“Voando nas Rías Baixas”, o programa da Deputación en colaboración con Seo BirdLife, segue a colleitar éxitos de participación tras esgotar en tan só media hora as 25 prazas dispoñibles para a próxima ruta ornitolóxica prevista para o domingo 3 de abril polas ribeiras do río Umia, ao seu paso por Cambados e Ribadumia. Con esta saída, a institución provincial volve a poñer o foco na importancia de contribuír á conservación e posta en valor dos recursos naturais da provincia así como de atraer un turismo sostible.
A ruta percorrerá as ribeiras do río Umia no seu último tramo protexido pola Rede Natura 2000. Esta zona conta con paisaxes moi atractivas para as aves como o bosque da ribeira onde se pode avistar á papuxa das amoras, o pimpín ou o ferreiriño, aves ás que lles gusta as árbores de sombrío. Ademais, o mosaico agrícola que rodea o bosque atrae a outras aves como xílgaros, tordos ou andoriñas. Augas abaixo, o Umia discorre entre xunqueiras e corriceiras onde se poden atopar outras especies como a lavandeira ou o picapeixe e xa na súa desembocadura convértese nun lugar idóneo no que observar aves acuáticas como garzas ou corvos mariños.
As saídas de “Voando nas Rías Baixas” están conducidas por persoal experto de SEO Birdlife, que axudarán as persoas participantes ao recoñecemento das aves. O programa pon á disposición de cada grupo prismáticos de observación e telescopios terrestres de alta gama para poder gozar das aves a distancia sen interferir na súa actividade. Tamén se facilita unha Guía de Aves, así como unha relación de paxaros para que cada integrante do grupo elabore a súa lista.
Trala ruta no Umia, o programa volverá o 8 de maio no Monte Aloia (Tui), o 19 de xuño nas Brañas de Xestoso (Forcarei, Silleda), o 10 de xullo na Serra do Suído (Cerdedo-Cotobade, Covelo, Fornelos, A Lama e Beariz), o 6 de novembro na Enseada de San Simón (Redondela) e, para finalizar, o 18 de decembro na desembocadura do río Lérez o a zona intermareal Combarro-Lourido (Poio, Pontevedra).
