O pasado 15 de xuño Loli Castiñeira dáballe paso na alcaldía a Verónica Tourón, dando cumprimento así ao pacto de goberno alcanzado co PSOE para esta lexislatura. A ata entón alcaldesa pasou a ocupar a tenencia de alcaldía, asumindo ademais a área de vías e obras, que se sumou ás que xa ostentaba ata entón: persoal, igualdade e coordinación de proxectos.

Para a formación local, estes primeiros cen días dende o relevo ofrecen un balance positivo, con un bipartito unido traballando man a man polo beneficio da veciñanza de Salceda. En palabras de Loli Castiñeira, voceira de Movemento Salceda, “Como non podía ser doutro xeito, o cambio de alcaldía non supón un cambio de rumbo, senón que ámbolos dous partidos continuamos a traballar nos proxectos iniciados na anterior etapa, sen que un cambio na persoa que ocupa a presidencia supoña ningún xiro nas políticas de esquerdas que se están a levar a cabo xa dende o 2007, e que seguen a transformar a Salceda que tanto queremos”.

Dende Movemento Salceda teñen claro que o feito de non ter a alcaldía non supón unha menor responsabilidade no goberno, lembrando que das catro persoas que forman o grupo municipal, ademais das mencionadas áreas da tenente de alcaldesa,  dependen outras fundamentais como as de facenda, réxime interior, seguridade e tráfico, cultura, patrimonio, festexos, parques e xardíns ou servizos municipais, ademais da coordinación de proxectos que segue a depender de Loli Castiñeira e que engloba as iniciativas da totalidade do grupo de goberno. O pacto de goberno asinouse para a lexislatura completa, e por parte de Movemento Salceda cumprirase escrupulosamente ata o último día.

Deste xeito, dende Movemento Salceda asúmese este novo papel no goberno do que xa se cumpriron os cen primeiros días “sen levantar o pe do pedal, e traballando con toda a entrega con independencia de quen ocupe o posto da alcaldía”.

Loli Castiñeira, voceira de MS e tenenta de alcaldesa: “a veciñanza de Salceda sabe que seguimos estando á súa enteira disposición, e que poden seguir acudindo a nós para todo aquelo no que poidamos botarlles unha man. Os nosos teléfonos están dispoñibles as 24 horas, e as nosas portas abertas sempre que se precise”.

O pasado 15 de xuño, Verónica Tourón accedía á alcaldía de Salceda de Caselas, converténdose na primeira alcaldesa socialista da nosa localidade, despois do acordo alcanzado nas pasadas eleccións municipais. A executiva socialista fai un repaso deste feito pasados os 100 primeiros días.

A chegada á alcaldía de Verónica Tourón, foi froito do traballo realizado nos últimos anos, por Grupo Municipal Socialista na defensa da veciñanza ”e nesa liña continuaremos gobernando”.

A infancia e a mocidade é fundamental na liña de traballo, por ese motivo existe por primeira vez una concellería de infancia e céntrase o traballo na busca de máis facilidades para as e os estudantes, así como na promoción de actividades de lecer e apoio ás familias. O crecemento da poboación infantil e moza fixeron que as instalacións non sexan suficientes tampouco no eido deportivo, para paliar esta deficiencia, ademáis de inversión búscanse convenios con outras entidades e concellos.

O rural e o medio ambiente e outro dos eixos de actuación para mellorar a calidade de vida da veciñanza. A recollida selectiva de residuos e mantemento das zonas rurais foi un dos primeiros focos de atención, así como a mellora do rural e o saneamento, na medida das posibilidades orzamentarias.

No que se refire o emprego, a nosa alcaldesa aposta pola formación como mellor xeito de mellora da empregabilidade e aumentar asi as oportunidades das persoas desempregadas, o Obradoiro de Emprego Sustentable ou o próximo Plan de Formación Municipal así como a mellora das instalacións do CDL son exemplos claros que definen as prioridades. A aposta polo comercio e hostelería é outra das vías elixidas pola alcaldesa para a dinamización da vila e a creación de emprego. Nos últimos días presentouse a marca comercial e as axudas directas ás pemes, comercio e hostelería.

A voz da veciñanza, conseguir que o goberno municipal sexa a caixa de resonancia das necesidades forma parte tamén da planificación da nova alcaldía e a primeira xuntanza de organización do Consello Veciñal xa tivo lugar fai uns días.

En infraestruturas as liñas están claras: continuamos centrándonos no aproveitamento dos recursos existentes a través do Plan de posta en valor das edificacións municipais como os proxectos de rehabilitación do Centro Social A Devesa, piscinas municipais e recuperación de aulas ou casas do mestre nas parroquias, podendo poner así en marcha novos servizos. Así como a mellora de estradas e camiños municipais no rural e neste sentido xa mantivo xuntanzas tamén con otras administracións para a procura de financiación e de mellora doutros viais.

Un dos puntos máis importantes é o Plan Xeral, para mellorar a calidade de vida (infraestructuras, servizos públicos, etc.). As socialistas son conscientes da imposibilidade de aprobar un PXOM nunha soa lexislatura pero están a centrarse na planificación dos traballos de actualización da planimetría e cartografía e ir avanzando na súa posta en marcha. Esta será a oportunidade para ter una vil amáis moderna, sostible e amable coas persoas.