7.6 C
Pontevedra
Martes, 27 de Febreiro de 2024
Máis
    HomeO CondadoPonteareasPonteareas exporta a súa terapia educativa con cans para menores con necesidades...

    Ponteareas exporta a súa terapia educativa con cans para menores con necesidades específicas

    A alcaldesa e concelleira de Educación, Cristina Fernández Davila, reuniuse coa Subdirectora Xeral de Innovación, Orientación e Formación de Recursos Humanos, Eugenia Pérez, para mostrarlle os éxitos do proxecto

    O alumnado con necesidades específicas do CEIP Mestre Ramiro Sabell Mosquera de Ponteareas leva catro anos aprendendo xunto a cans. Con eles e un equipo especializado avanzan no seu percorrido educativo, reforzan a súa autoestima e melloran as súas capacidades físicas e de concentración. Resultados constatados polo Concello e o equipo educativo do centro, e que, en palabras da alcaldesa e concelleira de Educación, Cristina Fernández Davila, mostran que “a terapia con cans é moi exitosa”.

    A rexedora e a concelleira de Benestar Social, Verónica Carrera, reuníronse coa Subdirectora Xeral de Innovación, Orientación e Formación de Recursos Humanos, Eugenia Pérez, para mostrarlle os bos resultados do proxecto e animala así a exportalo a moitos centros de Galicia. “A nosa experiencia nesta innovadora terapia educativa ten que servir de punto de partida para moitos outras escolas”, explica a alcaldesa, ao tempo que ofrece o coñecemento adquirido nestes anos pola Concellaría de Educación aos centros interesados en implantar este sistema.

    A terapia con cans é unha actividade integrada no currículum escolar do CEIP Mestre Ramiro Sabell Mosquera, e supón unha sesión individual semanal cos animais, un equipo de profesionais, e o equipo de orientación. A terapia ten distintas metas como a adquisición de habilidades técnicas de estudo, mostrar que a educación é esencial para o futuro da sociedade, e presta especial atención á aprendizaxe da convivencia, e á atención á diversidade. Ademais, durante o curso, tamén se fan sesións grupais co resto do alumnado e co persoal docente que axudan na inclusión dos alumnos e alumnas con necesidades específicas, e reducen o acoso escolar.

    O equipo educativo constatou que a terapia supuxo para moitos alumnos e alumnas a recondución da súa conduta, fíxolles retomar os seus estudos e mellorou a convivencia no centro. As familias tamén destacan os resultados da actividade e salientan a evolución do alumnado a nivel persoal, familiar e escolar, así como, unha mellora na comunicación, afectividade, relación social e psicomotricidade dos seus fillos e fillas.

    A alcaldesa conclúe que “despois destes anos mantendo esta iniciativa, pódese dicir, co respaldo de datos claros, que a súa implementación foi todo un éxito e que non só mellora a calidade de vida dos e das interesadas, senón que mellora os seus resultados académicos”. Por todo isto, esperan que a reunión mantida coa Subdirectora Xeral sexa un punto de partida para que os cans entren a moitas máis aulas de Galicia.

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.