17.6 C
Pontevedra
Luns, 17 de Xuño de 2024
Máis
    HomeO CondadoPonteareasUn accidente entre dous camións e un coche sáldase sen feridos en...

    Un accidente entre dous camións e un coche sáldase sen feridos en Ponteareas

    Debido ao impacto, a un dos camións rompeulle o depósito de combustible, quedando espallado por todo o viaducto.

    Faltaban dez minutos para as dez desta mañá cando un dos camioneiros implicados, camión de penso, contactou co 112 para informar de que acababa de ter un accidente na A-52, no punto quilométrico 295, en Moreira, na localidade pontevedresa de Ponteareas. Tamén, a esa hora, o condutor do outro camión implicado (que transportaba cartón), informaba do mesmo accidente ao 112.

    A partir de aí, os xestores de emerxencias pasaron aviso decontado aos axentes de Tráfico, á Policía Local e a Protección Civil. Así mesmo, informouse da situación ao persoal de mantemento da autovía, quen, de inmediato, solicitou a colaboración dos GES-SPEIS de Ponteareas por mor da cantidade de combustible que quedou derramado pola estrada debido ao impacto.

    Unha vez no punto, os Bombeiros confirmaron a extensión da mancha de combustible nunha ponte sobre o río Tea, polo que, tamén foi avisado o persoal da Confederación Hidrográfica do río Miño-Sil, co fin de colocar barreiras de anticontaminación e evitar que a vertedura chegue ao río.

    Polo momento, os servizos de emerxencia confirmaron o corte do carril afectado pola vertedura mentres duren as tarefas de limpeza da vía.

    Un ferido en Ponteareas

    Por outra banda, tamén en Ponteareas, un varón de avanzada idade, resultou ferido esta mañá tras chocar contra un poste de alumeado despois de saírse da vía.

    O accidente ocorreu sobre as 09:50 horas, en Xinzo, cando circulaba pola N-120, á altura do cruce da Igrexa.

    Nada máis recibir a chamada dun particular, o 112 Galicia informou do suceso ao Servizo de Urxencias Sanitarias de Galicia-061, que se encargou da evacuación do ferido, á Garda Civil de Tráfico, á Policía Local e a Protección Civil. De igual xeito, foron avisados os Bombeiros da localidade e o persoal do servizo de mantemento da estrada e ao da empresa subministradora da luz que abastece a zona, posto que, debido ao impacto, o poste partiu quedando o cabreado espallado pola estrada.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.