19.5 C
Pontevedra
Luns, 24 de Xuño de 2024
Máis
    HomeO CondadoPonteareasBateo de ouro e obradoiros na cuarta edición da Feira de Minerais...

    Bateo de ouro e obradoiros na cuarta edición da Feira de Minerais e Fósiles de Guláns

    Terá lugar os días 6, 7 e 8 de maio de 10.00 a 21.00 horas no Centro Cultural de Guláns

    A cuarta edición da Feira de Minerais e Fósiles de Guláns chega a Ponteareas esta fin de semana cunha morea de actividades de balde para todos os públicos. Os vindeiros 6, 7 e 8 de maio o auditorio do Centro Cultural de Guláns converterase no escenario desta feira que contará coa presenza de doce expositores de minerais, fósiles e xoiaría de Galicia e Portugal e cun programa de obradoiros dos que o público poderá gozar cada día de 10.00 a 21.00 horas.

    Organizada en colaboración co Concello de Ponteareas, a feira contará con 60 metros de exposición que abrirá diariamente ao público totalmente de balde. Pero ao longo destes tres días tamén haberá obradoiros como o de bateo de ouro ou de xoiaría ou un taller de mineraloxía impartido polo Grupo Mineralóxico Galego e outro de identificación de minerais pola Escola de Enxeñaría de Minas da Universidade de Vigo dirixido especialmente a alumnado de diferente centros de ensino.

    A concelleira de Ensino e alcaldesa, Cristina Fernández Davila, anima a toda a veciñanza e familias a visitar estes días a feira e gozar das actividades didácticas e lúdicas que se ofrecen. A rexedora salienta que “iniciativas como a Feira de Minerais de Guláns permite especialmente á mocidade descubrir sectores diferentes e temáticas científicas sorprendentes que poden converterse en vocación para moitos rapaces e rapazas”.

    O Concello felicita á organización polo traballo feito e agradece ao Grupo Mineralóxico Galego é á Escola de Enxeñaría de Minas da Universidade de Vigo a súa colaboración para levar adiante unha nova edición desta feira.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.