21.5 C
Pontevedra
Venres, 19 de Abril de 2024
Máis
    HomeO CondadoPonteareasÉxito de participación en Ponteareas da iniciativa conxunta de R e Cruz...

    Éxito de participación en Ponteareas da iniciativa conxunta de R e Cruz Vermella ‘Enredando tour R’

    A aula móbil formativa de ‘Enredando tour R’, iniciativa conxunta do operador galego R e a Cruz Vermella, visitou Ponteareas para continuar o seu labor de ‘inclusión dixital’ das persoas maiores. O programa desenvolveuse nunha aula móbil instalada na Praza Maior ponteareá con contidos formativos vinculados ás novas tecnoloxías.

    A alcaldesa de Ponteareas, Cristina Fernández, compartiu un tempo coas persoas participantes e puido visitar a furgoneta ‘superequipada’ con smartphones, portátiles, tabletas, altofalantes intelixentes… e todo tipo de accesorios para facilitar ese achegamento á realidade da tecnoloxía máis doméstica e presente en multitude de áreas da nosa vida cotiá.

    As persoas que participaron, puideron fedellar mentres ‘degustaban’ un dos catro “menús
    formativos” que Cruz Vermella e R lles tiñan preparados para que cada quen elixira o que máis se adaptara ás súas necesidades:

    • “Vivo no mundo analóxico, rapaza”; menú básico para comezar a “enredar”.
      ”E ti… de quen vés sendo?”: para saber que é e como funciona o WhatsApp.
    • ”Dixitalízate, ho”: para aprender como se pode acceder ao SERGAS, ao banco, facer a
      compra e, en xeral, como xestionar o máis cotián por internet.
    • ”Menú R: móbilR”: para coñecer a factura electrónica e outras utilidades e aplicacións
      prácticas en internet.

    A acción desenvolvida tiña, por parte de R e a Cruz Vermella, unha intención clara: minorar o efecto da fenda dixital que tanto lle afecta a unha gran porcentaxe dos maiores e a outros colectivos vulnerables. Cómpre salientar que estas persoas durante o confinamento e nos momentos máis duros da pandemia, por poñer un exemplo, non puideron botar man das novas tecnoloxías para completar xestións esenciais como pedir unha cita médica, facer a compra ou realizar unha operación bancaria sen saír da casa.

    O certo é que a iniciativa foi un éxito de participación e as persoas que asistiron aos diferentes obradoiros amosaron a súa satisfacción e entusiasmo de poder utilizar os dispositivos móviles para efectuar xestións da vida cotiá.

    “É importante que as e os nosos maiores pérdanlle medo ás novas tenoloxías” apuntan a Cruz Vermella e R xa que, unha vez eliminado ese medo, poderán adquirir habilidades básicas que lles permitan avanzar e aprender a navegar por internet, ter unha conta de correo ou enviar unha mensaxe.

    ‘Enredando tour R’, estará mañá, 6 de outubro, na Praza Avelino Vicente da Guarda onde pechará a súa andaina.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.