19 C
Pontevedra
Luns, 15 de Xullo de 2024
Máis
    HomeVal MiñorNigránO Concello de Nigrán informa da pronta aprobación provisional do PXOM

    O Concello de Nigrán informa da pronta aprobación provisional do PXOM

    O Concello de Nigrán, tal e como se comprometera, convocou onte o Consello Sectorial do PXOM co fin de informar sobre o estado actual de tramitación do documento, moi preto xa da súa aprobación provisional. A esta cita, tal e como recolle o regulamento deste órgano aprobado polo goberno socialista de Efrén Juanes no 2008, estiveron chamadas a participar 22 entidades deportivas, culturais, veciñais, de montes ou augas do municipio, así como representantes dos diferentes partidos políticos e o Colexio de Aparelladores ou APROIN. O obxectivo non foi outro que informar de man do propio equipo redactor da situación do Plan, con todos os informes sectoriais favorables desde o pasado mes de marzo, cando a Axencia Galega de Infraestruturas deu o visto bo tras 3 anos de traballo. Previamente a esta convocatoria, o goberno local mantivo durante o mes de setembro reunións abertas á participación veciñal en cada parroquia, deixando alí o propio documento, pendurado ademáis na web municipal e dispoñible en Urbanismo (onde se chegou a ampliar o horario para atender consultas polas tardes).

    Esta é a terceira vez que o goberno de Juan González convoca o Consello Sectorial, sendo a derradeira no 2018 para informar da modificación subsidiaria das normas urbanísticas e a primeira no 2015 para amosar á veciñanza o documento do PXOM antes de ser enviado a Patrimonio cos cambios introducidos tras actualizar o catálogo de bens, un dos requirimentos que esixidos. Nos tres casos, o goberno mantivo sempre reunións en cada unha das sete parroquias canalizadas polas propias entidades veciñais.

    “A transparencia é máxima e aí están os feitos que o corroboran, por iso cada veciño de Nigrán sabe perfectamente a situación das súas propiedades no futuro PXOM, ben a través das reunións por parroquias ou cos propios técnicos de Urbanismo, e por iso nos diriximos primeiramente a eles. Agora é o turno do Consello Sectorial, órgano que, precisamente, representa ao conxunto da veciñanza e que vela polos intereses globais do municipio”, explica o alcalde, Juan González, quen tamén acudirá ao Consello Sectorial xunto ao edil de Urbanismo, Diego García, e outros membros do seu equipo de goberno. “É a oportunidade de que fagan preguntas aos propios técnicos responsables. Nas reunións polas parroquias detectáronse algúns erros que se corrixirán e agora estamos de novo abertos á explicar absolutamente todo o que poida xurdir porque o que buscamos é o máximo consenso”, engade González, quen avanza que se modificará o regulamento que rexe ao Consello para que poidan participar entidades con sede no municipio creadas a partir de 2008.

    “Con todos os informes positivos confiamos en que a resposta ao informe de sostibilidade ambiental será favorable e, a partir de aí, poderemos levalo a un Pleno para a súa Aprobación Provisional, pola nosa banda non se demorará nin un día más do preciso. “É unha enorme tranquilidade e unha satisfacción ter rematados todos os ‘deberes’ por parte do Concello. Moi pronto Nigrán contará cun plan urbanístico do século XXI que a maioría dos municipios aínda non teñen”, finaliza.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.