A Asociación de Empresarios de Redondela e o Concello de Redondela xunto a todos os centro educativos do municipio, colaboraron nunha singular iniciativa de decoración e ambientación de Nadal. Un total de 19 renos foron decorados polos centros escolares seguindo distintos estilos pictóricos e expresións artísticas. Unha vez preparados, agora tomarán as prazas e rúas de Redondela.
A asociación de Empresarios de Redondela, de cara a darlle unha maior difusión á iniciativa, convida a todos e todas a fotografiarse cos renos e compartir as fotos nas redes sociais.
Un comercio local máis sustentable
Doutra banda, salientar que o Concello de Redondela colabora coa campaña de Nadal da Asociación de Empresarios a través do convenio de colaboración para a distribución de bolsas entre o comercio da localidade. Esta actividade supón unha contribución á mellora do medio ambiente en tanto as bolsas están realizadas en papel reciclado e a impresión foi realizada con tintas de base acuosa inocuos para o medio ambiente.
Todo isto supón tamén unha clara axuda de cara o cumprimento do establecido no Real Decreto 293/2018, de 18 de maio, sobre redución do consumo de bolsas de plástico. As bolsas teñen impreso o logo do Nadal creado pola Asociación de Empresarios de Redondela que está presente en todo o material gráfico da campaña.
Por último, Asociación de Empresarios e Concello puxeron en marcha distintas actividades na praza de abastos de Redondela decorada con motivos de Nadal. Así, un pequeno espazo comercial es desuso foi ambientado para recibir a visita de Papá Noel que estivo cos nenos e nenas durante a mañá deste sábado.
