12.9 C
Pontevedra
Mércores, 22 de Maio de 2024
Máis
    HomeLouriñaO PorriñoDiego Giráldez presenta a súa nova novela no barrio de San Benito...

    Diego Giráldez presenta a súa nova novela no barrio de San Benito do Porriño

    O acto será ás 20:00 h e estará acompañado dos xornalistas María Díaz e Alfonso Pato

    Hoxe venres, Diego Giráldez presenta o seu novo libro no barrio de San Benito do Porriño acompañado da xornalista de Radiovigo-Cadena SER María Díaz e o tamén xornalista e director do Festival de Cans Alfonso Pato. Para o evento, o escritor porriñés conta ademais coa colaboración da Asociación de Veciños de San Benito e San Sebastián.

    A partir das 20:00 horas, diante da capela, os tres conversarán sobre a nova novela do autor que leva por título “O meu sangue” e que está publicada pola Editorial Galaxia. Para o autor, “presentar este libro no meu barrio trae moitas emocións. A este lugar, agora verde e paseable, están vinculadas algunhas das persoas que máis quero e nas que me fixo a diario para seguir en marcha”. Ademais, engade, “levamos tres anos escuros, practicamente perdidos, que, dalgún xeito, temos que recuperar. Para min, a presentación desta novela é como encher de novo os pulmóns de aire. Presento un libro como quen vai de novo a unha verbena. Igual ata poño música para, por fin, bailar”.

    Escrita cun marcado estilo persoal, “O meu sangue” mergullará ás  lectoras e lectores nunha intriga que arrastra ao particular descenso  aos infernos do protagonista e a unha defensa irracional do que nos fai máis felices: os seres e os lugares queridos.

    Diego Giráldez (O Porriño, 1976)

    Exerceu o xornalismo en distintos  medios escritos e dixitais. Ademais de coordinar varias cabeceiras,  colaborou como columnista de opinión nos xornais A Nosa Terra e Xornal  de Galicia e, a través de reportaxes culturais, con El País. Na  actualidade, faino co diario dixital Praza Pública e a revista Luzes.  Fundou e dirixiu as revistas Malladoura e CanZine e escribiu libros  relacionados coa arquitectura e a historia económica de Galicia.

    En 2016 publicou o libro de relatos curtos “Galería de saldos”, o seu  primeiro traballo de narrativa, polo que foi elixido “Autor galego do  ano” pola revista Fervenzas Literarias. En 2019 publicou en Editorial  Galaxia a novela “Hotel para coleccionistas discretos” e participou nas obras colectivas “O libro dos trens” e “A secreta melancolía da garza”  (Galaxia, 2019).

    Entre os galardóns que recibiu destacan o Premio Literario José Saramago  de relato curto (2010), o primeiro accésit do Certame Nacional de Narracións Breves Modesto R. Figueiredo (2015) e o Premio Literario  Manuel Murguía (2016). En 2020 quedou finalista do XVII Premio de  Xornalismo Francisco Fernández del Riego.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.