A Concellería de Igualdade do Concello de Redondela, dirixida por Iria Vilaboa, vén de dar a coñecer o programa da Campaña de Igualdade en torno o Día Internacional da Eliminación da violencia contra a muller. Unha iniciativa, aposta persoal da alcaldesa Digna Rivas, que busca poñer sobre a mesa de debate “todos aqueles temas que poñan en valor o papel da muller na sociedade e a súa loita por acadar unha igualdade real como único camiño para conseguir unha sociedade máis xusta”.
“Queremos, como o fixemos dende que chegamos ao Goberno, que os actos non queden cinguidos a un só día, senón que teñan continuidade e participación da cidadanía, dos centros escolares e centros de día”, explicou a alcaldesa Digna Rivas na presentación do programa de actividades.
O día 21 de novembro, nos centros escolares e centros de día do municipio, comezará o programa de actividades cun xogo ao estilo do popular Pasapalabra onde os e as participantes dispondrán dun rosco proporcionado polo Concello de Redondela que terán que completar. As palabras terán toda relación coa violencia machista e coa igualdade, entre elas podemos atopar: abuso, acoso, burla, berrar…
“O xogo está ideado para que sexa participativo e non competitivo –explica a alcaldesa redondelá– porque o que buscamos é poñer de relevo as repercusións deses actos e desas palabras que forman parte dun entorno de violencia”.
“Somos conscientes de que temos que ir da man cos centros e que non é suficiente tratar o tema con charlas. Entendemos que a violencia é un tema sensible e que ‘non é un xogo’, pero queremos chegar coa mensaxe ao mallor rango de idade posible”, explica Rivas.
A alcaldesa tamén quixo agrafeder a participación do IES Mendiño e a profesora de Relixión Almudena Suárez, “por aportar ideas e propostas interesantes, e a todolos institutos de Redondela que sempre están dispostos a colaborar”.
O martes 22 de novembro e o miércoles 23 a través das Bibliotecas Municipais, haberá actividades enfocadas para as familias. Como en todas as actividades que desenvolve o Goberno local, a transversalidade está sempre presente como deixa ben claro Digna Rivas ao subliñar que “apostamos por traballar de forma transversal con centros e bilbiotecas, para chegar a máis xente e conseguir o obxectivo que é cambiar as actitudes e conseguir unha sociedade onde se fomenten as relacións igualitarias”.
O teatro tamén estará presente o programa do 25N de Redondela e o fará con Contos para nenas grandes e pequenas no Multiúsos da Xunqueira con Marta Ortiz e Brais das Hortas, o martes ás 18:30 horas. Un espectáculo que trata sobre a importancia do bo trato entre as persoas, a loita contra a violencia machista e a igualdade a través de historias de mulleres diversas.
O obradoiro Xoguemos a poetizar, que se levará a cabo no Multiúsos do Piñeiral do Crego o mércores ás 18 horas, traballa tamén a violencia de xénero, a cousificación do corpo ou o acoso escolar.
O mércores 23 pola mañá, o alumnado dos institutos e o público xeral (ata completar aforo) poderán asistir á proxección de dúas curtametraxes e se contará coa presenza do director dunha delas, Javier Pereira, co que as e os asistentes poderán falar do tema que se expón: A sumisión Química tema que, por desgraza, está de actualidade e ao que é preciso darlle visibilidade para sensibilizar aos e ás adolescentes. “As mulleres teñen dereito a divertirse sen que ninguén lles impida exercer o seu dereito de liberdade”, afirma rotunda a alcaldesa. Esa mesma presentarase en Redondela o libro 8 Señales. Cuestión de vida o muerte, no que a súa autora nos relata a súa propia e traumática experiencia na que a súa exparella a intenta asasinar.
O xoves, 24 de novembro, inaugurarase a exposición Á violencia de xénero dille NON!. E xa o 25 de novembro realizarase o acto institucional na Praza do Concello coa lectura do manifesto e a presentación do libro ‘BAMBÚ’ de Isabel Blanco, para despois pasar a facer a ofrenda floral que se realiza todolos anos na árbore Ginkgo Biloba no Salgueiral.
O 25 pola tarde ás 20 horas no Multiusos da Xunqueira, celébrase a Gala dos II Premios de Xornalismo Ético Sesé Mateo “coa que pecharemos dun xeito emotivo a nosa conmemoración do 25N” asegura Digna Rivas. A mestra de cerimonias será a actriz Arantxa Treus nun acto no que se dará a coñecer a persoa gañadora desta segunda edición duns premios que buscan recoñecer o tratamento ético das informacións vencelladas coa violencia de xénero e ao que concorreron un total de 16 participantes.
Por último, a alcaldesa de Redondela quere agradecer a “Joshua Mateo o seu traballo na realización dos premios Sesé Mateo que consideramos de gran importancia porque buscan ser un recordatorio permanente e unha homenaxe ás vítimas da senrazón que é violencia machista, unha das maiores lacras da sociedade”.