17.3 C
Pontevedra
Sábado, 18 de Maio de 2024
Máis
    HomeComarcasA ParadantaA Deputación concede subvencións para actividades de Lingua a Tomiño e Oia...

    A Deputación concede subvencións para actividades de Lingua a Tomiño e Oia no Baixo Miño e a Ponteareas, Mondariz, A Cañiza e Covelo no Condado-Paradanta

    A deputada de Lingua María Ortega sinalou que destináronse á conmemoración das Letras galegas, á homenaxe a Rosalía e a actividades diversas

    A Deputación de Pontevedra vén de aprobar as subvencións do Departamento de Lingua aos concellos de Tomiño e Oia no Baixo Miño e Ponteareas, Mondariz, Cañiza e Covelo no Condado-Paradanta. A deputada responsable da área, María Ortega, subliñou que as axudas entregáronse a un total de 23 concellos da provincia en réxime de concorrencia competitiva co obxectivo de “dar prestixio ao galego”, tendo unha partida inicial de 100.000 euros.

    O Concello de Tomiño destinou a súa subvención de 4.482 euros á conmemoración do día das letras galegas coa convocatoria do ’Concurso de deseño da camiseta do día das Letras Galegas 2020’. Un deseño en cor vermello coa cara da poeta e escritora galega Rosalía de Castro, rodeada dos nomes das parroquias de Tomiño, e co lema ‘Únete á resistencia’, en alusión á loita pola supervivencia do idioma galego, fíxose co galardón.

    No Concello de Oia a subvención e 5.000 euros destinouse á edición do libro “Historia da banda de música Unión Musical de Mougás”, proxecto que buscaba recompilar toda a historia da banda de música e recuperar e impedir que se perda o patrimonio inmaterial oral e, deste xeito o recordo dos e das máis maiores, transmisores importantes da cultura, coñecementos, historias, e anécdotas  quede gravado.

    Pola súa banda, o Concello de Ponteareas realizou unha homenaxe a Rosalía no seu traballo de potenciar a lingua galega, tanto literaria como audiovisual, e fomentar o coñecemento da figura de Rosalía de Castro entre toda a poboación. Puxéronse en marcha varias iniciativas como a convocatoria do Concurso de Poemas Ilustrados e de Vídeos “Día de Rosalía de Castro”, o recital poético da obra da autora ou un concerto de música. Por estas actividades o concello recibiu 3.098 euros.

    No caso de Mondariz, púxose en marcha o programa ‘Mondariz coa lingua’ co obxectivo principal de promocionar e incrementar o uso da lingua galega mediante a programación, elaboración e posta en marcha de actividades culturais e integradoras dirixidas á veciñanza a través de actuacións teatrais, para o que se desetinaron 2.635 euros.

    O concello de A Cañiza recibiu 312 euros para o Concurso de debuxo ou caricatura de Ricardo Carvalho Calero. A actividade, que estivo dirixida a crianzas e mocidade de 3 a 17 anos foi moi sinxela e contou cunha alta participación. Consistiu en realizar un debuxo ou unha caricatura, tanto do propio autor ferrolán como dalgunha das súas obras. Moitas e moitos rapazas e rapaces acompañaron os seus debuxos con algún fragmento dos seus libros.

    Finalmente, o Concello de Covelo puxo en marcha ‘Parroquia a parroquia’, un proxeto que pretende poñer en valor a microtoponimia do seu amplo territorio municipal de 154, 63 km cuadrados, dividido en 14 parroquias, a través doutras tantas publicacións multimedia, nos formatos de libro e de audiovisual. Este proxecto foi precedido do traballo de campo (recollida e sistematización) da toponimia de distintas parroquias do municipio realizado polo historiador e investigador Alberte Reboreda, en colaboración co proxecto da Real Academia Galega da Lingua ‘Galicia Nomeada’. Recibiu 4.350 euros.

    Para a concesión das subvencións, dende a Deputación valoráronse as accións de fomento da creación e difusión cultural en lingua galega (certames literarios e xornalísticos, creación audiovisual e literaria, feiras e eventos que promovan a creación en lingua galega), as actuacións en materia de sociolingüística e toponimia (estudos e publicacións sobre sociolingüística, xornadas e publicacións de recuperación da toponimia… ), o fomento do emprego do galego no comercio e na industria con xornadas, campañas e publicacións para a dinamización comercial en lingua galega, ou os recoñecementos e distincións, en relación a actividades, accións e publicacións relacionadas coa conmemoración do Día das Letras Galegas ou que recoñezan o labor de persoas ou colectivos que aposten polo galego.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.