O Museo de Pontevedra ten xa un paso máis dado cara a rehabilitación dos seus edificios centrais. A Deputación-da man da presidenta Carmela Silva e o vicepresidente César Mosquera- e Concello de Pontevedra -da man do alcalde Miguel Anxo Fernández Lores- asinaron o convenio de colaboración para a cesión de uso do subsolo público que permitirá unir os inmobles baixo terra de maneira accesible, consolidalos e restauralos.
Grazas ao acordo o Concello permite o uso de 355 metros cadrados do subsolo das rúas Sarmiento (30 m2), Pasantería (225 m2) e García Flórez (100 m2) coa finalidade de que se poidan acometer as obras necesarias para a interconexión. As superficies dos treitos de subsolo manterán a titularidade municipal como bens de uso e dominio público e, moi probablemente, segundo avanzou o vicepresidente Mosquera, non se utilizarán na súa totalidade. Inicialmente realizarase a conexión entre o edificio García Flórez e o Castro Monteagudo e deixarase para unha segunda fase a unión co Fernández López.
A sinatura do convenio era un paso imprescindible para sacar adiante a licitación das obras de mellora. A día de hoxe a modificación do Peprica está en fase de aprobación definitiva e o proxecto de execución enfocado, co visto bo de Patrimonio sobre o proxecto básico, polo que a previsión é que no segundo semestre do ano poidan adxudicarse os traballos e iniciar a obra.
O vicepresidente Mosquera amosouse optimista pese a todas as dificultades que tiveron xurdido no camiño: “xa é o tempo da rehabilitación”, dixo, asegurando que de todas as obras que tivo que xestionar (Mercado de Abastos, aparcamento da Praza de España, ou a rehabilitación do Pitillo, entre outras) estas están a ser as máis complicadas de levar adiante tanto pola complexidade como pola tramitación.
En canto ao orzamento da actuación, aínda que non está pechado o proxecto definitivo, o nacionalista asegurou que roldará os seis millóns de euros. Subliñou que se reiterará a petición de fondos á Xunta de Galicia e ao Estado, ademais de solicitar fondos europeos do Programa de Impulso á Rehabilitación de Edificios Públicos (PIREP) na súa segunda convocatoria, “para os que se cumplen todos os criterios de concesión”. Destacou, sen embargo, que se non se obtén inxección económica externa “hai fondos provinciais suficientes” para que a Deputación afronte soa a mellora.
Outra previsión é a do prazo de execución, que será de entre un ano e medio ou dous anos, aproximadamente, sen que teña afeccións elevadas na contorna, xa que a actuación apenas suporá un valado inicial da rúa García Flórez e non implicará máis superficie pública que a dos inmobles en si.
O alcalde de Pontevedra, logo de asinar o acordo para ceder o subsolo necesario para conectar os edificios do Museo asegurou estar encantado polo traballo feito para a rehabilitación. Salientou que hai sobre a mesa unha solución de vangarda operativa, “imaxinativa e que funciona” que ten referencias de vangarda coma o Louvre. “Agradecemos o investimento potentísimo nestes tres edificios, e no sétimo edificio que será Santa Clara se todo vai ben”, asegurou, para engadir que é preciso poñer en valor o patrimonio e que todos os fondos que ten o Museo sexan expostos para goce da cidadanía de Pontevedra e de toda Galiza.
Logo de salientar a excelente colaboración entre o Concello e a Deputación, solicitou que se “dediquen todos os esforzos para que o Museo, no menor prazo de tempo posible, estea no seu esplendor”. Así mesmo, confirmou que na entrevista que manterá con Alfonso Rueda retomarase a petición de colaboración económica da Xunta na rehabilitación dos edificios. “É absolutamente razoable”, finalizou.
Pola súa banda, a presidenta da Deputación, Carmela Silva, subliñou a transcendencia do convenio para seguir avanzando no desenvolvemento do que cualificou como o “Museo Nacional de Galicia” que garda o noso patrimonio e a nosa cultura como ningún outro”.
Felicitou ao vicepresidente César Mosquera e ao director do Museo, José Manuel Rey, polo esforzo en sacar adiante este proxecto de ampliación “para que a cidadanía poida desfrutar de todo o que o Museo contén”, e destacou a “estreita colaboración” amosada polo Concello pontevedrés en todas as actuacións relativas ao Museo, “nas que o trata como propio”.
Carmela Silva confía amais en que a Xunta comprometa o seu apoio económico para a ampliación así como a administración estatal. “Cando esa ampliación sexa unha realidade virá moita máis xente da que o fai agora. Virá xente de Galicia, do Estado e a nivel internacional a coñecer un museo que vai ser absolutamente referencial a nivel europeo.
