O Deputado do BNG no Parlamento Galego, Luis Bará e os representantes nacionalistas das localidades de Crecente, Arbo, As Neves e Salvaterra de Miño, mantiveron o pasado sábado unha reunión de traballo en Arbo. Na xuntanza destacaron a necesidade da crear plans de actuación que axuden a posta en valor do patrimonio e a promoción de iniciativas que axuden a fomentar o turismo e o comercio da contorna.
O BNG vén de presentar unha serie de iniciativas no Parlamento de Galiza onde se insta a Xunta a incoar expediente de declaración do conxunto das pesqueiras destes catro concellos, como bens de interese cultural.
Segundo apunta ‘Gago’, portavoz do bloque en Arbo, “o feito de declarar as pesqueiras do Miño como ben de interese cultural é un acto de xustiza” ademáis asegura non entender “como co paso dos anos tanto o seu uso como as propias construcións vanse degradando e a Xunta mira para outro lado, impasiva, deixando ir un pedazo de historia do noso país, xunto co modo de vida de moitos veciños e veciñas, que aínda hoxe, seguen usando as pesqueiras como fonte de ingresos para vivir. Ademáis das empresas de deporte vinculadas ó río, as que tamén debemos axudar”.
Salientan os nacionalistas o acordo de seguir traballando de maneira conxunta e seguir apostando por medidas que, coma esta, axuden a preservar e a “mellorar a calidade de vida da xente” e a “xerar un atractivo máis”, á hora de ofertar o turismo na zona. Entre as accións propostas polo BNG destaca un acto aberto a toda a veciñanza, onde serán presentadas as propostas para por en valor as Pesqueiras e a súa relación coa hostelería, o turismo e as actividades de lecer que terá lugal na localidade de Arbo este Outono.
