O Partido Socialista de Ponteareas amosou a súa satisfacción pola aprobación provisional do PXOM que tivo lugar onte na sesión plenaria celebrada na Casa Consistorial ás 19:00 h, onde os socialistas deron o seu voto a favor. Este documento, sinala o PSdeG-PSOE “permite deixar atrás a nefasta política urbanística levada a cabo polo PP durante décadas”.
Segundo o PSOE Ponteareas, a política urbanística que se abandona coa aprobación do PXOM estaba centrada “na especulación, nos ‘pelotazos urbanísticos’ e nas recalificacións de terreos por intereses propios e espurios”.
Para o PSdG-PSOE a aprobación do PXOM é un factor clave para Ponteareas que posibilitará “que empresas da nosa vila poidan legalizar definitivamente a súa situación irregular e que poidan ampliar os seus negocios con seguridade xurídica” e do mesmo xeito, “favorecerá o asentamento de novas industrias e empresas na nosa vila”.
Todo isto –sinalan os socialistas ponteareáns– traducirase na creación de máis postos de traballo, “sendo Ponteareas unha das vilas máis castigadas de Galicia en paro xuvenil e feminino”. Do mesmo xeito, permitirá a creación dunha nova depuradora municipal, “co que o saneamento integral do río Tea, unha cuestión clave para o Partido Socialista, está máis próxima, e tamén permite a creación de novas infraestruturas necesarias para Ponteareas, como novos aparcadoiros humanizados ou unha nova Escola Infantil”.
O PSdG-PSOE, do mesmo xeito, cualificou á oposición feita por PP e ACIP como “tóxica” para os intereses da vila e para a mellora das condicións de vida dos veciños e veciñas. Para os socialistas, Ponteareas “non se merece unha oposición que vote en contra de medidas coma esta que favorezan a creación de emprego por intereses persoais e de partido”.
O Partido Socialista lamenta profundamente e de maneira especial o voto en contra do Partido Popular. A única razón pola que este partido non apoiou o PXOM foi estar na oposición, “esquecéndose dos intereses dos veciños”.
O PP –afirma o PSOE– “mostrou unha postura do «non polo non» irresponsable e ineficaz. Lamentamos a loita de poder na dereita de Ponteareas por ver quen se converte en «líder da oposición», se Villar ou Carrera, e que por esta cuestión a portavoz popular primase non votar a favor do Plan Xeral en consonancia co goberno en vez de velar polos intereses reais dos veciños e veciñas”.
Do mesmo xeito, o PSdG-PSOE lamentou tamén o voto en contra de ACIP. Os socialistas son conscientes de que este partido, “herdeiro da UCPA do exalcalde José Castro”, non quixo votar este PXOM porque non se trataba de ningún «pelotazo urbanístico», e porque non puideron recalificar terreos para os seus intereses persoais”.
“Esta postura entra en relación directa coa idea de González Carrera de solicitar ao pleno municipal que Ponteareas deixe de estar adherida a APLU, a Axencia de Protección da Legalidade Urbanística da Xunta de Galicia”, conclúe o PSdG-PSOE de Ponteareas.