Os alcaldes de Mondariz e Tui, Xosé Emilio Barros e Enrique Cabaleiro e a alcaldesa de Tomiño, Sandra González, participaron este pasado domingo no antigo matadoiro de Mondariz á homenaxe ás seis persoas asasinadas en Mondariz polo réxime franquista –veciños de Tomiño e Tui– a fin de atemorizar á sociedade logo do golpe de Estado.
No acto, no que participaron máis de 200 persoas convocadas por Condado Antifascista, homenaxeouse ás seis persoas asasinadas e cuxo único delito era ser representantes activos do agrarismo e do republicanismo, varios deles concelleiros.
Trala intervención de varios colectivos e de Sandra González, Enrique Cabaleiro e Xosé Emilio Barros, procedeuse á inauguración dun monólito de recordo ante a sentida mirada das netas e fillas dos homenaxeados.