O Concello de Nigrán continúa co seu programa de turismo social destinado á veciñanza da terceira idade cunha excursión o venres 29 de abril á illa de San Simón e comida-baile, todo en Redondela. O custe é de 25 € e cubre transporte, comida e visita guiada. A inscrición realizarase únicamente este mércores 27 de abril no Pavillón Municipal de Panxón de 9:00 a 13:00 horas (cada solicitante pode anotar só a un acompañante e debe levar sendos DNI, resultando imprescindible ser xubilado empadroado en Nigrán). As prazas cubriranse por rigorosa orde de inscrición ata un máximo de 100, así como as reservas dos asentos.
A excursión, con saída ás 10:00 horas en autobús dende a Casa do Concello, inclúe unha visita guiada de dúas horas á illa de San Simón con transporte en barco ás 11:00 horas desde San Adrián de Cobres. Esta illa foi empregada ao longo da súa Historia como mosteiro, lazareto, cárcel e fogar para nenos orfos. A comida, no restaurante Casas, inclúe baile posterior e o menú consta de langostinos, vieiras, pescada, codillo, postre, café, pan e bebidas.
O goberno local de Nigrán entende que viaxar para as persoas maiores despois da inactividade do Covid-19 é especialmente importante. “Non só serve para descubrir lugares novos, senón que aporta moitísimos beneficios especialmente útiles para eles, como a mellora do ánimo, aumento da creatividade, mellora da capacidade de resolver problemas, estimulación da actividade cerebral e reconstituínte da memoria e da atención”.
Nese sentido, o alcalde de Nigrán, Juan González, deixa clara a súa aposta por este programa, “porque a todos estes beneficios hai que engadir que se socializarán e, en definitiva, faraos sentir máis felices e vitais”.
