Os clubs de elite masculinos da provincia estiveron onte na Deputación para recibir o recoñecemento público da presidenta da Deputación de Pontevedra, Carmela Silva, e do deputado de Deportes, Gorka Gómez. “Queremos darvos as gracias polo voso esforzo e compromiso” e desexarvos “todos os éxitos do mundo”. No acto participaron Lupe Murillo, presidenta do Pontevedra C.F.; Ana Portela, directora deportiva do GD Supermercados Froiz; Charo Castro, presidenta da Sociedad Gimnástica de Pontevedra; Manuel Falque, vicepresidente do Coruxo C.F.; Manuel Abalo Portas, presidente do Arosa C.F.; Alberto González, presidente do Club Balonmán Cangas; José Antonio Beiro, presidente do Club AMFIV; José Luis Chamorro, presidente do Club Ciclista Rías Baixas; Emilio Álvarez Vilariño, presidente do Tenis de Mesa Monteporreiro-Visit Pontevedra e Jesús Pereiro, director técnico do Bádminton Ravachol.
Carmela Silva subliñou a importancia do deporte e definiuno como “fundamental para construír sociedades mellores e inclusivas, polo que ten que formar parte das prioridades de xestión”. Neste senso, lembrou que “as administracións públicas temos a obriga de financiar o deporte de base, que é fundamental, e tamén o de elite que”, engadiu, ”ten un enorme poder de atracción e sitúa á nosa provincia no mapa”. A presidenta falou con “especial agarimo” do deporte adaptado “que ten moitas máis dificultades que ningún outro” e referiuse así especificamente ao AMFIV que “con tanto sacrificio e traballo foi capaz de situarse como unha grande referencia do deporte da provincia”. “Todas e todos temos que ter a oportunidade de participar”. Carmela Silva tamén se referiu ao “esforzo enorme” dos deportistas “por manterse na elite e mellorar” e fixo fincapé no valor do conxunto dos equipos nos que “hai moitísima xente que traballa sen máis remuneración que a do amor polo deporte”.
O deputado de Deportes secundou as palabras da presidenta e puxo o acento na axilidade coa que a Deputación de Pontevedra tramita as achegas que se lle conceden anualmente a estes clubs “que sempre teñen que dispor deses recursos económicos canto antes”. Con esas axudas “recoñecemos a vosa dedicación posto que somos conscientes do grande esforzo que facedes para poder competir”. Gorka Gómez tamén repasou os éxitos acadados polos equipos da provincia e situounos como referencias indispensables para achegar o deporte aos máis cativos.
Máis de 800.000 euros no apoio ao deporte na provincia
Os clubs de elite masculinos da provincia recibiron este 2022 da Deputación 590.000 euros en achegas, que sumados aos concedidos aos clubs femininos suman un total de 801.000 euros cos que a institución provincial continúa a impulsar o deporte na provincia.
As mostras de agradecemento dos clubs cara a Deputación foron moitas, tanto pola rapidez coa que recibiron este ano as subvencións como pola predisposición para axudarlles en todo o preciso para tramitalas. Lupe Murillo destacou que as achegas da Deputación “son importantes para a supervivencia dos clubs” e referiuse ao deporte de elite “como fundamental para que haxa deporte de base” xa que nestes equipos están as e os referentes das e dos máis novos. Pola súa banda Charo Castro puxo de manifesto o “apoio incondicional da Deputación non só con achegas económicas senón tamén anímicas”. “Sentímonos moi mimados de xeito especial por esta institución”. En palabras de Ana Portela, a Deputación tivo importancia para o seu club “sobre todo nos últimos dous anos, que foron difíciles para o ciclismo” e Jose Luis Chamorro deixou claro que “outras administracións deben copiar o que fai a Deputación de Pontevedra sobre todo en relación a deportes como o ciclismo que, ao non dispor de ingresos por socios ou venda de entradas, dependen enteiramente dos patrocinios públicos e privados. No acto tamén participou Jesús Pereiro, quen recalcou que a Deputación é “un dos apoios importantes que temos no traballo que estamos a levar a cabo para intentar continuar na elite”. Alberto González fixo mención á axuda brindada pola Deputación a través do Plan Concellos que serviu para renovar o pavimento do pavillón do Gatañal, en Cangas, e José Antonio Beiro, quenfixo fincapé na “proximidade cos clubs” indiferentemente da zona da provincia da que sexan. Pola súa banda Manuel Falque reiterou a importancia do “cambio substancial na entrega das subvencións, que era un problema engadido a todos os que temos que sufrir deportivamente no día a día”. O encargado de poñer fin ás intervencións foi Manuel Abalo, que tomou a palabra para asegurar queno seu primeiro ano en Segunda División B “custounos moito facer un orzamento” e neste senso recalcou que “o apoio da Deputación é o máis grande que temos a nivel económico”.
