Tras a disputa do ‘III Trail Muíños do Folón’, Pamela Pérez e Daniel Pazó convértense nos primeiros líderes da ‘Pontevedra Trail League’, unha competición que se estrea dentro da modalidade de trail. Ademais da proba do Rosal, tamén puntuará a do ‘Románico’ e o ‘Trail do Tegra’ que se celebrarán ao longo da tempada. A liga constitúe un novo aliciente para os deportistas e conta co apoio da Deputación de Pontevedra.
Daniel Pazó Giráldez, na modalidade de advance e José Antonio Losada, na de adventure, foron os gañadores do III Trail Muiños do Folón que se disputou no Rosal. A eles uníuselles Alina Cimpeán, na categoría feminina en Advance, e Lorena Ferrer, na de adventure.
A proba resultou un gran éxito de participación, con case 800 deportistas na liña de saída entre os que se inclúen tamén os que tomaron parte no roteiro de senderimos. Daniel Pazó e Pamela Pérez convertéronse nos primeiros líderes da recentemente creada I Pontevedra Trail League, que incluirá outras dúas probas ao longo da tempada.
A pesar da choiva e o vento, os participantes no Rosal gozaron dunha xornada que xuntou a máis de 1.500 persoas. O percorrido, de gran valor paisaxístico e simbólico, foi un dos grandes alicientes. Á cita acudiron numerosos deportistas de toda Galicia e unha ampla representación de Portugal.
[su_image_carousel source=”media: 12794,12803,12802,12801,12800,12799,12798,12797,12796,12795″ crop=”5:4″ link=”lightbox” autoplay=”0″]
Foi Daniel Pazó o que repetiu triunfo por segundo ano consecutivo na modalidade de advance. O seu esforzo e tenacidade tivo recompensa despois de afrontar os 21 quilómetros cun perfil que presentaba algunha dificultade en varias zonas. O ano pasado foi tamén un dos grandes protagonistas, ao entrar xunto a Marcos Fernández collido da man na liña de chegada, nun xesto de gran deportividade. Déuselle gañador a Daniel Pazó, que na presente edición logrou a vitoria en solitario. A pouco máis de vinte segundos entrou Luís Enrique Martínez Comesaña, que ocupou a segunda posición, mentres o terceiro foi César Santos Barciela.
Na categoría feminina, a triunfadora foi Alina Cimpeán, que superou a todas as súas rivais e realizar o percorrido en dúas horas e media. Sandra Fernández ocupou a segunda posición, mentres Loreto Rodríguez Martínez foi a terceira. O cuarto lugar correspondeu a Nuria Romero, que quedou a vinte segundos de estar no podio despois de case tres horas de esforzo.
Na categoría de adventure, que tiña 12 quilómetros de percorrido, o gañador foi José Antonio Losada. En pouco máis dunha hora completou o traxecto, aínda que tivo que empregarse a fondo para ser o primeiro na liña de chegada. Ricardo Estévez, que foi segundo, só cedeu 19 segundos ao seu rival. Luís Miguel Becerro foi o terceiro no podio. Precisamente Ricardo Estévez foi o primeiro en sénior, mentres Lorena Freire triunfo na categoría feminina. A segunda na clasificación foi Elena Pérez e a terceira Maru Fernández.
O éxito da terceira edición do Trail Muiños do Folón obrigou aos organizadores para ampliar o número de prazas dispoñibles ata chegar ás 800, o que supón un rexistro histórico. Cada participante recibiu unha medalla, tamén unha camiseta, podían visitar a Adega Valmiñor Ebano e os mellores levaron o trofeo deseñado por José Luis Rodríguez, un recoñecido escultor. A organización tamén realizou unha emotiva homenaxe a Nemesio Castro Alvarez, que a pesar da súa avanzada idade aínda coida e utiliza os emblemáticos muíños situados no Rosal.
