A comunicación do Ministerio de Transportes, Mobilidade e Axenda urbana (Mitma) na que se da conta do inicio dos traballos de redacción do proxecto de reordenación de accesos e adecuación das marxes da travesía de Chapela, na N-552, foi acollida con enorme satisfacción pola alcaldesa de Redondela, Digna Rivas, ao “darse cumprimento a unha demanda histórica da veciñanza de Chapela e que para o Concello era un tema prioritario”, afirma rexedora local.
Rivas quixo agradecer ao secretario xeral de Infraestruturas do Mitma, Sergio Vázquez Torrón, e ao Ministerio “a rapidez para dar resposta ás xestións que, dende o primeiro momento realizamos dende o Concello para dar solución a unha unha reclamación de hai anos das veciñas e veciños”.
Cómpre lembrar que na reunión telemática mantida en marzo deste ano con Vázquez Torrón, Digna Rivas cualificou de “demanda irrenunciable” o arranxo deste vial. En tan só seis meses, o Ministerio vén de iniciar a redacción dun proxecto que, entre outros aspectos, inclúe o acondicionamento de interseccións, reparación da pasarela peonil de Chapela e o tratamento das marxes.
Digna Rivas lembrou que o investimento estimado das actuacións e de 1 millón de euros que amosa, as claras, o compromiso do Goberno socialista con Redondela.
En todo caso, engade a alcaldesa redondelá, o Goberno local continuará demandando do Ministerio “a necesidade de resarcir á Chapela de todos os prexuízos ocasionados pola AP9”.
