7.6 C
Pontevedra
Venres, 29 de Marzo de 2024
Máis
    HomeA ParadantaA CañizaZona Franca e A Cañiza colaborarán para aumentar a rendibilidade e competitividade...

    Zona Franca e A Cañiza colaborarán para aumentar a rendibilidade e competitividade do sector empresarial da zona

    Co fin de ultimar o convenio de colaboración para a realización dun plan estratéxico empresarial para o desenvolvemento económico do Concello da Cañiza, o delegado do Estado para a Zona Franca de Vigo, David Regades e o alcalde da Cañiza, Luis Piña, mantiveron unha xuntanza de traballo na sede da Zona Franca de Bouzas.

    A Zona Franca, a través do seu prestixioso servizo de información económico, ARDÁN, realizará un estudo económico que pretende detectar fortalezas e debilidades para establecer políticas adecuadas para aumentar a rendibilidade e competitividade do sector empresarial da zona.
    ARDÁN é un dos servizos máis singulares de Zona Franca. É a área encargada de prover ao tecido empresarial galego de estruturas de coñecemento. Ao longo dos seus 26 anos de vida, xeráronse bases de datos, informes e indicadores cuxa utilidade transcende os obxectivos estritamente empresariais para penetrarse mesmo no perímetro de interese dos deseñadores de políticas públicas.

    Non é a primeira vez que este servizo de información da Zona Franca realiza este tipo de estudos. Recentemente, presentouse o terceiro Informe Sectorial da Industria e Comercialización de Produtos Pesqueiros, elaborado coa colaboración de CONXEMAR (Asociación Española de Almacenistas, Importadores, Transformadores e Exportadores de Produtos da Pesca e Acuicultura). O documento recolle a realidade do sector en España a través dos datos que o servizo de información empresarial do Consorcio, Ardán, procesou minuciosamente e no que se pon de manifesto a potencialidade do sector.

    O Delegado de Zona Franca, David Regades, puxo de manifesto a importancia de contar con datos fiables e ben estruturados, como os que ten Ardán, xa que “son moi útiles tanto para o concello da Cañiza como para as empresas á hora de dispoñer de información detallada e actualizada necesaria sempre á hora de planificar tanto as actuacións e os proxectos, como para extraer conclusións coas que poder deseñar políticas de futuro.”

    Pola súa banda, o alcalde da Cañiza, Luis Piña, quixo destacar o grao de compromiso e de colaboración do Delegado da Zona Franca. “Estou convencido que o noso concello está nunha das mellores localizacións do Sur de Galicia cun engadido que é a proximidade co futuro desenvolvemento da PLISAN polo que consideramos moi interesante e necesario este estudo que servirá como guía fundamental para afrontar o futuro e asi lograr o asentamento empresarial coa consecuente creación de postos de traballo” indicou o rexedor.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.