16 C
Pontevedra
Martes, 21 de Maio de 2024
Máis
    HomeLouriñaMosAemos demanda que o aumento de recadación de impostos minicipais reflíctase “en...

    Aemos demanda que o aumento de recadación de impostos minicipais reflíctase “en mellores servizos e infraestruturas”

    A Asociación de Empresarios de Mos reclama flexibilidade ao Concello na regularización do pago da taxa por recollida de lixos

    A recente decisión do Concello de Mos de regularizar o padrón para o pago da taxa por recollida de residuos sólidos urbanos, xunto co incremento impositivo sufrido estes últimos anos e que afecta directamente o tecido empresarial, reactivaron a demanda da Asociación de Empresarios de Mos de que este tipo de medidas teñan un claro reflexo na mellora de servizos e infraestruturas municipais.

    Ao parecer, un gran número de firmas radicadas neste termo municipal non figuraban no citado padrón para o abono da taxa de lixos, polo que agora estáselles empezando a reclamar a débeda acumulada do últimos catro anos.

    Moitas destas empresas pertencen a Aemos e directivos da asociación mantiveron un encontro estes días con representantes do Concello para reclamarlles flexibilidade á hora de aplicar esa regularización.

    Desde Aemos enténdese que a Administración local debe ter certo grao de condescendencia nese proceso, “sobre todo ante pequenas compañías que se topan agora cunha débeda moi elevada en relación á súa envergadura e que en ningún momento mostraron indicios de que houbese mala fe”.

    Neste sentido, a asociación ofrece a súa mediación ao Concello ante os seus asociados, pero non só para interceder en favor desa flexibilización, senón tamén para resolver casos nos que se está detectando que a reclamación por un servizo de recollida de lixos chega ao mesmo tempo a distintas entidades mercantís dependentes dunha mesma firma empresarial e radicadas nun único inmoble.

    En definitiva, como xa fixese meses atrás por mor de facerse público o incremento impositivo municipal de Mos para o 2024, Aemos insiste na súa demanda de melloras en servizos e infraestruturas tanto nos propios polígonos como nas zonas nas que se asintan as empresas e que se atopan afastadas destes enclaves de concentración industrial. Se naquela ocasión dirixiu as súas principais peticións a algún polígono industrial especificamente, agora incide na necesidade de que esas melloras cheguen a calquera punto do termo municipal en que haxa actividade empresarial. O obxecto desas actuacións sería non só a recollida de lixos, senón tamén saneamento, abastecemento, infraestruturas viarias ou telefonía, entre outras.

    De igual forma, desde a Asociación de Empresarios de Mos, AEMOS, insístese en ofrecer os seus servizos técnicos e xurídicos para atender as consultas oportunas e asistir, no seu caso, ao empresariado ante a administración local competente.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.