16.6 C
Pontevedra
Venres, 14 de Xuño de 2024
Máis
    HomeVal MiñorBaionaMaiores e persoas con discapacidade navegan con «Amar o mar»

    Maiores e persoas con discapacidade navegan con «Amar o mar»

    Case que cen participantes achéganse ao mundo do mar nunha iniciativa que promove, por cuarto ano, o Monte Real Club de Iates

    Preto dun centenar de participantes no programa Amar o mar déronse cita onte mércores e esta mesma mañá en Baiona para gozar dunha iniciativa coa que a Consellería de Política Social e o Monte Real Club de Iates tratan de achegar o mar a persoas maiores e con discapacidade.

    Nesta cuarta edición do Amar o mar foron en total 96 participantes, entre usuarios e monitores dos centros, os que puideron gozar dunha xornada lúdica e recreativa. O grupo que participou nestas dúas xornadas de programa estivo conformado por persoas maiores das residencias Nosa Señora dos Milagres de Barbadás, en Ourense, e As Gándaras, en Lugo, e do Centro de Atención a Persoas con Discapacidade de Redondela (CAPD), que se enmarca tamén no programa anual da Escola de Vela Adaptada do MRCYB. O certo é que algúns dos alumnos do CAPD que participaron nesta iniciativa xa realizaran cursos de vela anteriormente no club baionés.

    A actividade, que nacía en 2016 co obxectivo de axudar aos usuarios de residencias públicas do interior de Galicia a manter o nivel adecuado de benestar social e persoal, volveu a ter unha gran acollida este ano e hoxe contou co apoio e a presenza de José Ignacio Martínez, xefe de Servizo de Dependencia e Autonomía persoal da Xunta; Concepción Vara, concelleira de Servizos Sociais, Mobilidade e Accesibilidade do Concello de Baiona, e Óscar Martínez, tenente de alcalde de Baiona. Os tres estiveron acompañados polo presidente e vicepresidente do club, José Luis Álvarez e Alejandro Retolaza.

    Tras a visita polas instalacións do club baionés, cara ás 12:30 horas os participantes do Amar o mar dirixíronse aos pantaláns para embarcar e saír a navegar pola baía ata as proximidades das illas Cíes, achegándose así ao mundo náutico en contacto directo co mar. O programa incluíu, ademais, unha comida a bordo antes de regresar a terra.

    Con esta iniciativa o Monte Real reafirma o seu compromiso coa loita pola integración social. Desde hai anos o club colabora coa administración en programas como o que se levou hoxe a cabo e conta, ademais, co seu propio programa de cursos da Escola de Vela Adaptada, destinada a ofrecer a posibilidade de gozar da vela a persoas con diversidade funcional de diferentes asociacións de Galicia.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.