Venres, 9 Maio de 2025

Mondariz organiza un taller de defensa persoal para mulleres

Redacción
-
0
Mondariz organiza un taller de defensa persoal para mulleres

Este sábado, 23 mulleres aprenderán as ferramentas básicas da autodefensa en Mondariz. O taller, organizado polo Concello de Mondariz e dirixido exclusivamente a mulleres, será impartido por Felipe Meana, director técnico do club deportivo SKM, e Marietta Sacristán, instructora do mesmo centro.

Estes profesionais, con experiencia en violencia de xénero, tratarán de recrear de xeito realista situacións incómodas que poidan sufrir as mulleres, co obxectivo de axudar a identificar riscos e facer fronte a posibles agresións.

Este taller gratuíto, que terá lugar o sábado en horario de mañá na aula da Biblioteca Pública Municipal ‘Xoan Xosé Pérez Labaca’, espertou un enorme interese entre a poboación feminina tras ser anunciado na páxina oficial do Concello de Mondariz en Facebook.

As prazas, limitadas a 23, foron reservadas rápidamente. Das mulleres inscritas, 12 son de Mondariz, 5 de Vigo, 4 de Ponteareas e 2 de Salvaterra de Miño.

Nas próximas semanas está previsto que se informe doutro taller de defensa persoal dirixido á mocidade e co mesmo equipo profesional ao fronte. Estas actividades, segundo o Concello de Mondariz, “reflicten a liña de traballo da Concellería de Igualdade e Mocidade do Concello de Mondariz”, creada polo novo equipo de goberno (BNG-PSOE).

Ponteareas reafirmase na súa aposta pola igualdade

Redacción
-
0
Ponteareas reafirmase na súa aposta pola igualdade

A concellería de Benestar Social e Igualdade, que dirixe Verónica Carrera, informa que xa está na rúa o boletín do CIM de setembro, que leva un ano publicándose por iniciativa desta concellería e no que se poderán informar dos cursos, obradoiros, actividades, formación formal e un longo etc de accións en prol da igualdade e nas que as mulleres son as protagonistas. 

O Boletín recolle todas as iniciativas nas que poden participar tanto en Ponteareas como nos concellos da contorna. 

Todas e todos os que queiran recibir este boletín ou información de interese do CIM (Centro de Información á Muller) pode enviar un correo electrónico a [email protected] para subscribirse á lista de distribución. Tamén se pode solicitar ou enviar información sobre actos e actividades neste mesmo enderezo electrónico.

“

A concellería de Igualdade informa que todos as persoas que queiran recibir o boletín informativo do CIM en prol da igualdade poden solictalo

Verónica Carrera aproveita para recordar á cidadanía o horario de atención do CIM de luns a venres de 9 a 15 horas. Entre algúns dos servizos que ofrece o CIM está a atención psicolóxica, xurídica, axente de igualdade ou traballadora social. Calquera persoa interesada pode contactar co CIM no teléfono 986 644 653.

O boletín pode descargarse nesta ligazón. 

Mos abre expediente sancionador “por infracción moi grave” á empresa de recollida de lixo

Redacción
-
0
Mos abre expediente sancionador “por infracción moi grave” á empresa de recollida de lixo

O Concello de Mos vén de informar que, ante as deficiencias detectadas nas últimas semanas no servizo de recollida de lixo por mestura no mesmo camión dos residuos orgánicos procedentes dos colectores verdes, cos plásticos e envases lixeiros depositados nos amarelos, así como o papel e cartón dos azuis, a administración local abriulle á empresa concesionaria do servizo, Urbaser, un expediente sancionador por infracción moi grave.

Os informes periódicos que a enxeñeira municipal realiza para controlar a correcta prestación do servizo constatan as deficiencias.

Ademais a alcaldesa, Nidia Arévalo, e o concelleiro de Recollida de Residuos, Gonzalo Alonso, xa se reuniron con responsables da empresa para abordar este tema que os representantes municipais consideran “de máxima prioridade”.

“

Nas últimas semanas a recollida selectiva non se estaba a facer adecuadamente e mesturábanse residuos orgánicos, cos plásticos e envases lixeiros e papel e cartón

A postura do Concello é a de esixirlle a Urbaser a subsanación das deficiencias na recollida selectiva e a garantía de que non se volvan producir, so pena de ser obxecto de medidas máis drásticas chegando incluso a poder producirse a rescisión do contrato se a situación perseverase e fose necesario.

Ademais dende a administración local reclamóuselle á empresa un informe no que se especifique en detalle todo o lixo recollido e reciclado en Mos no último ano, con rexistros de depósito en Sogama que certifiquen a súa veracidade.

Segundo o Concello de Mos, Urbaser “aportou xa un informe e comunicoulle ao Concello de Mos que as deficiencias na recollida selectiva que se viñeron producindo nos últimos días foron producto dunha mala praxis por parte da plantilla que se considera unha falta moi grave e que, polo tanto, veñen de iniciar unha investigación para indentificar ao traballador ou traballadores responsables e abrirlle o pertinente expediente”.

Obradoiro de ‘cociña verde e superalimentos’ e xornada de micoloxía na Guarda

Redacción
-
0
Obradoiro de ‘cociña verde e superalimentos’ e xornada de micoloxía na Guarda

A Omix da Guarda organiza para os meses de outubro e novembro novas actividades nas que se inclúen un Obradoiro de Cociña Verde e Superalimentos e unha Xornada de Micoloxía.

O Obradoiro de Cociña Verde e Superalimentos terá lugar os venres en horario de 18:00 h a 20:30 h dende o 18 de outubro ata o 15 de novembro, cun custe de 35 € por persoa.

As inscricións para estas dúas actividades están xa abertas na OMIX da Guarda no teléfono 986 610 000 ext. 7 ou no enderezo electrónico [email protected]

A Xornada de Micoloxía terá lugar un sábado do mes de novembro, aínda por decidir, con saída ao monte pola mañá e pola tarde.

Alberte Momán, «1[14]1»

Redacción
-
0
Alberte Momán, «1[14]1»

Alberte Momán presentou meses atrás o seu novo proxecto, un poemario que responde ao enigmático título de «1[14]1». Trátase dun texto de ambientación distópica e contido case filosófico, que podería ter o desarraigamento do individuo como telón de fondo.

Máis ca poemario deberiamos cualificalo como prosa poética, tanto pola súa disposición como polo contido narrativo que se aprecia na súa lectura. Conta ademais cun prólogo a cargo de Henrique Dacosta que aporta algunhas claves máis ca interesantes para comprender mellor este libro, así como toda a poética de Momán.  

O texto está dividido en tres partes ou capítulos, sendo a primeira, «Exilio», a máis longa. Neste fragmento, o autor fálanos das vivencias e reflexións dun eu poético, protagonista de todo o relato, que vive afastado do grupo social ao que pertence e ao que critica con dureza por provocar ese afastamento. Non debemos entender estas palabras nun sentido puramente físico, pois o exilio do que falamos ten máis de aillamento psicolóxico, de falla dun sentimento de pertenza á colectividade e dunha relativa resignación fronte a tal situación, malia que ten relevancia no relato a carencia dun espazo fíxico ao que aferrarse e a habitabilidade imposta nun “non lugar” no que o protagonista se atopa. Falamos, entón, dun exilio non voluntario, senón provocado por ese grupo social ao considerar ao noso protagonista como algo alleo a eles. As razóns poden ser interpretadas de diversas maneiras durante a lectura, polo que o alicerce narrativo que domina todo o texto é tan diverso como se queira, o que lle dá a «1[14]1» unha profundidade moito maior. Unha longa viaxe introspectiva ao pasado do protagonista, tan habitual na poesía de Momán, complementa este capítulo.  

A segunda parte é a que dá título a todo o libro, «1[14]1», e está integrada só por catro poemas. Neste caso, o eu poético muda e a protagonista será unha muller que responde a ese nome en clave e que, dende o alto dun dos muros virtuais sobre os que se nos presentou o exilio do protagonista (que 1[14]1 comparte), reclama a integración no grupo de todos os membros que se sintan aillados ou, por explicalo mellor, arenga sobre a irmandade dos individuos e a necesidade de evitar que se produzan os exilios dos que se falou na primeira parte. Para iso, reivindica o amor como a ferramenta máis axeitada.  

O texto remata cunha terceira parte titulada «Poesía [Ficción]», na que os dous protagonistas dos fragmentos anteriores se atopan nunha sorte de viaxe interdimensional. Carentes ambos dun arraigamento físico, dun lugar ao que sentir que pertencen, procuran xuntos ese espazo que lles faga percibir un mínimo apego. E farano renunciando para sempre a calquera tipo de sometemento e de estigmatización, rebelándose contra un entorno inhóspito e exhibindo o seu propio exilio como ferramenta para reconstruirense nun novo eu poético.  

Un texto, como vemos, de contido que roza o metafísico, interpretado nunha prosa (poética) de grata lectura e de fácil absorción. E iso sempre é de agradecer neste tipo de textos nos que o autor se ispe completamente coa intención de exhibir para nós o máis fondo do seu ser.

Alberte Momán

1[14]1

Belagua

104 páxinas

Despois dos callos, volve o Pincho Folk a Salceda

Redacción
-
0
Despois dos callos, volve o Pincho Folk a Salceda

Tralo enorme éxito acadado os anos anteriores, vense de presentar en Salceda de Caselas a VII Ruta Pincho Folk, que se vai celebrar durante os venres e sábados do 6 ao 28 de setembro (ambos incluídos). Un total de 15 establecementos van participar na ruta, repartidos en duas rutas: venres e sábados. Nos locais serviranse pinchos ao prezo de 1,50 € en horario de 20:00 a 23:59.

Unha das claves do éxido do Pincho Folk de Salceda dende o seu nacemento, é o feito de engadir a música tradicional á propia ruta de pinchos. A música está aberta á participación de todas e todos os músicos que queiran participar como gaiteiros/as, pandeireteiros/as ou músicos/as en xeral que desexen asistir e pasar unas boas noites de foliada na compaña da mellor gastronomía.

A clientela que deguste os pinchos en diversos locais entrará no sorteo de interesantes premios como circuítos termais, lotes de productos ou cheques en efectivo.

Para elo non teñen máis que recoller as tarxetas de participación nos establecementos hosteleiros e ir cubríndoas en cada un dos locais visitados. Tamén os/as hosteleiros/as optarán ao Pincho de Ouro elexido pola clientela e aportado por ACISA.

“

15 establecementos hosteleiros participarán no evento acompañados dos grupos de música tradicional de Salceda e arredores.

O proxecto organízase conxuntamente entre o Concello e o sector hosteleiro, para o cal se levaron a cabo diversas reunións dos hosteleiros e hosteleiras con Verónica Tourón, concelleira de Comercio, e Alex Rodríguez, concelleiro de Cultura, encargados da coordinación que aproveitaron a ocasión para convidar aos diferentes grupos de música tradicional a participar no evento.

O certo é que as diferentes iniciativas levadas a cabo dende o Concello de Salceda de Caselas orientadas aos colectivos de música tradicional están a conseguir sempre unha elevada participación, nun Concello especialmente dinámico e con un amplo e consolidado tecido asociativo sempre disposto a colaborar neste tipo de actividades.

Loli Castiñeira, Alcaldesa de Salceda, definiu o evento como una importante iniciativa para dinamizar o pobo e sobre todo os establecementos hosteleiros.

“Pensamos –explicou a rexedora local– en seguir organizando este tipo de eventos que apoien ao comercio local, neste caso á hostelería. A iniciativa do pincho folk foi prantexada dende o Concello fai xa sete anos e estamos moi satisfeitos coa acollida que tivo por parte dos diferentes establecementos e coa colaboración obtida dende o primeiro momento”.

Amelia Tiganus ofrece na Guarda un relatorio sobre ‘Violencia Sexual Comercial’

Redacción
-
0
Amelia Tiganus ofrece na Guarda un relatorio sobre ‘Violencia Sexual Comercial’

O vindeiro venres día 13 de setembro o Centro Cultural da Guarda acollerá un relatorio sobre Violencia Sexual Comercial a cargo de Amelia Tiganus e no que colabora o CIM (Centro de Información á Muller) da Guarda. O acto, que terá lugar ás 20:00 h, tratará sobre os Avances e retos de futuro na loita contra a trata e explotación sexual de mulleres e nenas.

En tempos de globalización e neoliberalismo, a explotación da sexualidade feminina convertiuse nunha industria, unha das máis puxantes a nivel mundial. A cuarta onda do feminismo ten no centro da súa axenda a violencia sexual incluíndo dentro da mesma a prostitución e a pornografía.

Tendo ese marco presente, no relatorio, Amelia Tiganus combinará a teoría feminista e o marco legal, cunha análise crítica desde a experiencia vivida e sentida. Desgranará os intereses xeopolíticos que hai ao redor de legalizar a “trata con fins de explotación sexual en España”, deixando ao descuberto todos os actores do sistema prostitucional, e analizará o papel da demanda no mantemento da explotación sexual de mulleres e nenas

Os obxectivos deste relatorio son (re)pensar sobre a implicación e tolerancia social que existe ao redor da mercantilización do corpo das mulleres e nenas e as graves consecuencias que supoñen sobre a saúde física e psicolóxica das mesmas, así como identificar e incluír nos debates aos demais actores que inflúen e pechan o círculo desta realidade.

Como parte adxacente a isto, analizarase a importancia da coeducación e dos valores transmitidos a través da ensinanza e dos modelos familiares, culturais, sociais e políticos.

Para iso, na Guarda contarase co relato de quen convertiu a loita feminista no sentido da súa vida despois de ter sido vítima de trata e explotada sexualmente durante cinco años nos prostíbulos españoles. Coraxe, empoderamento, resiliencia e militancia feminista: claves para converterse en suxeito político.

“Son unha privilexiada por moitas razóns pero principalmente por poder pensar. Pensar paréceme un acto de rebeldía”, explica Amelia Tiganus.

“Algo tan humano como iso foime arrebatado –como a moitas mulleres– a través da violencia simbólica, a violencia psicolóxica, a violencia física, a violencia económica, a violencia sexual, a violencia institucional, a violencia sociocultural… As putas somos atravesadas por todas as violencias. Puiden despertar de aquela sensación de estar morta en vida o día que descubrín que a miña historia non era algo persoal senon a historia de moitas mulleres; a historia de mulleres que o patriarcado pon a disposición dos homes de maneira pública. E empecei a pensar, a indagar, a encontrar respostas, a perder o medo e a vergonza e a sentirme na obriga ética de actuar. Porque eu puiden saír dese campo de concentración que é a prostitución pero millóns de mulleres siguen alí, sufrindo a pérda de identidade, a tortura física e psicolóxica, o medo, o descoñecemento, o silencio, a indiferencia, o esquecemento e o desamparo do Estado proxeneta e da sociedade cómplice.”

Sobre Amelia

Amelia Tiganus é una activista feminista , nacida o 11 de marzo de 1984 en Galati, Rumanía. Vive en Euskadi, a súa xanela ao mundo desde a que puido reconstruír a súa vida e renacer despois de ter sido explotada sexualmente durante cinco años no Estado español. Publicou varios artigos, de entre os que destaca ‘La revuelta de las putas’,e é formadora en varios cursos e obradoiros de sensibilización e prevención da trata e a prostitución.

Foi coordinadora en feminicidio.net durante tres anos e recibiu varios premios e recoñecementos ao seu labor en pro dos dereitos humanos das mulleres e as nenas. Nos últimos tres anos impartiu máis de 150 relatorios, charlas e obradoiros por todo o territorio español e tamén en Arxentina e Alemaña.

Das súas varias aparicións en televisión, destaca Salvados –Las invisibles, un programa de máxima audiencia da Sexta- onde foi entrevistada en profundidade polo xornalista Jordi Évole. Tiganus deixa claro que: «Non podemos falar de igualdade entre homes e mulleres, nin de xustiza social, nin da sociedade do bo trato mentres exista unha soa muller no mundo explotada sexualmente».

Protección Civil do Val Miñor presenta o seu informe do verán 2019

Redacción
-
0
Protección Civil do Val Miñor presenta o seu informe do verán 2019

“Dende o concello de Nigrán queremos facer público e trasmitir o agradecemento de toda a cidadanía á Asociación de Voluntarios de Protección Civil que fan posible que o verán sexa máis seguro”, declarou hoxe o alcalde de Nigrán na presentación do informe do verán de Protección Civil.

O rexedor local subliñou a a instalación dun novo posto en Panxón “con servizo específico para persoas con mobilidade reducida, os dous vehículos de atención inmediata e unha zódiac e moto de auga dotadas de patrón e socorrista”.

As incidencias máis salientables, segundo o informe de Protección Civil, foron 579 pequenas feridas ou cortes, 23 luxaciones ou fracturas, 116 picaduras de insectos ou 637 picaduras de fanecas.

“A labor e o esforzo de socorristas e protección civil converten os nosos lugares en espazos seguros e protexidos –sinala o alcalde de Nigrán Juan González– e nese sentido seguiremos a traballar e apostar nos próximos anos intentando conseguir máis efectivos e ampliar as datas de traballo dende o 20 de xuño ata o 13 de setembro”.

Atopado o corpo do triatleta desaparecido en augas do Miño

Redacción
-
0

A federación de Triatlo de Portugal, a Federación Galega de Triatlón e Pentatlón Moderno «Pedal’Arte», a Câmara Municipal de Vila Nova de Cerveira e o Concello de Tomiño, veñen de facer un comunicado conxunto tralo achádego do corpo sen vida do triatleta desaparecido en augas do Miño.

COMUNICADO CONXUNTO

O corpo do mozo triatleta desaparecido, desde o domingo, no río Miño, foi encontrado esta mañá, sobre as 08h00, flotando na auga na marxe portuguesa, na zona situada fronte á Piscina Municipal. No transcurso das operacións de vixilancia no terreo, un membro da corporación dos Bombeiros Voluntarios de Cerveira deu o sinal de avistamento do cadáver, sendo inmediatamente accionado un bote do NRP Río Miño, para concretar o rescate do corpo e, posteriormente, encamiñalo cara ao Instituto de Mediciña Legal de Viana do Castelo.

Por ter o suceso acontecido durante a proba de natación do XII Triatlo da Amizade, con organización conxunta, a Federación de Triatlo de Portugal, a Federación Galega de Triatlon e Péntatlon Moderno, a Pedal’Arte, o Concello de Vila Nova de Cerveira e o Concello de Tomiño, manifestan publicamente o profundo pesar pola perda do mozo de 23 anos, enviando as máis sentidas condolencias á familia e amizades.

Tras catro días de operacións de busca intensivas, as dúas federacións, a asociación e ambos gobernos locais, agradecen públicamente todo o dispositivo efectuado, destacando que, baixo coordinación da Capitania do Porto de Camiña e da Comandancia Naval do Miño, realizaron un traballo incansabel ao longo de toda a operación.

Neste momento, solicítase o respecto necesario para que familia e amizades poidan realizar as cerimonias fúnebres coa maior privacidade posibel.

O Ministerio Público xa procedeu á abertura dunha investigación, polo que se agarda á maior brevidade posíbel dispoñer dunha clarificación dos feitos relativos ao suceso.

Prado Surf Escola, 12 anos de dominio no surf galego

Redacción
-
0
Prado Surf Escola, 12 anos de dominio no surf galego

O pasado domingo 1 de setembro Prado Surf Escola proclamábase, por duodécima vez consecutiva, Campión Galego por Equipos no Campionato Galego de Surf que se disputou nas augas coruñesas da praia de Caión.

Durante a fin de semana case 200 deportistas dábanse cita no areal coruñés para competir no Campionato Galego, tanto individual coma por equipos, organizado pola Federación Galega de Surf e Bodyboard. Unha proba que conta co apoio da Xunta de Galicia e Abanca, e que ademais é clasificatoria para o circuíto nacional.

Mara e Derick no campionato de Caión

Os integrantes do Prado Surf Club, fixeron o que nos teñen acostumados: dende as categorías sub 12 ata Open e Master, os e as de Nigrán fixéronse ata con 14 postos gañadores. Entre as vitorias máis relevantes cabe destacar o primeiro posto de Erika Lago en Sub 16 feminino, Manuel Fernández en Sub 16 masculino e Derick Rey que conseguiu o primeiro posto na categoría Master.

Ademais, Prado Surf Escola volveu proclamar Campión Galego por equipos por duodécima vez consecutiva, unha vitoria que, como sinala o propio club “recompensa todo o traballo realizado polo equipo que hai detrás da Escola e especialmente dos adestradores Derick Rey, Pablo Occy, Pedro Aceval, Pablo Romero, Pedro manso, José Dominguez e Antón San Ildefonso.

Hai anos xa que a escola aposta por manter a un equipo forte e sólido para competir tanto nos circuítos galegos como nacionais, ademais dos adestramentos semanais en varias praias das costa galega e portugesa, Prado Surf Club organiza viaxes de perfeccionamento todo o ano ás mellores praias de Francia ou Maldivas.

Os colexios de Ponteareas contarán, por primeira vez, co servizo de Aula Matinal

Redacción
-
0
Os colexios de Ponteareas contarán, por primeira vez, co servizo de Aula Matinal

A concellería de Ensino, que dirixe a tenente de alcalde Cristina Fernández, anunciou hoxe a apertura do prazo de inscrición para a aula matinal dos centros educativos públicos tanto no ámbito urbano como no rural. Será a primeira vez que os centros educativos ponteareáns conten con este servizo que contribúe a mellora da conciliación da vida laboral e familiar.

As familias con nenos e nenas no CEIP Feliciano Barrera, CEIP Santiago de Oliveira e CRA A Picaraña (Areas, Moreira, Pías, Ribadetea, Parada e  Portela) poderán realizar xa a inscrición.

Potenciar o desenvolvemento integral do alumnado tanto no aspecto lúdico como educativo e fomentar valores sociais tales como o compañeirismo, traballo en equipo, coidado do material, actitudes de respecto e tolerancia e dinamizar a través de actividades socioeducativas para incentivar a participación activa e o desenvolvemento de habilidades socias, actitudes cooperativas, democráticas e cívicas, son algúns dos obxectivos da aula matinal.

As familias interesadas poderán acceder ao formulario de inscrición, tanto para o rural como para o ámbito urbano a través da seguinte ligazón da páxina web do concello https://ponteareas.gal/servizos/ensino/aula-matinal/

Tamén poderán obter o formulario de inscrición no departamento de Ensino do concello ou nos centros escolares.

Unha vez cuberta a solicitude deberán entregala ou no rexistro do concello de Ponteareas ou a través da sede electrónica (trámites destacados/instancia xeral).

Con esta iniciativa o goberno de Ponteareas amplía os servizos ofrecidos á cidadanía e da un paso máis na equiparación de servizos ofrecidos á veciñanza das parroquias e do centro urbano.

Cristina Fernández insiste na importancia de apoiar ás parroquias “xa que son a identidade dun xeito de vida propio de Galicia e moi representativo en Ponteareas”.

Afaga e Concello de Redondela poñen en marcha un programa de estimulación para persoas con Alzhéimer

Redacción
-
0
Afaga e Concello de Redondela poñen en marcha un programa de estimulación para persoas con Alzhéimer

A alcaldesa de Redondela, Digna Rivas, e o presidente de Afaga, Juan Carlos Rodríguez, acompañados pola concelleira de Servizos Sociais, Marta Alonso, presentaron esta mañá un Programa de Estimulación Terapéutica para persoas con demencia do que se beneficiarán os veciños de Redondela e Chapela.

O presidente de Afaga, Juan Carlos Rodríguez Bernárdez, presentaba un programa que, como sinalaba, “ten como obxectivo traballar coas persoas no proceso leve da enfermidade para ralentizar o proceso de deterioro”.

O programa, tal e como se explicou no encontro coa prensa, traballará tanto coas capacidades cognitivas coma coas capacidades funcionais. “É un programa que nos lugares no que o temos desenvolvido o funciona moi ben”, aseguraba o presidente de Afaga que explicaba a “outra vertente” da iniciativa “que é a de respiro familiar que unida á de estimulación terapéutica, permite acadar un dobre obxectivo” xa que, recalcou “é preciso ter presente que cando fálase de demencias, sempre se fala do binomio enfermo-coidador/a”.

Pola súa banda, Digna Rivas, amosaba a súa satisfacción polo programa que se estaba a presentar porque, subliñou “Redondela como cuarto concello da provincia, precisa no só destas actividades, senón dunha Unidade Terapéutica de Demencias, que é un dos obxectivos a poñer en marcha”.

Nese sentido, Rivas chamaba a atención sobre o feito de que “outros concellos de menos poboación xa levan anos con este programa de estimulación terapéutica e outros como Mos, O Porriño, Vilaboa, que levan anos con Unidades Terapéuticas de Demencias, unidade da que Redondela carece”.

Digna Rivas aseguraba que apresentación deste Programa de Estimulación Terapéutica “é un primeiro paso, todos os camiños comezan cun primeiro paso, para no vindeiro ano ponernos a traballar na creación desa Unidade imprescindible para Redondela e desenvolver todas as accións precisas que supoñan un beneficio non só para as persoas doentes senón tamén para as súas familias”.

O Programa de Estimulación Terapéutica

O Multiúsos da Xunqueira de Redondela acollerá este Programa de Estimulación Terapéutica os luns e mércores de 10:30 horas a 13:30 horas, mentres que o Multiúsos Piñeiral do Crego, de Chapela, impartirá as actividades os martes e xoves no mesmo horario.

É, destacaba Juan Carlos Rodríguez, un “programa intenso” moi enfodo ás capacidades cognitivas de cada quen e por iso “son grupos de dez persoas máximo para facer unha intervención adecuada”. Traballase, polo tanto, en exercicios para evitar a pérdida de destrezas nas actividades cotiás, exercicios de memoria e axilidade mental, ximnasia para maiores, talleres de cociña e xogos tradicionais, manualidades e musicoterapia.

Un proceso “retardable”

“O alzhéimer non se pode previr, non hai unha vacuna” recalcaba o presidente de Afaga que, porén, sinalaba que o que hai “e a posibilidade de desenvolver actividades que permitan ao paciente ter unha actividade cognitiva suficiente para que o proceso de demencia chegue máis tarde”.

A demencia é a consecuencia dunha enfermidade, puntualizaba Juan Carlos Rodríguez, “e o Alzhémier ten a característica de comezar moito antes de que se manifesten os síntomas, en torno a quince ou 20 anos antes”.

A elevada “elasticidade” do cerebro fai que cando unha área “deixa de funcionar, este busque outras alternativas, pero para buscar esas alternativas alternativas, o cerebro ten que estar activo. Entón cando máis activo estea, maior capacidade de alternativas terá e por iso se pode retardar o proceso” explicaba o presidente de Afaga.

O Goberno porriñés “garante o pagamento a provedores fronte a política de atrancos do PP”

Redacción
-
0
O Goberno porriñés “garante o pagamento a provedores fronte a política de atrancos do PP”

O Goberno Municipal de Porriño co apoio da maioría da corporación “garante o pagamento ós empresarios e proveedores de Porriño fronte á política de atrancos do PP que ainda non asumiu que non gobernará este concello neste mandato”, manifestou Eva García de la Torre, alcaldesa da vila.

De xeito que a maioría da Corporación coa suma de votos de concelleiros do PSOE, EU Son, BNG e grupo mixto (Manuel Carrera) derrotou as propostas do Partido Popular durante a sesión celebrada este mediodía.

Segundo o Goberno de Eva García, o PP pretendía con este pleno extraordinario convocado pola súa iniciativa, “frear os pagos a proveedores e empresas oponiéndose ás mdoficacións de crédito prantexadas”. Asimesmo o PP demandaba ”unha revisión de oficio de toda a facturación dos exercicios 2016, 2017 e 2018 para depurar as irregularidades que se tiveran cometido”, segundo expusou o voceiro Alejandro Lorenzo.

“Iso suporía atrancar o funcionamento do Concello de Porriño durante anos e terminar pagando con xuros o que se debe” respostou Lourdes Moure, concelleira de Fazenda que lembrou o voceiro da oposición “cando vostede estivo no goberno municipal con Nelson Santos aprobaron pagos de facturas por 18 millóns de euros mediante modificións de créditos e recoñecementos extraxudiciais”, sinalou a voceira socialista.

“Unha revisión xeral de oficio da facturación pendente sería unha temeridade” segundo Manuel Carrera mentres que Pedro Pereira e Pedro Ocampo tamén coincidiron en manifestar durante o pleno o seu rexeitamento a unha revisión de oficio “que sería unha temeridade” apostillou o voceiro do BNG. Pola súa banda Ocampo fixo a observación de que na conta 413 “sí se revisarán algunhas das facturas segundo acordamos na comisión informativa”, extremo co que estiveron dacordo BNG e PSOE.

Os concelleiros do PP presentaron votos particulares contra as modificacións de crédito propostas polo goberno municipal. Os votos particulares foron derrotados e as propostas do goberno municipal sairon con 9 votos a favor (PSOE, EU Son, BNG e Carrera) e 8 abstencións (PP).

Unha desas modificacións de crédito, polo tanto aprobada hoxe, por importe de 473.000 euros é para pagar facturas con recoñecemento extraxudicial a dez empresas por servizos e obras. A aprobación da operación garante o pagamento en breve.

A outra modificación é por importe de 1.700.000 euros. O acordo adoptado hoxe pola maioría da Corporación determina a xeneración do crédito para o pagamento a 238 proveedores e empresarios do Concello de Porriño. Agás aquelas facturas que deban ser revisadas segundo o acordó de PSOE, EU Son e BNG. Para as restantes ainda que estará a súa ratiticación no seguinte pleno que será o ordinario de setembro.

Outro punto da sesión era a ratificación do contrato coa empresa “Ascan” para a limpeza viaria conforme decidiu hai meses a mesa de contratación. O PP pretendía derogar esa adxudicación alegando supostas deficiencias na prestación e tamén prantexou un voto particular que foi derrotado pola maioría da corporación. Sergio Casal, concelleiro de Medio Ambiente do goberno municipal defendeu a adxudicación que” foi decidida nunha mesa de contratación con catro técnicos sen intervención de políticos”.

A adxudicación a ‘Ascan’ foi ratificada con 7 votos a favor (PSOE, EU Son e Carrera) e 10 abstencións (PP e BNG).

Por último, nesta sesión plenaria quedaron finalmente aprobadas as retribucións da alcaldesa e concelleiros que forman o goberno municipal en réxime de adicación exclusiva, asunto que quedou pendente no pleno municipal do pasado 12 de xullo.

Arbitrariedade no recoñecemento das obrigas de exercicios pechados

Pola súa banda, o portavoz do Partido Popular do Porriño, Alejandro Loreenzo asegurou que “a proposta de Crédito Extraordinario por importe de 1.781.923,54 euros, respaldada hoxe por PSOE, EU SON, BNG e Manuel Carrera, pon de manifesto a arbitrariedade á hora de intentar recoñecer as obrigas procedentes de exercicios pechados que arrastra o Concello do Porriño, que en realidade superan os 5 millóns de euros”.

E é que sendo responsables e sabedores dos incumprimentos constantes da estabilidade orzamentaria, regra do gasto, periodo medio de pago, plan económico financieiro e da imposición da non dispoñibilidade de crédito por valor de 4.870.747,47 euros, o Goberno Municipal continúa omitindo a totalidade da facturación pendente de pago e nula de pleno dereito.

Por este motivo, os populares solicitaban hoxe que a Corporación Municipal recoñecera a obriga de pagar a totalidade do que se debe ás empresas, primeiro realizando a revisión de oficio da facturación irregular para poder elaborar a correspondente proposta de Crédito Extraordinario acompañado dun Recoñecemento Extraxudicial para determinar que se pague a todos os provedores o que se lles debe dende hai anos.

“A rexedora pretende seguir poñendo parches e levando a cabo postas en escena, como a de hoxe no pleno, que non fan máis que acrecentar o problema e dilatar o pago a provedores, para impedir dar conta do que en realidade está a acontecer no Concello”, apuntou Lorenzo, “Agora o fai respaldada por quen hai uns meses, antes das eleccións municipais, denunciaban estas prácticas e as tildaban de inadmisibles”.

O voceiro dos populares lamenta “a manipulación” que a rexedora está a facer dende as redes sociais e gabinete de comunicación do Concello do Porriño. “Está poñendo ao servizo do seu propio interés os medios institucionais , usándoos para engañar á xente”, explica Lorenzo, “Os plenos non se colgan na mediateca para que a veciñanza non poida comprobar o que realmente aconteceu”.

A proposta dos populares, tumbada a pasada sesión polos grupos que apoian á Alcaldesa, incluía a modificación da base 18 que permitiría ao pleno ter competencia para o levantamento de reparo e poder permitir o pago sendo, “esta competencia agora mesmo é da Alcaldesa e está a facer uso arbitrario da mesma e negándose a que o pleno teña capacidade de decisión”.

A revisión de oficio da facturación proposta polos populares ten como fin o pago a provedores coa garantía de que se fai conforme ao prezo de mercado e, entre outras cuestións, que se paga por traballos que se realizaron. “Lonxe de pretender impedir o pago, o que estamos intentando é que se pague a todas as empresas que traballaron para este concello e non só ás que a Alcaldesa decida, como está a facer e como pretende seguir facendo. Existen centos de decretos da Alcaldía ordenando o pago a empresas dunha forma totalmente arbitraria mentres outras continúan e continuarán sen cobrar. É inadmisible”, conclúe Lorenzo.

Nova cata de viños na Casa Cultural de Arcos

Redacción
-
0
Nova cata de viños na Casa Cultural de Arcos

A Casa Cultural de Arcos, como xa ven sendo habitual cada trimestres, acollerá este venres 6 de setembro, ás 21:30 horas, unha nova cata de viños da man de Templum Sensibus Viñoteca. Desta proponse facer un percorrido polos viños das Indicacións Xeográficas Protexidas de Galicia.

A cata inclúe unha cea a base de petiscos variados cun prezo de 18 euros para as socias e socios da Casa Cultural de Arcos e de 20 euros para as persoas que non estean asociadas.

As inscricións poden realizarse na Cafetería da Casa Cultural, en [email protected] ou no 667 816 814. As prazas son limitadas.

Ponteareas promociona as razas autóctonas na Feira Tradicional dos Remedios

Redacción
-
0
Ponteareas promociona as razas autóctonas na Feira Tradicional dos Remedios

A concellería de Cultura e Lingua, que dirixe Fernando Groba, adianta que nesta décimo terceira edición da Feira dos Remedios contarase con colaboracións especiais como a da Asociación de Criadores do Cabalo de Pura Raza Galega (Puraga) e a do Club Can de Palleiro.

Cun renovado enfoque, a Feira Tradicional dos Remedios de Ponteareas quere poñer en valor as razas autóctonas desde un punto de vista funcional. Con tal propósito, contactou coas diferentes asociacións de criadores de razas autóctonas de Galiza e dúas delas amosarán os seus animais no parque da Feira Vella a partir das once da mañá e tamén en horario de tarde co obxectivo de dar a coñecer as nosas razas e destacar a súa valía e características que os diferencian do resto das razas.

Degustación de carne de poldro

A Asociación de Criadores do Cabalo de Pura Raza Galega (Puraga) patrocina, por unha banda, un posto de degustación gratuíta de hamburguesas e chourizos elaborados con carne ecolóxica de poldro.

En segundo lugar, realizará unha descrición morfolóxica dun exemplar de Pura Raza Galega para coñecer, da man dunha das técnicas da asociación, cales son as características que ten que presentar un bo exemplar desta raza equina.

E, en terceiro termo, realizará unha exhibición-demostración do ancestral (Plinio xa falaba del na súa literatura ao falar dos Callaici) e tradicional (foron os animais preferidos para viaxar até a chegada dos vehículos de tracción mecánica) paso de andadura.

Pola súa banda, o Club Can de Palleiro brindaralles aos ponteareáns e ás ponteareás un Monográfico completo sobre este cánido (un concurso morfolóxico) que terá unha duración de dúas horas.

Estes animais, para alén de seren fantásticos compañeiros na vida diaria de calquera persoa, son formidábeis tanto como cans pastores para axudar nas tarefas gandeiras con gando menor (ovellas ou cabras) e maior (vacas ou cabalos) como cans guía para persoas invidentes ou con necesidades especiais.

A Concellería de Cultura agradece a colaboración da Federación de razas autóctonas de Galicia, BOAGA, e a Asociación de Criadores de Gando Celta, ASOPORCEL.

Entre as razas que atoparemos na Feira Vella estarán tamén a vaca rubia galega, frieiresa, caldelá e cachena, a cabra galega, a ovella galega e a galiña de Mos.

A Aula CeMIT da Guarda da a coñecer os cursos para nenos e adultos ata fin de ano

Redacción
-
0
A Aula CeMIT da Guarda da a coñecer os cursos para nenos e adultos ata fin de ano

A Aula CeMIT da Guarda ven de lanzar o calendario coa programación de novos cursos de informática de balde para nenos e adultos para os meses de setembro, outubro, novembro e decembro. Todas aquelas persoas que estean interesadas poden formalizar dende xa a súa inscrición, os cursos serán en horario de mañá e de tarde.

As inscricións están abertas no Concello ou no Centro Cultural(1º andar), chamando ao 986 611850 ou no enderezo electrónico [email protected].

Destacan na programación de cursos os de Informática para nen@s, mecanografía, redes sociais para maiores, administración electrónica, follas de cálculo ou o de informática para adultos.

Todos os cursos son de balde, destacando tamén que a Aula CeMIT da Guarda dispón de conexión aberta a internet para facer consultas.

Sobre a Rede CeMIT

A Rede de Centros para a Modernización e a Inclusión Tecnolóxica de Galicia, Rede CeMIT da Xunta de Galicia, configúrase como un importante vehículo para a posta en práctica de iniciativas orientadas a impulsar as TIC e a Sociedade da Información na nosa comunidade e tamén das políticas de goberno en áreas como a empregabilidade, competitividade empresarial, e-inclusión, benestar e a e-Administración.

O concello da Guarda manten a aula CEMIT en funcionamento gracias a un técnico contratado a través da liña 3 do plan concellos da Deputación de Pontevedra, de fomento de emprego. Aínda que a aula de informática está integrada na rede CEMIT, o concello non recibe ningunha subvención da Xunta de Galicia

Conformada por unha serie de aulas públicas de acceso libre e de balde, dotadas de avanzado equipamento informático, audiovisual e multimedia, contan con acceso a Internet e abarcan a totalidade das comarcas de Galicia.

O goberno de Nigrán reafírma o seu compromiso co tecido asociativo do municipio

Redacción
-
0
O goberno de Nigrán reafírma o seu compromiso co tecido asociativo do municipio

O Concello de Nigrán ven de conceder 45.000 € as entidades deportivas, culturais e veciñais. O Concello de Nigrán realizou un ano máis a convocatoria co obxecto de apoiar o desenvolvemento de programas ou actividades das entidades e que complementan a programación dos servicios municipais e que se realizan con carácter público en Nigrán durante o ano 2019.

Para as actividades de fomento da práctica deportiva concedéronse 22.000 € a 15 entidades e 5.200 euros a outras 11 no apartado de fomento do deporte; destínanse 7.300 euros a cinco entidades culturáis e 10.000 euros a 8 entidades polo fomento do Asociacionismo.

“Para o goberno de Nigrán é un compromiso e unha convicción apoiar ás entidades que co seu traballo fan posible un municipio onde o deporte, a cultura e o asociacionismo sexan unha prioridade”

Coa mesma intención de facilitar o traballo ás asociacións veciñáis vense de asinar hoxe 2 de setembro un convenio para que a Asociación de Veciños ‘A Irmandade’ de Priegue use a a antigua escola unitaria, pechada dende hai anos.

“

“Fomentar as actividades culturais, deportivas e veciñáis é un obxectivo fundamental deste goberno, dotar de espazos dignos ás asociacións que defenden os intereses dos cidadáns, unha prioridade”, declara Juan González

Á rehabilitación da escola redistribuíu o seu espazo para facer dúas novas estancias, una para oficina e outra para aseo adaptado, ademáis de manter unha zona para espacios comúns. Dotouse tamén de nova instalación eléctrica e de fontanería, novos solados e alicatados e completo pintado. Finalmente, a cuesta de acceso conta cunha baranda de aceiro inoxidable e rectificouse a súa pendiente para que resulte accesible.

A remodelación integral da vella escola unitaria complentouse coa creación una zona de parque infantil e mobiliario urbano e a imnstalación dunha pista multideportes e unha cancha de petanca de 3×14 metros.

“Con este proxecto damos respuesta a unha antigua demanda coa que queremos respaldar e facilitar o traballo da Asociación de veciños ‘A Irmandade’ e por outra bandqa por en valor este lugar para que sexa un verdadeiro punto de encontro da parroquia no que nenos e maiores se sintan a gusto e nun espazo seguro e de convivencia”, sinala o alcalde, Juan González.

‘Camiños Converxentes’, exposición de fotografía de Pily Reñones en Tomiño

Redacción
-
0
‘Camiños Converxentes’, exposición de fotografía de Pily Reñones en Tomiño

O Concello de Tomiño organiza, para as Festas do Alivio 2019, unha interesante exposición da fotógrafa tomiñesa Pily Reñones, mostra que leva por título ‘Camiños Converxentes’ e que estará aberta ao público entre o 7 e o 30 de setembro no primeiro andar do Mercado Municipal. ‘Camiños Converxentes’ será inaugurada, oficialmente, o sábado ás 12 horas.

Pily Reñones foi nomeada aos premios Goya de Fotografía (da Asociación de fotógrafos profesionais de Zaragoza) pola fotografía ‘Holanda’, na que a autora retrata a unha anciana da localidade ourensá de Riós.

Recentemente, o Concello celebrou unha homenaxe á fotógrafa, durante a cal esta fixo entrega á alcadesa de Tomiño dunha copia enmarcada da devandita fotografía.

Comandancia Naval do Miño e Capitanía de Porto de Caminha continuan coa procura do mozo desaparecido en augas do Miño

Redacción
-
0
Comandancia Naval do Miño e Capitanía de Porto de Caminha continuan coa procura do mozo desaparecido en augas do Miño

Continúan os labores de procura do mozo portugués de 23 anos que desapareceu a tarde do domingo pasado durante a proba de natación do Tríatlon dá Amizade, que se desenvolvía entre a Parroquia de Goian, no municipio de Tomiño, e Vilanova de Cerveira, na marxe portuguesa do Río Miño.

A Armada Española, a través da Comandancia Naval do Miño e a Marina Portuguesa a través da Capitanía de Porto de Caminha, lideran o dispositivo de procura e están a coordinar os medios na zona.

No día de onte, empregáronse nunha ampla zona os equipos de detección subacuática e realizáronse inmersións nun período de 4 horas, mentres a corrente permitíao. Investigáronse visualmente ata 15 obxectos mergullados descartándose todos eles.

Ata o momento a procura foi infrutuosa. Ao obxecto de prolongar no tempo as tarefas e ampliar a zona de procura, axustouse a diversidade de medios dispoñibles.

Redondela aposta pola difusión da cultura galega

Redacción
-
0
Redondela aposta pola difusión da cultura galega

O Concello de Redondela, logo de distribuír entre a veciñanza e bibliotecas municipais exemplares do libro Estirpe, de Xosé L. Méndez Ferrín (reeditado este ano por iniciativa municipal), vén de remitir esta obra, tan importante para a literatura contemporánea, a varias bibliotecas de Galicia que carecían dela.

Foron arredor de vinte bibliotecas municipais, de toda Galicia, as que recibiron este agasallo: Lalín, Rianxo, Ribadeo, Monforte de Lemos, Riveira, Celanova…

Con esta iniciativa, o Concello de Redondela reafírmase no seu compromiso coa cultura e lingua galegas como un sinal de identidade da vila.

Ademais, reiteran dende o Servizo de Normalización Lingüística, é necesario que dende a Administración local foméntese un circuíto de distribución de libros promovidos polos concellos e que están, en ocasións, en caixas sen saída nin mellor sorte.

A nova dirección do CEIP ‘Nosa Señora dos Remedios’ fomentará a autonomía do alumnado

Redacción
-
0
A nova dirección do CEIP ‘Nosa Señora dos Remedios’ fomentará a autonomía do alumnado

A tenente de alcalde e concelleira de Ensino, Cristina Fernández, reuníuse na mañá de hoxe co novo director do CEIP Nosa Señora dos Remedios, José Ángel Penas Tallón, para estudar as necesidades e apoios que o centro escolar precisará neste curso que comeza 2019/2020.

Cristina Fernández aproveitou para darlle a benvida ao novo director que asume por vez primeira a dirección dun centro educativo logo de levar xa oito anos consecutivos asumindo a ensinanza de mestre de educación física neste centro escolar.

Nativo de Lugo pero xa afincado en Ponteareas, José Ángel Penas toma o relevo do anterior director Regino Garrido Figueiras que nos últimos doce anos asumíu a dirección do centro deixando, segundo Penas “un listón alto que tentaremos manter”.

O director do ‘nº 1’ asume o seu novo cargo, que compatibilizará co de profesor de educación física nos curso 5º e 6º de primaria, con ilusións e propostas enriba da mesa xa encamiñadas. No mes de xullo, Penas Tallón xa se reuníu co concelleiro de Tráfico e Mobilidade, Roberto Mera, para comezar a traballar na creación de rutas seguras de acceso en bicicleta ao centro escolar.

“Queremos fomentar entre o alumnado e entre a comunidade educativa en xeral, os desprazamentos sostibles e seguros así como os hábitos de vida saudables por iso estamos a poñer en marcha o proxecto de tramos urbanos nos que se conte cun espazo seguro para o desprazamento do alumnado en bicicleta. Un feito que ademais promove a autonomía dos cativos e cativas”, explica o director.

Ademais, trasladou á concelleira de Ensino a súa intención de promover os desprazamentos a pé coa sinalización e demarcación de tramos específicos para o tránsito de escolares.

Director e concelleira percorreron as instalacións para avaliar os traballos realizados e os que están pendentes.

Ao igual que nos anteriores comezos de curso, Cristina Fernández manterá distintas reunións con todas as directivas dos centros escolares, dando tamén a benvida nos vindeiros días á nova directora do CEIP Feliciano Barrera de Guláns.

‘Mercadiyo’ de Sabarís, “o que a ti che sobra, outros o necesitan”

Redacción
-
0
‘Mercadiyo’ de Sabarís, “o que a ti che sobra, outros o necesitan”

A avenida Julián Valverde de Sabarís acolleu na mañá de hoxe a presentación da segunda edición do rastro familiar ‘Mercadiyo’, festa da reciclaxe, que o pasado ano, na súa estrea, acadaou un notable éxito tanto de participantes como de público.

Baixo o lema “o que a ti che sobra, outros o necesitan” ao redor de 60 participantes expoñerán nos seus postos todo aquilo que se adoita gardar nos desváns. Entre os ‘tesouros’ que se poderán descubrir este domingo, 8 de setembro, na Avenida Julián Valverde de Sabarís, están pezas de roupa, accesorios, aveños domésticos, obxectos persoais… en resumo, todos aqueles elementos que, habitualmente, se teñen nas casas e xa non se utilizan, “pero poden ter unha segunda vida en mans doutra persoa”, sinalan dende a organización.

Esta segunda edición do ‘Mercadiyo’ conta coa colaboración da Deputación de Pontevedra e do Concello de Baiona, que acolleron con gran entusiasmo o evento organizado pola Asociación de Empresarios e Comerciantes do Val Miñor (OVALMI) e a Asociación de Comerciantes e Empresarios de Sabarís (COEMSA).

Desde as 11 h ata as 21 horas unha infinidade de actividades paralelas, para todos os públicos, encherán a rúa. Instalaranse catro escenarios ao longo da avenida e cada un deles acollerá unha actividade.

Os materiais reciclados, a repostería e a música serán os tres alicerces sobre os que se sustentarán as actividades. Poderase gozar de talleres con materiais reciclados, talleres de repostería, música, concertos…

Este ano o Mercadiyo vira contorna a diferentes culturas, ‘4 escenarios …. 4 culturas’. Con isto, a organización busca mostrar a gran diversidade cultural que nos rodea, polo que animan “a quen desexe participar neste encontro intercultural, a poñerse en contacto con OVALMI”.

“O vindeiro domingo poderase gozar dunha bonita xornada de ambiente familiar e educativo na que os máis pequenos e os mozos poderanse concienciar da prolongación da vida útil das cousas, unha práctica que un tempo pasado era bastante común e que cada vez está máis en desuso”, conclúen os organizadores deste ‘II Mercadiyo’.

A Xunta colabora con Mos no ‘Festival Demostra’ de cultura urbana

Redacción
-
0
A Xunta colabora con Mos no ‘Festival Demostra’ de cultura urbana

A Xunta de Galicia colabora co Concello de Mos na organización do Festival Demostra de cultura urbana. A conselleira de Política Social, Fabiola García, xunto coa alcaldesa Nidia Arévalo, e a directora xeral de Xuventude, Participación e Voluntariado, Cristina Pichel, participou na presentación deste evento que terá lugar o vindeiro sábado.

Fabiola García salientou o firme compromiso que ten a Xunta de Galicia coa mocidade, por iso colabora con eventos como este que contará con obradoiros de grafitti, beatbox ou skate, exhibicións de baloncesto ou BMX e un concerto de rap. O Goberno galego destina 8000 euros á celebración desta cita que acada a súa segunda edición.

[su_image_carousel source=”media: 5708,5707,5706″ crop=”16:9″ link=”lightbox”]

Así mesmo, a conselleira de Política Social anunciou que tamén se instalará, en colaboración con Abanca, unha carpa informativa sobre as vantaxes do Carné Xove. Esta tarxeta, dirixida a persoas de entre 12 e 30 anos de idade, ofrece descontos e ofertas especiais en máis de 3000 establecementos adheridos ao programa en Galicia, e tamén noutras zonas de España e en 40 países de Europa.

Por último, Fabiola García salientou do Festival Demostra a capacidade de fomentar entre as mozas e mozos a vocación artística, deportiva e saudable, por iso felicitou ao Concello de Mos por poñer en marcha iniciativas como esta.

Xunta e Concello do Porriño acordan axilizar a ampliación do Centro de Saúde

Redacción
-
0
Xunta e Concello do Porriño acordan axilizar a ampliación do Centro de Saúde

Concello do Porriño e Consellería de Sanidade da Xunta de Galicia acadaron hoxe un acordo polo que ámbalas dúas administracións poñerán o “máximo empeño” en axilizar prazos e execución das obras de ampliación do Centro de Saúde do Porriño. En virdude do convenio asinado, en dous meses licitarase a redacción do proxecto.

O conselleiro de Sanidade, Jesús Vázquez Almuiña e a Alcaldesa do Porriño, Eva García de la Torre asinaron convenio polo que o Concello cede unha parcela anexa e comprometese a “prestar os servizos e subministros necesarios para a posta en funcionamiento do Centro de Saúde”. Pola súa banda, a Consellería executará a obra de ampliación e se encargará da dotación de material e persoal.

Conselleiro e alcaldesa presidiron a reunión celebrada este mediodía na sé da Consellería en Santiago. No encontro estiveron presentes os concelleiros do grupo EU Son, Pedro Ocampo e Blanca Francés, invitados pola alcaldesa a formar parte da representación municipal en recoñecemento ao seu protagonismo na reivindicación desta mellora sanitaria.

Vázquez Almuiña, pola súa banda, estivo acompañado por Alberto Fuentes, secretario xeral técnico, e por Antonio Fernández Campa, xerente do Sergas.

A Deputación destina 300.000 euros á mellora das instalacións do CAAN

Redacción
-
0
A Deputación destina 300.000 euros á mellora das instalacións do CAAN

A Xunta de Goberno da Deputación de Pontevedra vén de aprobar a adxudicación do contrato para a posta en marcha de actuacións de mellora no Centro de Acollida de Animais (CAAN) de Meis por valor de 293.627,90 euros.

Tal e como explicou a presidenta provincial, a empresa Prace encargarase de executar durante cinco meses o proxecto que abrangue a creación dunha nova zona de maternidade, outra de esparexemento, a remodelación da zona de corentena e hospitalización e a mellora do espazo de clínica para adecuar o CAAN á Lei 4/2017 de protección e benestar dos animais de compañía de Galicia.

En liñas xerais, Carmela Silva explicou que se entregan en adopción unha media de dous cans diarios que precisan dez días de media para recuperarse. “Neste eido é preciso adaptar o espazo actual que permite atender a 12 animais para dar cabida a 20 cans”, asegurou a presidenta.

“

Crearase unha nova zona de maternidade, outra de esparexemento, remodelarase a zona de corentena e a de hospitalización e mellorarase o espazo de clínica

Ademais, en canto á zona de corentena e recepción de animais, tal e como informou Silva, “crearase unha nova, formada por cubículos individuais confortables que permitirán aos animais recollidos pasar un período de corentena maior, garantindo a sanidade do centro e o benestar animal”.

No que respecta á zona de atención e mantemento de cachorros, a través das melloras que se van acometer no CAAN vaise crear unha nova zona de maternidade, “máis ampla e cunhas condicións hixiénicas óptimas que favoreza, ademais, a visita do público e permita a interacción entre animais e persoas”, detallou a presidenta.

Finalmente, en canto á zona de esparexemento, acondicionarase un novo espazo onde os cans poidan realizar actividade física, socializar e interactuar coas persoas que acudan ao centro.

“

Carmela Silva visitará proximamente o CAAN para presentar a nova campaña para previr abandonos e fomentar adopcións, esterilizacións e o sistema de microchips

A presidenta da Deputación destacou que “cada vez hai unha maior conciencia do bo trato aos animais pero tristemente moita xente abandona aos cans. Por iso a través deste centro de acollida de animais prestamos un servizo fundamental”. Neste eido, Carmela Silva informou que proximamente visitará as instalacións do CAAN en Meis, onde dará a coñecer a nova campaña que ten por obxectivo prever abandonos, fomentar as adopcións, as esterilizacións e o sistema de microchips para facilitar a identificación dos animais.

Unha quincena de embarcacións déronse cita na Guarda no ‘X Cruceiro Río Miño’

Redacción
-
0
Unha quincena de embarcacións déronse cita na Guarda no ‘X Cruceiro Río Miño’

O Club Alagua, en colaboración coa Federación Galega de Vela e o Concello da Guarda, organizou o pasado sábado día 31 de agosto a 10º edición do Cruceiro Río Miño, unha proba deportiva de vela clasificada dentro da categoría C que contou coa participación dun total de 15 embarcacións.

A regata disputouse nun único formato multiclase aberto a todas as embarcacións a vela con orza móbil, contando con 3 catamaráns, 7 470, 3 Laser Radial, 1 dorna e 1 raquero.

As regatas arrancaron pouco despois das 16:00 h da tarde facendo un percorrido polo Río Miño entre A Pasaxe, en Camposancos, e a Praia das Eiras no Rosal.

[su_image_carousel source=”media: 5690,5689,5688″ crop=”16:9″ link=”lightbox”]

A regata foi puntuable para as embarcacións 470 e as multiclase, resultando a seguinte clasificación:

Clasificación 470

1º Ignacio Campos e Yolanda Bastos
2º Carlos Español Berridy e Patricia M. Lomba
3º Emilio Alonso Estevez e Alejandro Alfonso

Todos os equipos de 470 son do Club Deportivo Alagua

Clasificación Multiclase

1º Catamarán Clase A, Pablo Martínez-Sayanes López (Club Alagua)
2º Catamarán Nacra, José Vicente Rodríguez Rodríguez (Club Alagua)
3º Laser Standar, Serafim Gonçalves (Clube Naval Povoense)

O Porriño remata as obras da ‘Galiña Azul’ de Torneiros realizadas con fondos propios

Redacción
-
0
O Porriño remata as obras da ‘Galiña Azul’ de Torneiros realizadas con fondos propios

As obras de reforma de espazos e mellora da gardería de Torneiros, vinculada a rede ‘Galiña Azul’ da Xunta de Galicia, están prácticamente rematadas como puido comprobar onte a alcaldesa do Porriño, Eva García de la Torre, que visitou as instalacións acompañada pola concelleira de Educación, Lourdes Moure.

Na zona dos nenos de 0 e 1 anos e de 1 e 2 habilitaronse novos espazos de baños, lavabos e cambiadores así como novo mobiliario. Asimesmo habilitouse outra nova dependencia, unha ‘aula de soño’ e se renovaron instalación eléctricas e de fontanería.

[su_image_carousel source=”media: 5678,5679,5677,5676″ crop=”16:9″ link=”lightbox”]

Por outra banda tamén pintaronse aulas e espazos común e se instalaron detectores de fume e outras medidas de seguridade recomendadas polo Consorcio Galego de Servizos de Igualdade e Benestar. Esta administración, dependente da Xunta de Galicia otorgou luz verde ó proxecto o pasado 14 de agosto razón pola que as obras empezaron o festivo 15 e os traballos tiveron que realizarse en dúas semanas.

O Concello de Porriño enviará a persoal para que faga a limpeza xeral das instalacións a fin que se poida abrir a Galina Azul de Torneiros para o vindeiro xoves día 5. O custe final das obras é de 48.054 e son sufragadas polo Concello do Porriño con cargo á partida de cofinanciación coa Xunta de Galicia.

As festas de Ponteareas incluirán un horario de atraccións “sen música nin megafonías”

Redacción
-
0
As festas de Ponteareas incluirán un horario de atraccións “sen música nin megafonías”

O concello de Ponteareas, por iniciativa das concellerías de Promoción Económica e Eventos, que dirixen Eva Gil e a tenente de alcalde Cristina Fernández, respectivamente, solidarízase coas persoas con diversidade funcional e promove os ‘horarios sen música nas festas’ para favorecer a inclusión de todas as persoas con autismo, síndrome de Asperxer e síndrome de Down entre outros diagnósticos.

Esta iniciativa contempla a apertura das atraccións obrigatoriamente ás 17 horas sen música e megafonía ata as 19 horas dos domingos día 8 e día 29 de setembro do presente ano, para facilitar o acceso ás persoas con diversidade funcional e que tamén poidan gozar das festas.

“

Esta iniciativa da concellería de Promoción Económica e da concellería de Eventos ten como obxectivo que as persoas con sensibilidade ao son poidan tamén gozar das festas

O concello de Ponteareas pon de manifesto que durante este horario non se poderá poñer música, sons ou megafonía nin facer uso de fogos de artificio así como calquera tipo de actividade que prexudique ou desfavoreza o uso e desfrute das atraccións e actividades das festas ás persoas con sensilidade ao son.

Preto de 133.000 euros da Deputación para a xestión de lixo tecnolóxico en Ponteareas, A Guarda, Nigrán e Gondomar

Redacción
-
0
Preto de 133.000 euros da Deputación para a xestión de lixo tecnolóxico en Ponteareas, A Guarda, Nigrán e Gondomar

A Deputación de Pontevedra investirá preto de 133.000 euros na adaptación dos puntos limpos de Ponteareas, A Guarda, Gondomar e Nigrán, co obxectivo de acondicionalos de cara á recollida e xestión dos Residuos Eléctricos e Electrónicos (RAEE). Unha iniciativa que permitirá o cumprimento da normativa europea e española, vixente dende o ano 2015, para o tratamento do ‘lixo tecnolóxico’.

A Xunta de Goberno Provincial tomou hoxe coñecemento do inicio dos expedientes. A presidenta da Deputación, Carmela Silva, destacou que agarda que, unha vez rematados os trámites de contratación das obras e as subministracións necesarias, os puntos limpos estean plenamente operativos no primeiro trimestre de 2020.

Culminará deste xeito un proceso que comezou coa captación dos fondos europeos FEDER a través da primeira convocatoria do Programa de Cooperación Transfronteiriza POCTEP 2014-2020. Naceu así o proxecto Estraee (Estratexia Sostible para a Xestión de Aparellos Eléctricos e Electrónicos) do que se están a beneficiar 9 puntos limpos doutros tantos concellos da provincia de Pontevedra, xunto con outros 9 situados en territorio portugués.

Ponteareas

No que atinxe ás obras do ‘ecocentro’ de Ponteareas vanse construír dous almacéns independentes para realizar o almacenaxe de RAEE (3o metros cadrados) e para a reutilización (28 metros cadrados).

Tamén vaise iluminar o almacén e instalar un sistema de protección contra incendios e paneis indicativos. O custo previsto destas obras é de 48.665,59 euros e o prazo de execución, trala adxudicación do contrato, será de dous meses.

A Guarda

No caso da Guarda é necesario subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos.

As obras permitirán construir no nivel superior un edificio para a reutilización dos residuos, instalarase iluminación no almacén e proveerase de sistema de protección contra incendios e paneis indicativos. A empresa que resulte adxudicataria das obras disporá dun prazo de 2 meses.

Gondomar e Nigrán

Nos ‘ecocentros’ de Gondomar é Nigrán é preciso subministrar sistemas de vixilancia, de control de accesos ao almacén, de control de accesos de vehículos, gaiolas e estanterías, transpaletas (máquinas para o movemento de palés) e, finalmente, subministración de equipos informáticos .

No que atinxe ás obras, no punto limpo de Gondomar vaise construír un almacén propio de RAEE, totalmente pechado, con soleira impermeabilizada e arqueta para recollida de posibles derrames.

No nivel inferior haberá un edificio para almacén e reutilización. Instalarase iluminación e tamén de sistema de protección contra incendios e paneis indicativos. O orzamento concreto para este punto limpo é de 35.637,19 euros.

En Nigrán obrarase para dotalo de nova iluminación e colocación de portas corredoiras con peche de seguridade. Construirase un edificio no nivel superior, apegado ao existente, para reutilización que poderá ser utilizado tamén como almacén de RAEE.

Tamén será dotado de sistema de protección antiincendios e paneis indicativos. O custo en Nigrán ascende a 19.960,05 euros. O prazo de execución en ámbalas dúas obras será, unha vez adxudicadas, de dous meses.

O orzamento total de licitación dos contratos de subministración e obras para a adaptación dos 9 puntos limpos da provincia incluídos é de 618.074,23 euros, que se reparten entre os 238.275 euros para as subministracións e outros 379.799,23 euros para as obras de reforma. A Deputación achega directamente 154.518,56 euros, o 25% do orzamento global.

O lixo ‘moderno’

Os RAEE, cuxo volume crece a un ritmo de entre un 18% e un 26% anual, supoñen xa 50 millóns de toneladas anuais no mundo, das que preto dun millón se producen en España.

Trátase de residuos altamente contaminantes, dado que inclúen elementos que causan graves prexuízos ao medio ambiente.

O mércores péchase a inscrición da XXIV Travesía a nado do Porto da Guarda

Redacción
-
0
O mércores péchase a inscrición da XXIV Travesía a nado do Porto da Guarda

O vindeiro sábado día 7 de setembro terá lugar no Porto da Guarda a XXIV edición da Travesía a Nado do Porto da Guarda, un evento que congrega cada ano a un bo número de deportistas profesionais e amateurs amantes da natación na complicada especialidade de augas abertas e para que aínda quedan algunhas prazas baleiras. A inscrición péchase mañá 4 de setembro.

Os interesados e interesadas poden formalizar a participación na web www.galitiming.com ou directamente nesta ligazón, contando con dous percorridos, un de 400 m para as categorías A, B, C e D e outro de 1.200m para as categorías E, F, G, H, I, J,K e L.

Como novidade esta edición estará cronometrada polo que a inscrición ten un custe de 6 € para as inscricións realizadas ata o 31 de agosto e 8 € para formalizadas entre o 1 e o 4 de setembro. As categorías de nenos e nenas –A, B, C e D– son de balde.

A inscrición inclúe un gorro numerado, seguro de accidentes, cronometraxe e avituallamento final.

Os nadadores e nadadoras non federados menores de 18 anos precisan que o pai, nai ou titor/a autoricen a súa participación. O impreso de autorización, que pode descargarse nesta ligazón, debe enviarse asinado previamente ao correo [email protected] ou, en último caso, pode entregarse no momento de recollida do gorro.

A proba comezará ás 12:00 h no Porto da Guarda, con saída dende as escaleiras do muelle, facendo un percorrido polo interior do recinto portuario, marcado por boias. O neopreno só se poderá utilizar se a temperatura da auga e menor aos 18 º ou por decisión da organización. O regulamento polo que se rexerá a proba pode descargarse dende este enlace.



O Arealonga FS de Chapela da a coñecer o fútbol sala entre os máis pequenos

Redacción
-
0
O Arealonga FS de Chapela da a coñecer o fútbol sala entre os máis pequenos

O Arealonga Fútbol Sala de Chapela vén de comezar os seus adestramentos para todas as categorías de cara a afrontar unha tempada 2019/2020 ilusionante. Ao mesmo tempo, e para que os nenos e nenas poidan decidir si lles gusta este deporte, abre un prazo de 15 días para que, sen compromiso algún, poidan probar dita actividade deportiva.

Interesados e interesadas non terán máis que achegarse ao pavillón ‘Manuel González Soto’ de Chapela os martes e venres en horario de 17 h a 19 h.

As categorías que ten o Arealonga FS son a biberón (2014-2015), prebenxamín (2012-2013), benxamin (2010-2011), alevín (2008-2009), infantil (2006-2007), cadete (2004-2005) e xuvenil (2001-2003). Ademáis tamén haberá equipos nas categorías femininas de infantil, cadete, xuvenil e sénior.

Os interesados e interesadas poden inscribirse no Pavillón Municipal de Chapela ‘Manuel González Soto’ –nos horarios de adestramento– ou tamén no teléfono 662 111 339 (Iván)

Salceda compostará preto de 1.000 litros de lixo orgánico da Festa dos Callos

Redacción
-
0
Salceda compostará preto de 1.000 litros de lixo orgánico da Festa dos Callos

No só foi a primeira festa dos callos “en Igualdade” que sinalaba a alcaldesa de Salceda de Caselas, Loli Castiñeira, na presentación do evento esta pasada semana, senón que a Festa dos Callos de Salceda nesta vixéximo oitava edición, foi tamén todo un exemplo de colaboración medioambiental que permitirá converter en compost, preto de 1.000 litros de lixo orgánico.

A cidadanía que acudiu onte a Salceda para comer unha ración de callos colaborou totalmente na iniciativa de reciclar o 100% do lixo e depositou nos colectores correspondentes os diferentes tipos de residuos.

Só no referido aos restos orgánicos recolléronse preto dunhs 1.000 litros (uns 250 de restos de callos e uns 750 de anacos de pan) que foron trasladados aos composteiros comunitarios que hai na vila –A Devesa, Raíña Aragonta e A Gándara– para producir compost baixo a supervisión das mestras e mestres composteiros do Plan Revitaliza da Deputación. Estes biorresiduos convertiranse en poucos meses, logo de misturalos con estruturante, en aproximadamente uns 200 litros de fertilizante natural.

[su_image_carousel source=”media: 5629,5628,5627,5626″ crop=”16:9″ link=”lightbox”]

O persoal técnico provincial destacou que a iniciativa, na que colaborou o Concello de Salceda a través das concellerías de Festas e de Medio Ambiente, “foi todo un éxito e tivo moi boa acollida entre o público”, xa que a práctica totalidade das e dos asistentes cumpriu coa separación do lixo xerado durante o xantar utilizando as sete illas de reciclaxe habilitadas, deixando os restos da comida no seu colector, o vidro noutro, e os envases noutro.

Tamén foi un éxito o stand informativo do Revitaliza, sempre ateigado de xente participando no coñecido como ‘Xogo da miñoca’, co que as mestras e mestres compostadores da Deputación explicaron as vantaxes da compostaxe e repartiron agasallos e uns 200 quilos de compost en bolsas.

En total pasaron polo stand máis de medio milleiro de persoas, principalmente da provincia de Pontevedra, pero tamén doutras localidades galegas amosándose moi interesadas no proxecto da institución provincial para replicalo nas súas vilas de orixe.

Ponteareas organiza unha visita guiada ao Castro de Troña

Redacción
-
0
Ponteareas organiza unha visita guiada ao Castro de Troña

A concellería de Cultura e Lingua, que dirixe Fernando Groba, convida a veciñanza e visitantes a participar na visita guiada ao Castro de Troña que se organiza dentro do programa ‘Coñece Ponteareas’. Esta iniciativa, totalmente de balde, permite que todos e todas poidan coñecer o patrimonio cultural e natural de Ponteareas así como descubrir recunchos singulares.

O punto de encontro será no Castro de Troña ás 19:00 horas e todos e todas as interesadas poderán anotarse na biblioteca municipal, a través do número de teléfono 986 660 765 ou no enderezo electrónico [email protected]

Mondariz recibe a un grupo de scouts cataláns

Redacción
-
0
Mondariz recibe a un grupo de scouts cataláns

O equipo de goberno do Concello de Mondariz, encabezado polo alcalde Xosé Emilio Barros, recibirá este martes, 3 de setembro, a un grupo de scouts da asociación ‘Escoltes catalans’. En total, son 15 persoas (doce rapaces e rapazas de entre 15 e 16 anos e tres monitoras) chegadas de Alcarràs, un pequeno concello da provincia de Lleida.

Este grupo de scouts escolleu Mondariz como destino do seu primeiro viaxe de traballo voluntario fóra de Cataluña porque algúns dos seus membros estaban familiarizados con Galicia e recibiran boas referencias do lugar.

Os mozos e mozas contactaron co Concello de Mondariz para ofrecer a súa colaboración voluntaria en actividades que beneficiasen á comunidade a cambio dun sitio onde durmir.

Durante unha semana, entre os días 3 e 10 de setembro, os scouts recollerán lixo polas sendas do río Tea, reconstruirán o parque infantil do Monte da Ovella e reestructurarán a sala de lectura da Axencia de Lectura da ELM de Queimadelos.

Estas actividades de traballo comunitario voluntario foron consensuadas polo equipo de goberno, que dará apoio e supervisará as tarefas a través das concellerías de Desenvolvemento Económico e Turismo, Igualdade e Mocidade, e Medio Ambiente e Deporte. Debido á falta de infraestructura municipal para o aloxamento turístico, o Concello de Mondariz habilitará o pavillón polideportivo como campamento dos scouts.

Éxito da ‘Holi Party’ e o ‘Festival Moseando’ de Mos

Redacción
-
0
Éxito da ‘Holi Party’ e o ‘Festival Moseando’ de Mos

O concelleiro de Mocidade do Concello de Mos, Leo Costas, fixo balance esta mañá da Holi Party e do Festival Moseando, que tiveron lugar o pasado sábado 31 de agosto. “Estou moi satisfeito do éxito acadado nesta primeira gran festa da mocidade mosense, o ambiente foi excelente e o índice de afluencia de público moi bo, a pesar de tratarse da primeira edición”, sinalou o edil.

Pola tarde na Holi Party “participaron unhas 300 persoas e xa pola noite, no Festival Moseando, a cifra de asistentes achegouse aos 400”, declarou Costas, quen asegurou que seguirá “apostando por este evento no os participantes disfrutaron enormemente de horas de música e diversión, de xeito que a intención dende o Concello de Mos é a de darlle continuidade a un acto que queremos se convirta en referente na axenda da programación municipal anual para a xuventude”.

Ambos eventos celebráronse na contorna do Multiusos das Pozas, a Holi Party a partir das 18:00 horas e o Festival Mosendo a partir das 23:00 horas. Os dous tiñan entrada libre e de balde.

[su_image_carousel source=”media: 5648,5651,5647,5650″ crop=”16:9″ link=”lightbox”]

Ambas iniciativas, dirixidas á xuventude mosense, foron promovidas e financiadas pola Xunta de Galicia (Consellería de Política Social, Dirección Xeral de Xuventude, Participación e Voluntariado) e polo Xacobeo 2021; e organizadas polo Concello de Mos.

Para a Holi Party os participantes debían ir de branco. A festa estivo amenizada musicalmente polos Dj’s Xoel Muñoz e Juanma López.

A multitudinaria festa dos pos de cores chegou a Mos o pasado sábado e todos os asistentes puideron gozar da fusión da música e a cor nunha tarde moi especial. Os pos de cores voaron cubrindo aos asistentes e ás súas vestimentas brancas, inundando de colorido os exteriores do Multiusos.

A continuación, a partir das 23.00 horas, chegou o Festival Moseando con Brokktt como cabeza de cartel. O seu verdadeiro nome é Carlos Lago, pero artisticamente coñéceselle como Brokktt Skinny Boy. Este artista empezou no rap underground fai catro anos e agora é un dos creadores emerxentes máis potentes do movemento trap en Galicia. Actuou en sitios como a Discoteca Anubis con intérpretes como Kidd Keo, no Festival Perreo Party da Discoteca Queen, na discoteca Licuore de Tui, No Mariña Fest de Marín ou na Pool Party para blacklips en Vigo. ‘Pra Pum Pa’, canción na que colabora con Cristian Yennia e Alberto Malleiro, supera as 12.000 visitas tanto en Youtube como en Spotify.

Completaron o cartel do Festival os Dj’s Traffic House, Enter, Gabri Domínguez e o mosense Fergwell.

A Deputación adxudica 51 novas bolsas para prácticas de FP en empresas e institucións europeas

Redacción
-
0
A Deputación adxudica 51 novas bolsas para prácticas de FP en empresas e institucións europeas

A presidenta da Deputación de Pontevedra, Carmela Silva, anunciou hoxe a adxudicación por parte da Xunta de Goberno das novas bolsas de mobilidade para o alumnado de FP participante no proxecto ‘Practicum Depo 2018’. Trátase da sexta mobilidade e, como subliñou Silva, a penúltima desta iniciativa bianual, que deu comezo coa primeira saída de alumnado no 2018 e rematará o 31 de maio de 2020 coa chegada do sétimo grupo.

Silva lembrou que o obxectivo deste programa de mobilidade para mozas e mozos titulados de Formación Profesional “é colaborar na súa integración no mundo laboral a través de prácticas profesionais en empresas e institucións estranxeiras”. Para esta nova mobilidade, a Deputación vai destinar 354.355 euros para 51 alumnas e alumnos de 18 centros educativos da provincia, que permanecerán en Finlandia, Grecia, Irlanda, Italia, Malta e Portugal durante 162 días (algo máis de cinco meses).

Máis polo miúdo, as persoas beneficiarias proceden de 5 centros de Vigo, 4 de Pontevedra, 2 de As Neves e un de Salvaterra, A Illa de Arousa, A Estrada, Redondela, Sanxenxo, Lalín e Bueu, e recibirán bolsas por contías que abranguen entre os 6.460 e os 7.727 euros. En total, neste programa bianual ‘Practicum Depo 2018’, que rematará en maio de 2020 coa chegada da sétima mobilidade, participan 104 estudantes e docentes de 32 centros da provincia, cun investimento de 672.278,40 euros.

“

Trátase da sexta mobilidade do “Practicum Depo” coa que as persoas beneficiarias viaxarán a Finlandia, Grecia, Irlanda, Italia, Malta e Portugal

Ata o momento, incluíndo o vixente de 2018, a institución provincial leva postos en marcha catro ‘Practicum Depo’, nos que en total está a investir máis de 2 millóns de euros. A través desta iniciativa, 400 mozas e mozos da provincia desfrutaron xa de mobilidades no estranxeiro, “mellorando a súa formación e acadando máis recursos para mellorar a súa empregabilidade”, como destacou a presidenta da Deputación.

Proseguen os traballos de procura dun participante do Triatlón da Amizade en Tomiño

Redacción
-
0
Proseguen os traballos de procura dun participante do Triatlón da Amizade en Tomiño

Proseguen os traballos de procura dun participante no Triatlón da Amizade cuxa proba de natación desenvovíase en augas do Miño, en Goián, municipio de Tomiño. Pasadas as cinco e media da tarde de onte, a Axencia Galega de Emerxencias (AXEGA), a través do CIAE 112 Galicia, activaba o protocolo de colaboración transfronteriza no caso de emerxencias, ARIEM112, para tratar de localizar ao participante desaparecido de nacionalidade portuguesa.

No dispositivo de procura participan ademais dos efectivos de Protección Civil da localidade, a Garda Civil, os Bombeiros de Baixo Miño, o GES da Guarda, Salvamento Marítimo  e o Servizo de Gardacostas de Galicia. Tamén se alertou ao Servizo de Urxencias Sanitarias de Galicia-061.

Pola parte portuguesa, atópanse na procura bombeiros voluntarios de Vilanova de Cerveira, mergulladores e unha embarcación da Comandancia Naval do Miño.

As labores de procura reanudábanse pasadas as 7 h de hoxe incrementándose o número de medios tanto humanos como materiais e traballar dende a terra, o aire e o propio río Miño.

Os equipos de buceadores analizan todas as posibilidades con apoio de sistemas de detección e exploración do fondo que traballan dende as embarcacións, co que os mergulladores poden centrarse en zonas específicas.

A corrente do río e as mareas, que na zona de Tomiño deixanse sentir de maneira ostensible a pesar da distancia da desembocadura, engaden novas variables ao operativo de procura.

Nigrán sinaliza o Camiño Portugués pola Costa

Redacción
-
0
Nigrán sinaliza o Camiño Portugués pola Costa

O Concello de Nigrán rematou a sinalización do Camiño Portugués pola Costa na súa variante non oficial polo litoral do municipio, un trazado que elixen moitos peregrinos polo atractivo diferente que presenta pero que está deficientemente indicado.

Así o recolle o propio proxecto elaborado dende o obradoiro de emprego Valmiemprega II, que no seu estudo pormenorizado empregado polo Concello de Nigrán a este efecto destaca a necesidade de mellorar a sinalización para evitar as actuais confusións. De feito, tamén se indica con  maior claridade a pequena alternativa ao oficial no Porto do Molle, onde o Concello opta porque os peregrinos camiñen pola senda do río Muíños en lugar de utilizar a PO-552.

“O trazado litorial é elixido por moitos peregrinos que prefiren ir a pé de praia e que actualmente está deficientemente sinalizado pese ao seu gran atractivo paisaxístico, polo que dende o propio consistorio solventamos esta situación”, explica o alcalde, Juan González. “O Esteiro de A Foz, Monte Lourido, Praia América, Panxón, a Praia de Patos ou das Canas son parte esencial da riqueza paisaxística de Nigrán, polo que era obvio a necesidade de reforzar e promover esta alternativa ao camiño oficial”, insiste.

Moita da sinalización consistía en pegatinas en mobiliario urbano ou mesmo pintadas verdes que non son fácilmente visibles e que confundían aínda máis aos peregrinos. Por este motivo, elimináronse todas estas vellas indicacións e sustituíronse por outras en paneis de calidade.

A variante litorial, que conecta finalmente co trazado oficial que une os municipios de Nigrán e Vigo, arranca dende a propia marisma ao pé da ponte románica de A Ramallosa. Nesta intersección de saída da ponte nova da Ramallosa co Paseo Torrente Ballester colocouse un panel informativo facendo constar a entrada ao Concello e diferenciando a continuidade do Camiño Oficial cara o Pazo de Pías e o inicio da opción do camiño pola costa cara a Praia América, eliminando actuais sinalizacións precarias en farolas que dan lugar a confusións.

Os camiñantes que elixen esta opción o farán polo paseo marítimo de A Foz ou Esteiro do Miñor, pertencente á Rede Natura 2000 e que se estende ata a península de Monte Lourido. Trátase dun ecosistema de alto valor ecolóxico pola súa biodiversidade de flora e fauna, e de gran valor ornitolóxico por ser refuxio de aves migratorias. Ao seu final, xa no cruce de camiños cara a Praia América, refouzouse a sinalización e borrouse a actual marca no reverso dunha sinal de circulación.

O peregrino é guiado para camiñar polo paseo marítimo de Praia América e Panxón e, ao longo do mesmo, elimináronse as pegatinas en farolas e papeleiras pola nova sinalización co obxectivo de evitar confusións. Esta vólvese a reforzar no fin do Paseo de Panxón para que o camiñante se dirixa sen dúbidas cara a praia da Madorra e posteriormente pola rúa Tomás Mirambell cara a praia de  Patos, praia das Canas a continuación polo paseo da Areosa e, finalmente, rúa Caranquexo cara o Camiño Oficial pola Costa xa no termo de Saiáns (Vigo).

A Xunta mellora a accesibilidade á praia de Maceira, en Covelo

Redacción
-
0
A Xunta mellora a accesibilidade á praia de Maceira, en Covelo

O delegado territorial da Xunta en Pontevedra, José Manuel Cores Tourís, visitou esta mañá as obras de mellora de accesibilidade que o concello de Covelo realizou na praia de Maceira grazas as axudas para a mellora das infraestruturas turísticas da Consellería de Cultura e Turismo e que supuxeron un investimento de algo máis de 50.000 euros.

Estas axudas, segundo explicou Cores Tourís quen na visita estivo acompañado polo alcalde de Covelo, Pablo Castillo, teñen como obxectivo “fomentar a accesibilidade e a sinalización dos recursos turísticos no medio rural cara a consolidación da oferta turística nas zonas rurais a través da posta en valor da súa riqueza histórica, cultural, patrimonial e paisaxística”.

En canto aos traballos executados na praia de Maceira en Covelo, o delegado puido comprobar como se levou a cabo a adecuación da comunicación peonil entre o novo parking desta área e a praia fluvial. Así, construíuse un pequeno muro de contención de pedra para estabilizar o noiro existente e conseguir un maior ancho de circulación de persoas. O muro é de mampostería de granito. Tamén se colocaron vallas de madeira de protección e pavimentouse a beirarrúa. En total, o investimento destinado a esta obra foi de 77.057 euros, dos cales, 50.087 foron aportados pola Consellería de Cultura e Turismo.

Con esta liña de axudas os concellos poden levar a cabo traballos de recuperación paisaxística, iluminación ornamental dos recursos turísticos, recuperación de miradoiros, embelecementos de vías, soterramento de colectores de residuos ou eliminación de cabreado aéreo. Tamén se pode poñer en valor turístico recursos distintos do aloxamento de persoas, recuperar elementos de interese etnográfico ou de arquitectura rural, así como eliminar barreiras arquitectónicas.

En total, a Xunta de Galicia mobilizou 2,5 millóns de euros para este fin o pasado ano, dos cales, a provincia de Pontevedra beneficiouse de 727.143 euros para un total de 27 concellos que investiron un total de 1,1 millón de euros en este tipo de obras.

Na comarca do Condado-Paradanta foron seis os concellos beneficiados: Covelo, Crecente, A Cañiza, Arbo e As Neves, cunha axuda total de 154.437 euros.

Redondela comunica ao Ministerio o seu “total rexeitamento” ao cargadoiro de contedores de Rande

Redacción
-
0
Redondela comunica ao Ministerio o seu “total rexeitamento” ao cargadoiro de contedores de Rande

O Concello de Redondela contestou, de xeito formal, á consulta realizada polo Ministerio para a Transición Ecolóxica sobre o denominado proxecto Reordenación del acceso a la zona portuaria de Rande desde la carretera N-552, que é o paso previo necesario para a futura instalación dunha terminal de carga e descarga de contedores que pretende realizar a Autoridade Portuaria de Vigo.

O Concello de Redondela remitiu ao Ministerio un informe técnico de 11 páxinas redactado por técnicos do Concello que argumentan, técnica e xuridicamente, a resposta que o Concello trasladou en tempo e forma e que non é outra “que a total e absoluta oposición ao proxecto”. O escrito de rexeitamento foi asinado pola alcaldesa de Redondela, Digna Rivas, e polo concelleiro de Medio Ambiente, Roberto Villar.

O martes 20 de Agosto, nunha xuntanza solicitada pola Plataforma en Defensa da Enseada de San Simón , a alcaldesa e o Concelleiro de Medio Ambiente adiantaron aos representantes desta Plataforma unha copia deste informe de 11 páxinas elaborado por técnicos do Concello.

Impacto negativo.

A obra que propón a Autoridade Portuaria supón, explica o Concello de Redondela, o trazado de novos accesos que non están previstos polo planeamento vixente (NNSS), nin polo Plan Xeral de Ordenación Municipal (PXOM) que se encontra en tramitación. Asemade, a infraestrutura prevista é de gran envergadura, pois inclúe muros de gravidade ou pilotados de considerable altura, caixón fincado baixo infraestruturas actuais, etc.

“

A obra que propón a Autoridade Portuaria suporía o trazado de novos accesos que non están previstos pola normativa urbanística, nin presente (NN SS) nin futura (PXOM)

Todo isto suporía, non una reordenación de accesos como denomina o proxecto senón unha infraestrutura nova que implicaría, dadas as dimensións das obras a executar, un enorme impacto visual e acústico no entorno de actuación. Tendo en conta que estamos ante unha zona próxima á costa, esta obra sería totalmente contraria ao Plan de Ordenación del Litoral.

Ameaza para a Rede Natura e o Patrimonio Cultural

Lembran Digna Rivas e Roberto Villa que, nesta zona de Rede Natura “atópanse importantes bancos pesqueiros e de marisqueo dos que viven numerosas familias, non só do concello de Redondela senón doutros concellos limítrofes, afectando ao ecosistema e, por conseguinte, ao seu medio de vida”.

“

O proxecto atentaría contra a Rede Natura e mesmo contra o Patrimonio Cultural da zona

Neste ámbito sitúase o denominado Cargadoiro de Coto Wagner (coñecido como antigo cargadoiro de mineral), elemento protexido, e a súa contorna que se sitúa no catálogo de patrimonio cultural.

Incremento do tráfico pesado na zona

O proxecto prevé dotar de acceso rodado á explanada, o que suporía cargar toda a zona de circulación de tráfico rodado pesado, a tal efecto no informe elaborado polo Concello inclúense recreacións realizadas polo arquitecto Carlos Falagán Mota, servizo encargado polo Concello de Redondela, onde se pode observar o enorme impacto visual que suporía nunha zona patrimonial e medio ambiental protexida.

Transparencia e participación no proceso

Dende que o Concello de Redondela tivo constancia desta consulta do Ministerio, a Alcaldía e a Concellería de Medio Ambiente mantiveron informados aos representantes da veciñanza dos pasos que se estaban a dar, concretamente á Plataforma en defensa da Enseada de San Simón, que leva anos reclamando un uso público desta zona e a desafección industrial da mesma.

Houbo xuntanzas para informar e intercambiar pareceres, estudáronse e tívose en conta a contestación a este proxecto que preparara a Plataforma cos seus medios e que entregaran por rexistro no Concello.

1...408409410...425Page 409 of 425

Fundado por Alfredo Estévez © Hansei Media, SL