A Deputación ofrece aos concellos da provincia ‘Tinta do mar: pequena biografía de Luísa Villalta’, un contacontos dinámico e participativo para festexar as Letras Galegas e divulgar a traxectoria da autora homenaxeada neste 2024. O presidente da Deputación de Pontevedra, Luis López, acaba de remitir unha carta aos 61 concellos da provincia para ofrecer 35 sesións desta actividade, que será totalmente de balde para os municipios. Os concellos interesados nalgunha das sesións deberán presentar unha instancia a través da Sede electrónica no Rexistro da Deputación a partir das 8:00 horas do vindeiro luns, 13 de maio.
A actividade, realizada por Polo Correo do Vento, consistirá na narración da vida de Luísa Villalta e na creación dunha ilustración da autora. Ademais, abrangue a interpretación de distintas pezas musicais e pecharase cun pequeno coloquio adaptado á idade da rapazada participante. Completarase a sesión cun obradoiro no que cada asistente realizará a súa propia caricatura de Villalta.
A partir do 8:00 horas do luns os concellos poderán solicitar algunha das 35 actividades a través dunha instancia na que deberán indicar o interese en acoller a actividade e tamén tres posibles datas de realización, en semanas diferentes, entre o 15 de maio e o 31 de xullo. Se a primeira opción quedase descartada, pasarase á segunda, e así sucesivamente. En caso de que as tres datas escollidas non estivesen dispoñibles, consensuaranse outras novas co concello.
Pola súa banda, aqueles concellos que presenten a solicitude con anterioridade á data e hora de apertura do prazo de inscrición, quedarán automaticamente excluídos. Ademais, se houbese máis de 35 solicitudes, abrirase unha lista de agarda á que se acudirá no caso de renuncia dalgún concello adxudicatario.
A Real Academia Galega (RAG) dedícalle o Día das Letra Galegas 2024 á escritora, filóloga e violinista galega Luísa Villalta. Escribiu poesía, teatro, narrativa de ficción, ensaio, artigos xornalísticos e traducións, e a RAG destaca dela que foi “creadora dunha obra singular e sólida que a converteu nunha das grandes figuras da literatura galega que emerxeron na segunda metade dos anos 80 e primeiros 90”.
