Dezaseis equipos loitarán esta fin de semana por converterse no campión galego das Galimpiadas, o evento deportivo enxebre-rural que se celebra en Caldelas de Tui. A terceira edición das Galimpiadas chega cheo de deporte, troula, música e gastronomía, no mellor ambiente posible, no entorno da ribeira de Caldelas, en Tui, os días 28, 29 e 30 de abril.
A inauguración oficial desta terceira edición das Galimpiadas será o sábado, 29 de abril, ás 11.30 horas, co desfile da Llama Galímpica“, que sairá do bar da comisión e percorrerá as distintas sedes do evento, o bar A Capela e o Chiringo Os Choróns, para rematar de novo no bar da comisión. A charanga Cantos Somos acompañará á comitiva, que deberán integrar todos os equipos que participen nas Galimpiadas, así como calquera que queira seguir á “Llama Galímpica”. E é que as Galimpiadas son para todos e todas. O público tamén pode participar animando aos equipos e votando polo seu favorito para que poida gañar o “Premio da xente”.
O mesmo sábado, a partir das 14.30 horas, haberá bocatas de xamón asado para xantar e ás 16 horas comezará a competición. Nesta primeira xornada disputaranse as seguintes probas: carreira de sacos, pano, corda e esquís de terra na ribeira; billar no chiringo Os Choróns, futbolín no bar A Capela e tute no bar da comisión.
O domingo haberá pulpeiro para coller forzas e seguir desfrutando das Galimpiadas. A partir das 16 horas continuarán o resto das probas: ra no chiringo Os Choróns, dardos no bar A Capela e pulso no bar da comisión.
O propio domingo ás 19.30 horas será a entrega de premios. Pero con eles non remata a festa. Tras coñecer ó equipo campión das terceiras Galimpiadas e o resto de premios, comezarán os concertos coa música en directo de Amnesia, Lost in Mantra y Amarok DJ.
