Xoves, 15 Maio de 2025

Gonzalo Caballero a dotar a todos os estudantes galegos de ordenador con conexión a internet dende a casa

Redacción
-
0
Gonzalo Caballero a dotar a todos os estudantes galegos de ordenador con conexión a internet dende a casa

O candidato socialista á presidencia da Xunta, Gonzalo Caballero, comprometeuse hoxe a dotar a todos os estudantes galegos de ordenador e conexión a internet “para resistir a nova etapa na que a dixitalización é fundamental”. O líder dos socialistas galegos empregará os fondos que correspondan a Galicia da partida de 2.000 millóns de euros que o goberno de España vai repartir entre as comunidades para a mellora da educación, incluíndo a posta en marcha dun Plan de Dixitalización do Ensino así como un incremento do persoal docente.

O secretario xeral do PSdeG protagonizou a presentación da candidatura socialista ao 12X por Pontevedra, que hoxe se reuniu en Vigo xunto co alcalde, Abel Caballero e a presidenta da Deputación, Carmela Silva. Dende alí respaldou o esforzo por parte do goberno de Pedro Sánchez en materia de educación pública, que será, subliñou, “a bandeira do goberno progresista na Xunta de Galicia”.

Gonzalo Caballero lamentou que “o único presidente autonómico ao que non lle gusta que o goberno de España dispoña fondos para a mellora da educación publica é Feijóo, porque non lle gusta a educación pública”. Fronte a esta actitude, comprometeuse a aproveitar os fondos estatais para “fortalecer o ensino público” e adaptalo ao novo tempo.

O líder dos socialistas galegos subliñou que as partidas procedentes do Goberno de España permitirán tamén contar con “máis docentes, un sistema de bolsas de ensino máis potente, máis capacidade para dotar os comedores escolares” e a dixitalización, ademais dos “libros de texto gratuítos”.

Gonzalo Caballero salientou así que o goberno de España “acaba de aprobar 16.000 millóns de euros para dotar ás comunidades autónomas de posibilidades para facer mellores políticas” e dotarse dun “escudo protector” para a cidadanía. Ademais, dixo, incorporan os sinalados 2.000 millóns para “defender o dereito dos e das estudantes de Galicia a ter unha educación pública de calidade”.

“O cambio posible é necesario”

O candidato socialista á Xunta aproveitou a presentación da candidatura de Pontevedra para apostar polo “cambio posible e necesario” na Xunta de Galicia, que “vaise producir pola mobilización crecente do electorado progresista”. Dixo que “de novo existen todos os impulsos para que o 12X Galicia abra unha nova etapa de progreso, de futuro e de posibilidades”.

Por iso, Gonzalo Caballero reclamou a “todos os galegos e galegas que se involucren” e “apoien o cambio que necesitamos para o futuro do país” porque “non nos podemos arrepentir catro anos máis de gobernos do PP, da dereita e de Feijóo, e temos que facelo cun compromiso claro coas políticas de progreso”.

O dirixente socialista interveu en Vigo, onde dixo que “queremos gañar porque a vitoria en Vigo será a vitoria progresista para a nova etapa en Galicia liderada polo PSdeG en conexión co municipalismo”. Reivindicou un goberno galego que traballe “a carón do alcalde de Vigo para facer mellores políticas públicas que a cidade demanda”.

Gonzalo Caballero reivindicou que os veciños e veciñas de vigo “saben que con Feijóo non hai avance nin compromiso, simplemente rexeitamento e tensión permanente e incapacidade de compromiso”. Puxo en valor o traballo municipal deste concello, “referencia en toda España”, onde o presidente da Xunta demostrouse “omnipresente nos medios pero ausente nas medidas”.

Tivo que ser, puntualizou, “o goberno municipal con Abel Caballero á cabeza o que lle dera resposta aos problemas e necesidades da cidadanía fronte á crise, como máximo colaborador do goberno de España para desenvolver o ingreso mínimo vital e que chegue a todos os cidadáns”.

Baiona atrasa a apertura das áreas infantís ante uns requisitos da Xunta do PP “improvisados e imposibles de cumprir”

Redacción
-
0
Baiona atrasa a apertura das áreas infantís ante uns requisitos da Xunta do PP “improvisados e imposibles de cumprir”

O alcalde de Baiona, Carlos Gómez, anunciou hoxe a intención do Goberno local de atrasar a apertura dos parques infantís e áreas biosaudables do municipio ante a imposibilidade de cumprir cos requisitos esixidos pola Xunta de Galicia que, unha vez máis, afirma o rexedor baionés, “fai gala da máis absoluta improvisación”.

Gómez lamentou que o Goberno do PP da Xunta de Galicia, aplique a máxima do Despotismo Ilustrado de ‘Todo polo pobo pero sen o pobo’ e adopte medidas “que afectan directamente aos concellos é a saúde da cidadanía, sen tan sequera consultar ás administracións locais se teñen capacidade ou non de poñer en marcha ditas medidas”.

É despropósito e un total descoñecemento da realidade dos concellos, asegura o alcalde de Baiona, “pensar que no prazo de dous ou tres días, unha administración local pode poñer en marcha unhas medidas, case que absurdas dende o punto de vista sanitario e de imposible cumprimento”.

A Xunta especifica, tal e como recolle o DOG que “os parques infantís e espazos de uso público ao aire libre poderán estar abertos ao público sempre que se respecte unha capacidade máxima”. Esa norma, amais de outras que propón o Goberno galego, “faría preciso medicións exactas e cálculos de uso en cada área de xogo para que cada neno ou nena tivera 4 metros cadrados de espazo” a ese traballo habería que engadir o da “elaboración e colocación de paneis informativos sobre as condicións de uso da zona”.

Doutra banda, explica Carlos Gómez, a Xunta obriga a “unha desinfección e limpeza diaria” tanto dos elementos de xogo como do mobiliario urbano compartido, unha medida que o rexedor local cualifica de “absurda e inútil” xa que “un xogo que toque un neno ou nena pode quedar contaminado e contaxiar ao que o utilice despois, polo que habería que desinfectado cada vez que un rapaz ou rapaza utilice un elemento do parque”.

A todas estas medidas que “non teñen máis intención que a de dar unha sensación de normalidade” sen pararse a pensar “as consecuencias que poden ter sobre un dos sectores máis vulnerables da poboación, como é a infancia”, afirma Gómez, engádese a obriga de contar con xeles hidroalcohólicos ou desinfectantes “unha medida que precisa de certo tempo para instalar os dispensadores”.

Por último, Carlos Gómez lamenta que a improvisación do Goberno galego, “que debería ser o principal garante da saúde dos galegos e galegas”, lle leve a adoptar unha medida como esta que pode tirar polo chan “todos os esforzos realizados ata o de agora por Concellos, sector produtivo e cidadanía”.

Os parques infantís e áreas biosaudables, remata o alcalde de Baiona, “iranse abrindo a medida que o Concello poida garantir totalmente, a seguridade dos nenos e nenas que utilicen ditas instalacións”.

Os premios ‘Demo Day’ de ‘DepoEmprende na FP’ exhiben na Deputación “todo o talento e a creatividade que hai na provincia”

Redacción
-
0
Os premios ‘Demo Day’ de ‘DepoEmprende na FP’ exhiben na Deputación “todo o talento e a creatividade que hai na provincia”

O talento emprendedor da xente máis nova exhibiu hoxe o seu grande músculo no Pazo Provincial da Deputación de Pontevedra no acto de entrega dos Premios Demo Day aos proxectos gañadores da nova edición de ‘DepoEmprende na FP’, un “acto cheo de talento e creatividade” tal e como subliñou a Carmela Silva, a pesar de que entrega tivo que adaptarse aos tempos da Covid19 coas medidas de protección e distanciamento axeitadas. A presidenta dirixiuse ás mozas e mozos premiadas e amosouse “alucinada co nivelazo que ten a formación profesional na nosa provincia”, subliñando que “cada ano sorpréndome coas incribles ideas que poñedes en marcha desde os vosos centros”.

Os Premios Demo Day recoñecen ás tres mellores iniciativas empresariais no marco de “DepoEmprende na FP” deste ano, que tiveron que reorientarse, polas consecuencias da crise sanitaria, cambiando os seus proxectos iniciais ao formato audiovisual. O xurado destacou “o excelente nivel dos traballos” que na categoría de Grao Superior, outorgou o primeiro premio (700 euros) ao CIFP Carlos Oroza polo proxecto “Animal Lovers” e o segundo premio (500€) para o CIFP Manuel Antonio por “OdontoApp”.

“Animal Lovers”, realizado polas alumnas Nuria Pintos e Nuria Franco, do Ciclo superior de Aloxamentos Turísticos do Carlos Oroza, baséase na posta en marcha dun establecemento destinado a satisfacer as necesidades que se dan á hora de viaxar con mascotas. Trátase dun hotel rural onde os protagonistas son os animais de compañía das persoas que se hospedan, con aloxamento e coidados específicos para as mascotas.

[su_image_carousel source=”media: 16305,16306,16307″ crop=”5:4″ link=”lightbox” autoplay=”0″]

O segundo premio foi para o proxecto do alumnado do CIFP Manuel Antonio, realizado por Sabela Cid, Óscar Vila, Eva Figueroa e Alba Pichel, do Ciclo Superior de Hixiene Bucodental, e leva como nome “OdontoApp”. Consiste nunha ferramenta tecnolóxica dirixida ás clínicas dentais co fin de optimizar e facilitar o traballo de xestión a través dunha axenda en liña que se pon a disposición das e dos pacientes.

En canto á categoría de Grao Medio, o premio dotado con 700 euros foi para o IES Montecelo polo proxecto empresarial “Camiñando”, ideado por Andrea Abal, José Carlos Rodríguez e Julián Sevilla, do Ciclo Medio de Farmacia e Parafarmacia. É unha iniciativa que ofrece a montaxe e comercialización dun kit con produtos para o coidado persoal dos peregrinos e peregrinas, utilizando unha cabaza como envase que despois pode conservarse como un recordo da experiencia vivida polos Camiños de Santiago.

Na entrega de premios, na que participaron o profesorado e o alumnado, Carmela Silva

salientou que estaba “abraiada cos tres proxectos premiados” porque “teñen moito futuro, xa que cada unha destas iniciativas están capacitadas para ter viabilidade, son demandas reais que hai no sistema económico”. Amais, recalcou que “nesta provincia hai moito talento, hai moita creatividade e isto é un feito para ser moi optimistas porque son as ideas as que poden por si mesmas cambian o mundo”.

A presidenta provincial aproveitou para reivindicar o papel da formación profesional a que considerou “fundamental para o futuro da nosa provincia e do conxunto do estado, como un bo camiño para xerar riqueza e emprego de calidade”. Tamén reclamou “unha aposta máis forte de todas as administracións pola FP”, e aplaudiu as palabras de alumnas e alumnos que fixeron un canto ao optimismo e á actitude como canles axeitados para conseguir os soños.

Redondela manterá pechados os parques infantís e áreas biosaudables

Redacción
-
0
Redondela manterá pechados os parques infantís e áreas biosaudables

O Concello de Redondela manterá pechados os parques infantís e zonas biosaudables do municipio ata que se estuden, por parte dos técnicos municipais, as posibilidades da súa apertura paulatina e controlada, unha apertura que “dende logo non é a que propón a Xunta de Galicia, dun día para outro, adoptando medidas que afectan aos concellos pero, como é habitual, sen contar para nada coa opinión dos propios concellos”, asegurou hoxe a alcaldesa de Redondela, Digna Rivas.

Rivas criticou a “improvisación” de que fai gala a Xunta do PP logo de estar “literalmente desaparecida durante un estado de alarma no que os concellos tivemos que asumir competencias que non eran nosas para non deixar desprotexidos aos nosos veciños e veciñas”.

Cómpre sinalar que as normas publicadas no Diario Oficial de Galicia establecen, entre outras cousas, a desinfección diaria das zonas de xogo, limitación de aforo con 4 metros cadrados por cada neno ou nena e colocación de dispensadores de hidroxel.

Todas estas medidas, non se poden levar a cabo en dous días aínda que “lamentablemente –afirmou a alcaldesa redondelá– xa comezamos a estar acostumados a unha Xunta que dita normas dun día para outro pero sen poñer os medio necesarios para que poidan ser cumpridas e sen contar, en absoluto, coas limitacións orzamentarias e de persoal que teñen as administracións locais”.

Chama a rexedora local “á responsabilidade das nais e pais que, ata o de agora, amosaron un comportamento exemplar durante o confinamento” e adiantou que o concello irá abrindo, “de xeito paulatino e estudado” as distintas áreas infantís para que, unha vez que poidan ser utilizadas por nenos e nenas “conten con todas as garantías sanitarias”.

Asemade, Digna Rivas fixo un chamamento a que non se retiren os precintos dos parques infantís e zonas biosaudables, como sucedeu no dia de onte, ata que o faga o Concello xa que, entón, poderán ser utilizadas ditas áreas “con todas as garantías para a saúde dos nosos nenos e nenas”.

O Concello de Ponteareas convoca ao Consello Municipal da Infancia e da Adolescencia

Redacción
-
0
O Concello de Ponteareas convoca ao Consello Municipal da Infancia e da Adolescencia

O Concello de Ponteareas vén de convocar ao Consello Municipal da Infancia e da Adolescencia para manter unha nova reunión, nesta ocasión virtual, o vindeiro 18 de xuño ás cinco da tarde. O alcalde ponteareán, Xosé Represas, quere dialogar coa infancia e coa mocidade da vila sobre o tempo de confinamento e a actualidade da desescalada co obxectivo de afondar naquelas preocupacións que os abordaron nestes tempos e coñecer cales foron as súas necesidades.

Xunto á concelleira de Educación e tenenta de alcalde, Cristina Fernández, e o concelleiro de Mocidade, Miguel Bouzó, recollerán tamén as propostas que ofrezan para o fin do estado de alarma e debatirán sobre o uso do espazo público na nova normalidade.

Ademais, na listaxe da orde do día atópanse puntos como a renovación dos parques infantís e as actividades lúdicas municipais para os menores neste verán de 2020.

Ramón Fernández Leal toma posesión como novo concelleiro de Participación Veciñal e Voluntariado do Rosal

Redacción
-
0
Ramón Fernández Leal toma posesión como novo concelleiro de Participación Veciñal e Voluntariado do Rosal

O Concello do Rosal celebrou este luns un pleno extraordinario no Centro Social Polivalente no que tomou posesión o novo concelleiro municipal, Ramón Fernández Leal, que estará ao fronte dos departamentos de Participación Veciñal e de Voluntariado, de nova creación, para darlle un maior peso a unhas áreas de grande importancia no municipio, que conta cun amplo e activo tecido asociacionista.

Mestre xubilado, con experiencia política e moi comprometido socialmente, Fernández Leal tamén complementará outras áreas do Concello e se sumará a un proxecto de equipo no que achegará o seu saber estar e escoitar, a súa veteranía e a súa dispoñibilidade para dedicar tempo á xestión municipal.

Mobilidade sostible

Durante o pleno tamén se aprobou o convenio de colaboración coa Deputación para a execución da fase 1 das obras de mellora da mobilidade peonil entre dous núcleos da ribeira do Rosal como son Tabagón e As Eiras, así como con núcleo urbano de Goián. Un proxecto na estrada provincial EP 3303 de importante calado para o concello rosaleiro co que se busca mellorar as comunicacións dun xeito sostible no que as persoas sexan a prioridade, fomentando a calidade de vida no rural. O convenio aprobouse cos votos a favor de BNG e PSOE e coa abstención do PP.

Enmarcado no Plan de Mobilidade Urbana e Sostible do Concello do Rosal, o proxecto busca recuperar espazos para as persoas dun xeito planificado e ordenado e seguindo criterios obxectivos consensuados coa administración provincial. Trátase dun “novo concepto de mobilidade que suporá unha transformación total en termos de comunicación entre os núcleos rurais que se realizará grazas á capacidade do Concello para sacar adiante en menos dun ano un proxecto considerado prioritario para a Deputación de Pontevedra, que xa comprometeu gasto para facelo realidade”, subliña a alcaldesa, Ánxela Fernández.

A posta en marcha destas obras é unha “oportunidade histórica despois de estar catro anos sen que se executasen proxectos e seguiremos traballando noutras iniciativas de mobilidade para transformar O Rosal”. “É hora de pensar a mobilidade dun xeito novo e diferente no que se lle dea protagonismo ao que verdadeiramente importa: as persoas. E hai que facelo apostando sempre pola sostibilidade e poñendo en valor o ámbito natural”, recalca a rexedora.

A fase 1 do proxecto contempla a creación dunha senda peonil e ciclista nesta estrada, ademais da renovación da rede de drenaxe existente, a execución da canalización soterrada para a futura renovación da rede de alumeado público ou a instalación de medidas redutoras de velocidade, entre outras accións. Estas obras terán un custe total de 650.000€, dos que o 80% irá a cargo da Deputación de Pontevedra e o outro 20% do Concello do Rosal.

As Bibliotecas de Redondela abren as súas salas de estudo

Redacción
-
0
As Bibliotecas de Redondela abren as súas salas de estudo

 As Bibliotecas de Redondela abriron este luns, 15 de xuño, as súas salas de estudo, unha apertura que se fai respectando o aforo, cumprindo sempre a distancia interpersoal e a limpeza e hixiene axeitados.

No caso da sala de estudo da Biblioteca Pública Municipal ‘Valle-Inclán’ de Redondela, adaptouse un dos espazos da planta baixa do Multiúsos da Xunqueira co fin de poder espaciar máis os lugares de estudo para manter a distancia de seguridade. Esta medida permite conotar cun total de vinte prazas para estudo.

As persoas interesadas poderán acudir ás salas de estudo de luns a venres de 08:30 a 14:00 horas. Ao chegar ao Multiúsos deben solicitar, no mostrador da entrada, un número que se corresponde co do posto asignado para o estudo; ese número entregarase de novo á saída para que o persoal poida sinalizar ese posto para a súa hixienización.

Respectando as mesmas medidas de seguridade e hixiene, a na Biblioteca Pública Municipal ‘Xela Arias’ de Chapela abrirá de luns a venres de 9 horas a 14 horas.

Balneario de Mondariz, recoñecido nos Premios ‘Wedding Awards 2020’ como “o lugar ideal para casar”

Redacción
-
0
Balneario de Mondariz, recoñecido nos Premios ‘Wedding Awards 2020’ como “o lugar ideal para casar”

Balneario de Mondariz foi de novo galardoado, nesta ocasión cun dos premios Wedding Awards 2020, considerados os Óscar do sector nupcial e de vodas, o que o acredita como un dos espazos máis recomendados polas parellas que casaron durante 2019. Estes galardóns organízaos a web Vodas.net, que forma parte do grupo The Knot Worldwide, líder global no ámbito nupcial e basean os seus galardóns nas máis de 7 millóns de opinións de parellas coas que conta o portal.

Balneario de Mondariz fíxose acredor deste recoñecemento polo lugar natural privilexiado onde está situada a vila termal, os seus espazos interiores marcados pola historia do establecemento, a súa gastronomía para eventos, o servizo do departamento de banquetes e o trato personalizado do cliente.

[su_image_carousel source=”media: 16282,16281,16279″ crop=”5:4″ link=”lightbox” autoplay=”0″]

Esta edición dos Wedding Awards 2020 cobra especial relevancia ao representar un gran apoio para os profesionais do sector nunha das tempadas máis difíciles que se lembran ata o momento debido a Covid-19. Aínda que estes premios adoitan entregarse en marzo, este ano víronse aprazados ata o mes de xuño, cando a situación parece que volve á normalidade despois duns meses de incerteza.

Estes son os únicos premios do sector outorgados en base ás opinións das parellas que contraeron matrimonio e aí precisamente reside o seu valor, por iso, os Wedding Awards volven máis forte que nunca e pretenden supoñer un recoñecemento aos miles de profesionais que tiveron que demostrar a súa paixón polas vodas e o traballo ben feito máis aló da celebración. Un impulso para arrincar unha tempada atípica e que lles permita afrontar con máis ilusión os meses nos que máis ligazóns celébranse: setembro, xuño, xullo e outubro segundo o ‘Libro imprescindible das Vodas’ de Carles Torrecilla, en colaboración con ESADE e Google.

Estes premios están baseados en máis de 7 millóns de opinións de parellas coas que conta o portal e só outórganse ao 5 % das empresas que obtiveron o maior número de opinións e as mellores cualificacións de cada categoría entre máis de 47.000 empresas, sendo case 3000 as empresas galegas dentro do portal, tendo en conta a calidade e profesionalidade do servizo que ofrecen.

Por iso, o papel máis importante téñeno as parellas que, coas súas opinións e tras gozar dos servizos dos profesionais das vodas, definen quen serán os gañadores. Por este motivo, o galardón converteuse nun referente no sector e nun selo de garantía para as parellas que están a preparar a súa voda, xa que poden coñecer as opinións que outros namorados teñen dos profesionais. Un feito moi relevante se temos en conta que case 7 de cada 10 prometidos, utiliza internet para localizar provedores para o seu día especial.

Benítez propón unha ‘Tartexa Cidadá Transfronteiriza’ para evitar a repetición dos problemas do peche da fronteira con Portugal

Redacción
-
0
Benítez propón unha ‘Tartexa Cidadá Transfronteiriza’ para evitar a repetición dos problemas do peche da fronteira con Portugal

O AECT Rio Minho, a través do seu director Uxío Benítez, propuxo hoxe a posta en marcha dunha ‘tarxeta cidadá transfronteiriza’ que facilite a vida da cidadanía de ambos lados do Miño e evite que se repitan, entre outros, os problemas de mobilidade derivados do peche da fronteira con Portugal pola crise da COVID-19 para as persoas traballadoras. Benítez realizou esta proposta nunha comparecencia conxunta dos alcaldes, alcaldesas e presidentes de câmara dos concellos do territorio miñoto na que se parabenizaron da vitoria conseguida ao terse autorizado a apertura das pontes de Arbo-Melgaço, Salvaterra-Monçao e Tomiño-Cerveira con fins laborais dende o día de hoxe, tal e como viñan reclamando con protestas durante as últimas semanas.

Segundo destacou o máximo dirixente do AECT é necesario desenvolver cara o futuro, e como iniciativa novidosa, un proxecto piloto para crear unha ‘tarxeta cidadá transfronteiriza’ que identifique a todas as persoas que viven no territorio “e que facemos a nosa vida, traballo, o noso lecer indistintamente de que esteamos nun estado ou noutro”, para que no futuro, se se volven ter que pechar as fronteiras, o peche non sexa efectivo para esa xente e se permita a mobilidade transfronteiriza “promovendo deste xeito unha cidadanía europea real”.

Benítez indicou tamén que a crise do coronavirus vai traer unha crise económica importante que no territorio do Miño vai a ser doble pola decisión de pechar as fronteiras o 17 de marzo. Por este motivo, instou ás autoridades rexionais, estatais, e europeas a que instrúan os procedementos económicos necesarios para que se compense ao territorio miñoto por ter tido as fronteiras fechadas igual que se tiveran centos de anos atrás. “As autoridades teñen que compensar a estes territorios porque nos impediron relacionarnos comercial e economicamente cos veciños do lado”, destacou.

De feito, puxo sobre a mesa a demanda de que no próximo cadro de fondos comunitarios 2021-2027 se faga un Investimento Territorial Integrado (ITI) no Río Miño e se dediquen diferentes tipos de fondos -estatais, rexionais e europeos- a facer un investimento enfocado no territorio “porque entendemos que é un territorio con moitas posibilidades de desenvolvemento socioeconómico e hai que reactivalo”, dixo Benítez. Lembrou tamén que a fronteira entre Pontevedra e Portugal “é a máis dinámica social e economicamente e non se pode permitir que estea afogada durante todos estes meses co muro de Berlín que nos puxeron aquí” e subliñou que esa demanda “nos vai ocupar o tempo de aquí en diante”.

Benítez realizou estas propostas hoxe dende o medio da ponte internacional entre Arbo e Melgaço, para facer unha valoración da apertura de pasos tanto en Arbo-Melgaço, como en Salvaterra-Monçao e Cerveira-Tomiño. O director do AECT manifestou que “para nós, o AECT e os concellos, a apertura dos pasos é unha boa noticia e unha pequena vitoria do territorio do río Miño, porque conseguimos anticipar 15 días e aliviar 15 días a economía de moitos traballadores e traballadoras que poden xa pasar por estas tres pontes e non ter que dar rodeos quilométricos”.

Subliñou que as protestas dos alcaldes, alcaldesas e presidentes das câmaras fixeron que se puxeran de acordo dous gobernos de dous estados. “Facemos unha valoración positiva porque conseguimos poñer no mapa o territorio e na axenda dos dous estados o problema que hai para milleiros de persoas”, destacou, subliñando que a reapertura dos pasos para as persoas traballadoras non soluciona todos os problemas. “Temos a problemática do comercio transfronteirizo, negocios e comercios que están nun lado do río pero viven, teñen boa parte da súa clientela nos veciños e veciñas do outro lado do río, e non poden recibir aos seus clientes porque non lles está premitido o paso. Iso seguiremos a reivindicalo hoxe e de cara ao futuro, poñendo propostas sobre a mesa”, subliñou lembrando a ‘tarxeta cidadá transfronteiriza’.

Pola súa banda o alcalde de Arbo, Horacio Gil, destacou tamén a vitoria de que se reabrise ao tránsito unha ponte como a do seu concello “que tardamos tanto ás autoridades para que se construíse”. Destacou que agora volvéronse convencer da necesidade de reabrir entre os dous países con motivos laborais, pero destacou o seu convencemento de que se comprenda tanto en Madrid como en Lisboa “que o fluxo debe ser o de sempre e non se volva reproducir esta situación”.

O presidente da Câmara de Melgaço, Manoel Batista, quixo poñer de relevo a importancia do AECT Rio Minho na consecución da reapertura dos pasos fronteirizos. Subliñou que nalgún momento houbo dúbidas sobre a efectividade da institución, “pero agora queda xa fóra de toda dúbida a súa importancia”, pola eficacia do traballo feito na problemática da fronteira, e pola existencia dun plan estratéxico estruturado e accións concretas para o territorio.

No acto de hoxe estiveron presentes as alcaldesa de Tomiño, Sandra González; O Rosal, Ánxela Fernández; Salvaterra, Marta Valcárcel; As Neves, Xosé Manuel Rodríguez Méndez; A Guarda, Antonio Lomba e Arbo, Horacio Gil; os presidentes de Câmara de Melgaço, Vila Nova de Cerveira, Valença, Monçao, así como o vicepresidente de Caminha.

Tomiño prioriza a circulación de persoas no novo espazo público do Seixo con excepcións só para residentes e comerciantes

Redacción
-
0
Tomiño prioriza a circulación de persoas no novo espazo público do Seixo con excepcións só para residentes e comerciantes

Crear un Área de Circulación Restrinxida (A.CI.RE.) nas rúas do núcleo urbano do Seixo, con total prioridade para os peóns, e na que non se permitirá a circulación de vehículos, salvo os debidamente autorizados, é a decisión tomada polo Concello de Tomiño, que entrará en vigor en breve, tras o remate das obras de humanización levadas a cabo nos últimos meses.

O obxecto é garantir a mellora da mobilidade peonil e a seguridade viaria, retirando o tráfico de vehículos das rúas República Arxentina, A Guarda, Colón, Camino do Alivio e Praza do Seixo.

Dentro das excepcións, atópanse as persoas residentes, propietarias de comercios ou usuarias de garaxes; vehículos de carga e descarga de mercadorías e gasoil; servizos de emerxencias, ambulancias, bombeiros, policía, taxis e bicicletas, entres outros.

[su_image_carousel source=”media: 16269,16268,16267,16265″ crop=”5:4″ link=”lightbox” autoplay=”0″]

Asemade, non se poderá estacionar na zona, salvo para as persoas residentes, que disporán de 10 minutos para carga e descarga doméstica (carga e descarga de mercadorías, até 30 minutos).

Para o control do acceso de vehículos, o Concello contará cun sistema de cámaras de videovixilancia, coñecido coma ‘Traffic Eyes Accesos’; un sistema de recoñecemento de matriculas por OCR, para o control de tráfico en vías urbanas, que funciona de forma centralizada, enviando todas as matrículas detectadas a un servidor central, que comproba cada acceso na lista de vehículos autorizados, e xera as infraccións correspondentes, en caso de non dispor de permiso.

A partir da próxima semana, tanto residentes como comerciantes e demais servizos, terán á súa disposición o modelo de solicitude para a autorización de acceso á zona restrinxida.

Ditas solicitudes poderán presentarse no rexistro de entrada do Concello, ou ben, a través da sede electrónica (tomino.gal).

O concelleiro de Tráfico e Seguridade, Ismael Troncoso, acompañado polo oficial xefe da Policía Local, José R. Álvarez Riveiro, mantivo varias xuntanzas con residentes e comerciantes do núcleo urbano de Tomiño, para informarlles sobre as obras realizadas para a creación dun novo espazo público para a veciñanza, e do conseguinte cambio de prioridades de circulación de persoas e vehículos, escoitando ao mesmo tempo as súas necesidades e inquedanzas. “Queremos salientar a boa acollida das novas medidas por parte de residentes e comerciantes, e agradecemos a súa paciencia e comprensión durante as obras”, comenta o edil.

As obras contan cun investimento total de 670.000 euros (500.000 do Plan DepoRemse).

Gonzalo Caballero destaca que “somos o cambio con garantías” e augura que “o 12X haberá en Galicia un presidente socialista”

Redacción
-
0
Gonzalo Caballero destaca que “somos o cambio con garantías” e augura que “o 12X haberá en Galicia un presidente socialista”

O candidato do PSdeG-PSOE á Presidencia da Xunta, Gonzalo Caballero, apelou hoxe a todos os galegos a sumarse ao “cambio con garantías”, a un “cambio tranquilo, confortable” que non irá “contra ninguén” senón que traballará para que “ninguén quede atrás”.

“Somos a mellor opción para o futuro de Galicia”, subliñou o líder dos socialistas galegos, quen chamou a “meter a Feijóo no baúl dos recordos” a partires do 12 de xullo. Sobre todo, como dixo, porque quen durante 11 anos “recortou os servizos públicos, privatizou a sanidade e destruíu o emprego non pode agora pilotar a reconstrución” de Galicia trala pandemia.

É por iso, remarcou Gonzalo Caballero, “os socialistas saímos a gañar” estas eleccións, “con forza e con ilusión”, para construír “un goberno de progreso” na Xunta. “Porque Galicia -argumentou- é a nosa razón e o noso compromiso”, e “se en abril o cambio era necesario” para poñer fin á senda de “recortes e retrocesos” de Feijóo, “agora é imprescindible”.

Sobre todo, porque despois de frear a curva dos contaxios da covid en virtude das medidas tomadas polo goberno progresista en España, agora temos que “frear a curva da desigualdade” e “non deixar a ninguén na cuneta”. “As nosas receitas son máis necesarias que nunca”, evidenciou o candidato socialista á Presidencia da Xunta, consciente de que “somos a única garantía fronte aos recortes da dereita”.

Así pois, Gonzalo Caballero chamou aos galegos a “non resignarse ao PP de Casado, Ayuso e Feijóo”. “As eleccións do 12 de xullo son moi importantes. Se non acertamos na resposta que queremos, estarémonos laiando durante outros catro anos dos recortes de Feijóo”, advertiu.

“Catro semanas para o cambio”

Neste escenario, Gonzalo Caballero fixo fincapé en que “quedan catro semanas para o cambio” e para ter en Galicia un goberno que “defenda os servizos públicos e faga política pensando na cidadanía”. “Necesitamos revitalizar Galicia tralo diagnóstico en branco e negro que nos deixa Feijóo”, engadiu.

En concreto, referiu como os 11 anos de Feijóo en Galicia deixan 70.000 ocupados menos, unhaa 500 camas menos nos hospitais públicos, 2.000 millóns de recortes na sanidade pública e tan só 26 vivendas públicas construídas. “Galicia necesita abrir unha etapa de progreso e de oportunidades e o PP non é quen de facer política para remontar unha crise como esta”, incidiu.

Para poñer en marcha medidas que “a prol da xustiza social, a igualdade, os dereitos dos nenos e dos maiores” e pular pola creación de emprego e a mellora da economía, Gonzalo Caballero comprometeu un pacto político, cos axentes sociais e co municipalismo para “reconstruír o país”. Para “orientar” ese traballo, ademais, avanzou que contará con Xoaquín Fernández Leiceaga como conselleiro de Facenda do goberno autonómico.

Ademais, asegurou que un goberno progresista en Galicia “esclarecerá todo o ocorrido nas residencias de maiores” durante a crise da covid, porque 132 persoas faleceron en Galicia dentro dos xeriátricos. “Con responsabilidade, sen demagoxia, pero entendendo que o dereito á dignidade implica dar información a quen perdeu a un ser querido”, concluíu, antes de remarcar que é “un compromiso” que fará realidade.

Finalmente, o líder do PSdeG puxo en valor como o goberno progresista dispuxo o pago das nóminas a 270.000 galegos a través dos ERTE, como 70.000 autónomos de Galicia percibiron axudas, que se prohibiron os desafiuzamentos e o corte de subministracións durante a pandemia e a aprobación do ingreso mínimo vital.

E a resposta de Feijóo a este “escudo protector” da cidadanía, recordou, foi “a confrontación. “É corresponsable da estratexia de Casado, Álvarez de Toledo e Ayuso”, remachou Gonzalo Caballero, antes de recriminar a súa “irresponsabilidade” ao pedir o levantamento do estado de alarma o pasado 3 de maio. “Feijóo é PP en vena”, criticou.

Fronte a este xeito de actuar, Gonzalo Caballero reivindicou que o PSdeG-PSOE ten “un proxecto de país” que terá en conta á cidadanía. E engadiu que, despois de que as forzas progresistas gañaran en Galicia todas as eleccións do pasado ano, o vindeiro 12 de xullo haberá unha nova vitoria nas urnas que terá como resultado un presidente socialista.

“Hoxe hai máis motivos”

Pola súa banda, a número dous pola provincia de Pontevedra, Isaura Abelairas, destacou de Gonzalo Caballero que é “reivindicativo” e “un traballador incansable” e resaltou que o PSdeG ten “gañas, experiencia e coñecemento” para afrontar o cambio.

A continuación, a cabeza de cartel por Lugo, Patricia Otero, puxo en valor as medidas do goberno de España nesta crise, como o pago dos ERTE, as axudas a autónomos ou o ingreso mínimo vital.

“Temos mil e un motivos para saír á rúa e dicir que non é igual que gobernemos uns ou que gobernen outros”, incidiu, e criticou a “inacción” de Feijóo fronte ao traballo dunha maioría de alcaldes socialistas na súa provincia e do presidente da deputación. “Só nos queda desbancar ao PP da Xunta”, arengou, convencida de que Gonzalo Caballero será o próximo presidente.

Tamén interveu Marina Ortega, quen encabeza a candidatura ourensana, e sinalou que a súa provincia parece “o experimento macabro do PP”, á vista do pacto subscrito por Feijóo para manter a Baltar á fronte da Deputación e situar a Jácome no concello.

Por iso, tras “unha década perdida” para Galicia, chamou a situar na Presidencia da Xunta a “unha persoa moi formada e moi recoñecida” como Gonzalo Caballero.

Finalmente, Pablo Arangüena, número un pola Coruña, tomou a palabra para subliñar que “se hai tres meses había vimbios e motivos para o cambio” agora “hai os mesmos vimbios e moitos máis motivos”.

“Se despois de once anos recortou todo o que podía recortar e máis en sanidade e servizos públicos, que non fará se segue gobernando tras o 12X na crise que seguirá á pandemia?”, inquiriu, convencido de que Feijóo “deixaría Galicia como un bonsái” a base de tesoiras. Fronte a isto, comprometeu unha nova política para reconstruír Galicia ao lado da cidadanía.

O Concello da Guarda abre un proceso de participación cidadá sobre a humanización da contorna da Igrexa Parroquial

Redacción
-
0
O Concello da Guarda abre un proceso de participación cidadá sobre a humanización da contorna da Igrexa Parroquial

O equipo de Goberno do Concello da Guarda na súa liña de humanizar espazos da vila ten previsto eliminar o estacionamento de vehículos na contorna da igrexa Parroquial e dotar este espazo de mobiliario para recuperalo para as persoas. Segundo a idea do Goberno local, o mobiliario urbano permitirá a circulación de vehículos pero “en ningún caso deixará espazos de estacionamento” agás a reserva dunha praza para persoas con mobilidade reducida e outra para carga e descarga.

Con esta idea, dende o concello, encargouse á arquitecta da localidade, Ana Lima, que fixera dúas propostas diferentes para que fora a propia cidadanía a que seleccionara a que mais lle gustara. 

Chegado este punto o concello fai públicas as propostas a través de internet e mediante dous paneis no propio edificio municipal para que aquelas persoas que queiran participar na decisión, se acheguen a expresar a súa opinión nunha urna que estará emprazada no posto de información do novo Concello.

Poderán participar na votación os maiores de 16 anos empadroados na Guarda. Para exercer o dereito ao voto deberán facelo coa presentación do DNI. O proceso estará aberto dende o martes, día 16 de xuño as 9:00 h, ata o venres, día 19 ás 13:00 h, en horario de atención ao público (de 9:00 a 13:00). O resultado da votación farase público o luns día 22 de xuño.

Nuria Gómez, nova presidenta do C.B. Nigrán

Redacción
-
0
Nuria Gómez, nova presidenta do C.B. Nigrán

Nuria Gómez, actual Directora Deportiva do Club Baloncesto Nigrán é, dende esta pasada semana, a nova presidenta da entidade. Substitúe no cargo a Enrique Villar González que, despois de cinco anos, deixa a presidencia do club e o seu posto na Xunta Directiva. Villar foi un dos piares nos que, neste tempo, o C.B. Nigrán basou o seu crecemento e a xunta directiva lembra que “baixo a súa presidencia acadáronse importantes logros deportivos” amais de ser quen de “fortalecer de forma moi especial a faceta social da entidade”.

Comeza agora unha nova etapa na que Nuria González asume tanto a presidencia como a dirección deportiva. Capacidade e coñecemento non lle faltan para afrontar a nova etapa dun Club que, en tempo récord e a base de moito esforzo e sacrificio, pasou de estar a piques da desaparición a ser unha referencia no baloncesto da provincia.

A nova presidenta xunto ao resto da Directiva do club están xa traballando arreo na organización e planificación da nova tempada. Unha organización a todas luces complexa porque a xa habitual e nada doada de configuración de equipos nas diferentes categorías, organización de adestradores e captación de socios colaboradores, engádese a complicadísima xestión do protocolo hixiénico/sanitario que deberá estar activo no momento no que se inicien os adestramentos e para o que xa adquiriron todo o material de desinfección necesario.

A todas estas tarefas, engádese o programar e planificar unha pretempada que ten, neste ano, unha especial cognotación e dificultade: a de levar máis de dous mese (case que tres) parados, polo que haberá que voltar aos adestramentos dun xeito gradual e moi planificado.

Dentro da programación tamén se perfilan os primeiros trazos do xa habitual Torneo de Nadal ‘Encesta un Alimento’, que vai xa pola súa VII edición e que, a maiores de formar parte do calendario das vacacións de Nadal, forma parte inseparable da propia filosofía do Club: a solidariedade e a capacidade de axudar aos que máis o precisan.

Con todos estes ingredientes, todo está disposto para ‘cociñar’ unha tempada que promete ser apaixoante.

O Pavillón Municipal de Deportes e as Escolas Deportivas Municipais reinician a súa actividade o vindeiro 15 de xuño

Redacción
-
0
O Pavillón Municipal de Deportes e as Escolas Deportivas Municipais reinician a súa actividade o vindeiro 15 de xuño

O vindeiro luns, 15 de xuño, o Pavillón Municipal de Deportes de Baiona volverá a abrir as súas portas, pechadas pola crise sanitaria provocada pola COVID-19. A apertura, sempre pendente das circunstancias que dite a ‘nova normalidade’ estará marcada pola adopción de “estritas medidas de seguridade que permitan un funcionamento o máis normalizado posible e, ao mesmo tempo, unha total garantía de seguridade sanitaria para usuarios e usuarias”, sinala a concelleira de Deportes, Miriam Costas.

Así, para acceder ás instalacións do Pavillón, establécese un protocolo que será controlado polo persoal de recepción tendo que presentar os usuarios e usuarias “unha declaración xurada de non ter viaxado ao estranxeiro, non estar en contacto con ningunha persoa que padeza a COVID-19 e non ter síntomas da enfermidade.

Ademais tomarase a temperatura a todas as persoas que accedan as instalacións, non permitíndose á entrada a ninguén que supere os 37,2 °C. Doutra banda, e para maior tranquilidade, proporcionarase a cada persoa usuaria un pulverizador de uso para a limpeza e desinfección de cada espazo e material utilizado. De cara a evitar cruzamentos de persoas usuarias, establécese unha única entrada de acceso (a porta da zona de recepción) e unha única vía de saída (o portón de pista).

En canto ao horario, as instalacións estarán abertas de luns a xoves de 8:30 horas a 13:30 horas e de 18:30 horas a 22:30 horas e o venres de 08:30 horas a 13:30 horas.

As diferentes clases realizaranse polo sistema de cita previa podendo solicitala ou a través do teléfono 986 356 558 ou do WhatsApp 667 983 555. A duración máxima da estancia no Pavillón será de 90 minutos ou dúas clases e, usuarias e usuarios, só poderán elixir unha quenda, ou de mañá ou de tarde. O persoal das instalacións levará un control telefónico de solicitudes e reservas a través do WhatsApp

No que ao persoal atinxe, haberá un monitor/a para clases colectivas en pista do pavillón, un monitor/a para clases de spining na aula de aerobic e un monitor/a permanente na sala Gym para o control de espazo de usuarios e usuarias.

Tal e como explica a concelleira de Deportes, Miriam Costas, as persoas usuarias “contan con todas as medidas de seguridade para poder asistir as clases grupais ou utilizar as instalacións” e, nese sentido, sinala Costas “cada persoa disporá de 4 metros cadrados e as clases grupais estarán limitadas a un máximo de 20 usuarios e usuarias para poder garantir o correcto distanciamento”. Na mesma liña, a sala de fitness terá limitado o aforo a 15 persoas por módulo.

A reapertura deste tipo de instalacións “é complexa debido á propia estrutura de funcionamento –sinala a concelleira de Deportes– motivo polo que o Goberno local adoptou todas as medidas para garantir o contacto ‘cero’ entre persoas usuarias”. Como medida preventiva non se poderán utilizar nin vestiarios nin taquillas, será obrigatorio o uso de esterilla propia e toalla, e as máquinas de vending non terán servizo.

Finalmente, as instalacións serán desinfectadas antes da apertura diaria, tanto de mañá como de tarde, e entre as distintas clases.

Cabaleiro e Regades coinciden en que o mellor para Tui “é que Gonzalo Caballero sexa presidente da Xunta” logo do 12X

Redacción
-
0
Cabaleiro e Regades coinciden en que o mellor para Tui “é que Gonzalo Caballero sexa presidente da Xunta” logo do 12X

O alcalde de Tui, Enrique Cabaleiro, recibiu a visita da candidatura do PSdeG-PSOE pola provincia de Pontevedra ás próximas Eleccións Autonómicas e do secretario xeral provincial, David Regades Fernández. Cabaleiro remarcou que o mellor para Tui é que o próximo presidente da Xunta de Galicia sexa Gonzalo Caballero.

A xuntanza produciuse no polígono industrial de Areas, onde o Concello está a impulsar unha segunda fase, para a que quere contar co apoio do Consorcio da Zona Franca, que dirixe Regades. O propio David Regades destacou que a Zona Franca pasou de ser unha institución pouco coñecida e que era vista como “un observador” a converteuse “nun axente activo do desenvolvemento industrial e social no Sur de Galicia”.

O alcalde de Tui ten moi claro que o relevo na Xunta de Galicia significará o mesmo que xa significou o cambio político no propio Concello de Tui no ano 2015. Confiou en que tralos comicios do próximo mes dispoñamos dun novo Goberno galego “para levar adiante tódalas cuestións que están pendentes en Tui”. O alcalde lembrou que ao igual que houbo que emprender un camiño para o desenvolvemento urbanístico da totalidade dos polígonos do municipio, agora hai tarefa por diante e que precisa dunha Xunta comprometida.

David Regades afirmou que a garantía do cambio son os nomes de Carmela Silva na Deputación de Pontevedra e de Pedro Sánchez no Goberno de España. “Xa demostramos que cando chegamos ás institucións sabemos poñelas ao servizo da xente”. Por tanto, concluíu que os proxectos a curto, medio e longo prazo de Tui precisan dun Goberno galego que, con Gonzalo Caballero á cabeza, aposte por xerar emprego, riqueza e ilusión “nun enclave que, como Tui, é o centro da eurorrexión e un dos pasos transfronteirizos máis utilizados de España”.

Salvaterra de Miño dará axudas de 75 € para compra de material escolar de infantil

Redacción
-
0
Salvaterra de Miño dará axudas de 75 € para compra de material escolar de infantil

Un ano máis o Concello de Salvaterra de Miño vén de aprobar as axudas de 75,00 € destinadas á adquisición de libros e material escolar de infantil, para o curso 2020-2021. O obxecto destas axudas, sinala a alcadesa Marta Valcárcel, “é promover o principio de igualdade no exercicio da educación e compensar ás familias con escasos recursos para facer fronte aos gastos derivados da escolarización dos seus fillos e fillas”. A iniciativa está dirixida a alumnos e alumnas dos cursos de Educación Infantil matriculados nos centros escolares do municipio.

      O prazo de presentación de solicitudes fíxase do 12 de xullo ao 28 de agosto de 2020, ambos inclusive. Os interesados deberán presentar as solicitudes acompañadas da documentación en Servicios Sociais, martes, mércores e xoves de 09:00 h a 13:00 h, previa cita telefónica no 697 911 050. Mais información, bases e modelo de solicitude en www.concellodesalvaterra.com.

Gonzalo Caballero, “Galicia necesita unha Xunta progresista en sitonía co Goberno de España”

Redacción
-
0
Gonzalo Caballero, “Galicia necesita unha Xunta progresista en sitonía co Goberno de España”

O candidato socialista á presidencia da Xunta, Gonzalo Caballero, sinalou onte en Santiago que “é necesario abrir en Galicia unha etapa de progreso para a reconstrución económica e social de Galicia”, e chamou a facelo cunha Xunta que sexa “aliada” das políticas de protección da cidadanía que está poñendo en marcha o goberno de España.

Así o dixo logo dun encontro co delegado do Goberno en Galicia, Javier Losada, no que avaliaron as 450 medidas que o goberno central puxo en marcha nesta comunidade autónoma durante a crise sanitaria provocada polo coronavirus, e que supón unha acción inédita ata o de agora.

Ao fío disto, o secretario xeral do PSdeG reclamou o apoio para un Goberno de España que “necesita aliados para desenvolver as políticas sociais” e consolidar a saída da crise “sen deixar a ninguén na cuneta”, polo que apostou por “abrir unha etapa de progreso” en Galicia. Chamou a unha “mobilización masiva” en Galicia para poñer fin a 11 anos de recortes nas políticas sociais da man de Feijóo e dar paso a un novo goberno progresista que teña nas políticas sociais a súa referencia.

Por iso, Gonzalo Caballero pediulle aos galegos e galegas “que nos acompañen” nun escenario electoral no que “comeza a respirarse aire de cambio” para “retirar ao Feijóo dos recortes” e poñer á fronte de Galicia a un goberno progresista que traballe en liña coas demandas da cidadanía.

“O 12X non podemos levar o susto de ter a Feijóo catro anos máis recortando, destruíndo emprego e desmantelando a sanidade, e temos que ser nós os que lle deamos un susto electoral a Feijóo”, arengou o líder do PSdeG, da man dunha “maioría de galegos que queremos que Galicia progrese defendendo a sanidade, as políticas sociais e unha nova política económica que non deixe a ninguén atrás”.

Ingreso mínimo vital

O candidato socialista contrastou así a bagaxe dun goberno progresista en España que protexe á cidadanía, que -enumerou- toma medidas como o ingreso mínimo vital, que financia os ERTEs, que prohibe os desafiuzamentos e garante as subministracións básicas nos fogares e que aproba prestacións para os autónomos, cun Feijóo que “quere aparentar que se acorda das políticas sociais plantexando medidas que xa estaban en funcionamento nos concellos dende hai anos con interese electoral”.

Nese senso, Gonzalo Caballero subliñou que Feijóo “vai a rebufo do goberno e do ingreso mínimo vital, intentando amagar cun compromiso coas políticas sociais” que non amosou durante a súa etapa á fronte da Xunta. En Galicia, evidenciou, “os colectivos vulnerables, os usuarios dos centros de día e de discapacidade ou das residencias de maiores, as familias que necesitan das escolas infantís… saben que o PP aplicou recortes drásticos durante 11 anos”.

Debates

Precisamente por iso, o máximo dirixente do PSdeG emprazou de novo a Feijóo a aceptar cinco debates electorais televisados nesta campaña, dous deles co candidato socialista como representante do principal partido da oposición, e outros tres co conxunto de forzas políticas.

A un mes das eleccións, subliñou Gonzalo Caballero, Feijóo aínda non respondeu a esta proposta, demostrando que “quere agocharse e escapar, non quere falar dos seus recortes, do que pasou nas residencias con tantos contaxios, ou coa destrución do emprego e da actividade industrial”.

“Feijóo quere pasar de puntillas pola campaña para non render contas, e vai chegar ao 12X acompañado tan só por Casado e Álvarez de Toledo fronte á maioría de progreso”, sentenciou Gonzalo Caballero, para facer fincapé en que “vai haber cambio en Galicia”, e “Feijóo vai ver como os galegos lle dicimos o que xa lle dixemos en abril, en maio e en novembro do ano pasado: que o seu tempo político en Galicia xa rematou”.

Alcoa

A preguntas dos xornalistas, o candidato socialista reclamoulle hoxe ao goberno galego que “se poña a traballar e pase a ser parte da solución” para a continuidade da planta de Alcoa en San Cibrao. Criticou que o goberno galego actúe “como unha axencia de queixas sen folla de ruta nin orzamentos, que non sabe que facer coa industria galega”, e cuxa única preocupación é “confrontar e non resolver” os problemas.

Sinalou que “mentres a ministra de Industria traballa para defender a actividade industrial, non sabemos de nada que faga o goberno da Xunta de Galicia”, polo que urxiu a Feijóo a que “se poña a traballar nestas catro semanas que lle quedan á fronte da Xunta”. Do contrario, “será un goberno progresista quen encete unha nova política industrial comprometida cos traballadores e busque solucións para a planta”, engadiu.

O delegado do Goberno, pola súa banda, emprazou ao goberno galego a “non equivocarnos e buscar ao inimigo dos traballadores nas administracións públicas” cando sen enfrontan a unha empresa que “non queren nin vender nin buscar un socio industrial nin tampouco presentar unha política industrial de futuro”. Advertiu que “empezo a pensar se o que está buscando é o conflito social”.

“O goberno de España, os sindicatos e os traballadores están na mesma sintonía, e cando Alcoa xera o problema temos que dicirlle que permita unha solución, que se non quere seguir na fábrica hai posibilidades que ten que abrir”, remarcou Losada, para incidir en que Industria está “na mesma posición que nestes anos, resolvendo con negociacións ou acordos todos os conflitos que o PP deixou debaixo das alfombras”.

450 medidas

O delegado do Goberno puxo en valor hoxe en Santiago as máis de 450 medidas postas en marcha polo goberno de España para apoiar a Galicia durante a crise do coronavirus, demostrando que “nunca, en ningunha crise, houbo un goberno que dedicara semellante cantidade de recursos a esta comunidade”.

O goberno galego, dixo, ten o “soporte necesario” para aplicar as medidas postas en marcha polo goberno de España en políticas sociais, educativas, atención aos máis pequenos, políticas sanitarias, nas residencias de terceira idade, material sanitario ou financiamento directo. Sinalou que “o obxectivo sempre foi saír da crise máis fortes, con respaldo e cun escudo social para a cidadanía”.

Salceda pide unha vez máis á Xunta a reparación do vial paralelo á EP2505 por ser “un perigo para vehículos e persoas”

Redacción
-
0
Salceda pide unha vez máis á Xunta a reparación do vial paralelo á EP2505 por ser “un perigo para vehículos e persoas”

A alcaldesa de Salceda, Loli Castiñeira, reiterou diante da Axencia Galega de Infraestruturas que se acometa o asfaltado de urxencia da vía de servizo existente entre a EP-2505 a glorieta elevada sobre a PO-510 polo seu mal estado, que non reúne as condicións mínimas para a circulación de vehículos.

A alcaldesa de Salceda, Loli Castiñeira, fixo fincapé no feito que o pasado ano a Xunta de Galicia, “saltándose o principio de colaboración entre administracións, impediu o arranxo do vial por parte do Concello, e agora manteno nunhas condicións deplorables que impiden o seu uso por parte de vehículos e camiñantes”

Castiñeira facía referencia a que hai un ano o propio Concello quixo realizar obras de reparación do mencionado vial contando co permiso verbal por parte da Xunta de Galicia, pero no momento da execución a administración autonómica paralizou dita obra, anunciando incluso a apertura dun expediente ao Concello de Salceda.

Finalmente a AXI autorizou ao Concello a realizar as obras de mellora, pero establecendo uns condicionantes imposibles de acometer por parte da administración local, pois levar a cabo o proxecto cos mencionados condicionantes supón un investimento que ronda os 50.000 €, que o Concello ademais non podería imputar a ningún tipo de subvención por tratarse dun vial propiedade da Xunta de Galicia, e polo tanto a Administración Autonómica é a responsable de mantelo nas condicións óptimas de utilización.

Dende o Concello xa se lle deu traslado á Xunta do mal estado do vial no mes de xaneiro, e o pasado 3 de marzo reincidiuse na petición, indicando na mesma que “case dous meses despois, non se tomaron as medidas pertinentes por parte da AXI (Axencia Galega de Infraestruturas), e o mencionado vial presenta un estado que o fai practicamente intransitable”.

O equipo de goberno, entendendo que o momento que vimos de vivir dificultou a execución da obra, respetou as semanas de confinamento, e este pasado xoves volveu enviar unha nova solicitude á Xunta de Galicia (a terceira) para que acometese canto antes a reparación, que neste momento resulta aínda máis importante para poder aliviar de tráfico a recén humanizada rúa Gándara, que gana así máis espazo para as persoas, fundamental nestes momentos en que resulta vital manter a distancia física entre persoas.

Según un informe do arquitecto municipal, o vial deteriorouse debido o aumento do tráfico rodado, polas obras realizadas en agosto pasado polo Concello, e as condicións climatolóxicas adversas dos últimos meses. Este informe considera que a situación do vial é un perigo tanto para os peóns como para os vehículos.

Agora, “unha vez pasado o confinamento, –conclúe Loli Castiñeira– a Xunta ten que dar resposta á nosa solicitude canto antes”.

Redondela esixe á Xunta unha “reunión urxente” para tratar o problema de Aucosa

Redacción
-
0
Redondela esixe á Xunta unha “reunión urxente” para tratar o problema de Aucosa

A alcaldesa de Redondela, Digna Rivas, e o concelleiro de Medio Ambiente, Roberto Villar, mantiveron unha xuntanza na mañá do venres coa veciñanza de Cabanas e Chapela que reclama o traslado de Aucosa, empresa dedicada á transformación de derivados do peixe, a un polígono industrial xa que, ao entender de afectados e afectadas, o planeamento vixente en Redondela só permite o establecemento de “industrias limpas” nesa zona limítrofe coa Rede Natura 2000.

Rivas e Villar aseguráronlle aos veciños e veciñas que o Concello “non está cruzado de brazos” se ben os trámites “teñen que seguir proceso administrativo” que, sinalou o concelleiro de Medio Ambiente, “non é todo o áxil que lle gustaría aos e ás afectadas”. De feito, o concello contratou os servizos dun avogado especialista en asuntos ambientais e urbanísticos para que analice toda a documentación e asesore ao Goberno local sobre os pasos a seguir.

A paralización das obras por parte do Concello responde, segundo a alcaldesa Digna Rivas, “á aplicación da normativa vixente ao ter a empresa comezado obras de ampliación das súas instalacións sen contar coa licenza de obra do Concello”. O inicio destes traballos de ampliación e o derrubamento de parte das instalacións onde se almacenaba a materia prima de refugallos de peixe, “fixo que o problema dos malos olores incrementáranse”, aseguraron os veciños e veciñas.

Tanto Digna Rivas como Roberto Villar, salientaron o “desinterese” da Xunta de Galicia ata o momento xa que, sinalaron a alcaldesa e o concelleiro “son conscientes do grave problema que padece a veciñanza a través dos numerosos escritos que, nese sentido, se lle dirixiron á Dirección Xeral de Calidade Ambiental e Cambio Climático”.

A estes informes, engádense as continuas denuncias realizadas ante a Policía Local redondelá pola veciñanza da zona, denuncias que tamén se fixeron chegar á administración ambiental autonómica.

Doutra banda, Roberto Villar daba conta que logo das chamadas realizadas polo seu departamento á Dirección Xeral e que estes constatasen que, efectivamente, “tiñan rexistradas numerosas denuncias sobre ese tema”, non día de onte visitaron a zona un inspector de Medio Ambiente acompañado do Servizo de Protección da Natureza da Garda Civil (Seprona), sen que, ata o momento, apunta Villar, “teñamos coñecemento do informe elaborado”.

Con eses novos datos sobre a mesa, Digna Rivas e Roberto Villar esixen “unha reunión urxente coa Xunta de Galicia para tratar sobre o problema que Aucosa representa para a saúde ambiental de Rande” e, ao mesmo tempo, urxen á Xunta a que “dea conta ao Concello do contido do informe elaborado trala visita, no día de onte, dun inspector de Medio Ambiente e do Seprona a Acuosa”

Rivas chamou a atención que non é a primeira reunión que solicita o Concello de Redondela “sen que ata o momento se dignasen a dar unha resposta” unha actitude que para a alcaldesa “é unha clara falta de respecto aos veciños e veciñas que teñen que convivir, diariamente, cos malos cheiros que produce a actividade da empresa”.

Pola súa banda, o concelleiro de Medio Ambiente, Roberto Villar, asegura “non entender” como os servizos medioambientais da Xunta de Galicia poden informar favorablemente sobre unha actividade “altamente contaminante” nunha zona limítrofe á Rede Natura 2000 se ben, engade Villar, “á vista do contido dos informes queda claro que foron redactados dende un despacho en Santiago e non como consecuencia dunha visita detallada ao lugar dos feitos”.

Digna Rivas e Roberto Villar aseguraron que o Goberno local “non ten máis interese que a salvagarda dos intereses dos veciños e veciñas, polo que seguirá traballando na procura dunha solución que permita que á veciñanza poida ter a calidade de vida que merece”.

‘María Soliña’ preséntase en Cangas que, xunto con Redondela, serán os primeiros escenario galegos para a súa estrea

Redacción
-
0
‘María Soliña’ preséntase en Cangas que, xunto con Redondela, serán os primeiros escenario galegos para a súa estrea

A esperada película de Ignacio Vilar ‘María Solinha’ percorrerá máis de 100 concellos galegos entre os meses de xuño e outubro deste ano e transgredirá as fronteiras autonómicas con representacións en Castela e León e Portugal. Así se puxo de manifesto na presentación que tivo lugar este venres no Auditorio de Cangas, vila que, xunto a Redondela, acollerá a estrea da longametraxe sobre a viúva acusada de meiga e símbolo da loita contra a represión das mulleres.

“Esta historia emociónanos a todas porque é a nosa historia, é a historia das mulleres” manifestou ó respecto a presidenta da Deputación, Carmela Silva, que asistiu á presentación na capital do Morrazo onde tamén estiveron o alcalde de Cangas, Xosé Manuel Pazos e a alcaldesa de Redondela, Digna Rivas, e o director de AGADIC, Jacobo Sutil, amais de todo o elenco da película co director, Ignacio Vilar, o responsable da exhibición, Xoán Mariño, e as actrices e actores Laura Míguez, Grial Montes, Antonio Durán “Morris”, Santi Prego e Mabel Rivera.

A primeira proxección do filme será o vindeiro venres 19 de xuño no concello de Redondela, mentres que o 20 de xuño “María Solinha” chegará a Cangas. Ambas estreas serán ó aire libre. “A presentación vai percorrer o territorio levando o cinema e a cultura a todos os lugares. Imos levar o cinema a toda a xente. Hai algo máis democrático?”, preguntou a presidenta da Deputación sobre o modelo de distribución que se escolleu. Segundo Xoán Mariño, o xeito no que se moverá a película representa “un feito histórico porque non hai moitas pelis que estreen primeiro no rural e logo nos cines. Ademais, debe ser a primeira vez que se estree unha película nun autocine”. Deste xeito, entre os meses de xuño e outubro deste ano haberá estreas en numerosos concellos de toda Galicia. En todos os casos se seguirán as recomendacións e directrices derivadas da situación de crise sanitaria provocada polo COVID-19, polo que a longametraxe será proxectada nas mellores condicións técnicas para garantir todas as medidas de seguridade, aforo e hixienización.

A dinamización da economía dos concellos tamén se atopa fortemente ligada con esta película. Tanto Xoán Mariño como Digna Rivas e Xosé Manuel Pazos denotaron na presentación a importancia que ten a cultura como sector estratéxico. Xosé Manuel Pazos, ademais, explicou que “a rodaxe desta película xerou riqueza en toda a zona”. “A xente da cultura é capaz de reinventarse”, apuntou Carmela Silva sobre a capacidade de adaptación do proxecto á nova realidade. Apoiar o cinema que utiliza como lingua vehicular o galego e visibilizar ás mulleres da provincia, á vez que se dan a coñecer os territorios e o patrimonio da provincia son os obxectivos que a Deputación de Pontevedra persegue coa súa colaboración na financiación desta película.

Durante a presentación, a presidenta tamén quixo poñer en valor o cartel da película por ser quen de apreixar o espírito da obra e a loita contra o dragón, a metáfora do sistema machista e patriarcal: “Amosa unha terra, a provincia de Pontevedra, a mellor que hai. Amosa un océano Atlántico no que ocorreron tantas cousas e que nos situou no centro do mundo hai 2.000 anos. Amosa dúas mulleres cómplices, irmás e empoderadas que miran cara o mar enriba dunha rocha e que se miran entre si buscando esa relación para acabar co dragón”. Así, a longametraxe é unha crónica da imparable enerxía feminina a través da figura de María Solinha, unha viúva de Cangas que sufriu no século XVII en primeira persoa a represión feminina ó ser denunciada por bruxería. O dragón é o eixo que vertebra a obra para trazar a relación entre a sociedade inquisidora na que morreu María e a sociedade actual, baixo as gadoupas da besta.

Dirixida por Ignacio Vilar e producida por Vigopolis e Vía Láctea Films, a película conta cun reparto cen por cento galego e composto por ata 30 profesionais da interpretación, entre os que se atopa Grial Montes, actriz que protagonizará xunto a Laura Míguez a longametraxe e que quixo denunciar o tratamento da muller na sociedade actual: “Xa vai sendo hora de que nos tomen en serio. Non somos complementos, somos persoas”. Ignacio Vilar, pola súa banda, puxo o foco sobre María Solinha, explicando o enorme descoñecemento que existe con respecto á canguesa. “Penso que é importante recuperar unha figura como a de María Solinha e o cine danos esa oportunidade para dar a coñecela ante o mundo”.

Nigrán inaugura hoxe o seu primeiro ‘Banco contra a transfobia’

Redacción
-
0
Nigrán inaugura hoxe o seu primeiro ‘Banco contra a transfobia’

O Concello de Nigrán inaugurou este sábado 13 de xuño o seu primeiro banco contra a transfobia no marco da ‘Semana da Diversidade Sexual’ que organiza xunto a Sociedade Galega de Sexoloxía e a Asociación de Familias de Menores Trans Chrysallis. O mesmo está pintado cos colores da bandeira transxénero (rosa, azul e branco) e o lema ‘Non a Transfobia’, e está xa instalado na propia Praza do Concello, núcleo do centro urbano de Nigrán.

O obxectivo é ofrecer a través del una mirada positiva e tolerante, tanto da diversidade como do colectivo LGTBI, e de visibilizar estas realidades. Nigrán súmase así a outras cidades de todo o país que tamén apostaron por estes bancos para amosar o seu apoio ao colectivo trans. Paralelamente, desde inicios de semana a bandeira LGTBI está colgada na fachada do consistorio.

Esta inauguración encádrase nas xornadas online que durante toda a mañá se desenvolverán desde Concello. O encontro será inaugurado ás 10:00 horas polo alcalde de Nigrán, Juan González; a edil de Asuntos Sociais, Bibiana Peixoto; a presidenta de Sogasex, Purificación Leal, e a presidenta da Asociación de Familias de Menores Trans Chrysallis, Soledad Fernández. Durante o mesmo intervirán psicólogos expertos en educación sexual, sexólogos, activistas LGTB ou un pediatra. Ademais, abrirase un diálogo co público participante, que poderá tamén asistir telemáticamente á unha exposición ao respecto das xornadas no Auditorio Municipal.

A Asociación de Alfombristas do Corpus Christi impulsan varias iniciativas para que o Corpus siga a ser a festa grande

Redacción
-
0
A Asociación de Alfombristas do Corpus Christi impulsan varias iniciativas para que o Corpus siga a ser a festa grande

A crise sanitaria provocada pola COVID-19, o confinamento e as fases medidas de desescalada que se están a desenvolver, fan que celebracións senlleiras téñanse que reinventar. O Corpus Christi de Ponteareas, declarado Festa de Interese Turístico Internacional é un bo exemplo.

A Asociación de Alfombristas do Corpus Christi non quere que estes días “pasen desapercibidos” así que, con imaxinación e ganas, veñen de poñer en marcha iniciativas tan diversas coma novidosas, para que o Corpus siga a ser o que é, o elemento que aúna a un pobo e que o fai traballar na procura dun fin común.

Pide a Asociación que, de entrada, veciñas e veciños adobien os seus balcóns como se fai habitualmente o como eles din “como se fora un día de festa normal”. Xorde así a idea do ‘Corpus de Balcón’, unha idea que busca a decoración de todos os balcóns e fiestras da vila do 13 ao 14 de xuño, “unha idea que tamén se pode desenvolver nas parroquias para conseguir –sinala a Asociación de Alfombristas– un Corpus que agrupe e abranga a todo o municipio” e, postos xa a facer unha decoración extensiva, tamén se inclúe aos e ás emigrantes de Ponteareas para que “alín onde vivan, decoren o seu balcón e leven o Corpus a todos os confins do mundo”.

Olor a Corpus

Todo aquel que tivo ocasión de vivir o Corpus o sabe perfectamente. O Corpus ten un especial olor. Non se trata dunha frase feita o dunha expresión que reflicte un sentimento (que tamén). O Corpus cheira porque as toneladas de flores e elementos vexetais utilizados para os tapices florais enchen as rúas, portais e casas dun cheiro especial, distintivo e único que, unha vez sentido, ninguén pode esquecer.

A Asociación propón, para manter ese ‘cheiro a Corpus’, estender polos laterais das rúas polas que tradicionalmente pasa a procesión “ramas de fiuncho durante a semana do Corpus, como se facía antigamente”. E outra forma, a través do olfato, de que a xente sinta a festa, a súa festa como o fai todos os anos dende hai preto de dous séculos.

Os comercios, en primeira liña

Os comercios de Ponteareas non quixeron estar ausentes do Corpus Christi e tamén botaron man da imaxinación –diso nunca faltou, falta nin faltará na vila do Tea– para celebrar a festa grande.

[su_image_carousel source=”media: 16205,16207,16208″ crop=”5:4″ link=”lightbox” autoplay=”0″]

Uns, como Decoración Romero, foron quen de aunar, nun tapiz floral, dous dos elementos máis tradicionais de Ponteareas: a música e a arte floral. Nada mellor para facelo que unha pequena e fermosísima alfombra que recolle os primeiros compases do pasodoble ‘Puenteareas’ do mestre Reveriano Soutullo.

[su_image_carousel source=”media: 16190,16189″ crop=”5:4″ link=”lightbox” autoplay=”0″]

Outros, como Zapatería Clos, optaron por un medio útil de visibilizar o Corpus ponteareán en tempos de pandemia e nada mellor que facer máscaras de protección adobiadas con motivos florais.

Finalmente, a Asociación colaborou coas persoas residentes en Domus VI Salesas de Vigo, que querían facer unha pequena alfombra floral.

[su_image_carousel source=”media: 16204,16203,16191,16192,16193,16194,16199,16198,16197,16195,16201,16202,16200,16196″ crop=”5:4″ link=”lightbox” autoplay=”0″]

Todas estas iniciativas fan, ao entender da Asociación de Alfombristas do Corpus Christi de Ponteareas, que a festa ‘siga viva’ pese ás limitacións e restricións impostas pola crise sanitaria e á espera que, no ano 2021, o Corpus Christi de Ponteareas volva a inundar as rúas e a enchelas dun cheiro que só Ponteareas pode ter.

Concello de Tui e Zona Franca márcanse como obxectivo a ampliación do parque empresarial de Areas

Redacción
-
0
Concello de Tui e Zona Franca márcanse como obxectivo a ampliación do parque empresarial de Areas

O Concello de Tui e a Zona Franca de Vigo van estudar a ampliación do Parque Empresarial de Areas. Así o acordaron esta mañá o alcalde, Enrique Cabaleiro, o delegado da Zona Franca, David Regades. Na Casa do Concello mantiveron unha reunión á que tamén asistiron os concelleiros Ana Mª Núñez, Sonsoles Vicente, Yolanda Rodríguez, Laureano Alonso, José Ramón Magán e Rafael Estévez, e técnicos de Zona de Franca.

O alcalde, Enrique Cabaleiro, e o delegado de Zona Franca, David Regades, comprometéronse a redactar un convenio de colaboración que estude a ampliación e desenvolvemento desta superficie empresarial en 200 mil metros cadrados.  O parque empresarial de Areas conta cunha estratéxica situación, e verá mellorada a súa comunicación co novo acceso que terá coa A55 e coa VAP Tui-A Guarda.

O goberno municipal de Tui sitúa entre as súas prioridades “a viabilidade das empresas, dispor de chan industrial para atraer investimentos a Tui,  consolidar o emprego existente e crear novos postos de traballo”, segundo explicaba o alcalde, Enrique Cabaleiro. En concreto  indicaba o rexedor que a ampliación do chan industrial de Areas tería coma obxectivo “consolidar a oferta existente e atraer novas empresas”.

O delegado de Zona Franca, David Regades, destacou coma nestes momentos na provincia se rexistra máis demanda que oferta de solo industrial.  Por iso apuntaba que esta posible ampliación “é unha gran iniciativa”, sinalando que “creemos que este polígono vai ser un polígono de éxito e máis se vai co selo de Zona Franca de Vigo”. Destacaba a vantaxe xeográfica que ten Tui pola súa cercanía en Portugal”, e nese subliñaba que temos que ver en “Portugal un aliado estratéxico” e Tui é unha porta importante a Galicia dende Portugal é Tui”.

Amais do traballo que se está a realizar para a posible ampliación do Parque Empresarial de Areas, o alcalde de Tui, Enrique Cabaleiro, lembraba tamén a xestión realizada nos outros solos industriais do municipio. Así explicaba que nestes momentos esta en fase final a reordenación definitiva do chan industrial de Ribadelouro, en breve aprobarase inicialmente a reordenación do chan industrial de Baldráns, e estase a traballar na reordenación do chan industrial de Guillarei.

O novo céspede do campo ‘Pepe Capón’ das Neves terá o selo de certificación FIFA Quality Pro

Redacción
-
0
O novo céspede do campo ‘Pepe Capón’ das Neves terá o selo de certificación FIFA Quality Pro

Técnicos do Instituto de Biomecánica de Valencia (IBV), veñen de realizar as probas no novo céspede do Campo Municipal de Fútbol ‘Pepe Capón’ para entregarlle o selo de certificación FIFA Quality Pro.

O alcalde, Xosé Manuel Rodríguez Méndez; o concelleiro de Deportes, Óscar González; o presidente do Nieves F.C., Salvador Pérez, e o coordinador de categorías José Manuel Alves ‘Pozas’, visitaron o campo, comprobaron o estado do céspede e recibiron información do especialistas que levaron a acabo as probas.

Estas probas, como indicou o concelleiro de Deportes, determinan a situación do propio terreo de xogo, a súa situación, o bote e desprazamento do balón, o drenaxe, durabilidade e resistencia, estado do céspede é “especialmente, a súa adecuación para a prevención de lesións das xogadoras e xogadores que van a utilizalo”.

200 xogadoras e xogadores

Óscar González lembrou que son máis de 200 deportistas, de todas as categorías, dende alevíns ata os recen ascendidos integrantes do primeiro equipo, os que adestrarán e disputarán distintas competicións en este novo céspede.

Precisamente, reiterou o concelleiro, “tanto o cambio do céspede coma os traballos de control e certificación da súa calidade están enteiramente orientados a garantir que todos eles podan xogar coa meirande seguridade, sexan cales sexan as condicións ambientais e climáticas”.

Preto de 127.000 € de orzamento

O cambio dos 6.842 metros cadrados da herba artificial do campo municipal, “que tiña danos moi considerábeis por 14 anos ininterrompidos de uso e por mor dos lumes de hai tres anos”, contou cun orzamento de 126.868,50 €, que se financiaron coa axuda para bens públicos danados polo incendio de 2017, achegada polo Ministerio de Política Territorial e Función Pública (49 %), a aseguradora MAPFRE (23 %) e Fondos do Plan Concellos da Deputación (28 %).

A Deputación participa no plenario da Rede de Destinos Turísticos Intelixentes coa presenza do rei Felipe VI

Redacción
-
0
A Deputación participa no plenario da Rede de Destinos Turísticos Intelixentes coa presenza do rei Felipe VI

A presenza do Rei Felipe VI no Plenario da Rede de Destinos Turísticos Intelixentes, da que forma parte a Deputación de Pontevedra coa súa presidenta Carmela Silva, supuxo onte o espaldarazo á propia RDTI “como un proxecto innovador” e a declaración de apoio e respaldo ao sector “dunha importancia crucial para este país polo seu peso económico e no emprego, a importancia social e o que supón de achegamento a outros pobos e culturas, sector co que agora enfrontamos o reto da recuperación”.

O monarca recoñeceu a crise da Covid19 como “un golpe serio” pero tamén unha oportunidade para repensar coas claves da transformación dixital, a accesibilidade, a gobernanza e a sustentabilidade. “Sabemos das nosas fortalezas, somos unha grande potencia turística”, dixo Felipe VI, que á vez reflectiu sobre o feito de que trátase do sector máis exposto e vulnerable a pandemias globais. Tamén insistiu o Rei no reto que teñen moitos destinos da desestacionalización e polo tanto da necesidade de poñer en valor e promocionar recursos e produtos dos que desfrutar todo o ano recoñecendo a fortaleza de España neste sentido con recursos como a cultura, os monumentos ou a gastronomía.

Ante o interese do monarca pola situación dos festivais e grandes eventos musicais do verán, cuestión sobre a que a Ministra, Reyes Maroto, informou que se están avanzando con medidas tanto de garantía sanitaria como de apoio ao sector, a Presidenta da Deputación, Carmela Silva, recordou que a provincia conta con 6 grandes eventos baixo a marca Rías Baixas Fests que aportan un valor importante tanto no desenvolvemento local dos concellos nos que se celebran como na promoción do noso destino, e celebrou os avances no apoio a un sector tan importante. Carmela Silva tamén trasladou a necesidade de que se axilicen as licitacións dos proxectos de RED.ES de Turismo Intelixente, precisamente para avanzar na innovación nos destinos cando é máis necesario que nunca, e pediu que se axilice a aprobación da norma do ICTE para vivendas turísticas, para que así estes establecementos dispoñan de tempo para facer as adaptacións precisas en materia de garantía sanitaria.

A Presidenta celebrou igualmente o anuncio da Secretaria de Estado de que esta á perfilar un Centro Mundial de Datos que supón un novo modelo de coñecemento para a toma de decisións acertadas de cara a demanda tanto nacional como internacional. Amais manifestou o seu aliñamento en materia de promoción turística coas campañas que está a preparar TurEspaña, tanto para turismo doméstico como internacional, esta última adaptada aos mercados internacionais de  maneira desescalada para trasladar que estamos preparados para volver.

A propia Ministra de Turismo Valorou positivamente o traballo realizado durante os últimos tres meses polos membros da rede para a posta en común de solucións para garantir a seguridade e confianza nos espazos turístico. Avanzou tamén Maroto que o sector das feiras poderá retomar a súa actividade no mes de setembro e que agardan que se recuperen citas importantes para o sector a nivel nacional. “Estamos preparados e a punto para recibir visitantes. E temos que demostralo no exterior”, rematou.

Tomiño recibe os primeiros selos de ‘Comercio Seguro’

Redacción
-
0
Tomiño recibe os primeiros selos de ‘Comercio Seguro’

A Federación Provincial de Comercio fixo entrega en Tomiño dos primeiros selos dunha campaña que infunde confianza nos consumidores. Estes selos acreditan como ‘Comercio Seguro’ aos pequenos establecementos que aplican os protocolos sanitarios e hixiénicos estipulados pola Xunta trala crise do Covid-19.

[su_image_carousel source=”media: 16164,16163,16162,16161″ crop=”5:4″ captions=”yes” link=”lightbox” autoplay=”0″]

Os selos de ‘Comercio Seguro’ foron entregados aos propietarios de Lito Sport, Hebe Estética, Clínica Dental Ignacio Rodríguez e Arte Peluquería pola alcaldesa de Tomiño, Sandra González; o concelleiro de Promoción Económica, Francisco Campo; a vicepresidenta, o secretario e a xerente de Adeto, Marta Álvarez, Iago Pérez e Lorena Quinteiro, respectivamente, e o secretario xeral da Federación Provincial de Comercio, Turismo e Mercados, Enrique Núñez.

Estes establecementos foron os primeiros en cumprimentar a autoavaliación da Xunta de Galicia dentro da plataforma www.comerciosegurogalicia.com conseguindo a nota de ‘Elevado’ e ‘Moi Elevado’ que outorga a citada plataforma. A vindeira semana seguiranse repartindo distintivos a outros establecementos que tamén superaron a autoavaliación da Xunta de Galicia.

Dende ADETO confíase en que “todos os comercios leven a cabo a súa evaluación e soliciten o seu distintivo”.

Ponteareas abre a preinscrición para o Campus-Tea urbano

Redacción
-
0
Ponteareas abre a preinscrición para o Campus-Tea urbano

A Concellería de Educación, que dirixe a tenenta de alcalde Cristina Fernández, informa que ata o vindeiro 18 de xuño estará aberta a preinscrición para o Campus-Tea urbano. Un ano máis, o campamento facilitará ás familias a conciliación familiar e laboral abrindo as súas portas para os e as cativas de educación infantil e primaria en horario de 9 a 14 horas, existindo tamén a posibilidade de solicitar aula matinal en horario de 07:30 a 09:00 horas.

O Campus-Tea urbano, subvencionado pola concellería de Educación, ofértase en quendas de quince días que van dende o 1 de xullo ao 31 de agosto e desenvolverase nas instalacións do colexio Nosa Señora dos Remedios e do colexio Fermín Bouza Brey se fose preciso para garantir as medidas e normativas de seguridade sanitaria.

As bases e o impreso (Anexo I), de Preinscrición do Campus-Tea poderán obterse de luns a venres en horario de 9 a 14 h. na Oficina de Ensino, no andar baixo ou no Rexistro Xeral do Concello de Ponteareas ou ben directamente na Sede Electrónica do Concello de Ponteareas.

Tamén se poden consultar premendo directamente na ligazón da pestaña Ensino, Campus Tea da páxina web https://ponteareas.gal/servizos/ensino/campus-tea/

Cristina Fernández explica que se seguirán todas as normas e protocolos sanitarios establecidos polo Estado.

As quendas do campamento serán as seguintes:

Xullo

1ª Quenda, do 1 ao 15 de xullo

2ª Quenda, do 16 ao 31 de xullo

Agosto

1ª Quenda: do 1 ao 15 de agosto

2ª Quenda: do 16 ao 31 de agosto

A protesta dos alcaldes e alcaldesas da ‘raia’ consegue a apertura de tres novos pasos na fronteira do Miño

Redacción
-
0
A protesta dos alcaldes e alcaldesas da ‘raia’ consegue a apertura de tres novos pasos na fronteira do Miño

O AECT Rio Minho considerou hoxe “unha grande vitoria do territorio” a decisión dos gobernos españois e portugués de abrir tres novos pasos para traballadores e traballadoras transfronteirizos en Tomiño, Salvaterra e Arbo. Segundo destacou o director da agrupación europea, Uxío Benítez, esta decisión é resultado da presión pública e social liderada polo AECT e os concellos miñotos dun e doutro lado da fronteira. “Conseguimos facer visible en Madrid e Lisboa a realidade transfronteiriza, que dous gobernos de dous estados acordaran unha solución para os traballadores transfronteirizos”, destacou.

O nacionalista indicou, así mesmo, a unión de todos os rexedores e rexedoras dos concellos do Miño que, sen diferenciación de siglas políticas, se puxeron de acordo para realizar dúas protestas simbólicas de grande repercusión nas pontes de Tomiño e Salvaterra co fin de poñer en evidencia unha situación “ilóxica e inxusta”. Lembrou que dende o inicio do peche de fronteiras se pediu unha maior mobilidade, pero que a petición de apertura de máis pasos foi un “clamor” dende finais de abril, cando alcaldes e alcaldesas asinaron un manifesto pedindo máis puntos de paso autorizados e trasladaron un informe da Universidade de Vigo a todos os niveis da administración central e da Xunta de Galicia.

Neste sentido, Benítez foi especialmente duro co papel xogado polo presidente Núñez Feijóo, “totalmente ausente” ante as reclamacións de concellos e das persoas afectadas. “Houbo unha inacción absoluta. O presidente desentendeuse totalmente da situación deixando nas mans dos concellos toda a reivindicación, a pesares de que debería ter activado a súa figura dentro da Comunidade de Traballo Galicia-Norte de Portugal, poñéndose á fronte. Abandonou á súa sorte esta parte do país nun momento de crise moi grave. Nin visitou a zona nin atendeu á nosa demanda de reunión. Iso di moito da importancia que para el teñen as relacións con Portugal”, subliñou.

Segundo di o director do AECT, esta medida tiña que ter chegado antes xa que “algúns traballadores e traballadoras se viron obrigados a non seguir nos seus postos”. En calquera caso, agradeceu que se tivera “recapacitado” por parte dos gobernos centrais e comprendido o “ilóxico e inxusto” de que un só punto de pasaxe autorizada tivera que asumir o 50% dos tráficos entre Portugal e España. Lembrou, de feito, que dende o peche das fronteiras ata onte 10 de xuño pasaron polo control de Tui-Valença arredor de 260.000 persoas. “Tomar decisións sobre un lugar como a fronteira do Miño a 600 quilómetros terra adentro sen coñecer as súas peculiaridades non é axeitado, mais valoramos o cambio de postura”, destacou.

Ademais, Benítez tamén quixo sinalar que a apertura de novos pasos non soluciona o problema do comercio transfronteirizo, xa que a meirande parte dos negocios da fronteira do Miño dependen da poboación e clientela do outro lado, polo que concellos e AECT seguirán coas reivindicacións.

Máis de 30 establecementos de Salvaterra adheriranse á plataforma de venda online DBarrio

Redacción
-
0
Máis de 30 establecementos de Salvaterra adheriranse á plataforma de venda online DBarrio

Na tarde de onte a Alcaldesa de Salvaterra de Miño, Marta Valcárcel Gómez, mantivo unha reunión cos presidentes das Asociacións de Comerciantes do municipio e o representante da plataforma de venta online a domicilio DBARRIO, co fin de definir os pasos e as fases para por en marcha esta plataforma, unha vez feita a primeira ronda de contacto co comercio local.

Na primeira fase o que se fixo por parte do Concello e das Asociacións foi dar publicidade da iniciativa e porse en contacto cos diferentes establecementos, que recibiron moi ben esta iniciativa, xa que inicialmente a plataforma vai a arrancar con máis de 30 locais adheridos.

Nos próximos días, os representantes da plataforma tratarán directamente en contacto cos establecementos para empezar a subir todos os datos. Paralelamente irase traballando na campaña publicitaria para lanzar esta iniciativa, contando pola en marcha nun par de semanas.

Esta iniciativa, xunto a entrega de material de desinfección e protección aos comercios englóbase dentro da campaña de apoio e promoción do pequeno comercio que está realizando o Concello de Salvaterra de Miño.

Chega a edición “máis necesaria e urxente” de ‘Mulleres que opinan’ que este ano será on line para adaptarse a crise sanitaria

Redacción
-
0
Chega a edición “máis necesaria e urxente” de ‘Mulleres que opinan’ que este ano será on line para adaptarse a crise sanitaria

“Agora era o momento de non renunciar a facer este encontro, é necesario e urxente que o fagamos”. Con esta declaración de intencións, da xornalista pontevedresa Susana Pedreira, presentouse na Deputación de Pontevedra a edición on line e ‘exprés‘ de ‘Mulleres que Opinan’, adaptada ao formato telemático polas circunstancias da crise sanitaria.

O evento, un ano máis, contará co apoio e colaboración da institución provincial e do concello de Pontevedra. A Presidenta Carmela Silva e o alcalde Miguel Anxo Fernández Lores, xunto á deputada e a concelleira de igualdade, Victoria Alonso e Paloma Castro, arrouparon ás dúas organizadoras do evento, as xornalistas Susana Pedreira e Diana López Molares, que presentaron “un espléndido cartel” que, aínda que de forma virtual, traerá a Pontevedra os días 26 e 27 de xuño a oito columnistas referentes do panorama galego e do estado para facer fincapé na situación “vergonzosa” das mulleres que, pese a ser máis do 63% das persoas graduadas en Xornalismo ocupan posicións residuais nas seccións de opinión e dirección dos medios de comunicación.

“Isto non é ningunha broma, o que acontece co xornalismo é grave e nos ten que preocupar como sociedade” reivindicou Carmela Silva, que cualificou o encontro como “unha extraordinaria idea, un gran acerto, que permite escoitar voces femininas de xornalistas comprometidas coa igualdade”, e poñer sobre a mesa os datos “vergonzosos” relativos ao papel das mulleres nos medios de comunicación. “Asinan menos do 21% das pezas de opinión ou só dirixen o 25% dos medios de comunicación. Hai que dar un paso adiante e denunciar, avaliar e traballar para cambiar estes resultados e esixir que as mulleres opinen, porque cando opinan cambian o mundo. Por iso son perigosas”. A Covid-19 formará parte do contexto do encontro e a presidenta da Deputación recordou que “os coidados convertéronse no centro de todo e foron as mulleres as que maioritariamente desde a sanidade, a dependencia ou a alimentación, estiveron na primeira liña. Iso si, dixo Silva, cando hai que falar do que aconteceu ou do que vai pasar soamente aparecen os homes. É fundamental que as mulleres falen, opinen, que amosemos rostros de mulleres”.

Pola súa banda, Miguel Anxo Fernández Lores, alcalde de Pontevedra, centrouse tamén na necesidade da igualdade “para construír unha sociedade máis libre, plural e forte” e de facelo en Pontevedra e con xornalistas pontevedresas: “sempre nos gusta ser referencia”. Lores fixo fincapé na “reacción hostil ante os avances do feminismo o que significa que algo estamos a facer ben”, destacando o enfoque mediático que establece a unión entre o 8-M e a expansión da Covid-19 “cando esa mesma semana houbo outras aglomeracións como acontecementos deportivos, políticos, concertos e mesmo touradas”.

Esta edición do programa “As mulleres que opinan son perigosas”, tal e como explicaron Susana Pedreira e Diana López, contará con “mulleres xornalistas moi activas durante esta crise sanitaria, moi potentes, e de diferentes xeracións, que representan aos mass media pero tamén a medios máis pequenos, cunha axenda propia que apostaron nestes meses de confinamento por temas máis profundos, escapando da inmediatez, e con perspectiva de xénero”. A precariedade do xornalismo actuará como “telón de fondo”, xunto á propia Covid-19 e á reivindicación do xornalismo local.

O encontro, para o que xa se pode formalizar inscrición (ata o 23 de xuño) a través das webs da Deputación e do concello de Pontevedra, terá lugar a través de Zoom o 26 de xuño pola tarde e o 27 pola mañá, e contará coa participación de Claudia Morán e Tamara Montero en representación de “Xornalistas galegas”; Clara Jiménez, cofundadora de maldita.es; Magda Bandera, directora de La Marea; Noemí López Trujillo, xornalista en newtral.es; e Ángeles Caballero, xornalista de opinión en El Confidencial. Tamén participarán desde a perspectiva local Sara Vila e Selina Otero, xornalistas no Diario de Pontevedra e Faro de Vigo.

O Porriño pavimenta o camiño da Vacaría en Budiño

Redacción
-
0
O Porriño pavimenta o camiño da Vacaría en Budiño

Esta semana comezaron as obras de pavimentación do camiño da Vacaría, en Budiño, acometidas polo Concello do Porriño, por iniciativa da Concellería de Urbanismo que dirixe Pedro Pereira.

As obras consisten no acondicionamento, limpeza, mellora da drenaxe e pavimentación con aglomerado quente, e posterior sinalización do camiño veciñal. Teñen un prazo de execución de 3 meses e un orzamento de 36.000 €. Execútanse con cargo ao Plan Concellos 2020, da Deputación Provincial.

Previamente a comunidade de augas, coa autorización da Concellería de Urbanismo e Infraestruturas, renovou a traída de augas veciñal.

Prado Surf Escola iniciou hoxe as actividades de ‘O Teu Xacobeo’

Redacción
-
0
Prado Surf Escola iniciou hoxe as actividades de ‘O Teu Xacobeo’

Durante todo o mes de xuño Prado Surf Escola, en colaboración coa Xunta de Galicia, pon en marcha unha actividade dentro do programa ‘O Teu Xacobeo’ para promocionar o Camiño de Santiago entre a poboación local do terceiro sector. A primeira destas actividades arrancou hoxe xoves 11 con Aldeas Infantís Redondela. Durante todo o mes de xuño participarán neste programa diferentes grupos Aldeas Infantís Vigo e a Asociación ANHIDA, tamén de Vigo.

A actividade inclúe unha etapa do camiño de Santiago, neste caso desde Baiona a Nigrán coa explicación dos monumentos de interese, fauna e flora de lugares protexidos como o Castelo de Monterreal, a Foz do Miñor, as dunas de Praia América… Ademais, realizaranse diferentes xogos durante o traxecto e os participantes tamén tomarán conciencia do coidado do medio ambiente a través dunha actividade que leva por título Basuraleza. Como colofón o traxecto finaliza cun bautismo de surf na Praia de Patos.

Con esta actividade Prado Surf Escola e Xunta de Galicia queren reforzar o sentimento de pertenza ao Camiño de Santiago dentro da poboación local, poñer en valor a importancia da Ruta Xacobea na formación da cultura galega e concienciar sobre o coidado do patrimonio natural da zona.

Prado Surf Escola puxo en marcha un protocolo estrito de hixiene e desinfección para realizar esta e outras actividades coa máxima seguridade.

O alcalde de Nigrán agasalla a Benedicta Carrera no seu 100 aniversario

Redacción
-
0
O alcalde de Nigrán agasalla a Benedicta Carrera no seu 100 aniversario

O alcalde de Nigrán, Juan González, acudíu esta tarde coa edil de Maiores, María Mayán, á celebración do 100 aniversario de Benedicta Carrera Rodíguez na súa casa de Chandebrito. A muller, nativa desta parroquia, soprou as velas en compañía da súa familia máis próxima, agardando ao domingo para reunirse todos. Ademais, recibíu de parte do Concello unha placa conmemorativa e o catálogo da exposición fotográfica ‘Mulleres de Nigrán -1970’.

Benedicta, viúva desde hai 35 anos, ten cinco fillos (un deles falecido), 17 netos (tamén un falecido), 21 bisnetos e un tataraneto en camiño. Aínda que conserva a súas facultades mentais, desde hai una anos precisa de axuda para moverse. Os seus netos destacan o seu bo carácter e o traballadora que sempre foi.

“É unha persoa moi querida na parroquia que traballou moito na súa vida, coidou da familia, traballou o campo, e aínda recorda como ía ao monte a por piñas para vendelas despois en Vigo”, conta a súa neta Paula Brito, quen subliña que Benedicta vive na súa propia casa.

O Baixo Miño contará coa súa propia Unidade de Atención Temperá para menores de 6 anos

Redacción
-
0
O Baixo Miño contará coa súa propia Unidade de Atención Temperá para menores de 6 anos

A Mancomunidade Intermunicipal do Baixo Miño, constituída polos concellos da Guarda, O Rosal, Tomiño e Tui, acordou esta semana dar luz verde á creación dunha Unidade de Atención Temperá para a comarca; unha iniciativa que permitirá ás familias de calquera deste catro municipios con menores con dificultades de aprendizaxe, ser tratadas na propia comarca, sen ter que trasladarse ata Vigo.

Trátase dun proxecto destinado a familias con fillos ou fillas de entre 0 e 6 anos que precisen o establecemento de pautas e estratexias que promovan a súa normalización, a través de intervencións planificadas por un equipo de profesionais interdisciplinar.

Tendo en conta que a familia é o axente socializante máis significativo, especialmente nos seus primeiros anos de vida. “Entendemos que a estimulación temperá permite detectar e traballar de maneira coordenada e integrada coa familia, facer as derivacións oportunas e dotar dos recursos necesarios, para evitar custosos desprazamentos que son moi gravosos para as familias con menos recursos”, explican dende o Servizo de Educación e Apoio Familiar de Tomiño, que foi o redactor do proxecto para toda a Mancomunidade.

O proxecto alcanzará á Comarca do Baixo Miño, que conta cunha poboación total de 48.175 habitantes e 2.035 menores de 6 anos. Dentro da franxa de idade dos 0 aos 6 anos, segundo os datos facilitados, aproximadamente un 10 % dos menores desta franxa de idade padecen dalgunha patoloxía do tipo T.E.A., problemas de dicción, foniatría ou TDHA.

A implantación desta Unidade de Atención Temperá na comarca supón un avance na coordinación entre todos os servizos e recursos de atención á infancia, tendo en conta as necesidades das familias e favorecendo a igualdade de oportunidades e a participación social xa que debido a ubicación xeográfica, os recursos dos que se dispón xeralmente quedan moi lonxe da área.

O traballo será establecido en rede, de xeito que a derivación dos casos á Unidade de Atención Temperá virá dada por un protocolo consensuado polas técnicas do Servizo de Educación e Apoio Familiar dos distintos concellos que a conforman, e será a vía de acceso,permitindo ter un coñecemnto sobre @s usuari@s beneficiarios e así poder detectar casos susceptibles de apoio e/ou intervención, dotando á mesma dun carácter eminentemente preventivo, sen prexuicio do establecer unha coordinación e supervisión da unidade e da xestión que o funcionamento da mesma require.

A subvención achegada pola Xunta de Galicia e polos propios concellos permitirá contratar a tres profesionais dos campos da psicopedagoxía, psicoloxía e logopedia.

Luís Bará destaca en Ponteareas “o exemplo de mobilización do pobo galego” diante da carencia de material de protección na crise da COVID-19

Redacción
-
0
Luís Bará destaca en Ponteareas “o exemplo de mobilización do pobo galego” diante da carencia de material de protección na crise da COVID-19

O cabeza de lista do BNG por Pontevedra, Luís Bará, recoñeceu hoxe “o exemplo de mobilización do pobo galego” diante da situación de carencia de material de protección na crise da COVID-19. Así o fixo nunha visita en Ponteareas ao ‘Equipo batas, máscaras e gorros de SOGAPS’ que agrupou dende o inicio da pandemia a máis de 300 persoas voluntarias que confeccionaron máis de 200.000 máscaras, traxes e gorros para sanitarios de toda Galiza.

Bará, acompañado das tamén candidatas Montse Prado e Cristina Fernández, así como dos alcaldes de Ponteareas, Xosé Represas; As Neves, Xosé Manuel Rodríguez Méndez e Mondariz, Xosé Emilio Barros, amosou estar “impresionados e admirados” ao coñecer a mobilización de primeira man. “Saíu o exército ás rúas, pero vós aquí montáchedes un auténtico exército de paz, de voluntariado, de xente desinteresada que fixo un traballo enorme. É a mellor representación que podemos ter dun país como o noso, que se volca para resolver unha necesidade que había, unha carencia que había no sistema sanitario e que cubristes vós. O noso recoñecemento, gratitude e emoción. E por suposto, nós daremos un impulso dende o goberno galego para o recoñecemento material deste labor”, sinalou o cabeza de lista ante as e os voluntarios.

O cabeza de cartel do BNG destacou que é importante amosar recoñecemento ao traballo voluntario e anónimo de milleiros de persoas, exemplificándoo no colectivo, encabezado por Maite Isla, presidenta da Sociedade Galega co pobo Saharauí, que dende os primeiros días organizou unha rede de confección de batas, gorros, e máscaras, con asesoramento técnico do hospital de Vigo para que tiveran as máximas garantías. Insistiu, de feito, en que “non só merece o máximo recoñecemento social, senón tamén apoio do goberno galego, a través de fórmulas de axudas económicas materiais”.

“Hai que poñer en valor que o pobo salva ao pobo. Esta crise demostrou que foi o traballo voluntario, a organización social, as redes de solidariedade quen lle fixo fronte á emerxencia social axudando a quen o precisaba, procurando alimento, apoio emocional para as persoas que o precisaban. Foi o traballo esencial da clase traballadora o que permitiu afrontar con garantías e superar a primeira fase de emerxencia”, insistiu Bará.

A maiores o cabeza de lista destacou que este proxecto de máis de 300 persoas, a maior parte delas mulleres, demostrou tamén o papel das mulleres na sociedade en xeral e tamén en situacións de emerxencia, de “como son quen de organizarse nestas redes de apoio e solidariedade, a importancia da comunidade, do local e do próximo”.

Por se iso non fose suficiente, este proxecto –dixo Bará– ten unha clara vontade solidaria, neste caso para o pobo saharauí. “Se nós tivemos un período curto de confinamento, eles son un pobo que leva décadas de confinamento no deserto lonxe do seu territorio. Hai unha xeración enteira ou máis sen esperanza. É o momento dende Galiza de ser solidarios con estes pobos como o saharauí ou o palestino de vivir pechados e confinados e de reclamar diante da comunidade internacional que haxa solucións”, subliñou.

A Xunta presenta a empresariado e sindicatos o Plan de Reactivación e Dinamización para relanzar a actividade económica

Redacción
-
0
A Xunta presenta a empresariado e sindicatos o Plan de Reactivación e Dinamización para relanzar a actividade económica

A Xunta de Galicia presentoulle onte a responsables da Confederación de Empresarios de Galicia (CEG) e dos sindicatos UGT e CC.OO. o Plan de Reactivación e Dinamización de 2020, dotado con máis de 3.000 millóns de euros e que ten como obxectivo recuperar a actividade económica de Galicia, xerar emprego nos sectores máis golpeados pola covid-19 e fortalecer os servizos públicos. Foi nunha reunión da Mesa de Diálogo Social na que participaron o conselleiro de Facenda, Valeriano Martínez, e o de Economía, Emprego e Industria, Francisco Conde.

Durante o encontro, os titulares de Facenda e de Economía explicáronlle a patronal e organizacións sindicais que a meirande parte da dotación deste plan (1.741 millóns) procederá de recursos públicos que achegará a Xunta. Estes recursos supoñen a armazón financeira de que dispón Galicia para facer viables todos os proxectos sectoriais prioritarios, que desenvolve cada departamento autonómico.

En todo caso, o conselleiro de Facenda destacou que os recursos públicos que activará a Administración autonómica permitirán mobilizar outros 1.302 millóns do sector privado, sobre todo na parte da dinamización económica.

Impulso á implantación do teletraballo para pemes e autónomos

Na reunión, o conselleiro de Economía, Emprego e Industria destacou os 5 millóns que este plan destina a axudas para impulsar o teletraballo, co obxectivo de que as pemes e os autónomos teñan a oportunidade de adaptar as súas infraestruturas tecnolóxicas así como ampliar as capacidades dos seus empresarios para poder traballar a distancia, unha medida que foi apoiada polos integrantes da Mesa de Diálogo Social.

Tal e como explicou, é necesario promover medidas como o teletraballo para estar preparados ante a nova era tecnolóxica, onde a dixitalización xoga un papel fundamental no desenvolvemento da actividade empresarial e das relacións laborais. “A dixitalización será unha das principais ferramentas do novo contexto laboral”, subliñou Conde, que engadiu que este apoio ao teletraballo dá resposta a unha demanda real como é a necesaria protocolización da volta á normalidade nas empresas e a adopción de medidas organizativas que incentiven o desenvolvemento de plans de formación en novas tecnoloxías.

Galicia Laica denuncia a vulneración de dereitos en materia de liberdade relixiosa durante o confinamento

Redacción
-
0
Galicia Laica denuncia a vulneración de dereitos en materia de liberdade relixiosa durante o confinamento

A Asociación Europa laica-Galicia laica vén de denunciar diante da Administración educativa o que consideran “unha nova vulneración dos dereitos fundamentais das familias en materia de liberdade relixiosa”. Se no tempo da escola presencial a relixión invadía os espazos comúns con Beléns e Festivais de Nadal ornados con panxoliñas católicas –afirma a asociación– “no tempo do confinamento e do ensino virtual igualmente os contidos relixiosos invaden o espazo común”.

Galicia laica afirma que máis da metade (69%) dos Centros públicos de Primaria da provincia de Pontevedra “exiben nos seus blogs en aberto (accesible a todo o alumnado) contidos relixiosos” e lembran que “as familias que non solicitaron estes contidos teñen dereito a que non sexan impostos aos seus fillos no espazo común virtual. Estes contidos deben ser de acceso restrinxido para as familias que os solicitaron”.

O artigo 16 da Constitución Española define ao Estado Español como aconfesional e o decreto sobre o currículo de educación primaria, “establece que as familias decidirán se a crianzas reciben ou non materia relixiosa”. Revisadas as páxinas web de todos os centros de primaria da provincia “constatamos cómo as autoridades educativas desprezan os dereitos da cidadanía unha vez máis”, afirma Europa laica-Galicia laica.

A través da denuncia presentada perante a Consellería de Educación (aínda sen resposta algunha pola sua parte), Europa Laica confía en que os Centros que incumplen co mandato de neutralidade relixiosa para a administración pública “depoñan a súa actitude e rectifiquen para o enriquecemento da convivencia, a democracia e a igualdade”.

Redondela ‘tira de imaxinación’ para celebrar, este xoves e domingo, a súa Festa da Coca máis virtual

Redacción
-
0
Redondela ‘tira de imaxinación’ para celebrar, este xoves e domingo, a súa Festa da Coca máis virtual

Ao igual que aconteceu cos Maios, a Festa da Coca, a cita máis tradicional de Redondela, terá que adaptarse as circunstancias extraordinarias que marca a pandemia da COVID-19 e optar pola adopción de iniciativas imaxinativas que permitan que, aínda que de xeito diferente, veciñas e veciños poidan gozar desta celebración tradicional.

Así, as concellerías de Cultura e Eventos que xestionan Daniel Boullosa e Marta Alonso, respectivamente, veñen de elaborar un amplo programa de iniciativas que, por unha banda adáptanse ás restricións sanitarias vixentes e, ao mesmo tempo, permiten que Redondela viva os seus días grandes.

Dentro das iniciativas a desenvolver nesta Festa da Coca 2020, está a de poñer a disposición de veciños e veciñas carteis anunciadores das edicións da festa dende 1969 ata o 2019, para colgalos nos balcóns e facer que, pese á pandemia a as restricións sanitarias, a Coca de Redondela estea máis presente que nunca. Os carteis para adobiar ventás e balcóns, poden recollerse no Multiúsos da Xunqueira de xeito totalmente gratuíto.

Os videos ‘A Coca Confinada’, outro “A COCA non falta a súa cita” e un terceiro sobre o percorrido histórico de alfombras florais, serán unha das iniciativas pioneiras que se poñerán en marcha. Os vídeos serán proxectados, no facebook do Concello de Redondela e nunha pantalla na praza do Concello. En ‘A Coca Confinada’, a veciñanza poderá gozar dunha marabillosa reportaxe resumo da Coca no que participan alfombristas, burras e Danza das Espadas, que conforman os tres eixos fundamentais da festa. Nesa mesma liña, o vídeo da ‘A COCA NON FALTA A SÚA CITA’ permitiranos mergullarnos na visión da coca neste ano, mentres que o terceiro reportaxe permitirá admirar, polo miúdo, as alfombras florais que todos os anos confeccionan as veciñas e veciños de Redondela e que constitúen un sinal de identidade tanto do municipio coma da propia festa.

O mércores, véspera do Día da Coca, festivo local de Redondela, os cabezudos outro dos elementos tradicionais da festa, estarán presentes nos balcóns da Casa Consistorial para goce de grandes e pequenos.

O xoves, Día da Coca propiamente dito, a música encherá todos os recunchos de Redondela. Literalmente. As bandas de Música de Arcade e Redondela percorrerán todas as rúas do casco urbano para levar a festa aos fogares a través da música e transmitir, con eses sons, que pese ao coronavirus, o confinamento e as restricións, a Coca está aí e que todos e todas os veciños e veciñas, son partícipes da súa festa máis senlleira.

“Todas e cada unha destas iniciativas non son máis que un xeito de adaptarse ás actuais circunstancias que marca a COVID-19”, sinala o Concello de Redondela que amosa a súa determinación de que “se non se pode celebrar como se viña facendo tradicionalmente, teremos que reinventarnos, buscar novas fórmulas para que a Festa da Coca siga a ser o que sempre foi, a festa emblemática de Redondela e un símbolo da identidade do municipio”.

Nigrán completa o abastecemento a toda a parroquia de Parada tras ampliar en 6.500 metros a rede

Redacción
-
0
Nigrán completa o abastecemento a toda a parroquia de Parada tras ampliar en 6.500 metros a rede

O Concello de Nigrán rematou as obras que permitirán achegar o abastecemento de auga a 947 persoas dos barrios de O Con, As Cartas, A Laxe, A Rúa, A Igrexa e A Carrasca, completándose así toda a Parroquia de Parada en menos de 4 anos. O Concello solicitou o 29 de abril a preceptiva autorización sanitaria á Xunta de Galicia para poder subministrar auga e agarda que o goberno autonómico lle dé a maior celeridade para que nos vindeiros días sexa efectiva, xa que no verán os problemas de seca agravan a situación dos veciños, que están a expensas dos seus pozos individuais.

As obras supuxeron máis de 314.000 € de investimento e máis de 3 meses de traballos tras ampliar a rede de abastecemento en 5.125 metros desde Nandín (a este barrio chega a auga tras investir a concesionaria Aqualia 374.809 € no 2019 froito dun acordo co Concello) e engadir outros 1.239 metros desde o depósito de distribución construído polo Concello no 2018 no monte Eiró de Parada (esta obra permitíu levar auga a parte da zona da Carrasca e outros barrios, onde xa estaba instalada a tubaxe de impulsión e de distribución desde hai anos pero que carecía de presión suficiente para funcionar). Así, o Concello realizou unha ampliación total de 6.435 metros de tubería de polietileno e, ao mesmo tempo, reparou outras tubaxes xa pre-existentes pero que nunca chegaran a funcionar (foran construídas hai anos, cando se dotou de saneamento a parte da parroquia en previsión de que algún día puidese haber abastecemento de auga).

“Cando chegamos ao goberno no 2015 o fixemos co compromiso de levar a auga a todas as parroquias e en menos de 4 anos conseguimos non só achegar o servizo a Parada, se non que dar cobertura ao 100%. Agora traballamos para facer o mesmo en Camos e chegar por vez primeira a Chandebrito, xa que existe unha clara demanda social ao respecto, como é lóxico”, sinala o alcalde, Juan González, quen indica que a situación de Parada era a máis complexa das tres porque os veciños, a diferencia de Camos e Chandebrito, non gozan de traídas comunáis que se surtan de mananciais no monte. “En Parada os veciños dependían exclusivamente dos seus pozos, cos conseguintes problemas de seca nos meses de verán, situación que agora se ve solventada”, indica González, quen precisamente por iso pide celeridade á Xunta de Galicia para informar da autorización sanitaria.

Na parroquia veciña de Camos o subministro público chegou a finais de 2019 grazas, precisamente, á nova rede de abastecemento municipal de auga que fornece aos barrios de Nandín, parte de Con e A Reboreda e que permite en Camos chegar aos barrios de Castelo, A Lama e O Rial e ás vivendas situadas nas inmediacións da PO-332, rúa dos Pazos. A maiores, nas obras de humanización da rúa San Roque achegouse o abastecemento ata aí ao ser colindante coa rúa dos Pazos, desde onde se ampliou. “Queda pendiente a parte alta de Camos e Chandebrito na súa totalidade, ese é o noso compromiso de goberno para estes anos”, finaliza González.

Mondariz pechará a piscina municipal en verán para destinar máis recursos a servizos básicos

Redacción
-
0
Mondariz pechará a piscina municipal en verán para destinar máis recursos a servizos básicos

Considerando os requerimentos extraordinarios en materia de hixiene, desinfección e distanciamento social que figuran no protocolo de Sanidade para a reapertura de piscinas e as características das instalacións municipais, o Concello de Mondariz manterá pechada a piscina municipal durante os meses de verán para preservar a seguridade e priorizar recursos. “Os 14.000 euros que costa abrir a piscina en xullo e agosto (sen contar o suministro eléctrico, o servizo de limpeza nin os socorristas) serán destinados a servizos básicos e gastos de emerxencia social”, explica o alcalde, Xosé Emilio Barros.

A piscina municipal de Mondariz, un espazo aberto situado no recinto do antigo C.E.I.P. Riofrío-Vilar (actual sede da Escola Municipal de Música), foi construída ao abeiro dun plan estatal (Plan E) e cofinanciada pola Deputación de Pontevedra. Despois da súa inauguración, en maio de 2015, mantívose aberta catro meses. Desde 2016, sen embargo, a apertura da piscina reduciuse aos meses de xullo e agosto debido á pouca afluencia de persoas.

“A piscina municipal é unha instalación cada vez máis deficitaria que incluso require obras de mantemento no vaso e no recinto. Tendo en conta que os protocolos sanitarios pola COVID-19 conlevan unha reducción do aforo na xa pequena área de esparcemento e uns considerables custos adicionais en medidas de hixiene e desinfección, a súa apertura é inviable económicamente. Por outra parte, os escasos recursos do Concello obrigan a establecer prioridades”, sinala o alcalde de Mondariz. “A prioridade política deste goberno é manter e reforzar os servizos básicos (incluídos os servizos sociais comunitarios, que xestionan o banco de alimentos e atenden emerxencias sociais), sobre todo despois da crise sanitaria e económica que está a deixar a COVID-19”, puntualiza.

Respecto aos servizos básicos, o goberno municipal liderado por Barros emprendeu fai uns meses un proceso de regularización de captacións de augas completamente inédito na historia recente do Concello. “Durante este primeiro ano de goberno atopamos graves irregularidades que tivemos que afrontar. Entre elas, un completo descontrol político-administrativo das captacións de auga municipais que demostraba o menosprezo dos servizos públicos municipais máis esenciais”, explica o alcalde. 

“Coa crise sanitaria e económica da COVID-19 tamén se observa un incremento das solicitudes de axuda no ámbito social. Durante estes últimos meses dedicamos notables esforzos e recursos ao banco de alimentos para incluír produtos frescos e aumentar a periodicidade do reparto. Antes da crise había unhas 70 familias con necesidade, pero agora temos contabilizadas a máis de 80”.

1...360361362...425Page 361 of 425

Fundado por Alfredo Estévez © Hansei Media, SL