A Deputación de Pontevedra fixo entrega hoxe ao Concello de Mos do grupo escultórico sobre emigración, realizado polo alumnado da Escola de Cantería, que se exhibirá de forma permanente na rotonda de Peinador do municipio mosense. Trátase de dúas esculturas, que xa se desfrutaron na exposición pública provincial ‘Nado en Pedra’, e que foron escollidas polo concello para embelecer e dar significado ao citado espazo público.
Trátase das pezas ‘Home de pé co seu fillo’ e ‘Maleta’, elaboradas en granito silvestre galego polos alumnos José Luis Fernández Ferradáns e Álvaro Somoza López respectivamente. A primeira é unha escultura de 1,85 metros de altura na que se representa a un home que rodea cun dos seus brazos agarimosamente ao seu fillo, mentres que ‘Maleta’ está baseada na representación da equipaxe tan característica da emigración. A Deputación de Pontevedra e o Concello de Mos asinaron un convenio polo que estas pezas, que poñen en valor o traballo de temática figurativa, poderán ficar na rotonda de Peinador.
‘Nado en Pedra’, a exposición da que formaron parte as pezas, foi unha mostra composta por 17 obras de gran tamaño, elaboradas polo alumnado da Escola de Cantería, que teñen como temática central a figura humana. Esta mostra percorreu a provincia de Pontevedra co fin de reivindicar o oficio de canteira e canteiro e de poñer en valor os traballos realizados polo alumnado da Escola de Cantería. O goberno provincial propuxo aos concellos a doazón das pezas e, como no caso de Mos, moitos deles, recollerán esculturas para ornamentar prazas e rúas dos seus municipios