“Repitamos o reto, o mar non é un vertedoiro”. Baixo esta premisa, o Concello de Nigrán lanza de novo o desafío #SanXoanSenLixo2023 motivado polo éxito desde a súa estrea no 2019. Nesta ocasión os padriños da iniciativa son o campión mundial de surf, Goni Zubizarreta; o adestrador do F.C.Barcelona feminino, Jonatan Giráldez (os dous son naturais de Nigrán); o showman vigués Tony Lomba e o mariñeiro e influencer Rogelio Santos Queiruga apadriñan este ano a iniciativa.
O obxectivo é que sexa viral outra vez máis e que o areal amenza completamente limpo grazas ao civismo dos participantes. A campaña de concienciación medioambiental foi presentada esta mañá na praia de Panxón coa presencia do alcalde e concelleiros, representantes de entidades culturais, educativas e deportivas, empresas concesionarias como Aqualia e outros particulares. Un ano máis, o Concello fai un chamamente á participación de persoas e colectivos para que suban unha fotografía ou vídeo a cadansúas redes sociais cun cartel que poña #SanXoanSenLixo2023, etiquetando así mesmo a publicación.
“Esta campaña foi pioneira en Galicia cando a estreamos no 2019, repetimos no 2022 despois da pandemia e o éxito foi absoluto, Nigrán é un exemplo ao respecto. Cremos que a xente, especialmente a mocidade, está cada vez máis comprometida co medio ambiente e sabe que isto inclúe tamén aos océanos, en Nigrán apelamos a esa conciencia e non recurrimos á prohibición. A festa non ten que estar reñida con estes principios, Praia América é un tesouro natural e é responsabilidade de todos preservala”, insiste o alcalde, Juan González, quen incide en que este ano a máxima marea alta será ás 7:45, polo que é especialmente importante depositar o lixo nos contedores instalados para evitar que o mar o leve.
O Concello de Nigrán editou tamén cartelería ao respecto na que se incide en 5 premisas básicas: Non deixes lixo. Recicla. Respecta a protección do sistema dunar. Evita facer buratos, teñen impacto negativo no ecosistema. Recorda que as cabichas contaminan. Súmate a esta campaña medioambiental difundíndoa e concienciando aos teus. Igualmente, pedíu a colaboración de Protección Civil para que, coma o ano pasado, difundan esta mensaxe por megafonía.
“Os servizos de limpeza do Concello van acudir coma sempre, pero do que se trata é de que os participantes tomen conciencia, non debemos esperar a que ninguén recolla o lixo por nos”, subliña.
