O Concello de Nigrán retomou esta semana os cursos de envellecemento activo despois das vacacións de verán. En total, participan 170 maiores do municipio (cifra récord) nas diferentes actividades ofrecidas no Centro da Terceira Idade de A Ramallosa e, por vez primeira, tamén no Local Social de Vilameán (rehabilitado polo Concello o ano pasado). Neste curso que comezou en febreiro, aos habituais obradoiros de ‘Vivilo Corpo’ (30 prazas), Informática (40), e Memoria (60) engadíuse un máis para axilizar a memoria en Vilameán (núcleo urbano de Nigrán) con 40 prazas. Todos son para persoas maiores de 65 anos empadroadas na localidade e se desenvolven ata finais de ano co mencionado descanso estival.
Facer exercicio, manter a mente activa e non illarse socialmente son os tres eixos que os especialistas recomendan levar adiante para previr deterioros cognitivos e neles se basan estes obradoiros de envellecemento activo que ofrece o Concello de Nigrán.
O caracter fundamental do programa é preventivo, a súa finalidade é a de garantir unha maior calidade de vida dos nosos maiores tratando de evitar ou atrasar a aparición de problemas de memoria, do deterioro cognitivo, do Alzheimer e doutros problemas de saúde e de incapacidades; pero tamén de mellorar aqueles que se poidan ter na actualidade e de acadar un maior grado de autonomía e independencia. “Apostamos por políticas que garantan a calidade de vida dos maiores, tamén con turismo social, bailes e mesmo o centro especializado en demencias neurodexenerativas en Panxón”, indica o alcalde de Nigrán, Juan González.
