Concello e Asociación de Comerciantes e Industrias do Porriño , Acipor, ultimaron os detalles organizativos da vindeira edición do ‘Pinchorriño’, que se celebrará entre os días 1 e 30 de novembro en colaboración coa asociación de hostaleiros Ahospor e no que se espera a participación de preto de 35 establecementos hostaleiros do municipio.
Este evento gastronómico, que xa cumpre a súa decimocuarta edición, organízase para promoción da hostalaría local e como xeito de contribuír a desestacionalización do turismo xa que, como sinalaba o concelleiro de Comercio do Porriño, Sergio Casal, “agardamos que siga a ser un reclamo para visitantes do resto da área metropolitana”.
Como xa é habitual nesta cita gastronómica, a oferta de tapas será os venres e sábados de novembro, entre as 19 h e 23 horas, cun prezo mínimo de consumición de 1,50 euros.
Os clientes que participen recibirán unha papeleta. Por cada catro consumicións seladas nos establecementos participantes poderán concurrir nun sorteo que este ano repartirá catro cheques compra no comercio local por importe de 100 euros cada un. Como novidade nesta edición, tamén se inclúe nos premios “unha cesta de productos que regala El Ultramarino valorada en 150 euros”, informou Noelia Conde, xerente de Acipor.
