O Concello de Nigrán agarda unha noite de San Xoan masiva en Panxón e Praia América ao coincidir na noite de venres para sábado e xa superada a situación de pandemia. Así, tal e como se acordou na Xunta Local de Seguridade, a totalidade da Policía Local participará no dispositivo con algo máis de 30 efectivos (sumaranse doutras localidades en ‘comisión de servicio’) xunto a Guardia Civil e axentes de Tráfico, Seprona, Policía Autonómica, GES e Protección Civil, conformando entre todos máis de 200 persoas. A maiores, como ven sendo habitual, a zona deportiva de Gaifar contará cun hospital de campaña e un Punto Violeta de atención a posibles casos de violencia de xénero e, como cada ano, as dunas quedarán pechadas perimetralmente para impedir o paso e iluminadas para mellorar a vixilancia.
“Traballamos para que a noite transcorra con normalidade, sen incidentes, e que, polo tanto, as fogueiras sexan as auténticas protagonistas da festa máis señeira de Nigrán”, resume o rexedor, Juan González, quen apunta a que se teñen solicitado 74 permisos de cacharelas (todas particulares agás as de Panxón, a da Asociación Cultural Camoesa e outra dunha comunidade de propietarios en Nigrán).
Nesta ocasión, e despois de varios anos, si que se ten consituído comisión de festas, polo que haberá actuacións musicais e atraccións desde o propio venres e ata o domingo. Así, o venres terá lugar a actuación do Grupo América S.L. e Metrópolis; o sábado a banda de cornetas e tambores da Brilat ofrecerá un concerto ás 19:00 horas e a verbena será a cargo de Conexión e La Banda de Ayer. Xa o domingo 25, último día, haberá concerto ao mediodía da Unión Musical de Vincios e pola noite de La Oca Band con gran tirada de fogos de artificio. O Concello, a través do programa ‘Música nas Parroquias’ da Liña 2 do Plan Concellos da Deputación achegará 4.000 € para colaborar neste apartado.
