O Concello de Nigrán ven de sustituír os 30 focos que iluminan o terreo de xogo do Campo Municipal de Condomínguez por nova tecnoloxía LED, investindo nelo un total de 6.700 euros que serán rápidamente recuperados grazas ao importante aforro enerxético que supón este troco. Paralelamente, ven de fornecer con 8 toneladas de caucho o céspede artificial desta instalación e da de Vilariño, ademáis de cepillarse cadanseu céspede con maquinaria da Deputación de Pontevedra.
“Queremos que cando os equipos poidan volver a adestrar se atopen cunhas instalacións melloradas, os clubes xa perderon a tempada e, polo menos, cando regresen darlles a benvida coas súas peticións cumpridas”, indica o alcalde, Juan González, quen aposta pola renovación LED en toda a iluminación pública do municipio por “sostibilidade ambiental e tamén económica”.
Un gran número das antigas luminarias de Condomínguez, de vapor de sodio, estaban fundidas e, ao carecer de aillamento, presentaban múltiples avarías coincidindo cos días de choiva, polo que esta mellora era unha demanda da ED Val Miñor, que emprega estas instalacións municipais durante todo o ano, sendo esencial unha boa iluminación para desenvolver dun xeito óptimo os adestramentos (especialmente no inverno, cando as horas de luz natural se reducen drásticamente). Así, estes focos foron substituídos por outros novos tipo LED de 200 W cada un, o que supón un importantísimo aforro no consumo enerxético.
“Supoñen un importante aforro enerxético, xa que a reducción da potencia de consumo será entre de o 51 % e o 80 %, o que ao mesmo tempo implica diminuír as costas de funcionamento das instalacións de iluminación pública e, sobre todo, permítelle ao Concello optimizar o gasto enerxético neste ámbito”, conclúe o rexedor.
