Tag: empresa

O Concello da Guarda, a través da Concellaría de Desenvolvemento Local oferta nos meses de febreiro e marzo tres obradoiros de xeito gratuíto dirixidos a comercio, hostalería e empresas. Estes obradoiros están enmarcados na campaña de apoio a o comercio local, iniciada xa no ano 2020 por mor da situación sanitaria.

A Asociación de Jovenes Empresarios de Vigo, AJE Vigo, celebrará a gala de entrega dos seus premios Joven Empresario e Empresaria e Iniciativa Emprendedora o próximo 18 de novembro. Por primeira vez, este evento anual trasládase fóra de Vigo e terá lugar no Parador de Baiona.

A modificación do Plan sectorial de ordenación de áreas empresariais de Galicia (PSOAEG) impulsada pola Xunta permitirá habilitar preto de medio millón de metros cadrados de solo industrial nos concellos de Mos e Redondela, que concentran unha gran actividade económica e empresarial e necesitan máis superficie preparada para acoller este tipo de usos.

'Un lugar para traballar e crecer', así será o primeiro Centro de Dinamización Empresarial de Ponteareas que foi presentado onte polo concelleiro de participación cidadá, Roberto Mera, e a concelleira de Promoción Económica, Eva Gil, acompañados da segunda tenenta de alcalde Chus Garrote e dos técnicos redactores do proxecto.

A alcaldesa de Ponteareas, Cristina Fernández Davila, visitou as instalacións que ten en Cristiñade Galinsect, unha empresa ponteareá pioneira na cría de vermes a escala industrial en todas as súas fases. Unha granxa de insectos coa que se busca a cría e comercialización do Tenebrio molitos como fonte de alimentación rica en proteína, natural e de alta calidade para gandaría ou mesmo para abono ecolóxico.

Acción, compromiso, talento, actitude, implicación, unión e forza. Baixo estas premisas e co obxectivo de poñer en valor as redes de mulleres, “imprescindibles para avanzar”, desenvolveuse hoxe o III Networking empresarial de Empresarias de Galicia co título 'As empresarias actuando dende a unión', no que participou a presidenta da Deputación de Pontevedra, Carmela Silva.

O Concello de Ponteareas entregou os Premios 'Ponteareas, Lingua e Empresa', relativos ao 2020, na Gala da Lingua de homenaxe á escritora Xela Arias Castaño. A través destes galardóns o Consistorio quixo recoñecer o labor de persoas e empresas que, día a día, achegan a lingua, dun xeito normal, aos consumidores e consumidoras e contribúen, deste xeito, ao aumento e mellora do uso social do galego no sector empresarial.

“Patrimonio autoriza as obras do Centro de Dinamización Empresarial, que se realizará baixo a dirección do premiado arquitecto Jesús Irisarri seguindo as directrices do estudo de dinamización empresarial e impulso económico” anunciou hoxe a concelleira de Promoción Económica do Concello de Ponteareas, Eva Gil, quen subliñou que este será "o primeiro espazo municipal que ofreza un smartlab, un viveiro de empresas e posibilite o coworking, entre outras actividades encamiñadas a facer máis competitivo o noso tecido empresarial".

A delegada territorial da Xunta en Pontevedra, Luisa Piñeiro, anunciou que o Goberno galego vén de conceder unha axuda de 192.414 € a seis asociacións e dez comercios das bisbarras do Baixo Miño, O Condado e A Paradanta. En concreto concédense subvencións á Asociación de Comerciantes e Industriais de Tui (Acitui), Centro Comercial Aberto da Guarda, Adeto Tomiño, Mercado Municipal de Tomiño, Asociación Local de Comerciantes de Ponteareas e Praza de Abastos de Ponteareas.

A Xunta de Galicia, a empresa Hijos de Carlos Albo, a Autoridade Portuaria de Vigo e o Consorcio da Zona Franca asinaron esta mañá as escrituras polas que se formaliza a adxudicación de tres parcelas na Plataforma Loxístico Empresarial de Salvaterra de Miño-As Neves (Plisan) á firma conserveira.

A Deputación de Pontevedra, a través de SmartPeme, oferta esta próxima semana sete novas accións formativas impartidas de xeito online, enmarcadas na carteira de obradoiros que se imparten de forma telemática. As accións versan sobre Linkedin e Instagram para empresas, debuxo con Onshape, como mellorar a presenza en liña e o footer da web, e a comercialización en liña de experiencias gastronómicas.

A Asemblea Xeral da Asociación de Empresarios de Mos, que tivo lugar o pasado 30 de setembro no Viveiro Industrial do Polígono da Veigadaña, tivo como punto relevante a elección de nova xunta directiva, renovando cargo o seu presidente, Manuel Castro, quen se comprometeu a seguir traballando polas empresas de Mos, o desenvolvemento económico e o emprego.

O vicepresidente económico e conselleiro de Economía, Empresa e Innovación, Francisco Conde, deu hoxe a benvida á nova xunta directiva da Asociación de Empresarios de Mos aos que ofreceu a máxima colaboración da Xunta de Galicia para impulsar o tecido empresarial de Mos. Na clausura da asemblea xeral da asociación, na que interveu por videoconferencia, Conde asegurou que, desde que comezou a pandemia, o obxectivo do Goberno galego foi estreitar ao máximo o contacto cos axentes económicos e sociais

'Persoas empresarias e profesionais ante a Pandemia: actitudes diferenciais para superala con éxito' é o título da charla en formato webinar que, organizada pola Deputación de Pontevedra, terá lugar o vindeiro martes 29 de setembro entre as 10 e as 11 horas e que terá como relator ao psicólogo industrial Ignacio Abeal que afondará na superación das adversidades empresariais.

As Concellarías de Lingua e Promoción Económica do Concello de Ponteareas, que dirixen Fernando Groba e Eva Gil, respectivamente, convocan a II edición do Premio 'Ponteareas, Lingua e Empresa' co obxectivo de recoñecer as empresas que usan a lingua galega na actividade económica. Segundo Fernando Groba, este premio ten como finalidade "promover o uso da lingua galega na actividade económica do Concello de Ponteareas, estender o seu uso nas relacións laborais, comerciais e empresariais, e recoñecer publicamente a contribución ao aumento e mellora do uso social do galego desde este sector".

O Concello de Tui e a Zona Franca de Vigo van estudar a ampliación do Parque Empresarial de Areas. Así o acordaron esta mañá o alcalde, Enrique Cabaleiro, o delegado da Zona Franca, David Regades. Na Casa do Concello mantiveron unha reunión á que tamén asistiron os concelleiros Ana Mª Núñez, Sonsoles Vicente, Yolanda Rodríguez, Laureano Alonso, José Ramón Magán e Rafael Estévez, e técnicos de Zona de Franca

O Concello de Nigrán ven de outorgar licenza a Zona Franca de Vigo para a ampliación do parque empresarial Porto do Molle con 14 novas naves de oficinas e talleres situados nunha parcela de 10.710 metros cadrados (6.02 e 6.03) entre rúa das Pontes e rúa Montes da Barxa (frente al Centro de Negocios) e cun orzamento de execución de 4,4 millóns de euros. O propio alcalde de Nigrán, Juan González, comunicoullo persoalmente ao delegado de Zona Franca, David Regades, nunha reunión esta mañá no Concello.

A alcaldesa de Mos, Nidia Arévalo, vén de anunciar a realización dun Estudo do Impacto Económico do COVID-19 en Mos, traballo que se fará a través do contacto directo con todas as empresas do municipio. No estudo, confeccionado polo Concello de Mos, están a traballar cinco técnicos e técnicas a Axencia de Colocación e conta, sinala o Concello "coa implicación de todo o equipo de Goberno local".

O Concello de Tui pon en marcha no día de hoxe a Oficina COVID a través da web municipal tui.gal. Trátase dun servizo específico de información e consultas relacionado coa actual situación derivada do estado de alarma polo COVID-19 dirixido a PEMES, autónomos e persoas traballadoras. Esta é unha medida acordada por unanimidade polos grupos municipais da corporación tudense.

O Concello de Ponteareas, a través da concellarías de Facenda, Emprego e Promoción Económica, ven de crear unha liña extraordinaria de axudas, que se concederán de forma directa a autónomos, comerciantes e empresas. Estas axudas promovidas polo goberno BNG-PSOE incorporan gran parte das propostas realizadas por ACiP, logo dunha reunión de portavoces da Corporación celebrada a pasada semana.

Dispoñer de plans e ferramentas que, unha vez rematado o estado de alarma, contribúan a reactivación económica do municipio á maior brevidade posible, é o obxectivo da Mesa de Asesoramento Económico e Reestruturación do Comercio de Redondela que este pasado venres celebrou a súa primeira reunión telemática.

O Concello de Redondela convocará esta semana a primeira reunión da Mesa de asesoramento Económico e Reestruturación do Sector Comercial, unha iniciativa que nace coa intención de comezar a traballar conxuntamente nun plan de acción para intentar paliar os efectos da crise que o estado de alarma polo COVID-19 traerá aparellada durante o mesmo e nas datas posteriores ao seu remate.

Co obxectivo de seguir analizando como a Zona Franca pode tomar medidas encamiñadas para minorar o impacto real do Covid-19 na economía da nosa área, David Regades mantivo unha reunión telemática coa xunta directiva da comunidade de propietarios de Porto do Molle. Como primeira medida, Zona Franca duplicará durante os próximos tres meses a súa cota á comunidade de mantemento para que as empresas non teñan que realizar ningún desembolso.

Varias empresas da zona están doando ao Concello de Tomiño pantallas e máscaras protectoras, para repartir entre os voluntarios e voluntarias de Protección Civil e Policía Local, asociación de comerciantes, preceiros e traballadores municipais.

Co obxectivo de seguir a axudar á veciñanza e ás pequenas e medianas empresas da provincia, ante as consecuencias económicas da crise xerada polo COVID19, a Deputación de Pontevedra planifica un novo servizo ao través do ORAL para facilitar o fraccionamento, sen xuros, do pago dos tributos. A medida, que suporía un novo respiro económico para a cidadanía e as pemes, está a ser avaliada técnica e xuridicamente para poder beneficiar ás veciñas, veciños e empresas daqueles concellos que teñan delegadas na Deputación as competencias do pago e recadación tributaria.

Ante unha situación de excepcionalidade como a que se está atravesando no país, desde a Zona Franca de Vigo veñen de intensificar as accións de comunicación de relevancia para as empresas de Galicia polo que, desde hoxe, pódese ter acceso desde a súa páxina web ás diferentes medidas de apoio á actividade económica ben sexan estatais, autonómicas, locais e como da propia Zona Franca.

O Concello de Redondela vén de tomar as medidas oportunas para “priorizar ao máximo posible” o pagamento de facturas ás persoas e empresas provedoras do Concello. A medida adoptada polo Goberno que preside Digna Rivas, busca “que os nosos provedores e provedoras non teñan problemas de liquidez e poidan manter a súa actividade laboral e empresarial nestes tempos complicados”, explica a alcaldesa de Redondela.

Promover os viños das denominacións de orixe galegas nos mercados de China, México e Países Baixos é o principal obxectivo da misión comercial inversa que a Zona Franca de Vigo está a organizar desde hoxe e durante tres días como os actos de peche do programa de VinoExterior, a aceleradora promovida polo Consorcio para impulsar a internacionalización das empresas do sector vitivinícola galego.

O asentamento das primeiras empresas na Plataforma Loxística e Empresarial de Salvaterra-As Neves está xa un pouco máis cerca. A conselleira de Medio Ambiente, Territorio e Vivenda, Ángeles Vázquez, e o conselleiro de Economía, Emprego e Industria, Francisco Conde, presidiron esta mañá en Vigo o acto de sinatura da adxudicación de cinco parcelas na Plisan, as primeiras que se asignan dentro desta gran área empresarial.

O acto de presentación do vídeo Conversassobreo#RuralDixital reuniu, este pasado xoves, a unhas trinta persoas na sede da empresa Galician Brew, na parroquia ponteareá de Padróns. O intercambio de opinións posterior á proxección do video, deixou patente a necesidade dun debate a fondo sobre as cuestións que afectan ao desenvolvemento rural no que teñan voz os seus e as súas protagonistas.

Dentro do marco das reunións periódicas que veñen mantendo o Delegado do Estado na Zona Franca de Vigo coas alcaldesas de Tomiño, Sandra González e O Rosal, Ánxela Fernández Callís e o alcalde da Guarda, Antonio Lomba, esta mañá mantiveron unha nova reunión na que concretaron as liñas de traballo a desenvolver no informe estratéxico sobre a actividade hortofrutícola en Baixo Miño

Un premio distinguíu, por vez primeira na historia de Ponteareas, o emprego da lingua galega no ámbito comercial e empresarial. Con este xesto o Goberno ponteareán quere non só promover o uso da lingua galega "senón tamén recoñecer publicamente a contribución ao aumento e mellora do uso social do galego desde este sector".

Nun encontro mantido na mañá do venres, 11 de outubro, entre a alcaldesa de Redondela, Digna Rivas, e o delegado do Estado no Consorcio da Zona Franca, David Regades, analizáronse as posibles vías de colaboración para poñer en marcha accións que favorezan o desenvolvemento económico da comarca.

A Deputación de Pontevedra programou para este mes de outubro seis novas accións formativas do programa «Smartpeme» que comezan mañá en Ponteareas. Estas sesións están dirixidas á adaptación das empresas e proxectos emprendedores da provincia ao novo escenario dixital no que desenvolver as súas actividades e aproveitar as ferramentas existentes, co obxectivo de aumentar a súa competitividade.

Procedentes de Reino Unido, Bélxica e Francia, ademáis de Galicia, España e Portugal, 19 empresas de toda a cadea do sector agro visitan estes días o territorio transfronteirizo para coñecer a calidade dos seus produtos e servizos e manter reunións nas que formalizar futuros acordos comerciais.

O delegado do Consorcio Zona Franca de Vigo, David Regades acordou esta mañá coa Secretaria de Estado de Comercio, Xiana Méndez, un marco de colaboración para fortalecer entre ambos os organismos as políticas de internacionalización do tecido empresarial galego así como desenvolver accións conxuntas para captar investimentos estranxeiros.

Co fin de ultimar o convenio de colaboración para a realización dun plan estratéxico empresarial para o desenvolvemento económico do Concello da Cañiza, o delegado do Estado para a Zona Franca de Vigo, David Regades e o alcalde da Cañiza, Luis Piña, mantiveron unha xuntanza de traballo na sede da Zona Franca de Bouzas.