O vindeiro sábado 18 de xaneiro, o IFEVI será o escenario da sétima edición do Concurso de Rondallas, organizado pola Federación de Rondallas da Área Metropolitana de Vigo co apoio da Xunta de Galicia e a Deputación de Pontevedra. Máis de 1.200 rondalleiros e rondalleiras de 14 agrupacións do sur da provincia de Pontevedra daranse cita neste emblemático evento, que combina música, coreografía e tradición.
A orde das actuacións será a seguinte: Rondalla da A.V.C.R. San Mamede de Zamáns (Vigo), Rondalla Círculo Recreativo e Cultural de Torroso (Mos), Rondalla do C.S.C.R. de Beade (Vigo), Asociación Rondalla O Mosteiro de Pexegueiro (Tui), Asociación Cultural Musical Rondalla de Pontellas (O Porriño), Rondalla da Asociación Recreativa Santa Eulalia de Atios (O Porriño), Rondalla Círculo Cultural e Deportivo Santa Eulalia de Mos (Mos), Rondalla do Centro Cultural Recreativo e Deportivo Helios de Bembrive (Vigo), Rondalla Nosa Merced de Chaín (Gondomar), Rondalla Asociación Cultural e Social de Herville (Mos), Asociación Club Rondalla Santiaguiño de Guizán (Mos), Rondalla C.C.A.R. de Valladares (Vigo), Rondalla Asociación de Veciños Galiñeiro de Vincios (Gondomar) e Rondalla Santiago de Parada (Nigrán).
Cada agrupación contará cun máximo de 12 minutos para amosar o seu traballo, tanto a nivel musical como na posta en escena. Nesta edición, o evento inclúe un formato competitivo, cun xurado dividido en dous grupos: un valorará o rendemento musical das rondallas, e outro avaliará o labor dos abandeirados que as acompañan. Os tres primeiros clasificados en ambas categorías recibirán premios económicos, mentres que o cuarto e quinto postos serán recoñecidos cunha mención especial.
As entradas están dispoñibles a un prezo simbólico de 3 euros e poden adquirirse nas sedes das rondallas participantes e noutros puntos de venda nas localidades implicadas. No propio IFEVI, as entradas que queden dispoñibles venderanse a partir das 15:00 horas o día do evento. O aforo será limitado e os asentos ocuparanse por orde de chegada. Posuír entrada garante o acceso, pero non un lugar sentado.
O evento contará ademais cunha singularidade: será o escenario dunha rodaxe cinematográfica. O recoñecido director Daniel Sánchez Arévalo gravará escenas para a súa próxima película, titulada Rondallas, en colaboración coa produtora Bambú Producciones. Un comunicado impreso nos billetes e no cartel do evento informa aos asistentes da gravación e solicita o seu consentimento para a posible inclusión da súa imaxe ou voz no filme.
O presidente da Federación, Serafín Rodríguez, anima a veciñanza a participar nesta festa cultural: “Esta cita anual permite manter viva unha tradición tan arraigada no sur da provincia e compartir a paixón polo traballo das rondallas co público que cada ano enche o recinto feiral”.