O PSdeG-PSOE de Pontevedra cambia a velocidade e entra en campaña electoral para contribuír dende a provincia que é punta de lanza do socialismo en Galicia ao cambio na Xunta o próximo 12 de xullo, levando a Gonzalo Caballero ata a Presidencia dun Goberno galego que debe sumarse ao cambio que xa representan o Goberno de España, a Deputación de Pontevedra e 21 concellos pontevedreses.
O Comité Executivo Provincial celebrou hoxe unha xuntanza telemática, baixo a presidencia do secretario xeral, David Regades, para preparar un intenso mes de actividade no que os e as socialistas estarán en tódolos concellos da provincia para facer ver á cidadanía que o cambio non só é posible, senón necesario. “Seguimos sen estar de acordo con esta convocatoria electoral nun momento no que a Xunta de Galicia debería estar preocupándose pola saúde pública, pero unha vez feita, imos dar o máximo para mobilizar ao electorado progresista da nosa provincia que xa derrotou por cinco veces consecutivas ao Partido Popular”, afirma.
O socialismo pontevedrés está preparado e onte mesmo formalizou a candidatura diante da Xunta Electoral Provincial sen ningún cambio con respecto á lista presentada en abril con Gonzalo Caballero á cabeza. Ao tempo, David Regades, anunciou que estará moi atento na vixiancia das garantías democráticas deste proceso electoral. Neste senso, expresa as súas “enormes dúbidas” polo nomeamento a dedo de 133 “coordinadores”. Unha figura que apareceu, de repente, no protocolo sobre seguridade sanitaria publicado no DOG do pasado sábado e que está en proceso de formación nas Delegacións Territoriais da Xunta. “Quen son esas persoas? Como se escolleron?”, pregúntase Regades.
Centros de Día e Escolas Infantís pechados
A Executiva dos/as socialistas pontevedreses recalcou que hai amplos colectivos cabreados no Ensino, na Saúde e tamén nos servizos asistenciais galegos. Neste eido, indicaron a súa preocupación polo abandono dos Centros de Día e das Escolas Infantís, que permanecen pechadas amosando unha gran insensibilidade cara as persoas máis vulnerables, que precisan de atención e coidados, como son as persoas maiores e os nenos/as. E tamén, unha indiferencia absoluta pola conciliación, o que volve prexudicar gravemente ás familias e, moi especialmente, ás mulleres. “O mantemento do peche dos centros de día nos que persoas dependentes, con deterioros físicos e cognitivos graves, recibían atención é un problemón e a fenda dixital que impide que moitos nenos/as sigan as clases online, tamén”.
O secretario xeral pontevedrés anticipa que no PSdeG-PSOE xa se está a apretar o acelerador fronte a un PP que non quere campaña porque ten moito máis que agochar que amosar. “Imos apoiarnos moito nos nosos alcaldes e alcaldesas e na nosa presidenta da Deputación porque todos eles e elas porque son un valor e un exemplo perfecto de que cando gobernamos nós as cousas funcionan mellor”. “Estou moi orgulloso do que fixeron as nosas Alcaldías durante esta crise sanitaria e social”, explicou Regades, “porque estiveron sempre ao lado da veciñanza, pola mañá e pola noite, e viuse claramente que cando chega unha situación dífícil os/as socialistas damos a talla dende as institucións”. O secretario xeral concluíu que, a día de hoxe, todo o mundo nesta provincia sabe que os concellos son a resposta aos problemas e que a única institución que os apoiou con cartos e con medios foi a Deputación de Pontevedra. “Da Xunta nin un euro e tan só uns poucos paquetes de mascarillas do Goberno de España aos que Feijoo cambiou a pegatina”.
