O Concello de Nigrán continúa co seu clásico ‘Outono de teatro’ este sábado ás 20:00 horas no Auditorio Municipal coa obra ‘Un vals para Cincinnati’, da compañía de Nigrán Teatro do Ar, responsable ademáis de impartir esta actividade municipal. A función, con entrada de balde ata completarse o aforo, encádrase no convenio entre o Concello e a Federación Galega de Teatro Afeccionado.
Esta peza resultou mención destacada nos Premios Buero Vallejo de Teatro Joven e está escrita polo seu director, Pedro Rodríguez. Ana leva pechada na súa habitación desde que se foi Jack hai 1 ano e 27 días. Deixouna pola guerra, e ela viuno marchar apoiada na xanela. Con el ían os seus soños de escapar ao idílico Cincinnati e casar o día de entroido. Farta de agardar, Ana decide suicidarse xusto o día no que Jack volve.
O ciclo de teatro continúa o sábado 14 de Outubro cun microteatro con tres pezas. A primeira delas ‘A Capoeira’, de Teatro Escoitade; a segunda de Teatro de Cámara Ditea, ‘Tránsito’; e a derradeira, de Farándula Velutina Teatro, ‘Punta tacón’.
O sábado 21 a compañía viguesa Porta Aberta presenta a comedia ‘Munuwa’. Un profesor de mediana idade, Darío, canso da vida rutinaria que levaba mantendo á súa ex-muller (Lola), aturando os caprichos do seu fillo adolescente e as bulras do seu mellor amigo (Guzmán), toma a decisión de mudar radicalemente de vida e irse ao outro lado do mundo. Para prepararse introduce nos seus hábitos costumes oceánicas munúwas, que comparte cos seus. Esta é unha obra tremendamente representativa do hastío no que viven determinadas persoas. Nunca quixestes dar un xiro radical ás vosas vidas? Pois mirade o que lle sucede a Darío cando quere dar o paso.
O ciclo teatral de Outubro remata o sábado 28 con ‘Nadal na casa dos Lamelo’ a cargo da compañía luguesa Achádego Teatro. Trátase dunha farsa en tres actos que afonda nas relacións humanas e xoga cos típicos conflitos familiares. É unha comedia case dramática. Unha reflexión divertida e profunda sobre a importancia da familia, en calquera das súas formas.
