Praia América transformase, nestes días, nunha excepcional sala de exposicións ao acoller, ata o 9 de setembro, as 16 esculturas realizadas polo alumnado da Escola de Cantería e agrupadas na exposición colectiva «D’Pedra».
A mostra, organizada pola Deputación de Pontevedra, foi inaugurada na mañá de hoxe polo alcalde de Nigrán Juan González, acompañado das deputadas Ana Laura Iglesias e Noemí Outeda e concelleiros de concelleiras do Goberno local.
“O ano pasado tivemos a mostra anterior desta Escola e foi un éxito rotundo, a ubicación ao pé da praia é inmellorable e estamos encantados de poder repetir con esta nova, a calidade das pezas é asombrosa”, sinalou o alcalde, Juan González, durante a presentación.
Para que os centos de persoas que nestes días de verán pasan polo paseo de Praia América poidan ter unha mellor idea da exposición, cada una delas conta cun pequeno panel no que figura o nome do autor ou autora e o título da obra.
Máis polo miúdo, as 16 pezas que se exhiben son obra de Patricia Pazó Vázquez, Alejandro García Álvarez, Marcos Lareo García, Álvaro Somoza López, Rubén Gil Rodríguez, Santiago Rey López, Marcel Kahlbrandt, José Sampedro Caamaño, Jonathan Mariñas García, José Gómez de Bernardo, Lorenzo Lede Mouriño, Jonathan López Otero e Jason Pérez. Tras o seu paso por Nigrán, a mostra da Escola de Cantería chegará ao concello de Gondomar, onde permanecerá ata o 9 de outubro.
«D’Pedra» é unha exposición que a Deputación de Pontevedra pon a disposición dos concellos, como fixo no seu momento con ‘Nado en Pedra’, e que non só fai fincapé na actividade que mozas e mozos desenvolven neste centro de formación, senón que tamén serve como elemento dinamizador da cultura e a idiosincrasia galega. Entre os seus obxectivos figura a achega da arte do traballo en pedra ás xeracións máis novas, para que poidan descubrir este oficio tradicional.
Máis sobre a Escola de Cantería
A Escola de Cantería naceu no ano 1979 coa finalidade de poñer en valor un dos oficios máis antigos de Galicia e ao longo da súa traxectoria, numerosos mestres e mestras canteiros formados na Escola teñen deixado a súa pegada no patrimonio arquitectónico de Galicia e diversos lugares do mundo. Así, os seus traballos están presentes en Fortaleza (Brasil), Maracaibo (Venezuela), Manila (Filipinas), La Paz (Bolivia), Nova York (Estados Unidos), Querétaro (México), Buenos Aires (Arxentina) o Montevideo (Uruguai) entre outros países.
Ademais, o alumnado ten participado nas obras de restauración de emblemáticos monumentos, como a A Sagrada Familia de Barcelona, a catedral de Santiago, a catedral de Westminster de Londres ou mesmo as obras de recuperación do edificio do Capitolio de Washington.
