A alcaldesa de Mos, Nidia Arévalo, xunto co Presidente da Comunidade de Montes de Torroso, Camilo Grandal, a concelleira de Educación, Julia Loureiro, a concelleira de Cultura, Sara Cebreiro, e o edil da parroquia de Torroso, Alberto Méndez; visitou esta tarde a Escola de Música de Mos e o Conservatorio Profesional de Música de Torroso, sitos no Centro Dotacional de Torroso, con motivo do comezo do novo curso 2020/2021 que hoxe se inicia “con ilusión e afrontándoo con todas as medidas de seguridade protocolarias ante a COVID-19” segundo declaran desde a directiva do Centro Cultural Recreativo de Torroso.
Pola súa banda a rexedora local mosense quixo expresar “a miña gratitude como alcaldesa, admiración e respecto a todo o equipo humano que traballa na Escola de Música de Mos e no Conservatorio Profesional para ter un icono da música en Mos, concretamente no Centro Dotacional de Torroso”.
O curso musical comeza en Torroso ademais con máis alumnos que o ano pasado, 510 en total, 442 da Escola e 68 do Conservatorio. Mentres que no curso 2019-2020 houbo matriculados un total de 501: 487 na Escola de Música e 14 no Conservatorio Profesional.
Ademais o presente curso comeza cunha importante novidade, consistente en que este ano implántase 5º de Conservatorio con 10 alumnos/as matriculados/as. E ademais, por outra banda, no caso dos máis pequenos da Escola, o curso de ‘Pasiños 1’, conta nesta ocasión con 13 alumnos/as matriculados/as novos/as; trátanse de nenos e nenas de 4 anos de idade, nacidos en 2016.
Neste senso destacar que a directiva do Centro Cultural Recreativo de Torroso inverteu en medidas de protección para garantir a saúde e o benestar dos máis 500 alumnos con que contan.
O Centro dispón de dispensadores automáticos, alfombras desinfectantes con zona de secado, mesas individuais para o alumnado, sinalización de entradas e saídas, produtos de desinfección en todas as aulas, equipos de ventilación, mamparas de protección para as aulas onde se imparten as especialidades de vento, contedores con tapa para todas as aulas, carteis informativos e contratación dunha persoa para axudar ó alumnado na entrada e saída das aulas.
Así mesmo a dirección do Centro pide a colaboración e responsabilidade dos pais e nais para que todo funcione dacordo as normas establecidas e segundo o protocolo.
A dirección quere recordar que toda a información do Centro, Escola de Música e o Conservatorio faise a través da aplicación Whastapp para que chegue máis rápido a todos e todas aportando así a nosa axuda o medio ambiente evitando gastos de papel, por iso a dirección roga a todos os socios que non estean recibindo dita información se poñan en contacto co Centro.
Destacar tamén que o Centro conta cun protocolo de actuación no caso de detección dalgún caso positivo ou sospeitoso, seguindo as instrucións da Xunta de Galicia para centros de ensino, o que suporá unha pronta intervención. Durante a pasada fin de semana un gran equipo humano estivo limpando e desinfectando o Centro Dotacional do Medio Rural de Torroso polo que quixeron agradecer todo o esforzo realizado.
O pasado mes de xullo asinábase o convenio anual de colaboración entre o Concello de Mos e o Centro Recreativo e Cultural de Torroso para o funcionamento da Escola de Música de Mos (sita no Centro Dotacional do Medio Rural de Torroso) durante o ano 2019, que implica unha subvención municipal ó Centro como xestor da Escola de 45.000 euros. O importe da axuda establécese en función do número de alumnos da Escola, en concreto a contía anual concedida é a que corresponde ao superar os 140 alumnos/as matriculados/as. Actualmente o número de alumnos da Escola de Música de Mos ascende a 510.
O obxectivo desta subvención de carácter nominativo a favor do Centro Recreativo e Cultural de Torroso para o funcionamento da Escola de Música que leva a cabo dita entidade é o de proporcionar formación musical á cidadanía mosense, así como fomentar entre a mesma a difusión da cultura musical, tan rica no Concello de Mos.
A Escola de Música de Mos é tamén Conservatorio e conta, dende o ano 2003, coa súa propia Banda Orquestra Sinfónica Escola de Música de Mos B.O.S.E.M.M.
