A acampada scout a partir das 17 horas para todos e todas as maiores de once anos e o serán a partir das 21 horas, abrirán o programa de actividades programadas para celebrar a romaría da Picaraña. O concello de Ponteareas convida a toda a veciñanza a participar nas actividades do vindeiro día 1 de maio na que se volverá vivir unha nova edición da romaría popular, unha das celebracións que contan cunha maior participación de veciños e veciñas de todas as idades.
Dende as parroquias de Arcos, Bugarín, Canedo e Prado subirán unidos como romeiros os veciños e veciñas para chegar á Picaraña.
Dado que son moitos os mozos e mozas que, dende sempre, acampan xa dende a noite anterior á celebración da festa (noite do 30 de abril ao 1 de maio), a Oficina Municipal de Información Xuvenil (OMIX), do Concello de Ponteareas, dependente da Concellería de Mocidade que xestiona Verónica Carrera, quere lembrarlles que, segundo a lexislación vixente, a acampada libre esta prohibida.
Para poder acampar sen ningún tipo de impedimento, os interesados e interesadas, poderán facelo de xeito totalmente gratuíto nos terreos do albergue xuvenil de A Picaraña, propiedade do Concello de Ponteareas. Para isto, só terán que se inscribir na oficina da OMIX, na Biblioteca Municipal de Ponteareas, na rúa A Perillana.
Nesta actividade transversal organizada por distintas concellerías colaboran as comunidades de montes veciñais en man común de Arcos, Ponteareas e Prado, as asociacións veciñais de Arcos e Canedo, os centros culturais de Arcos, Bugarín e Prado, o grupo scout BosqueTea e os Caminhantes do Condado.
A concellería de Cultura e Turismo, dirixida por Hortensia Bautista, convida “a ir vestido de romeiro e romeira do século XIX con instrumentos musicais para facer festa”, unha celebración que comeza xa o 30 de abril co II Serán, continuando con xogos tradicionais, actividades deportivas, mercado agro-ecolóxico e xantar popular que completan a oferta de lecer do día 1 de maio na Picaraña.
