O Club Patinaxe Artística condado de Salvaterra acadou unha medalla no transcurso do Campionato Galego nas categorías Benxamín, Alevín e Infantil que se disputou en Gondomar. Na categoría Benxamín, Marta Fraga, do CPA Maxia da Coruña conseguia o ouro mentres que a prata e o título de subcampiona galega era para a patinadora María Miranda García do CPA Condado de Salvaterra. Carla Corral, do Lenda da Coruña, facíase coa medalla de bronce.
No que fai referencia á categoría Alevín Femino, as patinadoras coruñesas non deixaban opción e acadaban os tres lugares do caixón: Olivia Rey do CP Oleiros, Lucía Deus do Galia e Xiana Royo do CP Oleiros. En Alevín masculino o ouro tamén quedaba en terras coruñesas co patinador Lois Rivas, do Raiola do Ferrol.
En Infantil Feminino, Sofía Costa e Noa Álvarez, ámbalas dúas do CPA Gondomar, facíanse co ouro e prata respectivamente, quedando o bronce para a patinadora do Club Ribeira da Coruña, Daniela Siero.
Finalmente, na categoría Infantil Masculino, Joel Ribeiro, do CPA Gondomar, facíase co ouro e o título de Campión Galego. Unai Cereijo do CPA Maxia proclamábase subcampión galego e Diego Íñiguez, do Axel Arteixo da Coruña, facíase co bronce.
