A parroquia de Trasmañó celebrará esta semana as súas festas patronais en honra a San Vicente. O evento combinará actividades culturais, gastronómicas e relixiosas, e terá lugar os días 22, 25 e 26 de xaneiro baixo unha gran carpa climatizada. A alcaldesa, Digna Rivas, e a concelleira de Cultura, Rita Táboas, presentaron o programa xunto a membros da comisión de festas, destacando a importancia de preservar as tradicións.

Mércores 22: Día de San Vicente

A primeira xornada comezará coa tradicional salva de bombas e os pasarrúas da Banda de Gaitas Foula polos barrios da parroquia. Ao longo da mañá, celebraranse varias misas, incluída unha cantada ás 13:00 horas, seguida de fogos artificiais e unha sesión vermú. Ademais, unha pulpeira estará dispoñible con prezos populares.

Sábado 25: vehículos clásicos, xogos e verbena

O sábado pola mañá destacarase a VI Concentración de Vehículos Clásicos, que arranca ás 10:00 horas. A organización espera superar os máis de 120 coches clásicos que participaron o ano pasado, con vehículos procedentes de toda Galicia e do norte de Portugal. Os participantes realizarán un percorrido pola parroquia e participarán nun sorteo de agasallos. Paralelamente, haberá un espazo gastronómico con racións de polbo e callos.

Xa pola tarde, a programación inclúe unha misa ás 17:00 horas, seguida de xogos populares e cucañas. Pola noite, a verbena será protagonizada polas orquestras Marbella e Escaparate, comezando ás 22:00 horas. Os fogos artificiais da medianoite pecharán o día con grande espectáculo.

Domingo 26: XIV Festa do Cocido de Trasmañó

O domingo, o evento gastronómico principal será a 14ª Festa do Cocido de Trasmañó, que dará comezo ás 14:00 horas. Antes, celebrarase unha misa en honra a San Blas (13:00 horas), seguida dunha sesión vermú animada polas pandereteiras Ledicia de Trasmañó. Durante a sobremesa, actuarán as pandereteiras Sen Querer, do Viso, e haberá sorteos e xogos con premios. O día rematará cunha sesión musical con baile.

Desde a comisión de festas, recomendan reservar os vales para o cocido con antelación, xa que o aforo é limitado. Os vales poden adquirirse nos teléfonos 663 176 951 e 670 884 419, ou na cafetería Rodeo, en Rande.

A alcaldesa, Digna Rivas, anima á veciñanza a participar: “É unha oportunidade para gozar dunha gastronomía tan nosa e vivir as tradicións da parroquia”.

Institutos, Concello, asociacións e clubs deportivos xa traballan na organización da edición 2025 de “Unha semaniña enteira”, que se celebrará en febreiro coincidindo co Día de Rosalía. Esta actividade busca fomentar o uso do galego entre a mocidade, propoñendo ao alumnado o reto de falar galego durante sete días seguidos.

O Concello de Redondela, mediante a concellería de Ensino e o Servizo de Normalización Lingüística, colabora activamente e anima a clubs e asociacións a sumarse á campaña. O IES Chapela acolleu a primeira xuntanza, onde os clubs da parroquia (Chapela CF, Balonmán Chapela, Arealonga FS, entre outros) confirmaron a súa participación, comprometéndose a promover o galego nas redes sociais, publicidade e actividades dos seus equipos.

Os organizadores destacan a boa acollida entre as entidades deportivas, subliñando que iniciativas coma esta son clave para normalizar o uso do galego nun momento en que a mocidade amosa unha baixa competencia na lingua. En palabras da alcaldesa Digna Rivas, “retos como este axudan a reforzar o uso do galego en todos os ámbitos da sociedade”. Nos próximos días continuarán as reunións coas asociacións das demais parroquias de Redondela.

A alcaldesa de Redondela, Digna Rivas, xunto cos concelleiros de Urbanismo, Antonio Cabaleiro, e de Infraestruturas, Roberto Villar, reuniuse este martes co director do CEIP Laredo, Abraham Domínguez, e o presidente da ANPA do centro, Martín Diéguez, para abordar os “graves problemas de seguridade” que afectan ao colexio debido ao deterioro da súa cuberta e o risco de desprendemento de tellas.

O Concello de Redondela enviou hai un mes un informe técnico á Consellería de Educación da Xunta de Galicia advertindo da “urxente necesidade” de adoptar medidas de seguridade no centro. Entre estas medidas destacan a colocación dun valado perimetral para evitar o acceso á zona de risco e a instalación dunha rede de protección para previr desprendementos.

A alcaldesa, Digna Rivas, lamentou a ausencia de resposta por parte da administración autonómica, malia a “gravidade” da situación. Ante esta inacción, a rexedora comprometeuse coa dirección do centro e a ANPA a asumir os traballos necesarios desde o Concello. “Malia ser unha competencia exclusiva da Xunta, a nosa prioridade é garantir a seguridade dos máis de 180 alumnos e alumnas do CEIP Laredo, así como do profesorado, as familias e os viandantes que transitan pola zona”, declarou Rivas.

Os técnicos municipais iniciaron xa os trámites para contratar estas actuacións, que inclúen a instalación dun valado e unha rede de protección. As obras, segundo indicou a alcaldesa, poderían comezar a finais de xaneiro ou principios de febreiro. A rexedora agradeceu a colaboración do equipo directivo do centro e da ANPA, que mostraron o seu total apoio ao Concello.

Por último, Digna Rivas instou á Xunta de Galicia a actuar de forma inmediata e establecer unha data concreta para acometer a reforma integral da cuberta do colexio. “Esta é unha obra imprescindible para garantir a seguridade no centro, tal como detalla o informe técnico que remitimos hai un mes”, concluíu.

O Goberno central atendeu a petición dos colectivos memorialistas e do Concello de Redondela para protexer un dos lugares relacionados coa ditadura franquista máis emblemáticos de Galicia: a illa de San Simón, onde houbo un campo de concentración entre 1936 e 1943. A partir do mes de agosto a illa será, xunto co Pazo de Meirás, “Lugar da Memoria Democrática”. Trátase dunha figura incluída na Lei de Memoria Democrática que implica dotar a estes espazos dunha función “conmemorativa, de homenaxe, didáctica e reparadora”, ademais de establecer “un réxime de protección e usos compatibles”.

Desde o Concello de Redondela a alcaldesa, Digna Rivas, amosou a súa “gran satisfacción” por este recoñecemento “a un dos lugares da represión franquista máis emblemáticos de Galicia” e agradeceu “a gran labora da Iniciativa Galega pola Memoria”. Os colectivos memorialistas pediran ao Estado o pasado mes de xullo esta protección para a illa de San Simón “ante a desidia da Xunta de Galicia, que desentende a protección da illa e calquera actividade relacionada coa memoria histórica”. O goberno de Rivas demandou tamén ao Ministerio de Política Territorial e Memoria Democrática o pasado mes de decembro esta declaración para illa de San Simón, despois de reunirse con representantes da Iniciativa Galega pola Memoria.

O acto oficial de declaración será en agosto, segundo recolle o programa “España en liberdade. 50 anos” que presentou esta semana o presidente Pedro Sánchez. A rexedora local ofreceuse tamén para que o Concello de Redondela, como institución, poida colaborar e participar nos actos que se celebren ao redor deste recoñecemento .

Recuperación da Fundación Illa de San Simón

Rivas lembra que desde o Concello reclamouse á Xunta de Galicia o pasado mes de outubro “a recuperación da Fundación Illa de San Simón para xestionar os usos deste espazo e velar pola memoria histórica”. O Concello de Redondela reitera esta petición, da que aínda non obtivo resposta, “e que ten máis sentido ca nunca, unha vez o Goberno Central declarou a illa como Lugar de Memoria Democrática”.

A Concellaría de Infraestruturas e Sostibilidade do Concello de Redondela continúa este ano co desprazamento do punto limpo móbil a todas as parroquias do municipio. O obxectivo deste servizo é “facilitar á veciñanza a reciclaxe de diferentes tipos de lixo que non debe de ir aos colectores da rúa”, explica o concelleiro Roberto Villar.

Trátase dun servizo gratuíto para a veciñanza “pero de grande importancia para ter cada vez unha Redondela máis limpa, polo que é fundamental contar coa colaboración de todos e todas”, sinala a alcaldesa Digna Rivas. Os residuos que se poden depositar neste espazo son aceite de cociña usado, cartuchos e tóner impresora, radiografías, lámpadas e fluorescentes, CDs e DVDs, cápsulas de café, cargadores e auriculares, pilas e baterías, material de escritura, móbiles e tabletas, material informático, aerosois e envases de pintura, plásticos que non sexan envases, xoguetes ou pezas de téxtil, entre outros.

O goberno local fai un balance “moi positivo” do uso que a veciñanza está a dar a este servizo, no que se están a recoller multitude de residuos. O concelleiro de Infraestruturas e Sostibilidade, Roberto Villar, explica que se depositaron “centos de CD’s e DVD’s, moito material informático, restos de pinturas, e moitísimos móbiles e cargadores, etre outros residuos”. O punto limpo móbil está a ter moi boa acollida en todas as parroquias, e “a veciñanza interésase por coñecer o calendario e os lugares a onde se despraza”, apunta Villar.

A próxima semana, do 13 ao 19 de xaneiro, estará no Viso, na chaira de Saramagoso.
En Cesantes estará dúas semanas: do 20 ao 26 de xaneiro no miradoiro do Alto dos Tras, e do 27 de xaneiro ao 2 de febreiro na praza de San Pedro, en Catapeixe. Do 3 ao 9 de febreiro estará en Redondela, na praza diante do Concello.

Na parroquia de Chapela estará tamén dúas semanas: do 10 ao 16 de febreiro no aparcadoiro da rúa Manuel Rodríguez Casal, e do 17 ao 23 na chaira do pavillón municipal Manuel González Soto.

En Trasmañó instalarase na chaira do Convento na semana do 24 de febreiro. A Cedeira chegará no mes de marzo, na semana do día 3, estará ao lado da pista deportiva. En Cabeiro estará na semana do 10 de marzo, no aparcadoiro do Centro Cultural San Juan de Cabeiro. En Vilar estará no aparcadoiro do Centro Cultural a semana do 17 de marzo, e no novo Centro Cultural de Quintela a semana do 24 de marzo. En Saxamonde instalarase na Área Recreativa do Camiño dos Frades, na semana do 31 de marzo. No Centro Cultural de Negros estará a semana do 7 de abril, en Reboreda, na zona do cemiterio, estará na semana do 14 de abril e logo nas inmediacións do CVCD Miñoteira, en Ventosela, a semana do 21 de abril.

O calendario coa localización do punto limpo móbil anunciarase por medio das redes sociais do Concello, e tamén na web municipal www.redondela.gal. Para que a recollida sexa eficaz “é importante separar ben os residuos, polo que en caso de dúbida é mellor consultar nos teléfonos de información”, sinala Villar.

Minipuntos Limpos

Este punto limpo móbil únese aos seis “minipuntos” que xa existen desde hai anos en diferentes rúas de Redondela e Chapela. Estes espazos para reciclar pequenos obxectos como cartuchos, lámpadas, cargadores, pilas ou baterías, están instalados nas rúas Alfonso XII, Ernestina Otero, Ribeira e Santa Mariña de Redondela, e nas avenidas de Redondela e de Vigo en Chapela.

Recollida de residuos voluminosos

Para residuos máis voluminosos como mobles, colchóns ou electrodomésticos, xa existe un servizo de recollida “porta a porta” cun sistema moi sinxelo para os usuarios. Tan só é preciso contactar con Urbaser no teléfono 986 388 111, en horario de 9 a 14 horas, e se lle informará do día e lugar no que pod

O Centro Cultural Recreativo da parroquia de Quintela estreou na entrada das súas instalacións un soportal cuberto.  Deste xeito as instalacións do centro gañan un novo espazo cuberto na entrada, que protexe aos usuarios e usuarias das inclemencias climatolóxicas, tanto do sol como das precipitacións. Trátase dunha instalación realizada en panel sándwich con soportes de aceiro que cubre unha superficie total de 56 metros cadrados. Esta actuación, realizada a conta dos Orzamentos Participativos destinados ás actuacións nas parroquias, foi a elixida polo Consello Parroquial de Quintela. O orzamento ascendeu a 14.852 euros.

A alcaldesa de Redondela, Digna Rivas, xunto cos concelleiros Pedro Villaverde e Alberto Álvarez, visitaron as instalacións acompañados da directiva do Centro Cultural de Quitela para coñecer o resultado dos traballos. Tanto os representantes veciñais como o goberno local manifestaron a súa satisfacción co resultado da obra, coa que o centro gaña “un novo espazo, protexido do sol e da chuvia, o que supón máis comodidade para a veciñanza e permite tamén realizar actividades baixo o soportal”.

O Centro Cultural de Quintela, inaugurado en 2023, é o centro neurálxico da parroquia e funciona como punto de encontro para a vida cultural e social da veciñanza. O parque infantil renovouse e inclúe un espazo biosaudable. A actuación realizada permitiu transformar unha zona infrautilizada nun lugar máis amable, gañando un novo espazo público para facer todas as actividades que precise a veciñanza.

Redondela iniciou este luns os traballos para a substución de todas as marquesiñas de autobús na avenida de Redondela. A actuación, que implica a renovación completa de seis destes elementos, implica un investimento de 61.637,40 euros.

O operativo comezou no Alto da Encarnación, e continuará ao longo da semana en dirección Vigo ata o Centro de Saúde de Chapela. En primeiro lugar retiraranse as marquesiñas actuais e posteriormente instalarse as novas. Os traballos prolongaranse ata a próxima semana.

As novas marquesiñas esstán fabricadas en aceiro con vitrina, e contan cun cerramento traseiro e lateral nun lado fabricado en vidro de 8 mm de espesor. Teñen 3 metros de lonxitude, 1,55 metros de profundidade e unha altura de 2,45 metros. O teito está fabricado en policarbonato de protección con tratamento anti raios ultra violeta, con 8 mm de espesor.

Este renovación das marquesiñas pode provocar algunhas molestias puntuais no tráfico neste tramo da N-552, polo que a Policía Local estará regulando a circulación.

Transformar a contorna do edificio de Don Pancho, que acollerá o futuro Viveiro de Empresas no que xa traballa Zona Franca, é o obxectivo do Concello de Redondela. Trátase dun céntrico espazo da vila, na intersección da Avenida Ernestina Otero e a Rúa Miña, cara ao interior do tecido urbano. O proxecto do goberno de Digna Rivas, que se presentou ao Plan Extra da Deputación de Pontevedra, consiste na remodelación integral do espazo entre os edificios existentes e a praza pública coñecida como “praza da Petanca”. A actuación contempla a creación dun auditorio ao aire libre na parte traseira do edificio de pedra, unha nova praza pública na parte dianteira, e a instalación dun ascensor para salvar o gran desnivel da zona, o que permitirá o acceso á rúa Subida á Estación Vella.

A alcaldesa explica que o obxectivo principal desta actuación é “revitalizar un espazo que actualmente se limita a unha zona de paso para crear unha nova área de esparexemento e convivencia no centro da vila que será un referente urbano”. A instalación do ascensor permitirá resolver “un gran problema de mobilidade nesta zona, conectado de xeito accesible a parte baixa e parte alta, que ten unha elevadísima pendente”. O estudo Naos Arquitectura, encargado de redactar o proxecto, explica que o propósito é “outorgar coherencia e uniformidade a toda a praza e ao espazo situado fronte ao edificio existente”.  A superficie total da actuación é de 2.296 m², cun presuposto de 877.438 euros.

Rivas aclara que se optou por esta proposta para enviar á Deputación de Pontevedra “porque cumpre cos criterios que demanda o ente provincial”. Rivas advirte que se esixen uns requisitos “moi estritos” para poder optar ao Plan Extra “e non vale calquera proxecto”. Por outra banda, esta era a mellor opción  “debido ao escaso prazo que deu a Deputación para presentar actuacións, de tan só 20 días”.

Praza pública renovada

Na zona da praza consérvase a árbore existente e tamén a pérgola cunha parra. O proxecto contempla a instalación de novos pavimentos e vexetación, tanto na parte dianteira como no lateral do edificio de Don Pancho. A praza servirá de antesala a o novo Viveiro de Empresas que xa ten e marcha Zona Franca. Haberá distintas zonas verdes e unha bancada forrada en madeira.  Tamén se engadirán módulos para aparcar bicicletas, papeleiras e nova iluminación. Substituiranse as luminarias existentes por un novas tipo LED de maior eficiencia enerxética, de baixo consumo e gran duración.

Auditorio ao aire libre

Na parte posterior da parcela prevese a construción dunha bancada aproveitando a pendente natural do terreo. Crearanse terrazas para transformar a zona nun auditorio ao aire libre para eventos e actividades promovidas polo Concello. Actualmente o espazo xa se utiliza como escenario para actuacións do Festival Internacional de Títeres. A bancada será de formigón forrada en madeira e materase a vexetación incluíndo novos arbustos e árbores.

Ascensor

Un ascensor de aceiro, vidro e aluminio permitirá salvar o gran desnivel da zona e mellorar a mobilidade. O elevador unirá verticalmente a avenida Ernestina Otero coa rúa Subida á Estación. Nesta parte alta hai un centro de día, unha escola infantil e un centro de fisioterapia, ademais de moitas vivendas. A alcaldesa explica que “agora é moi complicado acceder a pé a esta zona desde o centro da vila, porque a pendente é moi elevada”. A dificultade é maior aínda para persoas con mobilidade reducida “e o novo ascensor porá fin a estes problemas”.

A piques de rematar o Obradoiro de Emprego “Redondela Máis que Bela IV”, xa loce no municipio o gran traballo dos seus participantes. Entre as tarefas realizadas nestes meses na especialidade de “Forestal/Xardinería/Agricultura Ecolóxica”, unha das máis visibles é a das rotondas de Vilavella e Vilar de Infesta.

O bo facer do alumnado-traballador pode apreciarse xa na entrada de Redondela desde as estradas N-550 e N-555. Este punto, onde conflúen o Camiño Portugués e o Camiño da Costa, “recibe agora aos milleiros de peregrinos que pasan por Redondela cun aspecto renovado e atractivo”, sinala a alcaldesa Digna Rivas. A rexedora salienta o excelente resultado deste Obradoiro de Emprego, “que forma a veciñas e veciños para integrarse no mercado laboral, e ao mesmo tempo transforma o noso municipio con obras realizadas con gran profesionalidade”. A glorieta conta agora cun atractivo deseño axardinado. A outra intervención realizouse en Vilar de Infesta, na N-555. Nos dous casos son obras de interese municipal coas que os participantes acadan o Certificado de Profesionalidade de “Actividades auxiliares en viveiros, xardíns e centros de xardinería”.

O concelleiro de Emprego, Antonio Cabaleiro, explica os alumnos-traballadores reciben con este Obradoiro de Emprego unha titulación oficial “que lles será de gran utilidade á hora de atopar emprego”. O edil lembra que tanto os participantes da especialidade “Forestal/Xardinería/Agricultura Ecolóxica” como os de “Carpintería de Ribeira” están a piques de rematar a súa formación e comezarán a busca de emprego. Cabaleiro fai un chamamento ás empresas destes sectores para que teñan en conta que se precisan facer contratacións “aquí poden contar con persoal moi cualificado”.

No caso da especialidade “Carpintería de ribeira” o seu traballo ten tamén moi repercusión no municipio, xa que se encargaron da restauración do histórico bote Manuel. A embarcación, cun século de antigüidade, loce agora na entrada do museo Meirande. O alumnado-traballador, ademais de formarse nesta especialidade tradicional, tamén aprendeu os procedementos de reparación de embarcacións deportivas e de recreo utilizando fibra de vidro, resinas e catalizadores.

A praza do Concello de Redondela acolleu este mediodía o acto institucional co gallo da conmemoración do 25N, o Día Internacional da Eliminación da Violencia contra as Mulleres.

A concelleira de Igualdade, Iria Vilaboa. lembrou que no que vai de ano son xa 41 as mulleres asasinadas en España, 4 delas en Galicia. Advertiu tamén que “unha de cada tres mulleres son vítimas de violencia física ou sexual alo menos unha vez vida, e o risco é maior entre as mozas”.

A lectura da Declaración Institucional correu a cargo de Mar Núñez e usuarias e usuarios das asociacións Lenda e Andaina. Un texto que fai referencia ao lema da campaña polo 25N do Concello “Sempre hai saída”, unha alegoría que busca ser unha porta aberta á liberdade.
A escritora Arancha Nogueira e a artista Neves Seara realizaron unha simbólica performance na que reflicten as ataduras e dor que sofren as mulleres vítimas da violencia machista e da que poden saír con axuda. Esta intervención artística pretende ser un berro “polas que non poden falar”. A voz de Mar Núñez deu voz a varios poemas do libro “No camiño do Vento”, de Sesé Mateo.

A alcaldesa, Digna Rivas, foi a encargada de pechar as intervencións. Advertiu no seu discurso que “a violencia machista existe, e non retrocede” cunhas cifras de vítimas que so “arrepiantes”. Rivas reafirmou “o compromiso do goberno local coa erradicación da violencia de xénero” ao tempo que pediu o compromiso de todas as administracións e toda a sociedade “porque só remataremos con este tipo de violencia traballando unidos”. Puxo o foco na necesidade de avanzar “na prevención e a educación para acabar coas desigualdades”, e lembrou que desde o Concello de Redondela trabállase “todos os días do ano para erradicar a violencia machista en todas as súas formas”.

Un gran lazo humano violeta encheu a praza do Concello como símbolo da loita contra a violencia machista. Participaron escolares do CEP Santa Mariña e usuarios e usuarias de Lenda, Andaina, Cogami e centros día Cortizos e Cesantes, ademais de grupos políticos e veciñanza en xeral. Logo a porta violeta que representa o lema da campaña do Concello polo 25N “Sempre hai saída” encheuse coas mensaxes que os asistentes foron engadindo. Rematadas actividades na praza do Concello, realizouse a ofrenda floral no Salgueiral, ante a árbore ginkgo biloba na memoria das vítimas.

As actividades co gallo do 25N continuarán o xoves día 28 ás 18.00 horas co contacontos “Aitana e a avoa, e outros contos violetas”. Será no multiúsos do Piñeiral, en Chapela, con Soraya Lema. A actividade está dirixida a crianzas a partir dos 3 anos.

Recursos para as vítimas

A porta violeta e o lazo humano foron unha proposta dos Servizos Sociais Municipais que se sumou á programación do CIM. Lembrar que o Centro de Información á Muller de Redondela é un recurso que está a disposición de todas as vítimas de violencia machista. O 016 é o teléfono de información e asesoramento para casos de violencia de xénero. É gratuíto e non se reflexa da factura telefónica, pero é necesario borralo do historial de chamadas do terminal.