8.7 C
Pontevedra
Xoves, 28 de Marzo de 2024
Máis
    HomeO CondadoPonteareasXosé Represas recupera a Roberto Mera para a política municipal

    Xosé Represas recupera a Roberto Mera para a política municipal

    O alcalde e candidato do BNG á Alcaldía de Ponteareas, Xosé Represas, anunciou a inclusión de Roberto Mera no terceiro posto da candidatura do Bloque para as vindeiras eleccións municipais. O segundo posto será ocupado pola actual concelleira Cristina Fernández Davila, edil de educación, persoal e participación cidadá, quen xa acompañou a Represas nese lugar nas eleccións de 2015.

    O BNG conta na actualidade con cinco edís, polo que a presenza de Roberto Mera no terceiro posto supón con toda probabilidade o seu regreso á política activa despois dunha ausencia de case 12 anos. Mera é avogado e politólogo, e foi candidato e portavoz municipal do BNG entre 1995 e 2007, ano no que logrou ser a forza máis votada. Un pacto in extremis entre o PP de González Solla e a UCPA de Nava Castro impediu ao nacionalista ser o alcalde de Ponteareas e supuxo o seu abandono da política para centrarse na súa carreira profesional.

    Ademais, naquela etapa, Mera ocupou diferentes responsabilidades comarcais e nacionais no BNG, entre elas membro da Executiva Nacional da formación nacionalista. A súa traxectoria social iniciouna como cofundador en 1990 do Grupo Ecoloxista Adenco, do que foi máximo responsábel até 1995, cando con 23 anos foi elixido concelleiro do BNG en Ponteareas. Na súa traxectoria destaca ter logrado mediante unha querela a inhabilitación do alcalde José Castro e sete edís máis do PP. Foi ademais tenente alcalde no fugaz goberno bipartito do ano 2003. Vencellado durante estas décadas ao movemento veciñal da súa parroquia natal, Arcos, na actualidade é o presidente da súa Casa Cultural e secretario da Comunidade de Montes.

    Represas amosouse moi satisfeito pola presenza de Mera nun posto de saída. “É unha persoa moi apreciada en Ponteareas e cun recoñecido prestixio político e profesional que aportará ao goberno nos vindeiros catro anos toda a súa indiscutíbel capacidade e experiencia”, asegurou. O actual alcalde sinalou que “a volta de Roberto Mera ao Concello para gobernar non é só unha boa noticia para o BNG, en realidade é unha moi boa noticia para Ponteareas”.

    Pola súa banda, Roberto Mera agradeceu a Represas e ao BNG a confianza depositada nel, sinalando que “aceptei o ofrecemento do alcalde porque creo que estamos nun intre crucial para Ponteareas onde todos debemos arrimar o ombro. Represas fixo un traballo titánico, logrou recuperar economicamente o Concello e agora é fundamental continuar gobernando os vindeiros catro anos para levar adiante a transformación que Ponteareas precisa. Non podemos voltar atrás nin regresar a un pasado de corrupción, despilfarro e abandono que tanto dano causou a Ponteareas”.

    Roberto Mera contextualizou o seu regreso na situación política actual explicando que “estamos nun momento complicado no que os novos discursos antidemocráticos, do machismo ou do odio nos obrigan a dar un paso ao frente. Por iso decidín tamén asumir esta responsabilidade”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.