as obras acometidas nos últimos meses nun proxecto cofinanciado pola Diputación de Pontevedra.
Anteriormente
esta rúa soportaba unha alta presión de tráfico rodado, e coa
intervención acometida convertiuse nun espazo onde as guardesas e
guardeses poden pasear, mercar ou tomar algo nos establecementos da
zona. Na actual configuración da rúa o tráfico rodado está
restrinxido e toda a zona é prioritaria para os peóns.
Esta
rúa supón o pistoletazo de saída a un novo modelo de mobilidade na
Guarda, que recuperará o espazo público no centro da vila para as
persoas. Esta visión responde á necesidade de
transformar o centro urbano nun espazo integrador, accesible e
dinámico.
O Concelleiro de Mobilidade, Modelo Urbano e Comercio e tenente de alcalde, Anxo Baz sinala a importancia deste paso “como o primeiro de moitos no camiño de transformación do centro da vila no corazón do municipio cun novo modelo pensado nas persoas”.
O concelleiro lembra, ademais, que está máis que demostrado “que este tipo de intervencións supoñen un impulso positivo para os comercios e establecementos hostaleiros e polo tanto para un sector que é clave na economía do municipio”.
“Miramos cara a un futuro no que o centro da Guarda sexa un lugar aberto e agradable onde as veciñas e veciños se atopen, convivan, paseen, fagan a compra, lean o xornal, tomen algo e onde acollamos ás persoas que nos visitan cada ano cun sentimento de orgullo, presumindo da nosa preciosa vila”, conclúe Anxo Baz.
O tributo á música portuguesa nun rexistro intimista co público, volve a estar presente no escenario do Auditorio Municipal de Vila Nova de Cerveira. Continuando coa aposta en artistas de renome e “cunha carreira internacional xa consolidada” sinala a organización, a sexta edición do «Cerveira Acústica» manten o nivel de excelencia dos artistas convidados.
GNR
GNR son deses grupos que, logo de 38 anos de carreira musical contrastada, non precisan presentacións. A banda de Porto, liderada por Rui Reininho, amosa o seu orgullo de desenvolver unha liña que é un verdadeiro himno á música portuguesa. Éxitos de sobra coñecidos no país veciño como Dunas, Efectivamente, Pronúncia do Norte, Asas Eléctricas, Mais Vale Nunca, ou Mosquito, avalían a súa traxectora.
O vindeiro 10 de agosto, ás 22h00 e cun prezo de entrada de 10 euros, o público asistente ao Auditorio Municipal de Vila Nova de Cerveira poderá lembrar, ao longo de hora e media de concerto, algún destes temas.
HMB
Uma semana máis tarde, o día 17 de agosto tamén ás 22h00 e, desta volta, cun prezo de entrada de 5 €, os HMB prometen sorprender ao público “cun espectáculo electrizante”. Héber Marques na voz, Joel Silva na batería, Daniel Lima nos teclados, Fred Martinho na guitarra e Joel Xavier no baixo,xa eran amigos e tocaban xuntos cando, aló polo 2007, decidiron dar un paso adiante e formar HMB.
Héber Marques atopa, nesta formación musical, o equilibrio perfecto para desenvolver o seu gusto polo Soul e R&B que que adquiriu pola afinidade coas súas orixes gospel. Os grandes nomes dos anos 60 e 70, como Al Green e Bill Withers e os máis recentes D’Angelo e ErykahBadu son algunas das referencias que inspiran a sonoridade desta banda.
O PP do Porriño denunciou o que cualifica de “goteo de sentenzas condenatorias ao Concello do Porriño por impago a provedores”. Nesta ocasión, sinalan os populares porriñeses, o xulgado do Contencioso-Administrativo nº 3 de Pontevedra ven de condenar á entidade local a pagar 468.000 euros, aos que se suman costas xudiciais e intereses de demora, á empresa encargada da xestión da piscina municipal.
O fallo xudicial chega tras o recurso presentado pola empresa que, explica o portavoz popular, Alejando Lorenzo, “levaba anos sen cobrar polos servizos prestados”. Tal e como veñen denunciando os populares, as facturas deste provedor de servizos eran rexeitadas polo Goberno Municipal de maneira reiterada, pese estar acreditado que o servizo se estaba prestando e contar con partida orzamentaria destinada a facer frente ao pago deste servizo, partida cuxos fondos se estaban a desviar a outros fins.
“Mentres as sentenzas condenatorias se suceden, a alcaldesa continúa sen dar explicacións de ningún tipo sobre a facturación rexeitada e a manipulación de parte destas facturas”, afirma Alejandro Lorenzo quen chega a cualificar a situación de “estafa ás empresas que prestan servizos e subministros ao Concello do Porriño, así como ao erario municipal que non ten porque asumir as costas xudiciais e intereses”.
Tal e como refire o voceiro dos populares, a devolución de centos de facturas por importe de 5 millóns de euros –evitando que a facturación se fiscalice por parte dos servizos de intervención–, “supón un grave perxuizo para moitas empresas e autónomos que non cobran polos seus traballos” polo que, asegura o portavoz do PP, esixiremos que se cumpla o contemplado no informe do Secretario Municipal e a alcaldesa ou concelleiro correspondente ordenador do gasto das facturas rexeitadas responda co seu patrimonio”.
Dende o grupo municipal do Partido Popular continúan esperando unha explicación da rexedora que evita rendir contas ante o pleno e iniciar o proceso de revisión de oficio solicitado polos populares para proceder ao pago das facturas pendentes a provedores.
O PP solicitou no seu momento “que se investigue a facturación rexeitada para proceder a elaborar a correspondente proposta de recoñecemento extraxudicial que facilite o pago a provedores, sen ter ata o momento resposta”.
A negativa da rexedora a iniciar esta investigación da facturación que permitiría proceder de xeito transparente e legal ao pago a provedores supón para os populares unha nova mostra da “opacidade na xestión económica e política do executivo que preside Eva García”.
O Concello de Tui vén de presentar ante a Consellería Economía, Emprego e Industria a solicitude dun segundo Programa Integrado de Emprego, PIE, tras a convocatoria realizada por este departamento da Xunta cuxas bases reguladoras se publicaron no DOGA o pasado 20 de xuño. O obxectivo de mellorar a empregabilidade de 100 persoas desempregadas empadroadas no municipio. A subvención solicitada polo Concello de Tui ascende a 250 mil euros.
Os requisitos para acceder a este PIE, amais de
estar en situación de desemprego, será ser persoas con
discapacidade, perceptores de RISGA, mulleres, menores de 30 anos de
baixa cualificación, maiores de 45 anos ou vítimas de violencia de
xénero. No seu momento, no caso de concesión deste programa, será
a Oficina de Emprego de Tui a encargada de realizar a selección.
O Programa Integrado de Emprego é unha actuación
integral que combina atención individualizada e grupal de
orientación, formación en novas tecnoloxías e/ou idiomas,
coaching, intelixencia emocional, e técnicas de motivación para a
busca de emprego, tanto por conta propia como allea, habilidades
sociolaborais, obradoiros de entrevista, fomento da capacidade
emprendedora e formación para o emprego.
A duración prevista é de 12 meses, un tempo no
que o persoal técnico do programa realiza prospección empresarial
nas empresas da zona de influencia, así coma o emparellamento de
ofertas de traballo coas persoas participantes coa finalidade de
acadar a inserción laboral dun mínimo do 45% das persoas
participantes.
Convenios de Colaboración con Empresas
Precisamente o Concello de Tui está a establecer
convenios de colaboración con empresas da zona, que teñan previsión
de creación de emprego, co obxectivo de poder ofertarlle a
posibilidade de deseñar accións formativas acordes as súas
necesidades. Deste xeito búscase que o programa de emprego poida
converterse nunha vía máis de recrutamento de persoal, que
previamente se formará nas necesidades reais que teñen as
empresas. Ademais da formación teórica o programa tamén contempla
a posibilidade de realizar practicas non laborais en empresas. Así
as empresas poderán tamén validar a formación e cualidades dos
participantes no programa no propio traballo a desempeñar. Búscase
así dar respostas as necesidades reais do tecido empresarial e obter
un retorno do investimento realizado, a través do emprego.
A concelleira de Formación e Emprego, Ana Mª
Núñez, confía que a Xunta conceda de novo a Tui un Programa
Integrado de Emprego “para darlle continuidade ao traballo que
iniciamos en colaboración co tecido empresarial de formar e
insertar no mercado laboral as persoas desempregadas do noso
municipio”.
Segundo rescate nas praias baionesas na tarde de onte. Despois da menor que sacaron da auga con síntomas de afogamento en Barbeira, contra as oito da tarde de onte rescataron a un bañista en apuros na desembocadura do Miñor, no areal de Ladeira. Por fortuna, unha embarcación da Cruz Vermella recolleu ao home e levouno a terra en perfecto estado de saúde.
Desde a costa, unha persoa decatouse dos seus sinais de auxilio e rapidamente se puxo en contacto co 112 Galicia. Quen chamou ao servizo de emerxencias indicou que o bañista parecía ser arrastrado pola corrente e necesitaba asistencia urxente. Deste xeito, os xestores do 112 Galicia informaron aos socorristas da Praia Ladeira, así como aos equipos de Salvamento Marítimo e axentes da Policía Local. Ata a zona, tamén se achegaron algunhas embarcacións, entre elas, unha lancha da Cruz Vermella, que finalmente trasladou á persoa a terra.
Debido ao seu bo estado de saúde, descartouse a intervención dos servizos sanitarios de urxencia, que agardaban na zona por se fose necesaria a asistencia médica.
As máis de 20 persoas que participan no programa de maiores organizado polo Concello de Tomiño, co apoio da Deputación Provincial, pecharon o curso 2019-2020, cunha xornada en contacto coa natureza, que compartiron ademais con usuarios e usuarias do Centro de Día.
A granxa escola «Corazón de Carballo» de Tomiño foi o enclave elixido esta vez para pasar unha xornada diferente, que comezou sobre as once da mañá cun taller de musicoterapia, no que logo de ensinarlles instrumentos musicais de todas partes do mundo, proxectaron vídeos coa música doutros países. Máis tarde, eles mesmos tocaron varias melodías con instrumentos de percusión (pandeiro, conchas, cascabeis, etc.) e por último, interpretaron cancións galegas tradicionais.
Da man de Bibiana Álvarez Magallanes, psicopedagoga a cargo do programa de maiores «Reactívate», os usuarios e usuarias desfrutaron dunha merenda a base de sandía e biscoito caseiro. A continuación, divididos en dous grupos, uns foron a ver os diferentes tipos de aves da granxa, a Aula da Natureza, cunha fermosa colección de elementos, e os outros visitaron a horta, os demais animais e realizaron unha divertida actividade a base de refráns.
Sobre as 14 h, comida elaborada especialmente no establecemento, e a partir das 15.30 h continuaron as actividades, até as 17.00 horas.
Durante o curso, as persoas maiores do programa «Reactívate» fixeron 4 actividades principais: estimulación cognitiva, informática, xerontoximnasia e actividades específicas, dous días á semana, nas instalacións do Centro Vontade.
A
xornada en Corazón de Carballo, cos anfitrións Xosé Martínez e
Diana Balboa (musicóloga especializada en Lisboa e Oxford) e o resto
de monitores, foi unha boa oportunidade para afianzar as súas
aptitudes físicas e intelectuais, con momentos de convivencia e de
expresión artística que fan deste programa unha opción moi
atractiva.
A concelleira de Benestar Social, Cristina Martínez, salienta a importancia de que as persoas maiores do concello, “teñan unha boa calidade de vida, mantendo as súas capacidades no mellor nivel posible e fomentando unha boa autoestima e sociabilidade”.
Todo está disposto para que este sábado, 3 de agosto, dende as 21:30 horas, o paseo de Cardona, en Chapela, énchase de rock –de moi bo rock, por certo– nunha nova edición do Berete Rock, un festival que comezou sendo unha especie de “cita de amigos” para converterse, oito anos despois, nun festival de referencia da música rock do sur de Galicia.
Cinco grupos compoñen un extraordinario cartel encabezado Vhäldemar, e extraordinariamente completado con Cherokee, Rúa do Ruído, Collón de Lola e Seven Doctors. Un festival totalmente gratuíto dos que fan amar o rock.
Abraiados ao decatarse de que todo tempo pasado foi mellor e, sobre todo pasado, é dicir, que xamais volverá, lonxe de tentar deixalo todo atrás e mirar cara adiante, “6 collóns procedentes de diferentes lugares de Galicia, decidimos embarcarnos na busca do limbo onde o bocadillo de nocilla, o rock’n’roll e as series de televisión en galego son os protagonistas; aqueles tempos nos que soamente tiñas que preocuparche do que nivel de superguerrero chegaría Songoku ou se Crilín conseguiría ao fin reunir a valentía dabondo para meterlle ficha a c18”, explican os compoñentes do grupo.
Os compoñentes de Collón de Lola, como eles mesmos sinalan, teñen influencias musicais moi diversas “Rock, Death Metal, Crossover, Funky, Punk, Thrash Metal, Leticia Sabater…”, pero iso si, teñen en común unha única relixión: o Xabarín Club.
Desde o ano 2011, o grupo levou o seu espectáculo por toda a xeografía galega “e non queremos parar!”. O que este grupo busca e dar a entender “que NON hai moito futuro, polo que o que debemos facer é gozar e lembrar sen parar a través da música para que o tránsito ata o irrevogable final sexa máis agradable!”.
Ofrécense, aseguran, “para concertos en salas, festivais, pubs, vodas polo civil ou pola igrexa, aniversarios, festa de piscina, bautizos, festas gastronómicas, bailes de fin de curso ou grandes estadios”, tanto lles ten.
Cunha duración entre unha hora e cuarto e hora e media, Collón de Lola ofrece un repertorio de máis de 30 cancións, entre as que se atopan temas que van desde Estou na Lavadora –case que un himno do Xabarín Club– ata cancións de series de debuxos animados como Bolo de #Dragón, o obxectivo dos concertos de Collón de Lola é facer gozar a xente da música en directo e en galego, aproveitando o gran patrimonio musical herdado polo programa de televisión Xabarín Club, que marcou toda unha xeración na nosa terra.
Seven Doctors é unha banda de Rock formada no ano 2017 en Madrid. Cunha formación clásica de batería , guitarra, baixo e voz. O seu repertorio actual está dedicado a homenaxear ás grandes bandas do rock clásico dos anos 60 , 70 e 80 aínda que, tamén introducen nos seus concertos temas doutras grandes bandas do rock máis modernas.
As influencias dos compoñentes da banda proceden principalmente do rock, en toda a súa extensión e o blues, por iso é polo que entre o seu repertorio podamos gozar temas que van desde os Beatles, Doors, Deep purple, Eric Clapton ata Redo Hot Chili Peppers, Kaleo.
Seven doctors ofrece por tanto e sobre todo para os rockeiros máis nostálxicos un espectáculo que che fai volver ao berce do rock, aos inicios deste marabilloso xénero chamado rock and roll.
O grupo esta composto por Manu (batería), Luís (guitarra), David (baixo) e Danny (voz)
Liderados por Fran Vázquez, Cherokee nace durante agosto de 2015, tras a separación deste da súa anterior banda, José Rubio’ s Nova Era, coa cal gravou e virou por toda España presentando o seu segundo disco Fight.
Cunha idea clara de realizar rock duro como nunca se fixo neste país, Fran recrutou ao baixista da súa anterior banda, José Pineda (tamén membro de SnakeyeS e os disoltos SPHINX ), para encargarlle a produción do primeiro EP da banda, á que se unen reputados músicos da escena galega como o gran guitarrista Adolfo Fh e o batería, David González.
En setembro comeza a fase de composición do EP, titulado Empiezo a latir. Tanto José como Adolfo encárganse da música e Fran Vázquez fai o propio con todas as letras e melodías. Xa desde o primeiro tema nótase as influencias claras dos grandes do rock americano que unidas á particular voz de Fran, conforman un potente estilo que dará moito que falar no panorama nacional. Xa en outubro cos temas completos entran ao estudo para rexistrar o que será o primeiro EP da banda, composto por 5 temas.
Ademais de coidar o aspecto musical, Cherokee non dubidou en facer o mesmo no aspecto visual contando con deseñadores de primeira para realizar tanto o logo, obra de Fernando Nanderas , como a portada, obra dun prestixioso artista coñecido como Dibujante Nocturno.
No mes de novembro levou a cabo a presentación en directo da banda, durante o concerto do quinto aniversario dunha das bandas máis importantes de versións de rock a nivel estatal, Los Cacikes, da que formaban parte tamén Fran e Adolfo.
Xa no mes de decembro sae á venda do EP acompañado do vídeo promocional do primeiro single da banda, o que supuxo o pistoletazo de saída en canto á actividade da banda, que ocupou a súa axenda de 2016 con presentacións en directo ao longo de toda a xeografía española.
En decembro de 2016 reciben o premio MAKETON dos 40 Principales a mellor grupo en directo do ano 2016. En abril de 2017 Cherokee lanza un CD single de adianto do seu próximo traballo con 3 cancións, a canción elixida foi Ao límite do xogo , que se presentou como primeiro single do próximo disco da banda. Ademais esta acompañada de 2 cancións extras como son Sin Miedo a dúo con Manuel Escudero, e unha versión de Gotthard en castelán titulada El Traidor. Cherokee foi elixida banda semifinalista da Metal Battle WOA 2019. Tamén, este ano 2019 Cherokee formará parte do Forjando Leyendas, do prestixioso Festival Leyendas del Rock.
A finais do verán de 2019 espérase o lanzamento do novo disco da banda.
Calle del Ruído é unha banda que fusiona rock, metal e sintetizadores co fin de crear un estilo persoal difícil de clasificar, fundada a mediados de 2009 e orixinaria de Meis (Pontevedra).
O seu son defíneno letras combativas e intimistas mesturadas con bases rítmicas e potentes, retrousos melódicos e efectos dixitais. O grupo está formado por Tomy (voz e guitarra), Kike (guitarra), Setes (baixo) e Gianfranco (batería).
Ao longo destes 10 anos non pararon de xirar en ningún momento, en Galicia e Portugal con algunhas datas inesquecibles como tocar na concentración moteira internacional de Gois xunto coa mítica banda de rock portugués Xutos e Pontapes ou telonear ao veterano grupo Astarot.
A banda no ano 2018 compartiu escenario con artistas do calibre de Mago de Oz, Fe de Ratas ou os portugueses Moonspell.
Vhäldemar nace a finais dos 90 en Bizkaia, cando o guitarrista Pedro J. Monge decide crear unha banda de Heavy Metal xunto ao cantante e guitarrista Carlos Escudero. En xuño de 2001 gravan unha demo que lles serve para asinar con Arise Records, con quen edita o seu álbum debut , Fight to de the Ende, en marzo de 2002. O álbum foi editado por toda Europa, Xapón, Rusia, América do Norte e Sudamérica.
A finais do 2003 Vhäldemar publica o seu segundo álbum , I Made my Own Hell, de novo con Arise Records. En 2007 actuaron no Bilbao BBK Live Festival e editan o seu terceiro álbum Metal of the World. En agosto de 2012 actúan no lendas do Rock Festival e no Ripollet Rock Festival.Shadows of Combat o seu cuarto álbum edítase en 2013.
En 2017 asinan un contrato con Figter Records para varios álbums, o primeiro lanzamento foi a reedición das súas dous primeiros álbums nun dobre cd con 5 temas extra e son totalmente remasterizado que viu a luz o 21 de abril de 2017.
Vhäldemar acudiu, no 2018, ao festival Leyendas del Rock xunto a bandas como Megadeth, Amon Amarth e Arch Enemy e para este 2019 participará no Resurrection Fest.
O Concello de Nigrán ofrece neste mes de agosto máis de medio cento de actividades de lecer que dan continuidade sen transición á programación cultural e deportiva do mes de xullo. As actividades de agosto combinan os eventos xa consolidados coas colaboracións con distintas asociacións artellando, dese xeito, un programa diverso e con actividades para todos os gustos e todas as idades.
Así, aposta por eventos xa consolidados como a carreira pola praia Nigrán Area de mañá ou o ‘Flota como Poidas’ (día 18) e colabora coas distintas asociacións na baixada de carros de bolas de Camos (10-11) ou o festival da cervexa artesá Val Miñor Fest (do 15 ao 18), ao mesmo tempo, repite os estreados con éxito en 2018 como Chan de Folk (festival que une a xa tradicional observación das perseidas en Chandebrito cun concerto folk), a batalla de galos en Praia América ‘ Freestyle Master’ (3), ou o Rockin Patos como peche de verán (día 24) .
O
gran abano de actividades e o seu atractivo e diversidade prorrogan o
que xa foi un inesquecible mes de xullo, situando a Nigrán como un
gran referente cultural de toda a provincia. Ademais, o Concello
incorpora importantes novidades á programación estival, como a
presenza por vez primeira do festival Peregrinos Musicais o domingo
día 4 aos pés do templo Votivo de Panxón, un escenario
espectacular “estreado” o ano pasado e onde a Nova
Orquestra Promúsica de Málaga ofrecerá un concerto cos grandes
temas da historia do cinema (21:00).
Ademais,
o o Concello ofrece en colaboración co IEM senllos roteiros (unha
polo mar de Panxón o día 13 e outra etnográfica tamén por esta
parroquia o día 6) e repetirase a ruta xeolóxica por Monteferro
(día 7 e 20). Citas gastronómicas ineludibles como a Festa dúas
Ovos con Chourizo de Bolos da Carrasca (o día 9 dentro da súa
semana cultural) ou o festival da cervexa artesá na Foz volverán
ser referencia desde o punto de vista culinario.
A presidenta da Deputación de Pontevedra, Carmela Silva, ofreceu hoxe os datos de ocupación media na provincia de Pontevedra durante o mes de xullo, que salientan que “seguimos a ter uns resultados extraordinarios cunha media na provincia do 70,4 %, 3 puntos máis que no mes de xullo de 2018”. Estes datos, ademais, compleméntanse coas valoracións do sector hostaleiro, que sinalan que “o gasto medio por visitante está a aumentar de forma substancial”, o que significa que na provincia de Pontevedra estase a crear “máis economía, máis riqueza e máis beneficio”.
Por comarcas, como sinalou Carmela Silva, as ocupacións foron as seguintes: no Salnés un 71 % (2,5 % máis que en xullo de 2018) “con dúas localidades que quero salientar polos seus datos superiores: Sanxenxo, cun 82 % , e O Grove cun 79 %. En Pontevedra un 75 % (7 % máis), “cunha chamada especial para a cidade, onde se superou o 82 %, informou a presidenta provincial. No Morrazo un 79 % (2,5 % máis). En Caldas un 77,1 % (levemente inferior ao ano pasado) pero con 100 % de ocupación na primeira quincena de xullo na vila de Caldas “debido á atracción do PortAmérica”, matizou Carmela Silva, “grazas á grande idea que tivo a Deputación de promover os nosos festivais musicais e crear a marca conxunta #FestivaisRíasBaixas, idea que despois foi copiada por outras administracións”.
No caso da comarca de Vigo, un 76,5 % (4 % máis), con mencións especiais á cidade de Vigo (82 %) e a Baiona (77 %). No Baixo Miño, un 70,2 % (8 % máis). No Condado e A Paradanta un 53,6 % (3 % menos que o ano anterior). En Deza e Tabeirós-Terra de Montes, un 60,7 % (case 13 % máis que o ano pasado). Carmela Silva asegurou que “o sector nos formula que a ocupación dos primeiros 15 días de agosto xa está pechada e son datos importantes para o noso interior” xa que, lembrou, “un dos obxectivos do Plan Estratéxico de Turismo era aposta polo noso interior e os datos reflicten que a aposta dá moi bos resultados”.
Na ponte do 25 de xullo, por comarcas, os resultados foron os seguintes: “de media na provincia, un 75,6 %, un dato espectacular”. No Salnés: 85,2 %. En Pontevedra: 84,5 %. No Morrazo: 87,9%. En Caldas: 81,6 %. En Vigo: 81,1 %. No Baixo Miño: 83,7 %. No Condado e A Paradanta: 40,6 %. En Deza e Tabeirós-Terra de Montes: 60,5 %.
Carmela Silva valorou que “as zonas con maior ocupación son os destinos turísticos por excelencia e que xa están consolidados: Sanxenxo, O Grove, Vigo, Pontevedra e Baiona”. En canto ao perfil, “maioritariamente falamos dun perfil familiar, en torno ás catro persoas, cunha estancia media de oito días e procedencia sobre todo estatal”. O público estatal, informou Carmela Silva, “foi o 85,5 %, principalmente de Madrid, Barcelona, Euskadi, Aragón ou Estremadura”. Pola contra, o turismo estranxeiro supuxo o 14,5 % “sobre todo de Francia, a Alemaña, Portugal, Italia e a Arxentina”.
En canto aos castelos, durante o mes de xullo achegáronse a eles preto de 4.000 persoas no caso de Soutomaior (3.933 persoas) e outras 1.824 ao de Sobroso. Carmela Silva tamén valorou os datos de mes de xullo nas principais illas, con “Cíes sen prazas durante todo o mes e xa esgotadas ata finais de agosto”, e “30.000 visitas a Ons con 6 días sen prazas”.
O Concello de Arbo está a desenvolver traballos de mellora das instalacións do Pavillón Polideportivo Muncipal, obras que, segundo o Concello que preside Horacio Gil, son necesarias “para que as actividades e eventos que organiza o Concello de Arbo durante todo ano non supoñan un risco para os usuarios”.
O pasado mes de maio o secretario xeral para o Deporte da Xunta de Galicia e o alcalde do Concello de Arbo, asinaban un convenio para a realización de obras de mantemento no polideportivo municipal.
A zona de intervención céntrase na
cuberta dos vestiarios, e nos acabados interiores, deteriorados pola
presenza de filtracións de auga da choiva. As obras a realizar
consisten en, na substitución de panel sándwich de cuberta, sobre
os vestiarios, reparación de canaletas da anterior cuberta, pintado
de vestiarios, con reparacións puntuais (emplastecidos, etc..) e a
substitución das porterías de fútbol. Esta actuación conta con
financiamento ao 100% da Secretaria Xeral para o Deporte da Xunta de
Galicia .
Horacio Gil, rexedor do concello de Arbo,
declara que o obxectivo e conseguir un óptimo nivel de
funcionamento das infraestruturas municipais, neste caso deportivas,
de forma que o Concello poida prestar servizos de calidade á
veciñanza con independencia da súa idade, sexo.., apoiando aquelas
actuacións cuxa finalidade é o deporte. O alcalde informa No
pavillón Polideportivo de Arbo, realízanse distintas actividades
organizadas por diversas asociacións do Concello de Arbo, entre
elas, clases de Zumba, Pilates, bailes moderno, fútbol-sala…..
O pasado xoves día 1 de agosto a Casa dos Alonsos acolleu a inauguración da Exposición da a Asociación ACIGU – A GUARDA Centro Comercial Aberto titulada «Historia Comercial e Industrial guardesa: Dende Mediados do Século XX ata a actualidade».
Esta
mostra, que conta cun total de 18 paneis, tenta realizar unha viaxe
polos últimos 70 anos da vida comercial e industrial guardesa, a
través da súa publicidade, amosando diferentes anuncios e
publicidades que empregaron as empresas guardesas para dar
publicidade das súas marcas e produtos, xerando un feedback entre o
visitante e a exposición.
No
acto de inauguración interviron a Presidenta de Acigu CCA, Carmen
María García Braga; o Presidente da Federación Gallega de
Comercio, José María Seijas, o Presidente da Confederación de
Empresarios de Pontevedra, Jesús Castiñeira e o Alcalde da Guarda,
Antonio Lomba, contando ademais cunha ampla representación do
empresariado guardés e representantes políticos. A exposición
espertou moito interese, facendo recordar a moitos dos presentes as
empresas que existían tempos atrás e como eran os seus «slogans»,
logotipos ou «ganchos» comerciais.
Para
os maiores esta mostra permite, mediante estes anuncios, realizar
unha viaxe ao pasado dos seus recordos; ás tendas da súa xuventude
e a evolución destas empresas da nosa vila.
Para
os máis xoves é unha oportunidade de ver que tipo de produtos e
modas había tempos atrás; así como as ferramentas que se
empregaban e que arestora están fora de uso ou substituídas por
novas tecnoloxías. Naqueles tempos existían números de teléfono
con 2 e 3 díxitos, se empregaban direccións telegráficas, telex,
así como o xeito de promocionarse, antigamente se realizaba en
impresión, na actualidade a través das redes sociais. Tamén se
pode apreciar a denominación das rúas noutros tempos e a relación
existente xa naquela época con outras áreas, como pode ser Vigo ou
o norte de Portugal.
Nesta
mostra non se pretende valorar a presenza das marcas ou empresas;
senón a evolución que tivo a nosa localidade co seu tecido
comercial e industrial; así como a gran cantidade e a calidade de
grandes emprendedores locais.
Esta
exposición estará na Casa dos Alonsos da Guarda en horario de 8:00h
a 15:00h ata o vindeiro 16 de agosto.
A Concellería de Cultura do Concello de Ponteareas, que dirixe Fernando Groba, en colaboración coa asociación Versos de Area, está a adobiar as rúas do centro da vila con versos dos nosos poetas e poetisas dos que todos os veciños e veciñas poderán gozar mentres agardamos nos pasos de peóns.
Versos de Area nace a partir do curso de escrita creativa que se impartíu na Biblioteca Municipal por iniciativa da Concellería dende finais do ano 2016, impartido polo dramaturgo e profesor Roi Vidal Ponte. Algúns destes alumnos e alumnas amosaron a súa debilidade pola poesía dando lugar a este grupo de poetisas e poetas que traballarán na difusión da obra de creadoras e creadores de Ponteareas e de toda Galicia que non teñen acceso ás grandes canles de difusión.
Nestes días, algúns pasos de
peóns xa nos agardan con versos elexidos de xeito voluntario por
este inquedo grupo que tamén velará pola difusión doutros xéneros
literarios. Ao longo de todo o mes Ponteareas irá amencendo con
novas mensaxes poéticas en diferentes pasos de peóns que Fernando
Groba e Versos de Area convidan a ler con repouso dende a beirarrúa
e sempre prestando atención á seguridade no momento en que decidan
cruzar.
O vindeiro xoves día 8 no JJ Copas terá lugar a presentación do grupo Versos de Area que recitará poemas creados por eles e elas pero tamén convidarán a que todos e todas as presentes lean aqueles versos que máis lles gusten dos seus poetas e poetisas preferidos. Neste acto tamén difundirán a figura do ponteareán Xoán García de Guillade e a de outros creadores e creadoras ponteareás. Versos de Area é un grupo aberto ao que calquera veciño ou veciña que desfrute da arte literaria pode unirse.
O concello de Ponteareas, a
través da concellería de Cultura, presentou na última edición da
feira do libro celebrada na Praza Maior, o libro Obescrebimupo
que recolle as creacións do alumnado deste curso de escrita creativa
e que se pode atopar na biblioteca pública municipal.
Nesta iniciativa tamén
participou a concellería de Vías e Obras que dirixe Chus Garrote,
encargándose o persoal deste departamento de pintar en xornadas
nocturnas os versos cos que endozar o duro asfalto.
A alcaldesa de Salvaterra de Miño, Marta Valcárcel Gómez, vén de asinar o contrato de subministro e instalación de pavimento deportivo no Pavillón Polideportivo de Leirado coa empresa Mondo Ibérica, por un importe de 61.752,29 €, cun prazo de execución de dous meses.
As obras consisten en colocar sobre a soleira existente do Pavillón Polideportivo un pavimento deportivo aeroelástico de tarima de madeira, especialmente apto para a práctica de fútbol sala, baloncesto, balonmán e patinaxe, específico de instalacións deportivas.
O pavimento instalado será en madeira, conforme últimas esixencias da certificación UNE 14-904, deportivamente certificado a máximo nivel FIBA con certificados medioambientais, unha superficie equivalente á que se está celebrando os campionatos do mundo sub 21 de balonmán en Vigo e Pontevedra.
Coa instalación deste pavimento búscase a mellora da calidade de xogo e a máxima protección dos rapaces e rapazas que practican deporte a diario nas instalacións municipais.
A alcaldesa, Marta Valcárcel, lembraba “que son moitos os rapaces e rapazas que utilizan este Pavillón, xa que en horario escolar son máis de 100 nenos os que pasan por el, ademais das asociacións deportivas que practican deporte de maneira asidua, o Concello busca mellorar a calidade pero sobre todo ofrecer aos seus veciños as mellores condicións para practicar deporte”.
O
Alcalde da Guarda, Antonio Lomba, asistiu o xoves día 1 de agosto a
unha reunión co xerente do Consorcio Galego de Igualdade e Benestar,
Perfecto Rodríguez, para pechar de forma definitiva o proxecto de
Escola Infantil Municipal, tanto dende o punto de vista técnico como
económico.
Na reunión estiveron presentes, tanto o arquitecto redactor do proxecto como o do Consorcio Galego de Igualdade e Benestar. O proxecto presentado cumpre cos requisitos esixidos pola Xunta de Galicia e o Alcalde asume que a subvención da administración autonómica será de 10.000€ por praza, facendo un total de 410.000 €, que corresponde a 3 unidades e que obrigará ao Concello da Guarda a asumir o custo restante ata a contía total da obra, cuxo orzamento supera os 750.000 €.
O
Xerente do Consorcio Galego de Igualdade e Benestar quedou
comprometido co alcalde a elaborar a documentación necesaria para
manter unha xuntanza definitiva no mes de setembro coa Conselleira de
Política Social, Fabiola García, para que se poida pechar
definitivamente o compromiso de financiamento da Escola Infantil.
O segundo paso será incluír a obra nos orzamentos autonómicos e redactar e asinar co concello o correspondente convenio. Ai que recordar que o Concello da Guarda ten un ratio de escolas infantil moi baixo, que nos últimos anos oscila entre o 17 % e o 20 %, cando o compromiso da Xunta e que o ratio en Galicia sexa como mínimo o que recomenda a Unión Europea, un 35 %.
A Concellería de Vías e Obras do Concello de Ponteareas está a desenvolver diferentes traballos de mantemento de beirarrúas e de mellora da accesibilidade en distintos puntos do centro urbano e a súa contorna, obras que o Concello ponteareán está a afrontar con fondos propios.
Máis polo miúdo, na rúa Sarmiento Rivera e Xoan Trovador de Guillade, á altura do policlínico, adaptáronse as beirarrúas á rasante para facilitar o acceso universal, neste último punto tamén se repintou o paso de peóns. Nesta mesma rúa ao mudar de emprazamento o paso de peóns ubicado nas inmediacións dunha gardería, tamén se tiveron que readaptar as beirarrúas.
Ademais, na rúa Braña taméns
e fixeron traballos de mellora de accesibilidade.
Nesta semana os operarios de Vías e Obras realizan tamén obras de mellora e mantemento nas beirarrúas da rúa Real en distintos tramos.
O Concello de Nigrán acolle este sábado 3 e por segundo ano consecutivo a Freestyle Master Series, a primeira «Liga Profesional de Freestyle» do mundo que terá lugar no campo de fútbol de Lourido con máis de 3.000 entradas xa vendidas por parte da organización, Urban Roosters. O día antes, venres, terá lugar no espazo deportivo de Gaifar dende as 17:30 h unha sesión previa e gratuíta da “batalla” pendiente entre Zasko e BTA.
O
municipio acolle a cuarta das 9 citas que se desenvolverán ao longo
do ano no territorio nacional e que decidirá que 4 competidores van
a FMS INTERNACIONAL, estas “batallas de galos” venas miles
de persoas en todo o mundo en streaming (máis de 100.000 persoas
entre España e Sudamérica). Anteriormente a proba estivo en Bilbao
e a seguinte xornada despois de Nigrán será Málaga. Nesta terceira
tempada voltamos a disfrutar do bicampeón Chuty, Walls, Skone,
Blon, Zasko, Errece, Bta, Force, e os recén ascendidos Bnet y Mister
Ego.
“O ano pasado tivemos a oportunidade de acoller o evento e non o dubidamos porque non tiñamos nada similar na nosa programación e o certo é que foi un éxito absoluto, polo que estamos encantados de trasladalo a un espazo maior para que poida asistir máis xente. É un espectáculo digno de ver e que arrastra a moitísimos mozos, así que queremos seguir ofrecéndoo cada ano en Nigrán”, sinala o alcalde, Juan González.
Ata agora, non existía ningunha liga que englobase todas as competicións de rap como BDM, Red Bull ou Gold Battle.The Urban Roosters, xunto coa Freestyle Rap Federation ( F. R. F) revolucionou o sector dando forma a un circuíto de campionatos no que existe unha elite profesional e onde todos os demais freestylers teñan a oportunidade de ascender grazas ao seu traballo e esforzo. Con esta iniciativa preténdese dar un paso máis cara á profesionalización do freestyle. As competicións de Rap teñen cada vez máis público e enchen salas de concertos e eventos. Os participantes convertéronse en deportistas que demostran as súas habilidades e merecen ser tratados como os protagonistas doutros deportes.
O Concello de Redondela pechou onte a edición de verán do Programa Municipal de Conciliación, unha iniciativa que busca favorecer a conciliación da vida laboral e familiar –non sempre doada en períodos de vacacións–.
Ao mesmo tempo o programa, tal e como sinalaba a alcaldesa de Redondela, Digna Rivas “ofrece a nenas e nenos a posibilidade de dispoñer dun espazo lúdico-educativo alternativo no período vacacional”.
O programa, que se desenvolveu durante todo o mes de xullo en horario de 9 h a 14 horas, estivo aberto á participación de nenos e nenas con idades comprendidas entre os 4 e 14 anos e contemplaba tamén a participación de menores con necesidades educativas especiais.
Clausura do Programa Municipal de Conciliación no Multiúsos de Redondela
A actividade desenvolveuse tamén nas parroquias redondelás, dentro da prioridade do Goberno de Redondela de que a veciñanza das parroquias poida gozar das mesmas actividades que nos núcleos urbanos. Así, este programa de conciliación realizouse tamén nos centros culturais de Cabeiro, cun total de 15 prazas e Cesantes (15 prazas); na Asociación Cultural de Cidadelle, 15 prazas; no multiúsos de Chapela, 15 prazas; na Asociación de Veciños de Negros, 30 prazas; na Antiga Escola de Tuimil, no Viso, 15 prazas; na Sociedade Labrego Cultural de Reboreda, 15 prazas; no Multiúsos de Redondela, 30 prazas e tamén en Redondela no Posadouro con 45 prazas; no Centro Cultural Chan das Pipas de Saxamonde, 30 prazas; na Asociación Cultural Miñoteira de Ventosela, 15 prazas e, finalmente, no Centro Cultural de Vilar de Infesta con 15 prazas.
O
pleno constitutivo do Consorcio Provincial para a prestación do
Servizo Contra Incendios e Salvamento elixiu hoxe por unanimidade a
Carmela Silva presidenta do organismo, cargo que a presidenta da
Deputación de Pontevedra xa ostentou nos últimos catro anos. O
pleno tamén elixiu como vicepresidente do Consorcio ao Director
Xeral de Emerxencias e Interior, Santiago Villanueva Álvarez, por
delegación da Vicepresidencia da Xunta de Galicia, xa
que tal e como prevén os estatutos o cargo corresponde á persoa
titular da Consellería
con competencias en materia de protección civil e xestión de
emerxencias.
Na
sesión constitutiva tamén tomaron posesión as novas persoas
representantes da Deputación de Pontevedra, neste caso, os deputados
Carlos Font e Santos Héctor Rodríguez, mentres que pola Xunta de
Galicia repite o seu delegado territorial en Pontevedra, José Manuel
Cores Tourís, e tomará posesión a nova delegada territorial en
Vigo, Corina Porro.
En canto ao
funcionamento do pleno e da comisión especial de contas do
Consorcio, estableceuse un réxime de sesións ordinarias con
periodicidade semestral a celebrar nos meses de abril e outubro,
mentres que
as
sesións extraordinarias ou urxentes rexeranse polo disposto na
normativa de réxime local e nos estatutos do consorcio.
No decurso do pleno
tamén deuse conta do inventario do Consorcio, cun valor do
inmobilizado material de 4.438.089,92 €, e a acta de arqueo cun
saldo en conta a 31.07.2019 de 4.306.870,00 euros, o que pon en valor
a boa xestión e de saneamento económico destes últimos catro anos.
O próximo día 15 de Agosto, a concellería de Deportes e Actividades Marítimas do Concello de Baiona e o Erizana C.F. organizan unha nova edición do tradicional torneo Villa de Baiona de Fútbol.
Nesta nova edición do 2019 , a Concellería de Ceportes aproveita a ocasión para organizar conxuntamente varios partidos e así conmemorar outra edición máis do «Vila de Baiona de Fútbol». Así que os afeccionados e afeccionadas poderán gozar de partidos que enfrontarán ao equipo senios masculino do Erizana contra o veciño Vilariño de Nigrán.
Pola súa banda, os veteranos do Erizana medirán forzas contra o equipo de veteranos de Baredo.
Os partidos, que se disputarán o xoves 15 de agosto no Campo do Aral, terán os seguintes horarios:
O Concello de Arbo, pretende crear o «Parque Forestal Bouza de Miguel», dacordo coa concesión de subvención concedida pola Deputación Provincial de Pontevedra ao Concello de Arbo, ao abeiro do reparto de axudas a Concellos destinadas a Mellora dos Montes mediante a creación de Parques Forestais por importe de 38.271,74 €.
As
actuacións que se levaran a cabo, na primeira fase, será entre
outras a implantación de medidas fronte os incendios forestais, a
plantación de arbores autóctonos, a eliminación das especies
seucaliptus en faixas de defensa primaria, a instalación de
elementos de xogo infantís (tirolina, tobongan con pendente,
columpio adaptado a persoas con mobilidade reducida….) e a
colocación de paneis informativos.
O
Parque Forestal Bouza de Miguel, creado e promovido polo Concello de
Arbo, pretende seguir potenciando a riqueza natural que este
municipio pode ofrecer aos veciños e veciñas de Arbo, así como os
visitantes que se achegan atraidos pola natureza, gastronomia,
turismo, enoturismo, patrimonio.. que o Concello de Arbo ofrece,
según manifesta o rexedor do concello, Horacio Gil.
Coa execución das actuacións contempladas no presente proxecto
preténdese acadar un múltiple obxectivo: Reducción do risco de
incendio e da ameaza que este supón sobre as vivendas no caso de
producirse, mediante a eliminación de especies pirofitas e creación
de áreas de frondosas caducifolias en torno os núcleos de poboación
e instalación municipais, que actuarán como cortalumes verde.
Mellora da diversidade florística do espazo mediante o uso de
especies frondosas autóctonas e conversión de piñeirais en
carballeira ou fraga.Mellora do uso publico, mediante a creación dun
área de xogos infantil con tirolina, columpio e tobogán en pendente
coa colocación de elementos de características construtivas
integradoras co espazo forestal no que se ubica.
O club Deportivo Sen Amarras ven de celebrar a terceira proba náutica do IV Campionato Galego Inclusivo, disputada o pasado sábado día 27 de xullo no Porto da Guarda, enmarcada na celebración da Festa do Peixe Espada.
A
principal característica da proba é a integración, contando coa
participaron de 12 equipos de diferentes localidades, formados por
persoas con e sen discapacidade, empregando unha embarcación
adaptada que pode ser patroneada de maneira fácil e sinxela. Sendo o
mais importante o correcto desenrolo do trazado, e non o tempo deste,
por tratarse dunha proba de regularidade.
A
proba foi organizada pola Federación Galega de Motonáutica e o Club
Sen Amarras, en colaboración coa Deputación de Pontevedra, o
Concello da Guarda, Orpagu(Organización de palangreiros Guardeses),
Xunta de Galicia, Deporte Galego, Galicia Saudable e a Comandancia
Naval do Miño.
A partir de mañá, 1 de agosto, reactivarase o control na Zona Azul de Tui de estacionamento gratuíto limitado no tempo. Esta Zona Azul abrangue un centenar de prazas de aparcamento no Paseo da Corredeira, dende o cruzamento con Rosa Bahamonde até os soportais, a rúa Augusto González Besada, e as rúas Foxo e Rosa Bahamonde e as súas travesías. O estacionamento gratuíto limitado no tempo a hora e media aplícase nestes viarios de 10 h a 14 h e de 16 h a 21 h agás domingos e festivos, segundo se recolle na Ordenanza Reguladora aprobada en 2008.
A Policía Local encargaranse de controlar á Zona Azul para garantir así a mobilidade dos vehículos estacionados. Lémbrase que se debe colocar o disco horario coa hora de chegada en lugar visible no parabrisas. O disco pódese adquirir, por un prezo de 0,60 € na tesourería na casa do concello. Tamén se pode empregar o disco de zonas azuis doutros concellos.
Lémbrase que no centro urbano existen zonas de estacionamento sen límite de tempo coma o aparcamento municipal na traseira da Área Panorámica, e os habilitados na rúa Irmáns Maristas, A Guarda e Coengo Valiño.
A Deputación de Pontevedra estivo presente esta pasada fin de semana por partida dobre nos #FestivaisRíasBaixas coas súas campañas de concienciación medioambiental e contra as agresións sexuais, ao ter coincidido as datas dos festivais Atlantic Fest, na Illa de Arousa, e Sinsal SON Estrella Galicia, na illa redondelá de San Simón.
O balance das campañas foi moi positivo xa que, extrapolando só os datos de impacto das campañas de igualdade, a mensaxe da Deputación impactou en máis da metade do público total destes dous festivais a través dos puntos informativos de «Lembra! Eu decido, ti respectas» e «Conta comigo, eu respéctote». Ademais, o persoal do punto informativo de «Experiencias SOStibles» repartiu milleiros de materiais informativos e alternativas sustentables aos obxectos de plástico dun só uso.
A Deputación de Pontevedra levou o seu punto informativo das campañas de igualdade «Lembra! Eu decido, ti respectas» e «Conta comigo, eu respéctote» ao Atlantic Fest a tarde do sábado, en horario de 16:00 a 21:00 horas (condicionado polas choivas esporádicas cara ao mediodía). A campaña chegou a preto de 3.000 persoas, 1.455 mulleres e 1.230 homes, o que supón o 50% do aforo total do festival, para o que se puxeron á venda 5.000 abonos (esgotados). O persoal, composto por 5 axentes de igualdade, repartiu máis de 2.000 guías informativas, máis de 1.100 sombreiros, 2.000 pulseiras e 200 adhesivos. As axentes de igualdade salientaron o enorme interese espertado no stand, ao que se achegou público de todas as idades e de distintos sectores, entre elas un mozo pertencente a unha asociación asturiana de saúde mental que levou consigo material para repartir entre os usuarios e usuarias da entidade.
Campaña no «Atlantic Fest»
No caso do Festival Sinsal SON Estrella Galicia, a equipa formada por 4 axentes de igualdade estivo presente na xornada do domingo, en horario de 12:00 a 16:30 horas. Neste caso, as axentes atenderon a máis de 500 persoas, en sintonía coa porcentaxe de público atendido no Atlantic Fest xa que o aforo do Sinsal está limitado a 800 persoas por día. Esgotáronse todas as guías informativas dirixidas a mulleres e só quedaron 50 exemplares das dirixidas aos homes (un total de 750), repartíronse preto de 400 sombreiros e esgotáronse as pulseiras (450). Entre os perfís do público que se achegou ao punto informativo, cómpre salientar unha psicóloga que xa empregaba as guías informativas no seu despacho e unha profesora que levou material para repartir entre o seu alumnado.
No marco da campaña de sustentabilidade «Experiencias SOStibles», a Deputación de Pontevedra tamén tivo unha importante repercusión entre o público dos #FestivaisRíasBaixas para espallar a súa mensaxe de concienciación contra o uso indiscriminado de obxectos de plástico. Deste xeito, o persoal repartiu en total a pasada fin de semana 600 imáns (300 no Atlantic Fest e outros 300 no Sinsal), 200 bolsas de tea (100 bolsas en cada un), 1.600 eco-cabichas (1.200 no Atlantic Fest e 400 no Sinsal) e preto de 3.000 folletos informativos (2.100 no Atlantic Fest e 800 no Sinsal). No caso das bolsas de tea e dos imáns, esgotáronse todas as reservas de material coas que contaba o persoal que atendeu os puntos informativos.
«Lembra! Eu decido, ti respectas» naceu en 2017 como unha campaña de concienciación contra as agresións sexuais en cita e por submisión química, ante o incremento de ataques contra a liberdade sexual das mulleres especialmente en eventos con grande asistencia de público. A campaña sensibiliza, conciencia, informa e pon de manifesto o que é a violencia sexual implicando ás persoas que reciben a información e instándoas a espallar a mensaxe con reparto de material e difusión a través de redes sociais. Desde 2018, a Deputación de Pontevedra leva a cabo paralelamente a campaña «Conta comigo, eu respéctote» que dá un paso máis cara á implicación dos homes, posicionándoos directamente en contra das condutas sexistas e fronte aos agresores.
Pola súa banda, «Experiencias SOStibles» é a campaña de sensibilización e concienciación co obxectivo de eliminar o uso dos plásticos e as consecuencias que teñen no medio ambiente e na saúde das persoas. O stand destas accións reparte información sobre os efectos dos plásticos nos espazos costeiros e fluviais, os riscos para a saúde dos plásticos que forman parte da vida diaria, e promove a substitución das bolsas que se usan habitualmente por bolsas de tea reutilizables, así como vasos compostables e seguros para a saúde elaborados con fécula de millo e pataca.
O Club Patinaxe Artística condado de Salvaterra acadou unha medalla no transcurso do Campionato Galego nas categorías Benxamín, Alevín e Infantil que se disputou en Gondomar. Na categoría Benxamín, Marta Fraga, do CPA Maxia da Coruña conseguia o ouro mentres que a prata e o título de subcampiona galega era para a patinadora María MirandaGarcía do CPA Condado de Salvaterra. Carla Corral, do Lenda da Coruña, facíase coa medalla de bronce.
Equipo do CPA Condado de Salvaterra de Miño
No que fai referencia á categoría Alevín Femino, as patinadoras coruñesas non deixaban opción e acadaban os tres lugares do caixón: Olivia Rey do CP Oleiros, Lucía Deus do Galia e Xiana Royo do CP Oleiros. En Alevín masculino o ouro tamén quedaba en terras coruñesas co patinador Lois Rivas, do Raiola do Ferrol.
Podio Infantil Feminino
En Infantil Feminino, Sofía Costa e Noa Álvarez, ámbalas dúas do CPA Gondomar, facíanse co ouro e prata respectivamente, quedando o bronce para a patinadora do Club Ribeira da Coruña, Daniela Siero.
Podio Infanil Masculino
Finalmente, na categoría Infantil Masculino, Joel Ribeiro, do CPA Gondomar, facíase co ouro e o título de Campión Galego. Unai Cereijo do CPA Maxia proclamábase subcampión galego e Diego Íñiguez, do Axel Arteixo da Coruña, facíase co bronce.
Máis de 50 persoas aproveitaron os cursos de preparación dos exames de ESO, ciclos medios, superiores e de competencias clave, organizados polo Concello de Tomiño, co fin de achegar formación a aquelas persoas que interromperon os seus estudos secundarios ou primarios por diferentes causas. Repartidas case por igual con respecto ao xénero, o 60% das persoas que se apuntaron a clases o curso pasado, tiñan entre 25 e 45 anos; habendo un 20% de menores de 25 e outro tanto de maiores de 45.
A docencia estivo a cargo esta vez de Radio Ecca, que desenvolveu o seu traballo de formación a través dunha aplicación on-line e só dúas clases presenciais á semana. O esforzo das persoas máis constantes e que non faltaron practicamente a ningunha clase, viuse recompensado cos aprobados a todos os ámbitos da ESO ou, ao menos, a algúns deles, o mesmo que ocorreu nas probas para o acceso aos ciclos medios e superiores.
O Concello está apuntando xa para o vindeiro curso que comezará a principios de outubro de 2019. As persoas interesadas poden inscribirse ou informarse na Oficina de Desenvolvemento Local de Emprego do Concello de Tomiño.
A concelleira de Educación, Cristina Martínez, salientou a aposta decidida do Concello “pola accesibilidade á formación de todas as persoas; compromiso desta e das anteriores lexislaturas do goberno local”.
O Concello de Salceda de Caselas ven de solicitar unha subvención de 250.000 € á Xunta de Galicia para poñer en práctica un Programa Integrado de Emprego que beneficiaría a 100 persoas desempregadas do municipio. A alcaldesa accidental e concelleira de Emprego e Formación, Verónica Tourón expresou a súa confianza en que a Xunta “atenda a nosa petición e poidamos poñer en marcha este programa necesario para as persoas demandantes de emprego do noso concello, xa que é un programa integral de formación, prácticas e inserción laboral”.
O plan que se solicita á administración autonómica acollería persoas desempregadas de sectores diversos: discapacidade, risco de exclusión social, menores de 30 anos con baixa cualificación, maiores de 45 anos, mulleres, etc., presentando un obxectivo de inserción laboral dun mínimo do 40% das persoas participantes.
As persoas beneficiarias participarían nun mínimo de cinco accións individuais e tres accións de distinta natureza de xeito activo durante os 12 meses de duración do programa. Ademais da formación que se agrupa en catro itinerarios formativos: Administración e Atención ao cliente, Almacén, Produción Industrial e Hostalería, ademais prácticas en empresas da zona coas que o Concello establecerá convenios de colaboración para cumprir co compromiso de inserción marcado.
O Concello de Salceda conta cunhas instalacións idóneas para levar a cabo este tipo de programas no Centro de Desenvolvemento Local do Torrón, onde se establecería o programa e as técnicas que atenderían ás 100 persoas participantes. No caso de ser concedida esta iniciativa sumarase ás iniciativas municipais que nos próximos meses porá en marcha a Concellería de Emprego.
O luns 29 de xullo o Alcalde da Guarda, Antonio Lomba, recibiu na Casa do Concello a representantes a Asociación Solidariedade Galega co Pobo Saharauí,grazas á cal «Fala», unha nena de 10 anos de idade, pode pasar este verán cunha familia de acollida na vila da Guarda.
Este colectivo leva traballando dende o ano 1992 en diversos temas humanitarios, de sensibilización política, educación, deporte, pero sen dúbida o seu proxecto estrela é «Vacacións en Paz», mediante o cal nenos e nenas saharauís de entre 7 e 13 anos teñen a posibilidade de escapar do verán do Sáhara, onde se poden alcanzar os 50º de temperatura para poder ter un respiro con familias de acollida de toda Galicia. Este ano un total de 300 nenos e nenas participan nesta experiencia, na que tamén se inclúe unha atención médica grazas a diversos convenios co Sergas e clínicas privadas.
Dende o colectivo resaltan a importancia de sensibilizar o problema do pobo saharauí, para que sexan quen de voltar á súa terra e recuperar as súas vidas nun Sáhara libre.
A Delegada de Zona da Asociación Solidariedade Galega co Pobo Saharauí quixo agradecer o apoio recibido por parte do Concello da Guarda, facendo un convite a todas aquelas familias que desexen participar no seu programa «Vacacións en Paz», para seren familias de acollida de cara ao verán 2020, indicando que poden contactar con este colectivo chamando ao teléfono 986 26 26 37.
O Concello de Nigrán abre o mércores coa festa da escuma na Praza do Concello e as actuacións das orquestras América e Televisión no Ceán os festexos de San Fiz, patrón do municipio. Esta celebración, organizada directamente polo Concello, estenderase por vez segunda vez consecutiva durante dous días (o mércores 31 de xullo e o mércores 1 de agosto, festivo local) con múltiples actividades para nenos e maiores e coa participación de grupos de referencia en Galicia, outogándolle a entidade que merece aos festexos do patrón da localidade.
Así, hoxe mércores, 31 de xullo véspera de San Fiz dende as 18:30 horas ten lugar unha festa da escuma na praza do Concello aberta á participación principalmente dos nenos. Ese mesmo día, ás 21:00 horas, a verbena no torreiro do Ceán correrá a cargo de América e Orquestra Televisión. O propio día do patrón, festivo en Nigrán, a Agrupación Musical de Belesar ofrecerá un pequeno concerto ás 10:30 na Praza do Concello, posteriormente, ás 12:00 horas, será a Misa Maior cantada pola coral Novos Aires de Nigrán na Igrexa de San Fiz e ás 13:30 novamente a Agrupación Musical de Belesar tocará neste recinto ata a gran tirada de fogos ás 14:00 horas. Finalmente, pola noite terá lugar a verbena dende as 21:00 horas coas Orquestras Solara e Grupo Azar
“Trátase do patrón do municipio e do festivo local de Nigrán, polo que dende o Concello queremos darlle a esta celebración a entidade que merece”, resume o rexedor, Juan González.
Comezou sendo a xuntanza dun grupo de amigos para poder gozar, en directo, da música que facía un membro da asociación. Debido ao éxito acadado, pasou a ser un escaparate para a promoción dos grupos locais. Hoxe, tan só oito anos despois, o Berete Rock é todo un referente na música e unha cita obrigada para os amantes do rock. Esa “xuntanza de amigos” converteuse nun Festival –en maiúsculas– polo que pasaron grupos da talla de Stoned at Pompeii, The Killer Barbies ou Aphonic.
Así que, con estes antecedentes, o sábado 3 de agosto, no extraordinario escenario natural que ofrece o Paseo Marítimo de Chapela, o rock será o que mande nun festival que comezará as 21:30 horas e que foi presentado na Casa do Concello de Redondela pola alcaldesa, Digna Rivas; o concelleiro de Cultura, Daniel Boullosa, e membros da Asociación Berete Rock.
Este ano, tal e como se sinalou, o festival segue medrando e contará cun cartel que fará vibrar ás e os rockeiros: Vhäldemar, Cherokee, Rúa do Ruído, Collón de Lola e Doctors compartirán escenario, nun festival que, como sinalabamos, xa é un referente da música rock e que ten carácter totalmente gratuíto. Esa gratuidade non fai máis que poñer en valor o traballo que ten que desenvolver a Asociación Berete Rock, –unha asociación sen ánimo de lucro e sen socios– como organizadores do evento, xa que a ninguén se escapa a complexidade que ten a organización dun festival destas características e o custe económico que ten e que é cuberto pola achega do Concello de Redondela, as firmas patrocinadoras e a venda de merchandising.
Pero, todo esforzo ten recompensa e o feito é que ano tras ano, o Berete Rockincrementa, non só súa calidade, senón a cantidade de público que atrae. Ao ser un evento ao aire libre, sinalaban dende os organizadores durante a presentación “fai difícil contabilizar o número de asistentes” pero este sitúase, na última edición, preto dos 1.500 participantes “número que esperamos ir aumentando ano tras ano”.
Na presentación do VIII Berete Rock, o concelleiro de Cultura do Concello de Redondela, Daniel Boullosa, facía fincapé na importancia que estes eventos teñen “de cara a contar cunha programación na que teñan cabida todos os estilos musicais, neste caso o rock”. Doutra banda, Boullosa amais de incidir na importancia de que as actividades culturais “chegaran a todas as parroquias”, chamaba a atención sobre o aspecto turístico destas actividades porque, asegurou, “os festivais son, nestes momentos, un novo xeito de facer turismo”.
Pola súa banda, Digna Rivas, alcaldesa de Redondela, agradecía e puña en valor “o traballo da asociación que foi quen de converter este festival nun referente para os amantes do rock”. A alcaldesa redondelá adiantou a súa intención e do concelleiro de Cultura de manter unha reunión “coa Asociación Berete Rock, ao igual que temos pensado realizar cos demáis colectivos culturais de Redondela, para analizar as vías de colaboración que contribúan a que este festival vaia, cada ano, a máis”.
En resumo, un Festival con maiúsculas o que se vivirá no paseo de Cardona –fermoso onde os haxa– o sábado 3 de agosto a partir das 21:30 horas e totalmente gratuíto. Pódese pedir máis?
A Deputación de Pontevedra levará a súa programación cultural no vindeiro mes de agosto aos concellos de Crecente e Arbo, con propostas dirixidas a todos os públicos e que se desenvolverán sobre todo nos espazos públicos destes municipios.
Así, Anxo Moure e Servando Barreiro presentarán «A música da auga, contos e cantos do río Miño» o día 11 en Crecente e o 13 de agosto en Arbo. Trátase dun espectáculo ao aire libre que a través da música e a narración pretende divulgar a riqueza fluvial e cultural da provincia, sensibilizando sobre o coidado dos cauces fluviais e dando a coñecer a xeografía do Miño e o seu patrimonio lingüístico, etnográfico e mitolóxico cos nomes dos peixes, das árbores de ribeira, das embarcacións tradicionais, das artes da pesca e da propia toponimia.
En Crecente a actividade terá lugar ás 21 horas no Parque Cuíña, mentres que en Arbo será na praza do Consistorio, ás 20 horas. Moure e Barreiro protagonizarán un pasarrúas musical coa gamela tradicional do Miño e ofrecerán unha sesión de contos e cantigas baseadas no libro “A música da auga”. Durante o seu espectáculo haberá unha exposición de maquetas tradicionais do río Miño (batuxo, barca de pousa, barca das dornas, batela, carocho e gamela).
A
alcaldesa de Redondela, Digna Rivas, expresou o pasado venres na
reunión do Consello de Administración da Autoridade Portuaria de
Vigo, o seu máis “fondo rexeitamento a que a parcela de Duches, en
Rande, sexa destinada ao almacenaxe de contedores.
Dende o Concello informouse do
cambio de membro a pesar de
terse comunicado dita circunstancia, o cambio non foi realizado xa
que, segundo a propia Autoridade Portuaria, “tiña que ser
comunicado pola Xunta de Galicia e esta non o fixo”.
En todo caso, a insistencia da alcaldesa deu como froito que puidera
tomar parte na reunión de traballo con voz e voto “como
corresponde á representante do cuarto municipio en importancia da
provincia de Pontevedra ao que, polo que parece, algúns están
dispostos a facer calar por calquera medio”, concluíu Digna Rivas.
A
alcaldesa redondelá defendeu a postura manifestada no seu momento
pola veciñanza do municipio totalmente contraria ao uso que se
pretende por parte de Autoridade Portuaria viguesa. “A miña
obriga, neste foro, –asegurou Digna Rivas– é defender os
intereses dos meus veciños e veciñas por enriba de calquera outra
consideración”.
A
postura amosada polo Porto de Vigo, deixa ao descuberto “as
mentiras ditas polo exalcalde Javier Bas na campaña electoral”,
asegurou a rexedora local redondelá quen lembrou que o exalcalde
“asegurou á veciñanza que o tema estaba resolto e paralizado,
chegando incluso a amosar unha infografía aos votantes cun
megaproxecto con piscinas e zonas verdes para uso público algo que,
agora, amósase que era totalmente falso”.
Lembroulle
Digna Rivas ao Consello de Administración que a anulación polos
tribunais da Delimitación de Usos Portuarios (Plan de Costas), deixa
sen soporte legal o seu uso para a xestión privada. De feito,
sinalou Rivas, polo de agora a parcela “só pode der utilizada como
aparcadoiro de camións e remolques de servizo portuario”.
Doutra
banda, explicou a alcaldesa de Redondela, a parcela que afecta ao
dominio público portuario “atópase na zona do cargadoiro de
Warner e como é ben coñecido, na zona atópase o cargadoiro de
minerais que, a día de hoxe, está incluído no catálogo
patrimonial nunha contorna protexida”.
No
PXOM de Redondela, que está en proceso de tramitación, “o que se
pretende é ampliar esa contorna incluíndo a parcela de Duches,
amais de estudar unha solución urbanística que permita poñer en
valor a zona por estar a lámina de auga en Zona de Red Natura”,
engadiu Digna Rivas.
A
maiores, engadiu a rexedora redondelá, “o Plan de Reordenación
Litoral, apoia ás teses dos veciños e veciñas ao defender a zona
do cargadoiro e arredores como zona «de mellora ambiental e
paisaxística»”.
A
alcaldesa Digna Rivas informou aos presentes que, dende o Concello,
xa se entregou o informe realizado polo arquitecto Carlos Falagán
onde se opón á afección da zona. Por último, Rivas lembrou a
todos os presentes que o Plan de Ordenación Litoral, no seu artigo
40 e no que fai referencia á rede de espazos naturais de Galicia,
formula como obxectivos
Preservar os seus valores e mellorar a funcionalidade do ecosistema.
Manter as súas características naturais evitando a súa alteración
Procurar a súa conectividade ecolóxica
Manter o fraxil equilibro das condicións que configuran o medio
natural evitando a presión e ocupación da súa contorna próxima.
A aposta do Concello de Nigrán polo medioambiente, dista moito de ser unha mera declaración de boas intencións –como por desgraza acontece noutros concellos– senón que é unha filosofía de traballo que dende o pasado mandato desenvolve o executivo de Juan González coa aplicación de medidas concretas, ben estudadas e planificadas. A maiores, e dende o convencemento de que a loita pola conservación medioambiental é de todos e todas, o Concello de Nigrán traballa na concienciación da veciñanza incentivando, como é neste caso concreto, o uso de vehículos híbridos ou eléctricos.
Así, o Pleno de Nigrán, co apoio do Partido Popular, único grupo da oposición, aprobaba no pleno de onte a entrada en vigor da bonificación dende o exercicio 2020 do imposto de rodaxe nun 50% aos vehículos híbridos ou a gas (GLP) e nun 75% aos eléctricos ou híbridos enchufables, etiquetados estes últimos pola DGT como ‘0 emisións’. Previamente aprobárase en pleno a modificación da ordenanza e agora Nigrán sitúase na vangarda dos municipios españois e europeos que fomentan verdadeiramente o uso das enerxías limpas entre os seus cidadáns.
Cómpre salientar o feito de que, dende o mes de maio, Nigrán é o único municipio de Galicia que conta cun punto de carga público e gratuíto xestionado polo propio consistorio e, ademais, conta na súa flota con vehículos eléctricos.
Un vehículo eléctrico utilizando o punto de recarga gratuíto xestionado polo Concello de Nigrán
Actualmente, no padrón de vehículos de Nigrán figuran 4 vehículos ‘0 emisións’ e 60 ‘Eco’, e todos eles verían bonificado o seu respectivo imposto de Rodaxe con esta modificación da ordenanza. Paradoxalmente e debido aos parámetros de CV e cilindrada que se teñen en conta neste imposto, hoxe en día un turismo híbrido está pagando máis que un convencional. “Con esta modificación, un Toyota Auris híbrido pasaría de pagar 106 € a 53 €”, exemplifica Diego García, edil de Medio Ambiente. “Trátase de incentivar entre a veciñanza a compra de vehículos sostibles; é un transporte moi silencioso e o 100% eléctrico non produce ningún tipo de emisións”, resume o alcalde, Juan González, quen considera “unha labor da administración promover o uso de enerxías limpas e facilitar o acceso a elas”.
Un paso adiante na loita contra o cambio climático Por outra banda, nesta ocasión o goberno local aprobou tamén co consenso absoluto da Corporación adherirse ao Pacto dos Alcaldes para o Clima e a Enerxía, cuestión que no derradeiro mandato tivera que quedar sobre a mesa ante o rexeitamento de parte da oposición. Deste xeito, o Concello intégrase no maior movemento mundial de autoridades para a loita contra o cambio climático, asumindo os compromisos da Unión Europea en materia de clima e enerxía para o ano 2030. González é precisamente responsable da primeira concellería de Galicia ‘Axenda 2030-Obxectivos do Desenvolvemento Sostible’, iniciativa da ONU que inclúe moitas medidas medioambientais que Nigrán quere reforzar dende a política local e que comprende, entre outros aspectos, formar parte deste pacto lanzado en Europa no ano 2008 e que reúne xa a case 8.000 autoridades locais pertencentes a 57 países de todo o mundo (en Galicia está coordinado en Galicia pola Xunta, a través da Consellería de Medio Ambiente, Territorio e Vivenda).
Este plan inclúe medidas para o freo do cambio climático, consistentes na reducción de consumos enerxéticos e a substitución de enerxías fósiles por renovables, reducindo así a pegada de carbono do municipio. Estas medidas aplicaranse sobre edificios, instalacións, equipamentos e o transporte, tanto público como privado, e nos ciclos de tratamento de aguas residuais e dos residuos sólidos urbanos. Ademáis, o Plan de Acción implica o deseño de medidas de adaptación ao cambio climático, preparando así ao Concello de Nigrán para facer fronte aos riscos e vulnerabilidades aparellados a este proceso. O Concello ten un prazo de dous anos, contado a partir da data do acordo municipal de adhesión ao Pacto, para aprobar este Plan de Acción. Despóis, cada dous anos, terá que dar conta dos seus avances na procura dos obxectivos previstos para o 2030.
Para acompañar tanto a elaboración do Plan de Acción como da súa implementación, o Concello contará co apoio da oficina técnica do Pacto dos Alcaldes, posta a disposición dos 313 concellos galegos pola Direccion Xeral de Calidade Ambiental e Cambio Climático da Consellería de Medio Ambiente, Territorio e Vivenda. Esta oficina, a través do Centro de Asistencia aos Concellos e do Observatorio de Fondos e Convocatorias, realizará un asesoramento personalizado ao Concello de Nigrán, tanto na elaboración do Plan de Acción como na súa implementación.
Modificación de crédito Por outra banda, o goberno aprobou unha modificación de crédito de 313.448 € para pagar 353 facturas de 2018 e 2019, todas elas conformadas por técnicos municipáis e correspondentes a traballos correctamente realizados. Entre elas, a máis cuantiosa corresponde aos 94.000 € da subvención denegada pola Xunta para mellorar o acceso ao Parque Empresarial Porto do Molle (rúas Gándara e Ponte Muíña) ao non concedérselle ao Concello unha ampliación do prazo de finalización, cuestión que está sendo reclamada nos xulgados ao non entender o goberno local que non se aceptaran os informes nos que se incidía en que as choivas persistentes impedían o pintado da estrada. A seguinte factura é de 28.000 € correspodentes a materiais de obra, 21.000 € para a realización de actividades turísticas, 24.000 € de conservación de maquinaria, 12.000 € para actividades deportivas ou 2.000 € para emerxencia social. “Hai que ter en conta que temos un orzamento prorrogado, son traballos realizados por empresas, a maioría urxentes, e lóxicamente teñen que ser abonados”, explica o alcalde, Juan González, que recalca que o Concello ten débeda 0 con entidades financieiras e, a partir de agora, tamén con proveedores.
Finalmente, aprobouse por unanimidade o establecemento e fixación dos prezos públicos das escolas deportivas e actividades culturais municipáis para o curso 2019/2020 sen incremento algún con respecto ao anterior periodo.
O Grupo Municipal de Alternativa Ciudadana de Ponteareas, ACiP, a través do seu portavoz, Juan Carlos González Carrera, pedirá no pleno deste martes 30 de xullo, o cumprimento do acordo plenario aprobado en novembro de 2017 polo Pleno da Corporación, polo que se bonificaba nun 95% ás herdades recibidas polos fillos. Segundo González Carrera, o incumplimento dos acordos plenarios “supón un desprezo por parte do Goberno cara aos concelleiros e concelleiras da oposición”.
González Carrera cualifica de “lamentable” que non se cumpra un acordo plenario “que aprobaba a bonificación dun imposto, cando menos inxusto, que teñen que pagar os fillos cando reciben a herdade dos seus pais e que, en casos, pode chegar aos 6.000 euros”.
O portavoz de ACiP lembra que “existen diferentes sentenzas que anulan dito imposto e, no caso de Ponteareas, dito imposto segue a aplicarse polo incumplimento do Goberno local ao non ser publicado dito acordo no BOPPO para que entre en vigor e, pol
Utilizamos cookies para mejorar su experiencia y nuestros servicios, analizando la navegación en nuestro sitio web. Si continua navegando, consideramos que acepta su uso. Puede obtener más información pulsando aquí:.Saber MásAceptar
Cookies
Privacy Overview
This website uses cookies to improve your experience while you navigate through the website. Out of these, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may affect your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
