12.9 C
Pontevedra
Mércores, 22 de Maio de 2024
Máis
    HomeBaixo MiñoTuiA foto de Aroa Pérez Cabaleiro do IES Indalecio Pérez Tizón de...

    A foto de Aroa Pérez Cabaleiro do IES Indalecio Pérez Tizón de Tui, entre as mellores do concurso ‘Pegadas do mar e da terra’

    Onte falláronse os premios entre 80 estudantes de ESO e Bacharelato e os galardóns entregaranse este sábado

    O Museo de Pontevedra resolveu onte o concurso fotográfico xuvenil dirixido a mozas e mozos de ESO ou Bacharelato ‘Pegadas do mar e da terra’, baseado na exposición de José Suárez. A participación foi todo un éxito xa que inscribíronse un total de 80 estudantes procedentes de 14 centros (13 da provincia de Pontevedra e 1 de Lugo), concretamente de Catoira, Marín, Cangas, Soutomaior, Sanxenxo, Vilaboa, A Estrada, Vilagarcía, Pontevedra, Bueu, Vigo e Tui.

    O xurado estivo formado por técnicos dos departamentos de Educación, Comunicación e Arquivo gráfico do Museo que decidiron, debido a alta participación rexistrada na categoría destinada a estudantes de ESO e a calidade das imaxes presentadas, entregar outro premio nesa categoría en vez de un só, como estaba estipulado nas bases.

    Os premios do certame recaeron na sección de Bacharelato para Aroa Pérez Cabaleiro, do IES Indalecio Pérez Tizón (Tui), pola fotografía ‘Alimentando na ribeira’; e na sección da ESO (apartado Mar) en Cecilia González Padín, do IES Sanxenxo, pola imaxe ‘Redes viuvas’, e no apartado Terra en Evelyn Freiría Conde, do CPI Progreso (Catoira), por ‘A estreita relación entre as persoas e os animais’, e en Daniela González Isorna, do CPI Progreso (Catoira), por ‘Presente atemporal’.

    Todas as fotografías participantes exporanse desde mañá nunha pantalla no edificio Castelao e tamén na páxina web do museo. Os agasallos –que se entregarán este sábado nun acto co director do Museo Xosé Manuel Rey- consistirán en cámaras fotográficas Canon IXUS 185 e Fuji Intax Mini 11.

    Hai que lembrar que este certame fotográfico xurdiu como unha actividade complementaria á mostra ‘José Suárez 1902-1974’, un creador que inmortalizou coa súa cámara o traballo das galegas e galegos e as súas pegadas no mar e na terra. Por iso como homenaxe a el, as fotografías presentadas no concurso debían ser en branco e negro e xirar en torno a unha desas dúas temáticas, onde os obxectos e as xentes vencelladas a estes labores tradicionais sexan os verdadeiros protagonistas: aparellos de pesca, marisqueo ou de labranza, pezas de olería, embarcacións tradicionais, etc.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.