A alcaldesa de Ponteareas e candidata do BNG, Cristina Fernández, deu a coñecer a relación dos once primeiros postos da candidatura ás eleccións municipais, o número de concelleiras e concelleiros preciso para obter a maioría absoluta nas eleccións municipais do vindeiro mes de maio.

Tras a propia Fernández, figura a actual concelleira de Promoción Económica e Turismo, Eva Gil, natural de Canedo, directora Técnica de proxectos de Desenvolvemento Rural, licenciada en Xeografía e Máster en desenvolvemento local e comarcal e en políticas comunitarias. José Carlos Vázquez, licenciado en Ciencias Económicas pola UVigo e Funcionario de Administración Local, incorpórase ao proxecto no terceiro posto. Nos postos cuarto e quinto sitúanse a actual concelleira de Benestar social e Igualdade, Verónica Carrera, natural de Pías e diplomada en educación social, e o actual portavoz municipal do BNG, Miguel Bouzó, natural de Ponteareas, concelleiro de Deportes, Eventos e Mocidade no goberno local.

No sexto posto incorpórase Verónica Bargiela, natural de Guláns, enxeñeira Técnica Agrícola, Máster en Ciencia e Tecnoloxía Agroalimentaria e Doutora pola Universidade de Vigo e implicada na posta en valor da vaierdade do pemento de Guláns. Na sétima posición figura Fran Aparicio, natural de Cumiar, técnico Administrativo Contable, diplomado en Maxisterio coa especialidade de Educación Musical e dedicado profesionalmente á xestión e organización de recursos materiais e humanos. O oitavo posto ocúpao Bolívar González, natural de Cristiñade, técnico en taxacións e valoracións, foi director da Banda de Música Xuvenil de Xinzo, concelleiro do BNG dende 1995 a 2009 e é Responsábel local da formación nacionalista na actualidade. No décimo posto concorre Andrés Carrera, veciño da vila, licenciado en Ciencias da Actividade Física e do Deporte, presidente e director técnico do Club Natación Ponteareas. No undécimo posto, figura Diana Bernárdez, natural de Fozara, traballadora na hostalaría local, forma parte da directiva da Asociación Familias Azuis, dedicada á atención de persoas con autismo.

Cristina Fernández destacou que a candidatura combina experiencia política e de goberno coa incorporación de persoas de elevada cualificación profesional e académica, “o que supón unha garantía de eficacia, competencia e capacidade de xestión no futuro goberno local”. “O BNG ofrece a Ponteareas o mellor equipo, un grupo de persoas preparadas e formadas, ilusionadas coa transformación da localidade e dispostas a poñer a súa experiencia ao servizo das veciñas e veciños para garantir que Ponteareas siga avanzando nas mellores mans”, sinalou a alcaldesa e candidata do BNG.

O primeiro tenente de alcaldesa do Concello de Ponteareas, Roberto Mera, abandona a política activa e renuncia a formar parte da candidatura nacionalista. Mera adiantou a súa decisión hai un mes persoalmente á Alcaldesa a quen posteriormente, a través dunha carta, explicou formalmente os motivos da súa decisión.

Na misiva, á que tivo acceso Comarcas na Rede e que reproducimos na súa integridade nesta ligazón, Mera lembra que en 2009, tras 12 anos á fronte do BNG se retirou da actividade política e que dez anos despois, en 2019 “nunha circunstancias especiais nas que era preciso consolidar o goberno liderado polo BNG” decidíu atender a petición do Alcalde Xosé Represas para acompañalo na candidatura e axudar “a revertir o descenso electoral sufrido en 2011 e 2015”. Mera cualifica aquela decisión de “politicamente acertada” a pesar de ser “conscente dos custos persoais que lle podía acarrear”. O primeiro tenente de alcaldesa lembra que “o resultado electoral foi inmellorábel, recuperando os apoios perdidos nos procesos electorais anteriores, e o mandato que agora finaliza consolidou o proxecto do BNG en Ponteareas cun balance de transformacións espectaculares das que me sinto orgulloso dende a miña modesta contribución co meu traballo como concelleiro”.

O nacionalista explica que “como outra cara da moeda, estes catro anos foron especialmente dificis no plano persoal e profesional. Compatibilizar a adicación ao Concello coa miña actividade profesional como avogado supuxo un esforzo e sacrificio imposíbel de seguir mantendo no tempo”.

Mera engade que “se ao anterior engadimos a brutal e feroz exposición pública que eu mesmo soportei e que hoxe en día comporta a actividade política, precisaríase xa dunha vocación de heroe ou mártir da que, afortunadamente, eu carezo”. O concelleiro do BNG explica que a súa decisión é imprescindíbel para atender innumerabeis ocupacións e proxectos persoais, profesionais e sociais moi gratificantes que nestes catro anos se viron prexudicados e desatendidos “e que pagan a pena na compaña de persoas que comparten comigo un sinceiro afecto e consideración”.

Roberto Mera afirma que “ninguén nun proxecto político é imprescindíbel” e agradece o ofrecemento que recibíu para continuar outros catro anos nun goberno do BNG pero aclara que o seu compromiso “foi asumido de maneira excepcional co querido e tristemente desaparecido Xosé Represas, por un período de catro anos que agora remata e que non me resultou doado concluir”. Mera revela na carta que en agosto de 2022 xa presentara formalmente á Alcaldesa a súa demisión “e finalmente aceptei facer un derradeiro esforzo que agora conclúe de forma definitiva con todas as consecuencias”.

O nacionalista desexa ánimo e sorte ao BNG explicando que retoma a súa vida anterior a 2019 “coa tranquilidade e o convencemento de que o gran traballo desenvolvido polo BNG, o novo rumbo que emprendeu Ponteareas e os seus ilusionantes proxectos de futuro terán un respaldo social inequívoco e maioritario nas vindeiras eleccións”.