13.3 C
Pontevedra
Martes, 21 de Maio de 2024
Máis
    HomeO CondadoPonteareasPonteareas reafírmase na súa loita contra a violencia machista

    Ponteareas reafírmase na súa loita contra a violencia machista

    A actriz Estíbaliz Veiga interactuou con preto de 300 rapazas e rapaces nunha nova acción de «Violencia Zero» da Deputación de Pontevedra

    Facer que a mocidade se dea de conta do que está a acontecer na sociedade na que vivimos reivindicando a igualdade e a loita contra as violencias machistas foron os obxectivos da acción de ‘Mulleres en acción. Violencia Zero’ da Deputación de Pontevedra levada a cabo onte en Ponteareas.

    O auditorio Reveriano Soutullo acolleu unha iniciativa de Estíbaliz Veiga nomeada ‘Recoñecer os golpes que non marcan a pel’. Á cita acudiron a deputada de Igualdade, Isaura Abelairas, e preto de 300 alumnas e alumnos de secundaria pertencentes aos centros educativos CPR Santiago Apóstol e IES Val do Tea acompañados por persoal docente dos mesmos.

    Esta foi a cuarta acción levada a cabo no marco da quinta edición do programa, que se iniciou en novembro de 2019 e que xa pasou polos concellos de Vigo, Pontevedra e Lalín. A presentadora, actriz, escritora de guións e pedagoga Estíbaliz Veiga levou a cabo unha proposta interactiva coa mocidade como público obxectivo.

    En primeiro lugar a artista presentou ‘Golpes’, un monólogo sobre a violencia de xénero baseado en feitos reais co que está a xirar na actualidade, e logo, coa colaboración do público, fixo unha aproximación a través de métodos de interpretación á personaxe na que está baseado. A acción tivo moi boa acollida e na súa segunda parte colleron especial protagonismo ao interactuar coa artista un profesor e unha profesora dos centros educativos participantes así como alumnado dos mesmos.

    ‘Mulleres en Acción. Violencia Zero’ ten por obxectivo darlle visibilidade á loita contra as violencias machistas, así como dar a coñecer o labor de novas artistas que están a traballar a prol da igualdade. Este ano volve reunir a 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta quinta edición estase a celebrar en 25 concellos da provincia (Pontevedra, Vigo, Lalín, Ponteareas, A Cañiza, Forcarei, Crecente, Mos, Redondela, Cangas, Cerdedo-Cotobade, Tui, Mondariz, Pontecesures, Gondomar, O Grove, Marín, Vilagarcía de Arousa, Cambados, Sanxenxo, O Porriño, O Rosal, A Guarda, Meis e Moaña).

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.