Un total de 120 nenas e nenos con idades comprendidas entre os 4 e 12 anos de idades participan, ao longo do mes de agosto, nos Campamentos Urbanos organizados pola Concellería de Xuventude do Concello de Redondela que xestiona Nacho González. Os campamentos, que comezaban a súa andaina o pasado luns 5 de agosto, inician este luns 12 de agosto a súa segunda quenda.
A iniciativa, que se desenvolve na Alameda de Redondela –no multiúsos da Xunqueira en caso de choiva– busca ofrecer ás e aos participantes un espazo onde interrelacionarse na época de vacacións ao mesmo tempo que desenvolven actividades lúdico educativas.
Os campamentos de verán, sinala o concelleiro de Mocidade, Nacho González, “son unha boa ocasión para que nenas e nenos fagan novas amizades e afonden, a través de actividades divertidas e, ao mesmo tempo, didácticas, en conceptos como o compañeirismo, a solidariedade e o traballo en equipo”.
As quendas, de 30 participantes en cada unha delas, desenvolveranse de luns a venres en horario de 9 h a 14 horas.
Unha vez rematada esta segunda quenda o vindeiro venres 16 de agosto, as seguintes realizaránse na semana do 19 ao 23 e do 26 ao 30 de agosto.
As persoas interesadas poden consultar a listaxe de nenas e nenos admitidos na páxina web do Concello de Redondela –www.redondela.gal– ou directamente nesta ligazón.