A piques de rematar o Obradoiro de Emprego “Redondela Máis que Bela IV”, xa loce no municipio o gran traballo dos seus participantes. Entre as tarefas realizadas nestes meses na especialidade de “Forestal/Xardinería/Agricultura Ecolóxica”, unha das máis visibles é a das rotondas de Vilavella e Vilar de Infesta.

O bo facer do alumnado-traballador pode apreciarse xa na entrada de Redondela desde as estradas N-550 e N-555. Este punto, onde conflúen o Camiño Portugués e o Camiño da Costa, “recibe agora aos milleiros de peregrinos que pasan por Redondela cun aspecto renovado e atractivo”, sinala a alcaldesa Digna Rivas. A rexedora salienta o excelente resultado deste Obradoiro de Emprego, “que forma a veciñas e veciños para integrarse no mercado laboral, e ao mesmo tempo transforma o noso municipio con obras realizadas con gran profesionalidade”. A glorieta conta agora cun atractivo deseño axardinado. A outra intervención realizouse en Vilar de Infesta, na N-555. Nos dous casos son obras de interese municipal coas que os participantes acadan o Certificado de Profesionalidade de “Actividades auxiliares en viveiros, xardíns e centros de xardinería”.

O concelleiro de Emprego, Antonio Cabaleiro, explica os alumnos-traballadores reciben con este Obradoiro de Emprego unha titulación oficial “que lles será de gran utilidade á hora de atopar emprego”. O edil lembra que tanto os participantes da especialidade “Forestal/Xardinería/Agricultura Ecolóxica” como os de “Carpintería de Ribeira” están a piques de rematar a súa formación e comezarán a busca de emprego. Cabaleiro fai un chamamento ás empresas destes sectores para que teñan en conta que se precisan facer contratacións “aquí poden contar con persoal moi cualificado”.

No caso da especialidade “Carpintería de ribeira” o seu traballo ten tamén moi repercusión no municipio, xa que se encargaron da restauración do histórico bote Manuel. A embarcación, cun século de antigüidade, loce agora na entrada do museo Meirande. O alumnado-traballador, ademais de formarse nesta especialidade tradicional, tamén aprendeu os procedementos de reparación de embarcacións deportivas e de recreo utilizando fibra de vidro, resinas e catalizadores.

A praza do Concello de Redondela acolleu este mediodía o acto institucional co gallo da conmemoración do 25N, o Día Internacional da Eliminación da Violencia contra as Mulleres.

A concelleira de Igualdade, Iria Vilaboa. lembrou que no que vai de ano son xa 41 as mulleres asasinadas en España, 4 delas en Galicia. Advertiu tamén que “unha de cada tres mulleres son vítimas de violencia física ou sexual alo menos unha vez vida, e o risco é maior entre as mozas”.

A lectura da Declaración Institucional correu a cargo de Mar Núñez e usuarias e usuarios das asociacións Lenda e Andaina. Un texto que fai referencia ao lema da campaña polo 25N do Concello “Sempre hai saída”, unha alegoría que busca ser unha porta aberta á liberdade.
A escritora Arancha Nogueira e a artista Neves Seara realizaron unha simbólica performance na que reflicten as ataduras e dor que sofren as mulleres vítimas da violencia machista e da que poden saír con axuda. Esta intervención artística pretende ser un berro “polas que non poden falar”. A voz de Mar Núñez deu voz a varios poemas do libro “No camiño do Vento”, de Sesé Mateo.

A alcaldesa, Digna Rivas, foi a encargada de pechar as intervencións. Advertiu no seu discurso que “a violencia machista existe, e non retrocede” cunhas cifras de vítimas que so “arrepiantes”. Rivas reafirmou “o compromiso do goberno local coa erradicación da violencia de xénero” ao tempo que pediu o compromiso de todas as administracións e toda a sociedade “porque só remataremos con este tipo de violencia traballando unidos”. Puxo o foco na necesidade de avanzar “na prevención e a educación para acabar coas desigualdades”, e lembrou que desde o Concello de Redondela trabállase “todos os días do ano para erradicar a violencia machista en todas as súas formas”.

Un gran lazo humano violeta encheu a praza do Concello como símbolo da loita contra a violencia machista. Participaron escolares do CEP Santa Mariña e usuarios e usuarias de Lenda, Andaina, Cogami e centros día Cortizos e Cesantes, ademais de grupos políticos e veciñanza en xeral. Logo a porta violeta que representa o lema da campaña do Concello polo 25N “Sempre hai saída” encheuse coas mensaxes que os asistentes foron engadindo. Rematadas actividades na praza do Concello, realizouse a ofrenda floral no Salgueiral, ante a árbore ginkgo biloba na memoria das vítimas.

As actividades co gallo do 25N continuarán o xoves día 28 ás 18.00 horas co contacontos “Aitana e a avoa, e outros contos violetas”. Será no multiúsos do Piñeiral, en Chapela, con Soraya Lema. A actividade está dirixida a crianzas a partir dos 3 anos.

Recursos para as vítimas

A porta violeta e o lazo humano foron unha proposta dos Servizos Sociais Municipais que se sumou á programación do CIM. Lembrar que o Centro de Información á Muller de Redondela é un recurso que está a disposición de todas as vítimas de violencia machista. O 016 é o teléfono de información e asesoramento para casos de violencia de xénero. É gratuíto e non se reflexa da factura telefónica, pero é necesario borralo do historial de chamadas do terminal.

As xornalistas Macarena Baena Garrido e Laura de Grado Alonso son as gañadoras do IV Premio Sesé Mateo de Xornalismo Ético pola súa reportaxe “Desprotexidas. A realidade das mulleres migrantes vítimas de violencia de xénero en España”.

O traballo foi publicado na web Efeminista, da axencia EFE. Trátase dunha ampla reportaxe que inclúe vídeos con testemuños de mulleres de diferentes nacionalidades. Este traballo denuncia “a situación de vulnerabilidade destas mulleres migrantes, que ademais de sufrir violencia de xénero son tamén vítimas de violencia institucional, racismo e unha desprotección sistemática pola súa situación irregular”. A reportaxe ofrece tamén a visión de expertas que propoñen solucións.

A concelleira de Igualdade, Iria Vilaboa, sinala que o traballo elixido polo xurado pon o foco nas propias vítimas, “mulleres invisibles que sofren marxinación e violencia polo feito de ser mulleres, o que se grava pola súa condición de estranxeiras e sen recursos”.

A alcaldesa, Digna Rivas, lembra que estes premios naceron co obxectivo de recoñecer “a ética á hora de tratar información relacionada coa violencia machista, evitando o sensacionalismo, e iso é o que fai esta reportaxe que dá voz ás propias vítimas”.

As xornalistas da Axencia EFE, Macarena Baena e Laura de Grado, afirman que a súa responsabilidade “é dar visibilidade a aquelas voces que sistematicamente foron silenciadas”. A través desta reportaxe “queriamos que estas mulleres se convertesen nas donas da súa propia historia, narrándoas en toda a súa complexidade”. As autoras agradecen “a confianza e valentía” destas mulleres ao participar neste proxecto “co obxectivo común de que ningunha outra muller teña que vivir o que elas viviron”.

Advirten que “a falta de acceso a recursos, o racismo, a discriminación, a desconfianza nas institucións e a lei de estranxeiría colócaas nunha posición de extrema vulnerabilidade”.
O xurado estivo formado polas xornalistas Cristina García (CRTVG) gañadora do II Premio Sesé Mateo, Ana González Liste (A Praza) gañadora do III Premio Sesé Mateo, Laura Nogueira (Atlántico Diario) e María Xesús Queimaliños (Radio Redondela).

O premio está dotado n 1.500 euros e unha escultura en bronce feita pola asociación Lenda. As premiadas recollerano nun acto que se celebrará este sábado, día 23, na Oficina de Turismo de Redondela ás 12.00 horas. Celebrarase tamén unha charla-coloquio baixo o título “Os medios de comunicación como axentes do cambio” con Ana González Liste, Diana López Varela (xornalista, guionista e escritora) e Joshua Alonso Mateo, Técnico superior en Promoción da Igualdade de Género. Haberá unha lectura de poemas do libro de Sesé Mateo “Polo camiño do vento” a cargo de Mar Núñez.

O Concello de Redondela realizou traballos de renovación da rede de recollida de augas pluviais realizada no barrio de Outeiro das Penas, en Cesantes. O concelleiro responsable de Infraestruturas e Sostibilidade, Roberto Villar, explica que esta rede “tiña máis de 30 anos de antigüidade e presentaba fugas, polo que se procedeu á substitución de toda a canalización”. A raíz destes traballos detectouse que existían restos de augas fecais na rede de pluviais, e localizáronse seis vivendas conectadas a esta canalización de xeito irregular.

Técnicos de Aqualia, empresa concesionaria do servizo de auga e saneamento en Redondela, procedeu a revisar estas instalacións “pero só nunha das vivendas lles permitiron acceder ao inmoble para comprobar a situación da conexión de saneamento”, sinala Villar. Neste caso puido confirmarse que a vivenda ten conectado o saneamento á rede municipal de pluviais “o que supón unha infracción do regulamento”, advirte o concelleiro.

Unha vez que reciban o requirimento formal terán un mes de prazo para facer as obras necesarias e conectar a vivenda á rede de saneamento. O responsable de Infraestruturas e Sostibilidade anuncia tamén que nas vivendas onde non se permitiu a entrada dos técnicos realizarase unha segunda visita coa Policía Local, “e de non ser posible facer a comprobación tramitarase unha denuncia no xulgado”. O edil advirte que “a falta de colaboración pode ser prexudicial para os propios afectados, xa que incrementa as posibles sancións”.

Villar lembra que hai máis dun ano o Concello de Redondela rebaixou un 70% a taxa de conexión ao saneamento. A tarifa reduciuse de 1.200 a 360 euros “para facilitar a alta das vivendas unifamiliares”. O concelleiro lamenta que, malia este importante desconto “moitas vivendas seguen sen conectarse á rede de saneamento, o que supón un grave prexuízo para o medio ambiente”. No caso do barrio de Outeiro das Penas os vertidos fecais “acaban directamente na praia e contaminan”. Se a situación non se resolve pode carrexar sancións económicas para o Concello de Redondela por parte do Programa de Control de Vertidos de Augas de Galicia.

Técnicos de Aqualia realizaron recentemente inspeccións na zona de Soutoxuste, no Viso, nas que detectaron un cento de vivendas que non están conectadas á rede de saneamento. O concelleiro explica que cada obra de saneamento no rural supón un elevado investimento de cartos públicos, polo que “é de xustiza que unha vez que existe unha rede de sumidoiros próxima ás casas, sexa obrigatorio conectarse”. Estas inspeccións por parte de técnicos de Aqualia continuarán facéndose por todas as parroquias de Redondela para detectar posibles irregularidades. A próxima será na parroquia de Cabeiro.

A empresa Naturgalia, adxudicataria do servizo, está a realizar desde setembro a segunda campaña anual de limpeza. Os traballos inclúen tanto a retirada da maleza e restos vexetais como a limpeza a fondo das cunetas con maquinaria especializada en diferentes camiños municipais nas parroquias de Redondela.

Segundo explican dende o Concello, a brigada retira todo o lixo acumulado nas beiravías para permitir unha boa evacuación da auga. Os operarios limpan caños e sistemas de drenaxe obstruídos por vexetación ou outros residuos. Isto busca evitar atascos e facilitar a evacuación da auga da chuvia. A alcaldesa, Digna Rivas, sinala que se trata duns traballos “moi necesarios” xa que hai máis dunha década que non se realizaba unha limpeza a fondo das cunetas.

Por primeira vez as tarefas de roza e limpeza fanse dúas veces ao ano en todos os camiños públicos de Redondela. A primeira fase realizouse entre xuño e agosto. A segunda limpeza é a que está a facerse actualmente e rematará antes de que finalice o ano.

“O obxectivo deste contrato histórico é que todos os camiños das parroquias e as súas marxes estean en perfectas condicións todo o ano”, explica Rivas. Trátase dunha “aposta decidida” da rexedora local “pola mellora da calidade de vida nas parroquias” cun servizo de limpeza que se foi ampliando e mellorando nos últimos anos. O contrato, por dous anos, licitouse á empresa Naturgalia por un importe de 989.268 euros.

O contrato podería prorrogarse dous anos máis, de xeito anual, ata un importe máximo de 1.978.536 euros para os catro exercicios.

Amelia Tiganus, recoñecida activista e presidenta da Federación Estatal de Mulleres Abolicionistas (FEMAB) ofrecerá un coloquio no auditorio da Xunqueira. Baixo o título “Xuventude, internet e violencia sexual, quen gaña?” o faladoiro celebrarase o venres, día 15, ás 19.00 horas con entrada libre. Na súa intervención, Tiganus abordará a educación sexual en internet, destacando como identificar e combater a violencia sexual dixital.

Así mesmo, reflexionará sobre a mercantilización do corpo de mulleres e nenas na rede, e as súas consecuencias físicas e psicolóxicas. Amelia Tiganus dedicou a súa vida á loita contra a trata e a explotación sexual, tras ser vítima durante cinco anos en prostíbulos de España. O seu traballo foi recoñecido con numerosos premios, e o seu compromiso coa erradicación da explotación sexual foi clave na creación de FEMAB.

Este evento, que forma parte da programación do 25N do Concello de Redondela, pretende fomentar a concienciación e o debate sobre a violencia de xénero, especialmente no contexto da era dixital. A charla é unha oportunidade para profundar nos desafíos e solucións na loita contra a violencia sexual, e busca involucrar tanto á mocidade como ás persoas adultas na creación dunha contorna máis segura e equitativa.

O Concello de Redondela puxo en marcha unha serie de accións destinadas a mellorar a Praza de Abastos. Estas iniciativas inclúen programas de formación para os comerciantes e un exhaustivo diagnóstico das instalacións, realizado por unha empresa especializada, que permitirá identificar áreas de mellora e adecuar o edificio aos estándares de excelencia e calidade. Este proxecto representa un paso crave no compromiso municipal por ofrecer un mercado moderno e adaptado ás necesidades da comunidade. O concelleiro de Economía e Emprego, Antonio Cabaleiro, explica que xa se puxeron en marcha diferentes iniciativas “para identificar novas áreas de mellora e estratexias que optimicen os usos do mercado” de cara a obter o selo de Mercado Excelente.

Unha das accións que se puxo en marcha é o “mentoring comercial” con expertos que orientan e guían aos praceiros para mellorar no seu eido profesional. Ademais de titorías para coñecer as necesidades de cada vendedor e vendedora, celébranse catro obradoiros. Son o de “Aumento da rendibilidade do punto de venda” para atraer máis clientes, mellorar a presentación dos produtos e maximizar as vendas. O segundo denomínase “Técnicas de visual merchandising” para axudar aos praceiros a destacar os seus produtos e atraer a atención dos clientes, a iluminación e a creación de escaparates atractivos. Outro taller será o de “Colocación do produto” para organizar os seus produtos de forma atractiva e por último o obradoiro de “Atención á clientela”, con técnicas de comunicación, a importancia do trato amable e como xestionar queixas ou reclamacións.

Tamén se realizará un estudo de diagnose de situación de usos do mercado, “cunha análise do impacto económico e potencial da praza de abastos na súa contorna”, explica Cabaleiro. Farase unha recollida de percepcións e opinións sobre o mercado por parte dos praceiros e usuarios. Finalmente realizarase unha análise e proposta de actuacións necesarias para obter o selo de Mercado Excelente.

Todo este proceso pretende incrementar a competitividade da praza, impulsando a transformación das súas instalacións e o crecemento dos seus comerciantes, que contan co respaldo dunha formación continua e unha contorna de apoio. Desta maneira, a Praza de Abastos de Redondela prepárase “para consolidarse como un punto de referencia para quen valora a tradición, a proximidade e o trato personalizado nas súas compras”, sinala Cabaleiro.

Estas actuacións contan cun investimento de máis de 22.600 euros, dos que un 80% (18.159 euros) están subvencionados pola Consellería de Emprego, Comercio e Emigración e o 20% restante polo propio Concello.

A alcaldesa de Redondela, Digna Rivas, e a concelleira de Cultura, Rita Pérez Táboas, reuníronse con Montse Fajardo, Guillerme Pérez e Matías da Torre, da Iniciativa Galega pola Memoria, para abordar diferentes aspectos sobre as necesidades e usos da illa de San Simón.

Desde o Concello de Redondela a alcaldesa amosou o seu apoio á liña de traballo da Iniciativa Galega pola Memoria para solicitar ante o Ministerio de Política Territorial e Memoria Democrática a declaración da illa de San Simón como un “espazo da memoria”, conforme á Lei de Memoria Democrática.

Goberno local e colectivos da memoria coinciden na necesidade de “protexer a illa” para evitar que nela se celebren actividades lucrativas “e que supoñen unha ofensa para a memoria das vítimas”.

A xuntanza serviu tamén para abrir unha vía de traballo para poñer en marcha un Plan de Usos para a illa que se inclúa no PXOM de Redondela. Será o Concello o que o realice “contando co asesoramento da Iniciativa Galega pola Memoria, nos aspectos relacionados coa memoria histórica”.

Digna Rivas trasladoulle aos colectivos memorialísticos a demanda do Concello de Redondela para recuperar a Fundación Illa de San Simón. A alcaldesa entende que a illa de San Simón “precisa dunha fundación propia cunha dotación económica que permita desenvolver actividades na illa”. O Concello de Redondela propón abrir o debate para a recuperación desa Fundación, da que deberían formar parte o propio Concello, a Xunta de Galicia, a Deputación de Pontevedra, as tres universidades galegas e os colectivos da memoria.

A Xunta de Galicia modificou en 2022 os estatutos da Fundación Museo do Mar de Galicia, o que supuxo que a xestión da illa de San Simón se integrase nesta entidade. O Concello de Redondela solicitou formar parte desta institución, pero desde a Xunta de Galicia “aínda non houbo resposta”, sinala Rivas.

A alcaldesa de Redondela e Iniciativa Galega pola Memoria, da que forman parte 38 asociacións de todo o país, concordaron tamén en que “calquera actividade que se celebre na illa deben ter en conta que se trata dun lugar de memoria histórica, e debe ter algunha vinculación ou mención coa memoria e co tempo que foi a illa foi cárcere”.

Un grupo de voluntarios da Agrupación de Protección Civil de Redondela desprazaranse este venres a Valencia para axudar en tarefas de limpeza, seguridade e apoio na zona afectada pola DANA. Nos últimos días recolleron multitude de doazóns no Multiúsos da Xunqueira de alimentos non perecedoiros, produtos de hixiene, material de limpeza e roupa que serán trasladados a Valencia. Son máis de 2.000 quilos de axuda os que van trasladar a Valencia nun vehículo de Protección Civil e dous furgóns cedidos por Autos González e Autos Brea.

Esta axuda súmase á que desde o pasado luns prestan na zona cinco Policías Locais de Redondela, e que tamén levaron alimentos e enseres de primeira necesidade que foran doados pola veciñanza. Os axentes a traballar na localidade de Benetússer en tarefas de limpeza e vixilancia grazas a un convenio coa Generalitat Valenciana.

A alcaldesa de Redondela, Digna Rivas, e a concelleira de Interior, Rita Pérez Táboas, supervisaron o material que se vai enviar mañá a Levante. Rivas explica que o envío está a coordinarse cos policías de Redondela desprazados na zona, “xa que a situación alí é de colapso e son os nosos axentes os que xestionaron a onde trasladar as doazóns”. Rivas explica que desde o Concello non se envíou a axuda ata o de agora “para ter claro a onde podía trasladarse o material e en que condicións”.

Rivas agradeceu aos axentes da Policía Local e aos efectivos de Protección Civil “o seu traballo e entrega” e tamén “a axuda do pobo redondelán e das empresas Autos González e Autos Brea que unha vez máis son un gran exemplo de solidariedade”.