8.3 C
Pontevedra
Xoves, 28 de Marzo de 2024
Máis
    HomeO CondadoPonteareasNin saneamento, nin abastecemento, nin escola infantil

    Nin saneamento, nin abastecemento, nin escola infantil

    Os orzamentos da Xunta de Galicia deixan a Ponteareas sen investimentos para necesidades básicas do municipio

    A Corporación do Concello de Ponteareas, por iniciativa do Goberno local, aprobou por unanimidade instar á Xunta de Galicia e ao Parlamento Galego a atender as demandas prioritarias de Ponteareas, moitas delas reclamadas dende hai anos, contemplando nos seus orzamentos para 2020 as partidas económicas precisas para servizos tan básicos como abastecementos e saneamentos.

    Entre esas necesidades básicas salienta tamén o Goberno local o da nova escola infantil, investimentos en centros educativos, apoio ao conservatorio municipal de música, mellora de seguridade viaria, a mellora da Ponte dos Remedios e a contorna da praia fluvial da Freixa ou a creación dun centro de encontro familiar, ademais da renovación da residencia de maiores así como a dotación dunha segunda ambulancia ás 24 horas para toda a comarca.

    Na explicación de motivos da moción aprobada, o alcalde Xosé Represas lamentou que a Xunta se esqueza das necesidades dos e das ponteareás, “necesidades que son unha obriga da Xunta de Galicia por tratarse de investimentos e actuacións que son da súa competencia”.

    Entre estas necesidades básicas que Ponteareas reclama que figuren nos orzamentos da Xunta para 2020 están a ampliación da rede de abstecemento de auga en San Mateo e Moreira e a primeira fase do colector xeral de saneamento de Ribadetea en base ao proxecto que está redactando Augas de Galicia.

    O representante da Plataforma Veciñal de Ribadetea tomou a palabra no Pleno para subliñar o feito de que unha das parroquias máis poboadas do municipio, careza de saneamento

    No pleno ordinario de outubro o alcalde deu a palabra a un representante da plataforma veciñal de Ribadetea que salientou a importancia de que as administracións sexan proactivas e cumpran os compromisos adquiridos sen a necesidade de que a veciñanza teña que exercer unha presión contínua, ademais quixo trasladarlle tanto ás autoridades presentes como á Xunta “o malestar da veciñanza de Ribadetea ao ser esquecida e non ter este servizo básico a pesar de ser unha das máis poboadas do concello”.

    A Xunta tamén debería prever, segundo adianta o goberno, a primeira anualidade para cofinanciar coa Confederación Hidrográfica e co concello as obras de mellora de saneamento e ampliación da EDAR en base ao proxecto xa redactado pola propia Confederación tendo en conta que estas obras foron declaradas de interese xeral do Estado.

    O goberno recórdalle a Xunta a necesidade de construir unha nova escola infantil, a primeira que a Xunta faría en Ponteareas tendo en conta que cada curso perto dun cento de nenos e nenas quedan sen praza na actual escola municipal. Unha escola infantil municipal que, por certo, o Goberno de González Solla anunciaba “de inminente construción”.

    A mellora da eficiencia enerxética e reforma do CEIP Fermín Bouza Brey así como distintas obras noutros CEIPs e institutos tampouco serán posibles se a Xunta non contempla nos seus orzamentos unha partida.

    Outras das demandas é a construción de sendas peonís e ciclistas en determinados tramos das estradas autonómicas Ponteareas-Salvaterra, Mondariz-Ponteareas, na PO-252 de Prado a Pazos de Borbén e na estrada PO-402 Vilasobroso-Salvaterra.

    No mesmo sentido a necesaria mellora da residencia municipal de maiores e as actuacións na praia da Freixa e na Ponte dos Remedios.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.