Digna Rivas, Xoan Carlos González e Roberto Villar firmaron esta semana pasada o acordo de pacto de goberno que ten como finalidade consolidar un goberno tripartito progresista en Redondela.
A secretaria xeral do PSdeG de Redondela declaraba na mesa de acordo que “imos ter o goberno progresista que a cidadanía demandou cos seus votos o pasado 28M. As urnas demostraron o que estamos hoxe a firmar e é o noso deber responsabilizarnos cos dereitos dos veciños”.
Digna Rivas e Roberto Villar asinaban un documento de medidas programáticas así como a entrada no goberno da Agrupación de Electores, asumindo o seu concelleiro electo, Roberto Villar a concellería de Infraestruturas e sustentabilidade.
No caso da sinatura realizada con Xoan Carlos González chegaron a un acordo de investidura no que dende o primeiro momento estaban de acordo en loitar por un goberno progresista. Entre os puntos expresados destacaban a necesidade de diálogo e que ambas forzas políticas participen nas decisións fundamentais para Redondela, ademais de puntos en común sobre igualdade e empregro estudando as necesidades reais da cidadanía.
Na sinatura de ambos acordos a secretaria xeral amosou ”a súa satisfacción e agradecemento a BNG e AER por traballar na procura de puntos de consenso que foi imprescindible para este acordo progresita”. Ao que engadía que “os veciños esperan un goberno forte que estea a altura. Non vou a falar de disputas porque estamos aquí para traballar por e para a cidadanía de Redondela”.
“Abrimos un período novo e contade co meu compromiso permanente de diálogo e de entendemento, sempre cos intereses xerais de Redondela para seguir catro anos máis avanando”, concluía Rivas.
O pleno de investidura celebrouse o sábado ás 12:00 horas no Multiúsos da Xunqueira.